تخاريف 6

ماذا لو

تخلص العالم من النساء ؟؟؟؟

 سؤال بيلح على من فترة  وبدأ يزداد فى الفترة الأخيرة بشكل كبير ، وحاليا وصل لذروته جدا جدا جدا جدا

فى البداية وعلشان عارف إن فى ناس كتير هتفضل تقول لى إنت ظالمهم ، وماينفعش كلامك ده ، ومش كلهن ، والكلام البايت اللى مالوش عازة على رأى واحد أعرفه ، أحب أقول له إن انا فى 80 % من تعاملاتى كانت مع الستات .

فى البيت ، فى المحل بتاع البقالة القديم ، فى المعرض  ، فى النوادى ، فى الشركة ، فى التدوين ، فى الصيدلية ، فى تويتر ، فى الفيس ، حتى فى الميدان ، يعنى عاشرتهم وعرفتهم على كل شكل وملة ولون وعقلية وأى حاجة حد يفكر فيها للمقارنة .

وبأقولها وبكل قوة ، كفاااااااااااااااااااااية ارحمونى ، ويا إما تسيبوا البلد وترحلوا يا إما ترحلونى أنا منها على أى مكان مفيش فيه ستات إطلاقا ، وعلى رأى العيال الثوار اللى خربوا البلد خنقتوووووووووووووووووووونا

نعم ؟ فى محترم قاعد فى الصف اللى على الشمال بيغمغم ، ممكن أعرف بتقول إيه بصوت واضح ؟؟؟؟

نعم يا روح طنط ، فى دليلى

فاكرنى هأعمل زى الأفلام الهندى واقلع لك هدومى وأفرجك على الكرابيج اللى بيضربونى بيها مثلا

ولا أقول لك أنا هأحترم برضه وجود حد بعقليتك معانا هنا وبما إن القافلة تسير بقدر احتمال أضعفها هأقول لك كمثال فى السريع كده

سنة 2002 كنت مسافر الغردقة ورفضت آخد حد معايا قلت للكل أجازة ومصيف ومش عايز حد يقرفنى

وعنها وبدأت الحرب و ( س ) من السيدات لفت لتخليها أجازة نحس على

وانتظرت لحد ما وصلت الغردقة وقعدت الكام يوم بتوعى وانا راجع ويا دوب ركبت الأتوبيس ونمت

ودى اتصلت بحد من القريبين منى وبتسأله صحيح الخبر اللى سمعناه ده ؟؟؟؟

خبر إيه ؟؟؟؟

إن الأزهرى عمل حادثة وهو راجع ونقلوه المستشفى وفارق الحياة

وطبعا مع الكثير من النهنهة والشحتفة والعياط والصويت والذى منه

وعنها وهو اتصل يطمن من حدا تانى والخخد  التانى اتصل بحد تالت

وانتشر الخبر والجيزة كلها اتقلبت وقتها

وطبعا أنا فى الغيبوبة لإن مفيش طريقة حد يوصل لى بيها نهائى لحد ما أنزل القاهرة أو الجيزة

وحتى بعض المقربين منى اتصلوا بالبيت عندنا وبيسألوا انافين فيقولوا لهم دا مسافر وراجع بكرة

وطبعا مفيش حد عايز يبقى هو اللى نقل الخبر السيء ناهيكم عن إنه مش متأكد أساسا

وفضلت الدنيا تغلى ويتصلوا بستشفيات الطريق والبوليس وكانت كارثة

لحد ما وصلت بيت خالى فى الجيزة وعرفت من أولاده الموضوع   وبدأنا نتصل نطمن الناس

سيبك بقى من عملت إيه بعدها  لحد ما وصلت لها ولا حتى انتقامى منها

وكان ف موقف تانى بأعيشه حاليا عبارة عن مأساة حقيقية

تخيل لما حد يوطك إنك تشتغل جليسة أطفال لحد عنده 22 سنة

سيبك منه علشان وأنا باكتب دخلت على بنت أمورة ومعاها جوزها وطفلتها وانا باكتب التدوينة دى

وعايزو علاج للكحة لبنتها

طيب يا ستى معاها بلغم او برد ؟؟؟؟

آه معاها

لأ مش معاها

يعنى معاها ولا مش معاها ؟؟؟؟

مش عارفة

طيب يا ست الكل

وهى بتكح بتحسى غن صدرها تقيل مثلا او حاجة غريبة فى كحتها ؟؟؟؟

أيوه فى

لأ مفيش

يعنى فى ولا مفيش ؟؟؟؟

مش عارفة

طيب هى أسنانها بدأت تطلع ولا لأ ؟؟؟؟

أيوه بدأت

لأ لسه

يعنى بدأت ولا لسه ؟؟؟؟

مش عارفة

طيب سؤال أخير

هى عمرها كام ؟؟؟؟

سنتين وشهرين

لأ سنة وشهرين

نعععععععععععععم

تيجى إزاى دى بقى إن شاء  الله

طيب اتولدت قبل الثورة ولا بعدها ؟؟؟؟

قبلها

لأ بعدها

هى اتولدت فى شم النسيم

قلت لها حلو

يعنى فى أبريل ويبفى كده هندها تقريبا

سنة و 3 شهور

لأ هى اتولدت فى فبراير

يا ستى طول عمر شم النسيم بييجى فى أبريل مع عيد ميلادى

لأ النسة اللى فاتت كان فى فبراير

طبعا غلطت نفسى

وقلبت الكلام ضحك مع جوزها وبنكمل كلامنا

وعرفت إن الأبلة المعدلة

اللى حارقة دمى من الصبح المفترض تقول لى يا خال

تبعا لقواعد عائلات الريف اللى كيد عارفينها

طبعا

كان نفسى أولع فيها وفى بنتها وفى جوزها وفى أبوها لو شفته هو كمان

دى عينة بسيطة من المأساة

ترضيكم ولا نقول تانى ؟؟؟؟