السبت، 31 ديسمبر 2011

آسف


حاولت كتير دى لكن
.
.
برضه هأحاول تانى
.
.
.
استنونى

الأربعاء، 28 ديسمبر 2011

اشتياق

مشتاق لك
شوق الأرض لبل الريق

شوق الزعلان للنسمة 
لما الصدر يضيق

الأبنودى

الثلاثاء، 27 ديسمبر 2011

السبت، 24 ديسمبر 2011

كارثة

عندما ندفن عواطفنا 


ونعيش عقلنا

الأحد، 18 ديسمبر 2011

لا

لا تحزن على الأموات 
واحـــزن على الأحياء


وخاصة هؤلاء الذين يعيشون بدون حب

الخميس، 8 ديسمبر 2011

نداء وتنبيه هام

يا جماعة
أنا آخر مرة دخلت فيها على المدونة كانت من أسبوعبن
ولو أى حد وصلوا منى تعليق بعدها أتمنى يسامحنى 

فى مشكلة غريبة بتواجه الأكاونت بتاعى





الأحد، 20 نوفمبر 2011

تفتكر ؟

د هبة رؤوف على تويتر:: طفل عمره ثلاثة عشر عاما استشهد بطلق ناري في رقبته وحملته الإسعاف من عند عمر مكرم..لكن لا تشغلوا بالكم ..احضنوا أولادكم وناموا أحلام سعيد .

الجمعة، 4 نوفمبر 2011

شكر خااااااااااص

 من الصعب أن تصف الكلمات الفرحة التى غمرتنى بمن حضروا الزفاف أول أمس ولكن هكذا الإخوة

فلهم منى كل الحب والمودة


 

سالى


والدة منى



 
وطبعا فى صور رائعة بس ممنوعة من النشر والأمر لله



وشكر خاص لرجالة فريق شبابنا الذين حملوا على أعناقهم أن يجعلوها ليلة العمر ونجحوا فى ذلك على مدار يومى الفرح باذلين جهدا رائعا


وبالطبع كل العذر لمن لم يحضر

وكل عام والجميع بخير وسعادة وهناء

وجعل كل أيامنا فرحا

الأربعاء، 2 نوفمبر 2011

خط الطوارىء

بناءا على رغبة الجماهير
سيتم تشغيل خط استعلامات وطوارىء
بدءا من صباح الغد وحتى انتهاء الفرح


01274247210


وطبعا دا غير مسموح للنا اللى صفتهم

برسونا نان جراتا

إنهم يكلمونى عليه

الاثنين، 31 أكتوبر 2011

دعوة بالمقلوب + تحديث هام





يا جماعة تصحيح بسيط اسمه نادى مصنع الطائرات وليس الطيران
غلط لغوى وبلاش تسييح فى المنطقة

من الآخر كده يا بشر وبدون كلام كتير
يوم الخميس الجاى 3 نوفمبر
هيكون فرح أختى الصغيرة 
ومن هنا بأوجه دعوة وتحذير
الدعوة لكل إخواتى وحبايبى من المدونين
وأتمنى الكل بإذن الله يحضر ويكون يوم فرح لنا كلنا

أما التحذير وبأوجه بكل قوة وحزم وشدة ضد أ حد فكر ولو للحظة فى عقله الباطنى إنه يناصر حزب الشر والأذى أو جمعية المرأة المتوحشة يقرب من قاعة السحاب الكبرى أو نادى مصنع الطيران أو حتى منطقة حلوان
وربنا
وربنا
وربنا كمان مرة
لأغرقة فى المالح
ولإصحابنا اللى هييجوا الدعوة مفتوحة لكم ولكل أحبابكم بدون حدود
والوصف سهل
من عند ركن فاروق وإنت داخل حلوان هتقول للسواق على النادى هينزلك هلى الباب
ولو من المترو نركب عربيات المساكن أو التبين دقيقتين وتقول للسواق على النادى برضه هينزلك على الباب
والناس اللى مش بخلاء
ممكن يركبوا تاكسى هيوصلهم مفيش مشكلة

ولو فى حد عنده وصفة أسهل
يا ريت بلاش خباثة هى مش لجنة ثانوية عامة هنا

الجمعة، 14 أكتوبر 2011

اطمنى



علمنى جوع
جـــوع الفـطـــام
إن اللى عشمان فى الغموس
لازم يغوص فى النار ويشبع من الألم

السبت، 8 أكتوبر 2011

الجمعة، 30 سبتمبر 2011

رسائل من المنفى



يهتز القلم فى يدى وتعجز بلاغته عن صوغ مشاعرى ، تضيع الكلمات ، يسكن الكون ، ولا يبقى سوى لغتنا السرمدية فيما بيننا ، نتواصل بها عبر الزمن ، نبنى أحلاما جديدة لم نتحدث عنها من قبل ، ترسم فرشاتنا أحلامنا ، أجرى بين ربوع الأرض ، أكافح فى تحقيقها ، أنتظر يوم لقائنا على أحر من لهيب براكين الأرض ، بل يفوق ذلك كثيرا ، أحمل هديتى الأخيرة إليك فى كل زمان ومكان أمضى إليه ، يملؤنى الأمل فى كل لحظة أن تكون اللحظة الأخيرة لفراقنا وأننى سألقاكِ من جديد ، سترفف الفراشات من حولنا سعيدة وتتفتح الزهور وتعم الخضرة وجه الأرض فرحا بنا .



كم أنتظر أن أنظر من جديد فى عينيك الصافيتين كسماء صباح يوم من أيام الصيف ، كم اشتقت أن أبحر فيهما بلا حدود ، أن أجد الدفء فيهما ولو كان ذلك وسط ثلوج الشتاء ، أن تمسح يديك الحانيتين دموعى التى ترفض أن تأتى منذ رحيلك ، كم اشتقت عبيرك ، يغمرنى سكون بعد صراع الحياة حين يتغلل فى داخلى ، انتعش من جديدا ، أواجه ألف ألف خطر من أجلك ، أضحى بكل كنوز الأرض من أجل لحظات قصيرة أراك فيها ، أبثك فيها ما لم أقله من قبل ، أصدق فى وعدى الأخير إليك ، أشهد كل العالم أنى ملكك وإليك ، تنبعث من داخلى ضحكة حقيقية صافية لا أجدها منذ فراقنا .

