الاثنين، 23 مارس، 2009

عذرا أصدقائى

سحقا للقانون
آسف أصدقائى فقد تم تأجيل المهرجان
فى يوم الافتتاح ووسط فرحة الجميع حض الى المكان كل من العميد فلان والعميد فلان ومعهما العقيد علان مع صحبة من
رجالهم وبعض الموظفين وتم اعلان اغلاق المسرح الخاص بالجمعية والمقرر اقامة المهرجان عليه وكالعادة لضرورة الامن
وبأمر من الدفاع المدنى والحريق
وتم إغلاقه وتشميعه بالشمع الأحمر إلى أجل غير مسمى ليلحق بما سبقه من المسارح على تلك القائمة وعلى رأسها القومى والبالون وغيرهم من المسارح الجميلة وليتم نقل المهرجان إلى مركز شباب الساحل (ولا يسئلنى أحد ما هو فلا يعلم عنه الكثيرون أى شىء )
أما عن الموعد الجديد فما زال فى علم الغيب لا أحد يعلم متى سيستأنف المهرجان
وبالتالى لا يعلم أحد موعد العروض
آسف لكم جميعا حقيقة كنت أتمنى رؤية الكثيرين
ولكن تأتى الرياح بما لا تشتهى السفن
قدر الله وما شاء فعل
ولعل الغد أفضل
***************************************************************************
لالالالالالالالالالالا
وأنا راجع وفاكر إنى هالاقى يفط متعلقة وانتظروا مفاجأة الموسم
والحق العرض الكبير
والدعوات منتشرة للحضور
وفى أول أجازة ( 12 ساعة على فكرة) أدخل ألاقى كل حاجة هس هس كده
وكمان عمالين تقولوا العنوان مش واضح
طيب ده عنوان المهرجان المكتوب فى الورق عندى
جمعية محلة الرواد
جماعة الرواد
رقم 1 (واحد) شارع الترعة البولاقية متفرع من شارع الجلاء
خلف مجمع محاكم الجلاء
بالذمة مش عنوانى اسهل
انما اقول ايه عقدة الخواجة بقى
واعلان هام يا جماعة تم تقديم مواعيد المهرجان بالكامل لمدة يوم
وبذلك يكون العرض فى الساعة السادسة يوم الأحد 29/3
وصدقونى والله العظيم ما لى يد فى تغييره المره دى الموضوع جاى من فوق
فوق قوى
إنما فى المرة الأولانية غيرناه بناء على مواعيد المهرجان بحيث نكون آخر عرض وما زلنا وسيكون حفل الختام يوم 30
وكان تحديد الموعد بناء على مصلحة أقارب الأعضاء والمدعوين من الأقاليم بحيث يتمكنوا من سماع العرض والعودة دون التعرض لزحام نهاية الأسبوع
وما زال الإعتذار ساريا عن متابعة الموضوعات الجديدة فى المدونات
أدعوا الله أن ألقاكم على خير
************************************************************************************
دعوة عامة ويا رب تبقى لمه


