الخميس، 26 فبراير 2009

اشهد يا تاريخ

اشهدوا ياعالم

اشهدوا يا خلق
أنا خلاص هارتكب جناية والدم هيبقى للركب
أنا كنت مستحمل الموضوع بالعافية لكن الكيل فاض بى
والصبر نفد
وجبت أخرى
وباقى ثانيتين وأتجنن واعمل اى حاجة
إيه ؟
بتقولوا أهدى ؟
أهدى مين يا عم إنت وهو وهى انتم مش شايفين اللى بيحصل
أنتم مفيش عندكم علم إزاى ؟ دى فضحانى فى كل حته
طيب ما علينا أنا هأحكى الموضوع من أوله وأنتم تحكموا أتفقنا
كانت البداية من حوالى 3 شهور وكانت
الهانم بتعلق عندى وفى نهاية التعليق كتبت D: وطبعا للصراحة يا جماعة أنا فاشل جدا فى موضوع لغة الشات دى وآخر مرة لى على الشات كانت فى يوليو 2004 وطبعا أنا قلت بالمرة دى فرصة إنى أعرف بالمرة شوية معلومات فى الموضوع ده وبحسن نية سألتها فبينت لى أنها بتسامة وكمان كتبت حوالى أربع رموز كمان بمعانيهم
وبعدين كانت طلباتها ( واحد زجاجة حبر حجم صغير للكيبورد بتاعتها ) وإدعت إنى السبب فى إنها خلصت الحبر

طبعا السبب غير مقنع ، لكن أنا قلت يمكن تكون محرجة من إن الحبر خلص من عندها وأنا عارف إن ميزانية الخريجين بتبقى على الحديدة وأحيانا بيبيعوا الحديدة كمان فأنا وبكل كرم وشهامة قلت فى نفسى ( أختك فى زنقة ومحتاجة حبر ضرورى) وبدلا من إنى أبعت واحدة بعت سته ومن الحجم الكبير

مع TNT لا يا جماعة مش متفجرات ( مع انى دلوقتى نفسى كانت تكون كده ) دى شركة البريد
واهو برضه كله بثوابه
لكن غبت يومين رجعت لقيتها بتقول إن الحبر ما وصلش
فاتصلت بشركة البريد لكن مديرها أكد لى إن الطرد وصل بسلام وعنده وصل بكده وعليه إمضتها فأنا قلت له يبعت لى نسخه منه والراجل صراحة وفى أقل من ساعتين كان عندى صوره من الوصل بالإستلام وكمان بعته مع نفس الراجل اللى وصل لها الحبر علشان يأكد
رجعت أكلمها يمكن الحبر وصل وهى مش واخدة بالها ، لكن فوجئت إنها مصرة على كلامها وكمان طلبت تعويض عن الضرر مصنع حبر كامل

وبدأت تتكلم فى كل حتة على الموضوع ده لحد ما شهرت بى
لحد كده وأنا الفار إبتدى يلعب فى كل حتة حواليا مش عبى وبس

وكنت ناوى أبلغ النيابة لكن فى ناس يعز علي زعلهم كانوا بيحبوها وعلشان كده صبرت وطنشت الموضوع ، لكن كانت المفاجأة إن اللى لبست لبس الرهبان

رفعت على السلاح و صعدت الموضوع وبقت بتطالب بمصنعين مش مصنع واحد وكمان بتهدد إنها تولع فى المكان وحاجات كتيرة زى كده
طيب ده بالذمة مش ظلم ، وطيب لما ألاقى نفسى بأتظلم يبقى من حقى إنى أرد على الظلم ده ، طيب ولما تلاقوا واحد مظلوم بيبقى رد فعلكم إيه تقفوا معاه وألا مع الظالم
يا جماعة لوسكتنا على الظلم واتجبر يبقى العيب فى الظالم والا فى الناس المستكينة له ورافضة إنها تتحد ضده وتحاول تغيره
ولو بدأنا نتنازل ونخضع له ، هل فى حد متخيل إن الظالم بيقف من نفسه كده لله فى لله
أفيدونى أفادكم الله

الاثنين، 16 فبراير 2009

رحلة بحث

أبحث عنك





أبحث عنك
أمشى بين دروب الأرض
ألهث من ركضى المحموم ما بين الوديان وفوق جبال ، أعبر صحراء الصمت ، أبحث عن لحنى التائه ، عن طيف الحلم المفقود
أبحث عن أمل فى أن أجدك يا بلسمى الشافى من كل جراح
أبحث منذ فقدتك عند غروب الشمس ، أنتظر الفجر الوضاح
أبحث تحت شعاع الشمس اللافح لنهار الصيف
أعوام تمضى
أتنقل بين البلدان ، أعبر أجواء الأرض ، لا يرهبنى خوض البحر ، أبحث فى الجزر القاحلة وبين مروج خضر
منذ فقدتك ضاعت منى كل معانى الحس ، فلا أحزان ولا أفراح ، مرت أعوام لم أتذكر ما معنى إكرام الضيف
ألا فليصمت هذا القائل إنى أبحث عن عنقاء
إنى لا أبحث عن أسطورة حكيت فى لحظة دفء من ليل شتاء
إنى ابحث عن واحتى المخضرة تظللنى من قيظ الصحراء
أبحث عن نسمة صيف حانية ضاعت بين الأنواء
أبحث وسط ظلام دامس عن قبس ضياء
أبحث عن تلك المفتقدة فى هذا الكون إلى القرناء
آه ما من بعدك قد صار العمر شقاء
أحيا فى هذا العالم من أجل لقاء