ما زلت أنتظر


الاثنين، 26 سبتمبر 2011

ترحال


يا أيها النهر القديم

ألا انتفض ، أجب النداء
قد جئت أبحث فى ضفافك
عن ذكريات الصبح
همسات المساء

فى ضفافك كان الزهر ينبت
يمرح الطير المغرد
الآن ينتشر الخواء
كم كنت أجلس فى نسيمك
أبعث بالرسائل
بين طيات المياه
وبين غيمات السماء


يا أيها النهر الجليل أجب السؤال
قد جئت أسأل بعد أن جبت الفيافى والجبال
جئت بعد ان فاضت بحار العشق
وأخضرت من الدمع التلال
قد جئت أسأل
ماذا نكون ؟ وما المآل ؟

الأحد، 18 سبتمبر 2011

كانت تعلم !!!!!!!!

كانت تعلم ..

أن الموت ضريبة عشق للأوطان
أن الحب سيصبح يوما
أجمل وشم للأكفان
أن الموت سيصبح عرسا ..
ينسينا كل الأحزان
من هذا الطين بدأنا الرحلة
سوف نعود لنفس الطين
ليطوينا .. صمت النسيان

جويدة

الأربعاء، 14 سبتمبر 2011

هأوصلك


من قلب الألم
يولد الأمل

الجمعة، 2 سبتمبر 2011

السمسمية


استمتعت جدا بيها فى بور سعيد

الأربعاء، 24 أغسطس 2011

أغسطس




ضيعت عمري أغني الحب في زمن
شيئان ماتا عليه الحب والأمل

ضيعت عمري أبيع الحلم في وطن
شيئان عاشا عليه الزيف والدجل

كم راودتني بحار البعد في خجل
لا أستطيع بعادا كيف أحتمل



الأربعاء، 20 يوليو 2011

رحلة لا تنتهى

أسافر فى غربة دائمة ، أبحث فى البلاد ، فى كل شبر ، أبحث فى كل مكان وصل إليه البشر على مر الزمان ، ولكن لا أجدكِ وتتواصل الأيام وتمر السنين ، ولا أجدكِ .

رحلة أبدية فى سبيل العثور عليكِ ، يندهش الجميع من رحلتى العبثية بلا أمل ، ويتصايحون وينصحون ، ولكن أنّى لهم أن يعرفوا من أنتِ ، وما الذى يعرفونه عنا وعن ما بداخلنا ، ما الذى يعرفونه عن مشاعر تتحدى الزمان والمكان وتمضى صامدة لا يهزها ريح ولا تعوقها جبال أو بحار أو ......... موت ، ما الذى وصلوا إليه من قبل كى يرفوا وينصحوا فيما بيننا ، هل رأى أحد منهم مثلنا ؟

يهتز القلم فى يدى وتعجز بلاغته عن صوغ مشاعرى ، تضيع الكلمات ، يسكن الكون ، ولا يبقى سوى لغتنا السرمدية فيما بيننا ، نتواصل بها عبر الزمن ، نبنى أحلاما جديدة لم نتحدث عنها من قبل ، ترسم فرشاتنا أحلامنا ، أجرى بين ربوع الأرض ، أكافح فى تحقيقها ، أنتظر يوم لقائنا على أحر من لهيب براكين الأرض ، بل يفوق ذلك كثيرا ، أحمل هديتى الأخيرة إليك فى كل زمان ومكان أمضى إليه ، يملؤنى الأمل فى كل لحظة أن تكون اللحظة الأخيرة لفراقنا وأننى سألقاكِ من جديد ، سترفف الفراشات من حولنا سعيدة وتتفتح الزهور وتعم الخضرة وجه الأرض فرحا بنا .

كم أنتظر أن أنظر من جديد فى عينيك الصافيتين كسماء صباح يوم من أيام الصيف ، كم اشتقت أن أبحر فيهما بلا حدود ، أن أجد الدفء فيهما ولو كان ذلك وسط ثلوج الشتاء ، أن تمسح يديك الحانيتين دموعى التى ترفض أن تأتى منذ رحيلك ، كم اشتقت عبيرك ، يغمرنى سكون بعد صراع الحياة حين يتغلل فى داخلى ، انتعش من جديدا ، أواجه ألف ألف خطر من أجلك ، أضحى بكل كنوز الأرض من أجل لحظات قصيرة أراك فيها ، أبثك فيها ما لم أقله من قبل ، أصدق فى وعدى الأخير إليك ، أشهد كل العالم أنى ملكك وإليك ، تنبعث من داخلى ضحكة حقيقية صافية لا أجدها منذ فراقنا .

ما زلت أنتظر

الاثنين، 4 يوليو 2011

8 يوليو

الثلاثاء، 21 يونيو 2011

أنا نازل

نتقابل فى الميدان
عند عم مجاهد
بإذن الله

الجمعة، 17 يونيو 2011

وتقدرون


وتضحك الأقدار

السبت، 11 يونيو 2011

إضرااااااااااب عاااااااااااام

 أنا مضرب


 عن المذاكرة
لحين صدور النتيجة

الخميس، 9 يونيو 2011

وضاع الراجل يا عينى

ودى أخرتها

الأربعاء، 8 يونيو 2011

بلا جمعية بلا نيلة


اتفرجوا يا بتوع الجمعية
الرجالة المحترمين
مش زى ناس

الثلاثاء، 7 يونيو 2011

اقرأوا معى

من أجمل ما قرأت وتأثرت به خلال أعوام مضت


أتمنى مشاركتى قرائتها

الأحد، 5 يونيو 2011

وتتكرر المآسى

والله حرام اللى بيحصل ده




ومين السبب ؟

الخميس، 2 يونيو 2011

علشان نبطل صداع

وربنا أى حد هيتكلم تانى فى الموضوع
هأحكم عليه ينضم للجمعية ويبقى معادى

الثلاثاء، 31 مايو 2011

الوثيقة المصرية



للتسجيل فى الوثيقة اضغط هنـــــــــــــــا

السبت، 28 مايو 2011

يا رب نفهم

يا رب نفهم

الاثنين، 23 مايو 2011

الخميس، 19 مايو 2011

بلطجة واللى عاجبه

يوم السبت هيكون فى انتخابات فى نقابة الفنون الجميلة بالأوبرا وشمس النهار ضمن المرشحين ، وطبعا أنا هاكون هناك ، ليه ؟
سؤال ذكى . طبعا علشان  ادعم المرشحة ضدها ، بعد اللى حصل منها وما ثبت بالدليل من تآمرها على مع أمى وعضوات الجمعية وهو ما مسح كل التاريخ القديم وكل العلاقات السابقة .
ومن هنا بأهدد بشدة أى حد وخاصة عضوات الجمعية هألاقى هناك مفيش دية له عندى وألا أقول لكم ممنوع حتى النزول فى محطة الأوبرا بتاعت المترو ولو سمعت نفس هأوقف المترو كله ، وربنا ، وربنا ، وربنا كمان
لأوريكم يا جمعية خراب