أصدقائى الأعزائى إنه ليسعدنى ويشرفنى أن أدعوكم إلى زفاف الأستاذ/ الأ..........
لالالالا ياجماعه زفاف إيه بس وهباب إيه
أسف أصلى فاصل ومن غير نوم تقريبا من 65 ساعة وحالتى كرب
المهم ومن غير خروج عن الموضوع خلينا نقول الكلمتين وبعدين ننام والصباح رباح وبكرة الجمعة ويا ريت تفتكرونى وقت الصلاة بدعوة حلوة إن ربنا يقوينى لإن فعلا الدنيا مقلوبة على دماغى اليومين دول ومحتاج لدعائكم معايا بصدق إن ربنا يوفقنى
ونرجع لموضوعنا
الموضوع إنى اتورطت فى مشكلة عويصة وناوى أشرككم معايا فيها إجبارى كده وكمان ممكن تسموها غلاسة لكن أعمل إيه مش لاقى غيركم يستحملنى
يوم30 مارس بإذن الله يكون تاريخ العرض المسرحى الجديد (مدد يا عالم ) والذى أشرف بالمشاركة فيه على الرغم من أنها إجبارية وضد إرادتى إلا أن الموضوع جميل ومع مخرج لا أستطيع أن أرفض له طلبا للأسف وهو يعلم ذلك ويستغله فى كل مره لكن فعلا موضوع المسرحية أكثر من رائع ونتمنى الفوز بهذا المهرجان
المفروض العرض كان يوم 26 لكن إتضح إنه يوم خميس وبممارسة سلطاتى الجبارة ودموع التماسيح وخلافه وطبعا مع الإستعانة بالكوسة ( ربنا يكترها فى بلدنا ) قدرت على تأجيله ليوم 30 وهو يوم الأثنين وكان نفسى يكون يوم الأحد علشان فى شخص واحد بحبه جدا والمفروض إنه بينزل القاهرة يوم الأحد فقط لكن يسامحنى بقى أنا حاولت على قد ما قدرت
نرجع تانى لموضوعنا يا جماعة بلاش تتوهونى فى كلامكم اتفقنا
العرض بإذن الله هيكون تبع مهرجان المسرح وبدون اسئلة برضه عن اسم المهرجان لإنها من كترمهرجانات الثقافة دخلت الاسامى فى بعض والموضوع باظ خالص
المهم العرض بإذن الله هيكون فى ( جماعة الرواد ) ودى موجودة فى القللى وعلشان الوصفة تكون أسهل الواحد يروح عند مبنى الأهرام ( بتوع الجرايد ) ويقف قدام المبنى بانبهار لفخامته ومتانته لمدة دقيقتين وبعدها يبص على اليمين هيلاقى مجمع محاكم مصر القديمة
ويمشى ناحيته لكن بدل ما يمشى من قدامه وواحد محامى يضربه باى حاجة لانى صراحة اصبحت محتارا ايهم الاكثر اجراما المحامى ام المتهم
المهم تمشوا من وراء المبنى وبمحاذاته هتلاقوا ورشة نجارة فيها اسطى شاطر جدا تطلبوا منه انه يعمل لكم كرسى علشان تقعدوا عليه لان المسرح كراسيه قليلة ومحتاج تبرعات وخلافه واى حد بخيل ممكن ياخد الكرسى بتاعه وهو راجع بيته من تانى
وبعد ما يخلص لكم الكرسى تاخدوه وتدخلوا من الباب الموجود بعد الورشة على طول هو باب الجمعية هتلاقوا لوحة كبييييييييرة عليها اعلان المهرجان
وأقرب محطة مترو هى أحمد عرابى
لكن الناس اللى هتنزل فى رمسيس ممكن تمشى لانها مسافة بسيطة
والعرض باذن الله يبدأ الساعة 6 وطبعا مساء وليس صباحا مش عاوزين ذكاوة والنبي
نيجى بقى لأهم المهم صحيح إن العرض مجانا وبدون تذاكر لكن هيكون فى صندوق كرتون من الحجم المتوسط لجمع التبرعات لصالح أخوكم العبد الفقير إلى الله والراجى محبتكم وكل واحد وزوقه بقى
وطبعا أوامر هامه
ممنوع إصطحاب الأطفال تحت 26 سنة منعا باتا ، كما يمنع أى حد بيحب المصاصات منعا باتا من التواجد وكل واحد عارف نفسه ، وكمان الناس بتوع الشيكولاته الميزانية خربت أشوف فيكم يومين حلوين
ويا ريت كل واحد يعرف بالموضوع يبلغ أصحابه ويحاول يجيب معاه أكبر عدد منهم أهو التبرعات كمان تز......
لالالالالالا يا جماعة ممنوع حد يفهمنى صح انتم عارفين ان الفلوس آخر حاجة أفكر فيها أنا مش عارف لسانى بيقول كلام غريب عنى من الإرهاق تقريبا
أنا يهمنى ألاقيكم هناك وخاصة الناس اللى فاتهم لقاء توقيع كتاب أنا أنثى وعيطوا وكانوا قربوا ينتحروا
اتفقنا ؟
استودعكم انتم والمدونة فى رعاية الله وبإذن الله أتشرف بلقائكم هناك وسيسعدنى كل من يحضر على أن تكون ظروفه تسمح بذلك وبدون أن يكلف نفسه فوق طاقتها ومن لا يحضر فله منى كل العذر والمحبة بدون أى شىء
وبالطبع استمحيكم عذرا فى التغيب الفترة المقبلة نظرا لكثافة الإستعدادات وانشغالى بأمور اضافية أخرى على رأسها الدراسة
وبإذن الله عند حدوث أى تعديل سأقوم بإضافته فى تحديث جديد
السلام عليكم ورحمة الله وبركاته