أنتظر لقاء

السبت، 14 فبراير 2009

خبر مؤسف 2

مش قلت لكم انه شهرنحس اتضح ان فى عيد ميلاد حروف كمان وفى نفس اليوم مع ايمى ،
انا قلت هو شهر مش فايت انا خلاص قربت ابيع هدومى يا جدعان
أى حد عيد ميلاده الشهر ده ممنوع من الدخول عندى لحين انتهاؤه
مفهوم ؟
***********************************************************
ياجماعة عيد ميلاد إيمى يوم الثلاثاء 17/2 وفى إشاعة مغرضة مجهولة المصدر بتقول إنها ناوية تلم الهدايا وتهرب على سويسرا علشان مفيش حد يطالبها بالتورتة والحلويات وخلافه
(يا رب الشهر ده ينتهى بقى الميزانية انتهت بسبب الهدايا)
*************************************************************
اسمحوا لى يا جماعة انى أعلن عن بدء فعاليات مهرجان عيد ميلاد الأميرة بيرى
(وكلام فى سركم احنا ناويين نرشحها أميرة للتدوين بدل ناس تانية ) المهم شروط الإشتراك فى المهرجان تلاقوها هناك
وكل سنة والجميع بخير
*************************************************************
الدجاج ( الفراخ يعنى)



اسمحوا لى أولا أن أطلب من مطبخ شموسة طريقة عمل أكلة فراخ ، طبعا ليس لى لأننى لا أطبخ أساسا ، ولكن للمدونات ، لأن كل ما أدخل مونة أطلب واجب ضيافة يكون سندويتشات ، وأنا طبعا خسيت وحالتى بقت صعبة .
المهم نرجع لموضوعنا
أنا فاكر سنة 92 أو 93 كنا ساكنين فى بيت مكون من ثلاث أدوار ، وكنا ساكنين فى الدور الأول مع ساكن تانى وباقى البيت فاضى ، وطبعا أنا كنت بألعب فى باقى البيت ، وفى يوم كنت طالع العب فوجئت بقطة واقفة وضهرها لى ، وكانت محاصرة فأر فى ركن غرفة وبتلعب بيه ، وكان خلاص على وشك نهايته وفجأة لقيت الفار نط فى هجوم مفاجىء وقوى على القطة وطبعا كان فى كده نهايته .
بعد كده بحوالى سنتين وكنا نقلنا فى بيتنا القديم وكنا بنلعب فى الشارع وفجأة لقيت كل أصحابنا بيجروا بسرعة والكل بينادى ، وطبعا أنا جريت فى الزحمة ، وكان كل ده ليييييييه ؟
طلع الموضوع ان فى قطة بيطاردها ثلاث كلاب كل واحد فيهم قد كده واستمرت المطاردة حوالى ربع ساعة وفى النهاية اتحاصرت القطة جنب مصطبه عالية ، ولقينا القطة نفشت وبرها وكانت انيابها كبيرة فعلا وهاجمت الكلاب ، لأ يا جماعة القطة الحمد لله خرجت سليمة ، لأننا كنا جاهزين بالأسلحة الفتاكة من طوب وخلافه وبدأنا مطاردة الكلاب وأنقذنا القطة ، وطبعا القطة جريت فورا وخرجت من الشارع وكانت آخر مرة .
إيه دا يا جماعة إحنا كنا بنتكلم عن الفراخ ، أكيد انتم بتفرعوا الكلام ، لكن انا لا انسى واجب ضيافتى أبدا، نرجع للفراخ
فوق بيتنا كان ي عشة فراخبها عدد نحمد الله عليه ، وعين الحسود فيها عود ، المهم وأنا صغير كانت أمى كل ما تنىوى تعمل فراخ يكون العبد لله هو الضحية ، تسن السكينة وتقول لى تعالى ننقى فرخة ، ونطلع فوق وبكل هدء وحنكة وكقاضى مخضرم تكون إشارتها إلى فرخة معينة ، يكون حكم بالإعدام ووعد بأكلة زى العسل ، وطبعا من يريد أ ينال الورد يجب أن يتحمل الأشواك ، ويكون على أن مطاردة الفرخة عبر السطح فى مطاردة لا تقل عن عشر دقائق ، ويمكن أن تزيد المدة إذا قرتت الفرخة استكمالها فى الشارع وتكون الطامة الكبرى ، أنزل من فوق ويبدأ كل الشارع فى الجرى وراء الفرخة التى ربما تستسلم فى وقت قصير وربما تكون مشاكسة وتقرر المقاومة حتى آخر نفس ، وتتطور المطاردة من مكان إلى آخر ، بل وربما تنتقل إلى الشوارع المجاورة ، وأذكر فى إحدى المرات أن الفرخة قفزت فوق إحدى العربت ومنها إلى سور المدرسة الموجود فى بداية الشارع ، وبدأنا ف مناوشتها محاولين إقناعها بالنزول حتى تذبح ، ولكن هيهات حتى تبرع أحدهم ممن لا يؤمنون بالحلول السلمية وكان الطوب ، لكن الفرخة وبكل براعة تفادت الطوبة وكانت النتيجة كسر زجاج أحد سبابيك المدرسة ، وبكل شجاعة انفضت كل الصحبة وبقيت أنا فى المواجهة ، وثار المدرسين وهللت الناظرة وكان ناقص دقائق ونطلب مجلس الأمن والأمم المتحدة لكن الحمد لله تدخل بعض المدرسين المعارف وتم حل الأمر بسلام ، المهم فى النهاية كلنا الفرخة .
فى خضم كل تلك الأحداث التى نواجهها ومن تكالب الأعداء علينا ووسط ما يفعلونه بنا ، نجد أن الناس تطالب بالمقاومة ويرد البعض بأننا لا نستطيع المقاومة لظروف سياسية وخلافه .
وهنا تفتق ذهن البعض عن فكرة أخرى وهى المقاطعة لمنتجات أعدائنا الذين أصبحوا يواجهوننا بوجوجوهسافرة غير عابئين بنا وبأننا لنا كيان يمكن الإهتمام به وله ، وبعيدا عن رأى الدين الذى نعرفه جميعا وما نعرفه أيضا من أن المقاطعة تضرهم اقتصاديا ، هل من الصعب علينا أن ننتفض وهم يذبحوننا بسكين بارد ، هل مطلوب منا أن نموت فى صمت تام وبلا صرخة تنبىء عنا ، هل من الصعب أن نكون مثل الفرخة أو القطة أو حتى الفأر ونموت ونحن نترك ذكرى لمن بعدنا يذكروننا بها بعد مرور السنين ؟