الأحد، 15 مايو 2011

الاثنين، 9 مايو 2011

محاولة للفهم




أنا راجع من امبابة امبارح فى نص الليل والدنيا هناك كلها توتر
ليييييييييييييييه ؟
حد يفكر معايا
اللى حمى الكنيسة بتاعت شارع الوحدة وطفاها أغلبهم مسلمين
اللى بيحمى الكنيسة بتاعت شارع الوحدة حاليا أغلبهم مسلمين
اللى حارب الناس اللى بتدمر هناك امبارح أغلبهم مسلمين
الناس بتقول إن فى حد من اتصل بشيخ على إنه البنت المخطوفة فى الكنيسة
وحد اتصل بالناس فى الكنيسة وقال لهم إن فى ناس جايين يهاجموها ويحرقوها
موضوع السلاح اللى فى الكنيسة حقيقي مش كدب ودا من سنين طويلة لإن البصراوى أسوأ من الباطنية ألف مرة
والموضوع مش كنيسة هى منطقة لبش أساسا من بداية التسعينات ولغة الحوار فيها بين أهلها بكل طوائفهم وحتى بين المسلمين وبعضهم هى السلاح
الشرطة كانت طول عمرها بتخاف تقرب من هناك إطلاقا لإن المنطقة أسوأ من غيطان الذرة بتاعت الصعيد وعشوائيات خالد يوسف فى حين ميسرة ولو دخلتها قوة شرطة كاملة ممكن تختفى بعربياتها وقواتها ولا حد يعرف له طريق

حد فهم حاجة ؟

السبت، 7 مايو 2011

الخميس، 5 مايو 2011

وسقط أول طاغية






http://www.shorouknews.com/contentdata.aspx?id=447422

اللهم لك الحمد كما ينبغى لجلال وجهك وعظيم سلطانك

ويا رب الباقى

الأربعاء، 4 مايو 2011

مصر بتاعتنا وبإيدنا ننميها


 
مين إيده معانا ؟


أعتقد الكل بيحب مصر ومستعد يشارك

أنا من الجيزة ومع ذلك معاهم

لإن كلها بلدى

شارك ولو بالدعوة والنشر

الأحد، 1 مايو 2011

ربنا على الظالم والمفترى


ارحم الغلابة ياااااااااااااااااااااااااااااااااااااااااااااااااااارب

الاثنين، 25 أبريل 2011

أين أنتِ؟؟

أين أنتِ؟؟






أين أنتِ في الصباح وفي المساء
أين أنتِ حين تنهشنى الذئاب وأصبح للسبع الغذاء
أين طيفك فى ربى الحزن المسيطر
فى ثنايايا أغنى
أنتفض
أرقص رقصة طائر ذبحوه وحيدا
وتركوه ملقي على قارعة الطريق


أين من يلملم أشلائى
يدمع من أجلى دمعة
يوارينى الثرى
أين من يلقى فى رثائى كلمة
تؤنسنى فى وحشة القبر
يزرع من أجلى وردة أستنشق عبيرها
من بين ثنيات التراب

أين لمستك الحانية
كى تخفف عنى العذاب
أين الوعود


ولا عتاب





قد بت التحف السماء
ولا يوارينى التراب
ران السكون
وضاع نور الشمس
من خلف السحاب
ولا جواب