الجمعة، 6 مارس، 2009

حفلة أنا أنثى


حفلة التوقيع وأصدقائى الأحباب

كانت حفلة توقيع كتاب أنا أنثى جميلة بكل ما تعنيه الكلمة من معانى فقد تعرفت على مدونتين رائعتين وهما صاحبتى مدونة قررت أكون عانس للانستين الجميلتين آيه ويمنى الفقى وما تناولته ايه من طرح جميل لأفكار مدونتهما كما كانت هناك الأخت الفاضلة شمس الدين ربة السيف والقلم وقد استمتعت بالاستماع اليها على الرغم من قولها انها فوجئت بطلبهم منها الحديث ولكنها كانت تتحدث بثقافة وفكر جميلين وربما لم أقرأ الكتاب بعد ولكننى بعد أن أقرأه أعتقد أننى سأكتب عنه .
وقد قابلت هناك الكثير من المونين القريبين من قلبى وعلى رأسهم
الكاتب الجميل والأخ الغالى
طارق (صاحب مدونة كوارث) والذى كنت فى شوق شديد لرؤيته وكان لقائنا على غير ميعاد مفاجأة كبيرة لى وله بعد أن تواعدنا عدة مرات ولم نستطع اللقاء
أخوى الغالى محمد غاليا ( الباحث عن السعادة) أتمنى له التوفيق فى بحثه عنها
محمد (الذى يدعى انه مجنوون) ولا أصدقه بالطبع فهو عاقل ورزين وسررت للغاية بالتعرف عليه
ايمى بيبى (وهى اصغر مما تدعى امامنا وتستحق المصاصة التى وعدتها بها محاسن وابو على وطبعا ظهر كمان انها مفترية ومضهدة لسفروته )
ولا أنسى بالطبع كيارا (وأخبرتنى أن معها ضد التيار ورأيت معها أسمى آيات الصداقة بينهما فبعد أن قالت أنهاصديقتها الصدوق وانها انتيمتها وكلام كتير كده ، توعدتنى أنها ستخبر ضد بوجودى للانتقام منى لكن ومن أول مصاصة نسيت وجودى تماما ولم تخبرها أى شىء عنى ، وبعدها فوجئت أنها تحولت إلى عم عبده المهم وردت على التليفون وجريت حتى من غير سلام ) المهم
وسعدت هناك بالتعرف على العديد من المدونين
الدكتور عمرو فاروق
سفرووته ضحية إيمى
إينو صاحبة أرق إحساس رأيته هناك وربما على الأطلاق
وأسماء رمضان المدونخانة والتى ستصبح صحفية قوية كبيرة والأيام بيننا

كما افتدقت الكثيرين ممن كنت فى شوق أن أراهم
عمرو بدر صاحب الفلسفة الرائعة فى الحياة ونصيرى ضد ظلم وكيد المعتدين
الحاجة شموسة وإدعاء السفر كما أخبرتنى كيارا
أبوعلى و رومانسى اللذين ظللت منذ دخولى وحتى إنصرافى أبحث عنهما بحثا محموما
أميرتنا الغالية والتى كان وجودها سيضفى الكثير من البهجة والسرور على الجمع الجميل
وبالطبع
محاسن ولى حق عرب كبيييييير جدا لأانها وعدتنى أن تكون هناك وكمان كانت ناوية تتخانق وجبنا السلاح وفوجئت باختفائها تماما وكيارا قالت إنها مش جاية تخيلوا
ولا يمكننى أن أنسى
ضد التيار ومحاولاتى للإختفاء خوفا من نهر الدماء والذى كان على وشك أن يراق (دمائى طبعا) ولا يمكننى أن أصف كم حزنت لأننى لم أتمكن من مقابلتها مع وجودها هناك

وفى نهاية اليوم أنا كنت خلاص شطبت لأنى وعلشان أحضر كنت فى الكلية من الساعة 7 الصبح علشان أخلص بدرى وأقدر أحضر فى الوقت المناسب وحتى بكده ما كنتش قادر أسيب الكلية بس فجأة الأمور أتصلحت وقدرت أروح والحمد لله ، وطبعا أتمشيت مع طارق وتناقشنا فى حاجات كتييير وكان انسان جميل فعلا وهمه مصلحة الكتابة والكتاب الشباب وأتضح فى النهاية إنه أزهرى هو كمان تخيلوا الصدفة الجميلة
وانا روحت ميت من التعب ومن الجوع لأنى كنت من غير فطار من الصبح
ونمت زى القتيل

لكن اليوم كان جميل فعلا وأحب أقول لأى انسان فاته إنه خسر كتير جدا جدا

وسلام بقى أنا تعبت من الكلام وصدقونى أحساسى أكبر من كل الكلام المكتوب هنا