الثلاثاء، 3 فبراير 2009

أنا جييييييييت

أحتاج رأيكم هنا
************************************************************
أنا جييييييييت

شكرا شكرا شكرا
أخجلتم تواضعنا
شكرا شكرا
ما خلاص جدعان قلنا شكرا يبقى شكرا
لازم يعنى كل التحية دى
خلونا نقول الكلمتين بتوعنا بقى
يبقى انتم والناس علينا وألا ايه ؟
المهم تصدقوا أنا لسه واصل من نصف ساعة وأنا داخل المنطقة لقيت حالة تراخى تامة فكرتنى بحالة ما بعد الكوارث وطبعا استغربت لكن كملت طريقى ووصلت للبيت لقيت نفس الحالة
فسألت وفوجئت بأننى نسيت وسط ما كنت فيه ان أخويا الصغير كان عنده هو كما امتحانات وطبعا أعلنت حالة الطارىء القصوى فى البلد وتم استدعاء الاحتياطى واعلان حظر التجول بعد السادسة مساء وقبل ذلك تكون الحركة فى هدوء شديد وممنوع منعا باتا مرور أى شىء من المجال الجوى من الذبابة وحتى بوينج 767
وبالطبع أدى هذا إلى تذمر شديد بين السكان وكل ما حد يشتكى يقولهم : حرام عليكم دى تالتة شهادة ياعالم
نعم بتقولوا ايه ؟ تالته ثانوى ايه ؟ تالتة ابتدائى يا ناس هو لازم يعنى نزعق

المهم كنت هانسى أنا طبعا بأشكر كل حبايبى ودعواتهم الحلوة فى الامتحان وطبعا فى ناس الذاكرة عندها ضعيفه برضه عذرهم موجود وحبايبى دايما ، ويا رب اقدر ارد لهم الجميل فى أقرب وقت .
لكن احكموا انتم فى الناس ام قلب اسود ودعواتهم اللى تودى فى داهية
يوم الاحد كان عندى امتحان حديث مادتى المفضلة واستاذها بين زمايلى وفى اخر نقطة فى الامتحان واسهل سؤال وتيجى دعوة توقف الدنيا وادور على الاجابة فى كل حته ، ابدا ، وحاولت افصل الارسال يمكن يضيع الاثر ، لكن اتضح ان الدعوة فيها فيروس سيطر على النظام كله وكانت كارثة افظع من هيروشيما وناجازاكى مجتمعين ، وشكل كده الدعوه كانت من قلب أسود من قلب أبو جهل وللنهارده الاجابة تايهه مع ان السؤال جميل وبسيط ، حتى أقروه وساعدونى انى افتكر اجابته او جاوبوه لى
يعنى إيه كلمة وطن ؟