لاجواب



*********************************


إعادة نشر

الثلاثاء، 19 أبريل 2011

مشروع وفشل + بناءا على طلب د/ ستيتة




شجر التوت

آخر يوم امتحانات رجعت على الأرض على طول ووصلت تقريبا بعد العصر بساعة وأنا هناك قلت لابن عمى يجيب لى الغدا هناك وبصراحة بعد العلقة المحترمة بتاعت الإمتحانات الأخيرة دى كنت حاسس باسترخاء فظييييييييييييييع وبعد الأكل مددت تحت الشجرة وسرحت بخيالى أفتكر أيام بعييييييدة جدا
منها فى الأجازة قبل ما أدخل أولى ابتدائى مباشرة وكنا متجمعين فى شلل من أعمار مختلفة أكبرنا كان فى سنة تالتة وأنا كنت من الصغيرين نسبيا ، المهم وكانت هوايتنا الكبيرة بطبيعة الحال إننا ناكل توت من الشجر وده طبيعى ، لكن المش طبيعى كانت هوايتنا إننا ناكله من شجر تانى غير شجرنا ( وحتى الأن لم أجد لذلك سببا) المهم وفى من الأيام رجع واحد مننا وكان مضروب علقة تمام ولما سألناه قال إن ابن صاحب أرض من الأراضى عمل كمين محترم لإصطياد من تسول له نفسه الحصول على توت من شجرهم وأطلق كلبين وسط الزراعه لزوم الإنذار والتهديد ولتنبيهه فى نفس الوقت باقتراب أى من أطفال القرية ، وكان أن وقع صاحبنا فى هذا الشرك ، وبصراحة كان صاحب الخدعة مكروها منا ربما لأنه كان بيقظته يمثل عقبة أمامنا فى اصطياد شجرتهم ومنها لأنه كان فى سنة سادسة ومعنى هذا أنه من الكبار وهذا كان سببا كافيا لكرهه ، وبعد الحادث الأليم تم اعلان حالة الاستنفار فى شلتنا وتم تجمبعنا وعلامات الخطورة على وجوهنا نظرا لخطورة القرارات التى سيتم اتخاذها فى هذا المكان وبطبيعة الحال تم الإتفاق على الأخذ بالثأر منه ، وأقسم الجميع قسما مغلظا على ذلك (وكان باقى شويتين ونجيب جفنة دم زى كفار قريش ونحلف عليها ) ، وبعدها قامت هيئة الأركان بشرح خطة الإنتقام المحكمة والتى تم الإستقرار على تنفيذها وهى على عدة مراحل
فى البداية على كل فرد من أفراد المجموعات محاولة الحصول على أى بواقى لحوم من اى نوع من منازلنا ، لزوم تضليل الكلاب وشغلهم عن موقع تنفيذ العملية ( والتى لم يطلق عليها أى اسم كودى للأسف )
على جميع الأفراد محاولة تجهيز المعدات اللازمة لتنفيذ العملية بجميع مراحلها حسب دور كل واحد فيها ، وعدم التحدث مع اى انسان مهما كان عن ما ننوى تنفيذه حفاظا على السرية المطلقة
وتم الإتفاق على توقيت سرى للعملية
وتم تنفيذها على اكمل وجه ، أيه ؟عايزين شرح للخطة ؟ والله احاول أقول لكن طبعا مع التجاوز عن النقاط التى ما زالت تحت بند السرية المطلقة
كانت الخطة كالآتى :
تمت دراسة ارض المعركة دراسة مستفيضة ووجد أن خطة التأمين للمكان به ثغرة يمكن استغلالها وهى إن أكبر شجرة تقع على شط ترعة صغيرة يقابلها ممن الضفة الثانية أرض تقع ضمن املاك أخرى وبذلك لا سيطرة لهم عليها كما أنه مع شغل الكلبين يمكن التسلل منها دون الشعور بنا على الإطلاق ، وامعانا فى السرية تم الدخول الى الارض الموجودة على الضفة الثانية من احدى جوانبها البعيدة والتسلل من وسط الزراعات للوصول الى نقطة الانطلاق عند التوقيت المحدد للعملية .
يتم تقسم الأفراد كالتالى المجموعة الاولى والثانية والثالثه يقومون بعبور الترعة بحيث تقوم المجموعة الاولى بتسلق الشجرة وقطف التوت والقاؤه الى المجموعة الثانية والتى مهمتها نقل التوت الى الضفة الثانية حيث تنتظر المجموعة الرابعة لتجميعه تمهيدا للهروب به والمجموعة الثالثة وهى من كبار السن مهمتها مراقبة وتأمين المكان والاشباك مع العدو فى حالة ظهوره فى أرض العمليات وتغطية الهروب السريع للمجموعات فى حالة الهرب ،وكنت أنا من المجموعة الثانية ولكم أن تتخيلوا حماسنا ونحن نعبر الترعة ؟ صدقونى ربما لو كنا نعلم بأفلام أكتوبر لقلت لكم أن اغانيها الحماسية كانت تدوى فى اذاننا وربما بعد قليل كنا سنبدأ بالتكبير

استمرت العملية بنجاح طبقا للخطة وخاصة أن الولد كان نائما فى زراعتهم ، ولكن وبعد قليل حدث ما لم يكن فى الحسبان ، فوجئنا بوالده يظهر من بعيد ويصرخ فيه مناديا مما أيقظه كما ان الرجل لمحنا وهنا القى كل منا ما بيده وتمت عملية الإنسحاب (الهروب ) بشكل جميل ونال الولد علقة شديدة من والده لإهماله فى حراسة الأرض كما ينبغى ، وكانت قصة تحاكى بها اطفال القرية لفترة طويلة وفى أثناء الإحتفال وتوزيع ما تم جمعه من أسلاب وغنائم على الباقين فوجئنا أن الكمية كبيرة جدا وكنا فى جلستنا الفخور فى هذه المرة نبدوا كالقادة المنتصرين وأضائت لنا الحياة واصبحوا يعاملونا مثل الأباء الروحيين للمافيا
للاسف كنت هجاما جيدا وأصلح للصوصية واكسبنا هذا الكثير وقد نجح بعضهم فيه واستمروا حتى ان احدهم تمكن من ان يصبح من عتاة لصوص الجبل رغم صغر سنه وقتل فى أحد المعارك العام الماضى لكن فشل المشروع بالنسبة لى بسبب تصميم والدى على أن اتعلم وأصبحت الحالة على ما ترون .

***********************
تم اعادة النشر بناءا على طلب د / ستيتة
والعاقبة عندكم فى المسرات

الأربعاء، 13 أبريل 2011

الأحد، 10 أبريل 2011

الخميس، 7 أبريل 2011

الثلاثاء، 5 أبريل 2011

بيان اللجنة التنسيقية لجماهير الثورة "جمعة المحاكمة والتطهير"

بيان صادر عن اللجنة التنسيقية لجماهير الثورة*

جمعة المحاكمة والتطهير

8 إبريل 2011


نحن جماهير الشعب المصري صاحب السيادة الوحيد علي أرضه ومصيره ومقدراته ومصدر كافة السلطات في هذا البلد،

وإيمانا منا بثورتنا المجيدة وإدراكا منا بما يحاك ضد ثورتنا من محاولات لإجهاضها،

فإننا نؤكد في جمعة المحاكمة والتطهير علي سرعة تنفيذ المطالب الأساسية للشعب المصري في هذه المرحلة من أجل تطهير البلاد من الفساد وأهمها:

أولا: سرعة القبض على الرئيس المخلوع وعائلته واعوانه الفاسدين وخاصة فتحي سرور وصفوت الشريف وزكريا عزمي وأحمد نظيف والتحقيق معهم و محاكمتهم على كافة ما اقترفوه من جرائم في حق الشعب المصري.


ثانيا: إقالة النائب العام الذي ثبت تواطؤه في إجراء التحقيقات وعلاقته بكثير من رموز الفساد المطلوبة للمحاكمة، وعلي رأسها الرئيس المخلوع ورموز الفساد، وتعيين جهاز قضائي مستقل حر ونزيه لمحاكمة رجال النظام السابق .


ثالثا: إقالة نائب رئيس الوزراء يحي الجمل، بعد سقطاته المتكررة وما أحدثه من فتن، وفشله في إدارة الحوار الوطني، وعلاقته ببعض رموز النظام السابق، ودعوته لمشروع مرسوم بقانون لتخفيف العقوبات عن الفاسدين.

رابعا: إقالة ومحاكمة كافة العناصر الفاسدة وكل من ارتكب جرائم في حق الشعب والمتظاهرين، وتطهير الأجهزة الأمنية والحكم المحلي منهم. وسرعة الافراج عن جميع السجناء السياسيين وتعويضهم.

خامسا: سرعة حل المحليات الذراع الرئيسي للثورة المضادة والحزب الوطني الفاسد وتحديد موعد قريب لأجراء انتخابات المحليات علي أسس سليمة .

سادسا: استكمال تطهير المؤسسات الأعلامية والصحفية وكافة الوزارات والمؤسسات الرسمية والبنوك من رموز النظام السابق ومحاكمة الفاسدين منهم.

سابعا: إقالة رؤساء الجامعات وعمداء الكليات المعينين من قبل أمن الدولة وانتخاب الأكفأ وإصلاح نظام التعليم باعتباره هدف قومي يتعين الاهتمام به .


ثامنا: سرعة سن قانون لتحديد الحد الدنى للأجور للقضاء على كافة صور المظاهرات الفئوية.


وأخيرا فإننا نهيب بالقوات المسلحة التى هي ملك للشعب والذي ائتمنها علي ثورته عدم التباطؤ أكثر من ذلك فى تنفيذ هذه المطالب حفاظا علي حقوق الشعب ومكتسبات الثورة وأن يبقي شعار الجيش والشعب يد واحدة هو الشعار السائد حتى يرد الجيش الأمانة الكاملة للشعب فى نهاية المرحلة الأنتقالية بعد إجراء الأنتخابات التشريعية والمحلية والرئاسية قبل نهاية العام،

ونؤكد دائما على أن الشعب وحده هو صاحب السيادة ومصدر السلطات وأن الشرعية الثورية هي أساس الحكم في البلاد يفوض من يشاء ويسقط الشرعية ممن يشاء .

دعوة هامة

دعوة لجمعة المحاكمة والتطهير
من اللجنة التنسيقية لجماهير الثورة

فى إطار المحافظة على ثورة 25 يناير ومكتسباتها والتصدى لمحاولات سرقتها وإجهاضها وسرعة تحقيق مطالب الشعب ، تدعو اللجنة التنسيقية لجماهير الثورة التى تضم كلا من مجلس أمناء الثورة والأخوان المسلمين وائتلاف شباب الثورة والجمعية الوطنية للتغيير وائتلاف مصر الحرة وتحالف ثوار مصر والأكاديميين المستقلين وحركة شباب 25 يناير جموع الشعب المصرى إلى الخروج فى تظاهرات مليونية يوم الجمعة القادم 8 أبريل إلى ميدان التحرير بالقااهرة والساحات الكبرى فى المحافظات والمدن الكبرى للمطالبة بسرعة محاكمة الرئيس المخلوع وغائلته وكافة العناصر الفاسدة فى النظام السابق وتطهير البلاد ومؤسسات الدولة من كافة عناصر النظام الفاسد السابق ومحاكمة الفاسدين منهم

اللجنة التنسيقية لجماهير الثورة

*************************
الوضع بدأ يرجع للنوم من تانى
لازم الكل يتحرك
أقابلكم هناك بإذن الله

الثلاثاء، 22 مارس 2011

لماذا قلت لا


الحمد لله رب العالمين خلص الإستفتاء بسلام وضحكنا على نكت اللجان ، يبقى باقى نتكلم
أنا قلت فى الإستفتاء لأ ..ليه ؟ خلونى أشرح حاجة بسيطة جدا ، أنا فى اللجان من الساعة سبعة ونص الصبح تقريبا ، وأدليت بصوتى بعد صلاة المغرب ، كنت متحير ما بين نعم ولا ، بس اللى شوفته خلانى أقول وبكل ثقة لا ، وهأحكى مشهد من مشاهد كتير حصلت فى اليوم ده ، أولا كنا اللجنة الوحيدة من غير توجيه لإنى طردت أى حد بيقول للناس نعم أو لا سواء من الإخوان او المسيحيين ، بس واحدة غلبان داخلة على وأنا واقف بأدخل السيدات اللجنة وبتسألنى ..أقول إيه يا ابنى ؟ فرديت كعادتى قولى اللى إنت عايزاه يا ست الكل . فسكتت لحظة وقالت بس انا مش عارفة حاجة ، فقلت لها ببساطة يا ست الكل أدخلى الراجل هيسألك عايزة نعم ولا لأ _ إنها كانت زى كتير لا لها فى القراءة ولا الكتابة وبيتعلم لهم على صوتهم من المراقبين _ وأول حاجة ربنا يجيبها فى دماغك ويهديكى لها قوليها على طول .
وطبعا الكل عارف حجم التوجيه والشحن المعنوى عند الناس تجاه آراء معينه لها مصالح ، بس الكارثة إن الموضوع عام جدا ، لدرجة غن كتير من المثقفين والمتعلمين جايين وبيصوتوا وهم مش فاهمين فى إيه أساسا ، اللى يقولى نعم علشان المادة التانية ما تتغيرش ، واللى يقول لى لأ علشان المادة التانية تتغير مع إن الدستور أصلا واقع ولا فى مادة تانية ولا تالته وإحنا أساسا كنا بنقول رأينا على مواد الإعلان الدستورى لإن الدستور معطل وواقع من زمان .
تخيلوا بقى الناس البسطاء حالتهم إيه لما المتعلمين بقوا كده ؟
علشان كده قلت لأ ، لإننا محتاجين فترة كافية علشان نوعى الناس بكيفية التفكير والإختيار وكمان البحث عن المعلومة الصح وسط الغث اللى بيبقى منتشر ، ومحدش يقول مستحيل أنا بأتكلم من واقع عملى وتجربة قمنا بيها ومش مستحيلة ، ولا فيها ضرر ، صحيح ماغيرتش بالكامل بس كان فى تغيير وغلطتنا إننا انشغلنا بالدراسة وبدأنا متأخر .
أدخل فى المرحلة التانية ائتلاف الثورة والأحزاب وغيرهم من اللى قالوا لأ ودعوا لها - سواء اتفقت معاهم أو اختلفت - اسمحوا لى اصف كل اللى عملتوه بلفظ واحد بس ، الغبااااااااااااااااااااااااااااااااااااااااااااااااء ، كتبتم فى الجرايد ووقفتم احتجاج ودا أكبر دليل على إنكم ما بتتعلموش من الفترة اللى فاتت أى حاجة وإنكم لسه بتشوفوا الناس من منظور بعيد ودا اكبر دليل على فشلكم فى المرحلة الجاية ، فى الوقت اللى الحزب الوطنى والإخوان فهموها صح ونزلوا للناس الشوارع ، هتقولوا التكلفة ، تكلفة وقوفكم فى الشارع والمظاهرات صدقونى أكتر ، إحنا عملنا حملة ككاملة للتوعية فى مدينتنا ، وكلفتنا تقريبا 80 جنيه اول عن آخر لطبع الورق والباقى عملنا لقاءات فى النادى وفى الشوارع لتوعية الناس ودا كان مجهود شخصى ، يعنى لو حسبناها هنلاقى ان كل واحد فى المجموعة اتكلف خمسة جنيه تقريبا وضحى بجزء من وقته ، التلكفة فى المظاهرات اللى الشعب البسيط زهق منها وبقى فى عندها اختناق منها _ حتى لو هى صح ومن حقكم _ أعلى ولا التوعية أعلى ؟ ، وطبعا صعب حد يتكلم عن أمن الدولة اللى بيمنع والكلام الفاضى القديم .
بالله عليكم انزلوا الشارع ، كلموا الناس فى المواصلات ، كفاية كلام فى الجرايد والتليفزيون والفيس بوك _ ومش بأقول بطلوه دا أسلوب كويس بس يطور _ علشان لسه فى قطاع كبير من الناس لا بتسمع تلفزيون ولا لها فى الكلام بتاع الفيس بوك والتويتركلنا فاكرين الفيديو بتاع الدعوة ليوم 25 يناير والتحرك الناس وكلنا شفنه نتيجته الفيديو  هنــــا  .

القاعدة الشعبية هى الأغلبية وهى اللى الناس الفاهمة بتلعب عليها ودول بيبصوا للكتاب ورجال الإعلام بريبة أنما لما يشوفوا الشخص قاعد معاهم وبيكلمهم وواحد منهم بيسمعوا له وينصتوا له ومع الوقت يقتنعوا .
اللى حصل حصل بس نتعلم منه ، الفترة الجاية فى تحد كبير وإحنا هنا شغالين عليه ، المرحلة الأولى إزاى تعلم الناس تختار مرشح سواء للشعب أو الشورى أو الرئاسة أو حتى اللجنة الدستورية ، كفاية لحد كده اختيار علشان هو راجل طيب وبيخدم ولا من عيله ولا كلامه حلو ، ومش عايز حد يقول لى الشعب اتغير أنا عايش مع الشعب وسامع كلامه ، فى اللجنة واحد بيقولى تفتكر منكن نرشح فلان ، فقلت له ليه ؟ قال والله راجل محترم وأى واحد يقصده فى خدمة بيتحرك معاه ، تخيلوا واحد من المثقفين وبيفكر كده يبقى باقى إيه على انهيار الثورة ، يا جماعة عيشوا مع الشعب كفاية كلام فى الواقع الإفتراضى وارجعوا للواقع الحقيقي وابدأوا الشغل الصح علشان لسه عندنا موال كبير كبير ولازم نتحرك بدرى بدل ما نلاقى نفسنا رجعنا لمبدأ الحزب الواحد تانى .
وبأكررها انا مستعد أقبل بمجلس شعب وشورى ورئيس كلهم وبنسبة 100 % من الإخوان او السلفيين أو الوطنى أو التجمع أو حتى الملحدين ، بشرط واحد إن الشعب يكون اختاره بإرادته الحرة من غير توجيه وعن فكر سليم .
اللهم اعنا




الأحد، 20 مارس 2011

قليل البخت يلاقى العضم فى الكرشة

طبعا الكل عارف إن امبارح كان فى استفتاء على التعديلات الدستورية ، نعم ؟ مين اللى بيتكلم ؟...آه الأستاذ هناك إنت ما عرفتش مفيش مشكلة فى ناس كتير زيك عادى لا إنت الأول ولا الأخير .

نرجع لموضوعنا فى اللجان إمبارح تم تكليفى قيادة مجموعة الشباب المنظمين للجان بإحدى المدارس عندنا ، ورحنا هناك مع فريق حقيقي جميل ورجالة بجد وقفوا معايا طول النهار بعزيمة ربنا يجزيهم خير عليها ، لكن كان فى حاجات تخلى الواحد تضحك جدا ، طبعا ما فى هم بيضحك زى ما فى هم بيبكى ،يعنى على سبيل المثال وإحنا واقفين كان فى واحد فى صف الرجالة فضل يقول النظام يا جماعة ويتكلم ويتناقش لحد ما وصل لبداية الصف بعد نص ساعة انتظار وفجأة قال : لأ خلاص انا مش داخل ولف ومشى . طبعا أنا وقفت مذهول واللى كان معايا كان قرب يجرى وراه ويضربه على الصداع اللى هو عمله على مفيش ، وبعدها يخدعنا ويمشى . كنت هأطق .

مرة تانية واحد بيقول انا عندى شغل ومستعجل ومصر على كده ، فى الآخر رفعت صوتى وانا ماسك كتفه وقلت يا جماعة اللى مستعجل وعنده شغل ييجى ورا الأستاذ ده ويعمل طابور ، طبعا اللجنة كلها بقت وراه فبص عليهم وبص فى الأرض واعتذر ورجع مكانه فى الصف ، شوية على الساعة 11 وبدأ إقبال الحريم يزيد واللجنة بتاعتهم تكبرأكتر وأكتر لحد ما الشاب اللى كان واقف هناك رقع بالصوت واتنرفز وقال الحقونى يا بشر، فجرت على هناك وفوجئت بيه ف حالة شبه انيهار من ضغطهم عليه والمستشارة اللى كات هناك وقفت اللجنة تماما لحين رجوع الإنضباط ودورت على أمين الشرطة لقيته هربان وواقف على باب المدرسة ورافض يرجع لجنة الحريم بتاتا وعنا وخليت الراجل بتاعى يروح على لجنة تانية ووقفت أنا على باب اللجنة وربعت إيدي ووقفت ساكت حاجة كده ولا الحجاج لحظات وكنت هأقول إنى ارى رؤوسا قد أينعت وحان وقت قطافها ، الحريم لقيونى ساكت ومش بأرد عليهم فبدأوا يهدوا مستنيين هأقول إيه ، فردين بهدوء وبدون لا شخط ولا صوت عالى بعد إذنكم صفين واحد هنا والتانى هنا وفى دقايق أوعدكم تروحوا غير كده وربنا أسيب اللجنة وأمشى وخليها مقفولة لما اليوم يخلص ولا تصوتوا ولا نيلة وترجعوا بيوتكم .

فبدأوا ينتظموا شوية بشوية وبدأت أخفف معاهم من حدة الكلام وأضحك هنا وأضحك هناك علشان يسكتوا عنى ويقفوا كويس وساعدنى على كده إن فى كتير منهم أعرفهم مأيام ما كنت بأقعد فى المحل بتاعنا من يتوع المنطقة وبقيت زى الأراجوز وأصحابى واقفين من بعيد يضحوا على وعلى الذل اللى أنا عايش فيه ، ما أنا مضطر يعنى لا قادر أزق واحدة فيهم علشان تدخل الصف ولا أشخط زى ما كنت بأعمل فى الرجالة وناخدها بأضحك علشان نمشى الأمور ، يا ربىىىىىىىىىىىىىىىىىى كان ذلك حقيقي لدرجة إنى بقيت فين أيامك يا مبارك كنت مريحنا وقاعدين فى البيوت لا حاملين هم استفتاء ولا انتخابات

طبعا قبل ما أمشى لازم أقول إنى رجعت البيت عندى إرهاق رهيييييييب ، تخيلوا من الساعة سبعة الصبح ولحد الساعة سبعة بالليل غير إننا كنا نايمين متأخر لإن كان عندنا شغل فى اليوم اللى قبله ، بس كل ده يهون وسط فرحتى وانا شايف الناس كلها وهى خايفة على بلدها وطالعين يشاركوا سواء فاهمين أو لأ مؤيدين أو لأ تخيلوا من 4 آلاف أيام زمان شاملين التزوير والميتين والمسافرين وخلافه نعمل 9500 ومن غير تزوير .

الحمد لله يا رب إن الحلم اتحقق وانا عندى المقدرة إنى أكون جواه

الأحد، 13 مارس 2011

هل من دموع

أحيانا ما نجد أن القادر على البكاء مثار حسد منا
وذلك حين لا نجد من الدموع ما يطفىء ما بداخلنا

الأربعاء، 9 مارس 2011

ابتدت بنون النسوة

وما أدراك مانون النسوة
امبارح كنت رايح النقابة وكان بعدها عندى مشوار تانى فقلت أعى على الميدان اتفرج على البشر هناك أخبارهم إيه ؟

أول ما دخلت الميدان لقين إنى كنت محظوظ وإن الشعب كله كان متفق من ورايا يكونوا هناك .

أول ما دخلت لفت نظرى هتافات ولوحات مطالبة بحقوق المرأة وبصراحة ما فهمتش ، ليه ؟ لإنى كنت اعتبرت إنى خلصت من الليلة بتاعت مجالس المرأة دى من بعد ما اتحرق المجلس بتاعهم ( ودى أكبر حسنة فى حرق مقر الحزب الوطنى الرئيسي ) ، يااااااااااااااااه كنت حاسس إنى فرحان جدا لما شوفته فححححححححححححم .

ما علينا دخلت وشوية وفهمت إن ده اليوم العالمى للمرأة ، مش عارف الناس افتكرت الموضوع ده إزاى وسط اللى بيحصل ، مع إنى قربت أنسى اسمى أساسا ، كان فى هناك عدد لا يقل بحال من الأحوال عن 300 نفر بيطالبوا بحاجات غريبة ، ومع قراءة اللوحات وسماع الهتافات قلت أنقل لكم المشهد .

- أول لوحة ( محدش فاهم حاجة خالث ) وعلى الضهر ( لما الحشيش خلص الشعب فاق )

- تانى لوحة ( لا مساومة على حقوق النساء )

- تالت لوحة ( عدم تغليب دور المرأة الإنجابى ، على باقى أدوار المرأة العامة والخاصة )

- رابع لوحة ( يا سى السيد عصرك فات )

- خامس لوحة ( ائتلاف المنظمات النسائية )

- سادس لوحة ( دستور مدنى جديد يحترم المواطنة ويكفل المساواة ويلغى كافة أشكال التمييز )

- سابع لوحة ( مصر لكل المصريات والمصريين )

- ثامن لوحة ( دولة مدنية لا دينية ولا عسكرية )

- تاسع لوحة ( مشاركة المرأة فى صياغة المستقبل الدستورى والقانونى والسياسى لمصر )

- عاشر لوحة ( نريد قانونا يمنع ويعاقب على اغتصاب الزوجات )

أما الورقة اللى بتتوزع فمكتوب فيها

أهداف مليونية المرأة

اليوم العالمى للمرأة – 8 مارس 2011 – مبادرة شعبية 100/100

* مشاركة المرأة فى صياغة المستقبل الدستورى والقانونى والسياسى لمصر

* دستور مدنى جديد يحترم المواطنة ويكفل المساواة ويلغى كافة أشكال التمييز

* تغيير منظومة القوانين المختلفة بما فيها قانون الأحوال الشخصية بحيث تضمن المساواة التامة والحقوق الكاملة

* عدم تغليب دور المرأة الإنجابى ، على باقى أدوار المرأة العامة والخاصة

* وضع عقوبات رادعة تعمل على الحد من أشكال العنف المختلفة ضد المرأة المصرية خارج وداخل المنزل

* يجب أن يسمح الدستور للمرأة بالترشح لرئاسة الجمهورية

هذا ما قرأت وسمعت وأترك لكم الحكم .

بعدها بشوية خطوات ناحية كوبرى قصر النيل

كان فى بعض السلفيين للأسف مريت جنبهم بسرعة فكان فى هتافين رئيسيين

- بالروح بالدم نفديك يا أختاه

- بالروح بالدم نفديك يا إسلام

وأختاه هنا كان المقصود بيها كاميليا اللى أعلنت إسلامها واختفت

بعدها على ماسبيرو وكان هناك الإعتصام المشهور من أهالى أطفيح ومن جاء معهم من مسيحيين ومسلمين

وكانت برضه لوحاتهم الرئيسية كالآتى :

- يا أعيش فى بلدى بكرامتى يا أموت شهيد على اسم ربى

- يا مينا يا بلال أصل الثورة صليب وهلال ( مع رسم للصليب مع الهلال )

- دعوة عامة .. شهداء تحت التنفيذ ( التوقيع شهيد قبطى )

- يا طنطاوى ساكت ليه شفت مبارك جرى له إيه

- عالكنيسة رايح أصلى مهما جرى لى مهما حصل لى

- جايب كفنى وجاى أموت لو الكنيسة مش هتعود

- أوفى بوعدك يا مشير وابنى كنيسة الشهيدين

- إلى أكبر حزب فى مصر الأخوان المسلمين أين أنتم مما يحدث فى أطفيح ( التوقيع مسلم بيحب مصر )

- مطالبنا

* بناء كنيسة الشهيدين

* محاسبة الجناة المعروفون دون تقص فالحقائق معروفة

* رحيل محافظ حلوان ومحافظ المنيا الموالين للنظام الفاسد
دا إلأى جانب عدد من اللوحات بنفس المعنى تقريبا مع اختلاف الكلمات

 
أما اللوحة الرئيسية للمطالب فكانت كالآتى

* بناء الكنيسة فى نفس مكانها وعدد أدوارها ومبنى الخدمات التابع لها

* رجوع أقباط القرية إلى منازلهم وتعويضهم

* محاسبة الجناه ومرتكبى أحداث الشغب

* محاسبة المتقاعسين من قيادات الجيش

* محاسبة المسئولين عن مهاجمة دير الأنبا بيشوى من الجيش وإطلاق الرصاص الحى على الرهبان

* وعد بمناقشة قانون العبادة الموحد فور بدء الجلسات بمجلس الشعب

* لا للتعديلات الدستورية نريد دستور جديد

* اسقاط الإعلام المصرى الفاسد

أنا عايز الناس اللى بتفهم تحاول تفهمنى

إيه القاسم المشترك بين كل الهتافات واللوحات فى كل مظاهرة والرابط بين المظاهرات دى كلها


السبت، 5 مارس 2011

الجمعية اللى ما تتسمى + اعتراف



صدااااااااااااااااااااااع



وكمان صداااااااااااااااااااااااااااااااااااااااااااااااااااااااااااااااااااااااااااااااااااااااااااع



وكمان مرة صداااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااع



دا اللى انا حسيت بيه لما رجعت من الميدان امبارح ، تخيلوا يوم كامل مع تلاته من عضوات الجمعية ، قائد الجناح العسكرى ورغاية هانم وصاحبتها ، طبعا بدون ذكر أسماء منعا للإحراج ، لأنى محترم طبعا ، صحيح كان فى ناس كتير زى العسل موجودين ، ضياء والمهندس أحمد ووليد الدوغرى ورامى وعمرو يسرى وحسنى توهان وفولتا ، لكن تقول إيه بقى الرجالة الغلابة لما بيقعوا فى شر أعمالهم ويبقى معاهم ناس من الجمعية المحظورة وكلهم تقريبا معايا على نفس الرأى ، صدقونى لو كان الجستابو كان أرحم بكتييييييييييييييير ، وكلام فى سركم بعد اليوم ده شايف إن أمن الدولة مش وحش للدرجة ، يعنى الواحد يقضى أسبوع معاهم أرحم من اليوم ده ، وقال بيقولوا على غلباوى وشرير ، مع إنى كنت ساكت أغلب الوقت وبأقول حاضر ونعم ومؤدب جدا جدا جدا ، نقول إيه بقى على الافترا ، وبنهاية اليوم كان أخطر قراراتهم على الإطلاق وهو التعدى على الحرية الشخصية وبدأ الاكتتاب العام لسجن شخصى المتواضع وبيقولوا هتكون مليونية الجمعة الجاية علشان يطالبوا المجلس الأعلى للقوات المسلحة بسجنى ، إيه ؟ السجن الحربى ؟ لالالالالالالالا ، لو على السجن الحربى كانت تبقى سهلة ، السجن الحربى أرحم بكتييير جدا من اللى ناويين عليه ، دول ناويين يجوزونى ، رغما وغصبا واقتدارا وافتراءا واستغلالا للإنفلات الأمنى وعدم وجود قانون يحكم البلاد .



وأنا من هنا أناشد مجالس حقوق الإنسان ، والأمم المتحدة والمجلس الأعلى للقوات المسلحة ومجلس اتحاد مجرة درب التبانة ، ومجلس مدينة البدرشين بالتدخل بينى بينهم بدل ما اضطر للدخول فى مواجهات مفتوحة معاهم ويبقى الضحايا أكتر من ضعايا العبارة والقطر المحروق وإبادة القذافى لشعبه مجتمعين ، أنا حذرت علشان أخلى مسئوليتى عن اللى هأعمله ومفيش حد يطلع لى ويقول طيب كنت قلت لنا وإحنا اتصرفنا والكلام اللى بييجى متأخر ده .



وقبل ما أختم هنا وبناءا على المناقشات اللى دارت امبارح فى أمور معينة كان لازم كلمة حق عند جبار ظالم ، وبأقولها وأنا مش مصدق نفسى إن الكلام ده طالع منى ، ومذهول أكتر منكم ، يا جماعة أنا بأعلن إن فاتيما هى احسن وأحسن أخت قابلتها فى العالم ده كله ، ومش لاقى كلام يعبر عن اللى جوايا ، بس فى هدية منى لها عندى من سنين وعمرى ما حطيتها لحد على المدونة ولا حتى بعتها ميل قبل كده ، لأنهاغالية على جدا ، وأتمنى تقبلها منى .