الأربعاء، 29 مايو، 2013

تعالوا نحكى ونتفسح 2


شوفى بقى
والله لولا إنك ضيفة هنا ما كنت قبلت الإعتذار اللى من تحت الضرس ده
لكن الأمر لله نعديها المرة دى
وتعالى بقى نروق دمنا بكوباية عصير قصب
لالالالا
دا مين ما يغركيش شكله الكويس
الواد المستخبى اللى هناك ده بيعمله تححححححححفة
وخصوصا إنه مش نصه تلج وخلاص زى الباقيين

إيه رأيك ؟؟؟؟؟
وحش !!!!!!!!!!!!1
طب إمشى قدامى بدل ما أخبطك ابلكوباية اللى فى إيدى
انا غلطان أساسا إنى وجهت لك الدعوة
أنا اللى جبت الغلب لنفسى

بينا بقى نكمل
هنمشى من الشارع المواجه لنا ده
لإن على اليمين وعلى الشمال الموازيين لخط السكة الحديد
ممكن يوصلونا
بس بلفة بعيدة حبتين

خلينا فى المواجه اللى على بدايته محلات الفراخ دول
لا طبعا مش بنشترى منهم
أمى اساسا من الناس اللى لا تعترف سوى بالبلدى فقط فى الأكل
ودا سر عذابى
ولما نوصل ( بالمعدل ده هيبقى على آخر السنة )
هتشوفى العذاب اللى اتعذبته فى العشش وتشكيلاتها

بعد محلات الفراخ
طبعا محل الدهب
وبلاش تبريقة العين دى
ممكن أجيب لك هدية
بس أكيد مش هتبقى ده
الميزانية لا تسمح
وقصداه زى ما إتى شايفة الجزار وجنبه المكتبة
والكتبة دى مقامة من 15 سنة تقريبا
وكل ما أسأل فيها عن أدوات ما ألاقيش
مش عارف هى فاتحة ليه أساسا
تقريبا صاحبها بيسلى نفسه ويقعد هو وأصحابه فيها
بعيد عن مراته ورغيها وكده

أما محل أدوات الصيد دا فمحل عبقرى
وصاحبه صياد قديم
وعنده من أدوات الصيد
سواء الشخصى أو العملى كتيييييييييير
وبأحب أقعد ارغى معاه لما آجى أشترى منه
الراجل دا تقريبا اتولد فى مركب
وعاش تحت الميه
حاجة كده زى فيلم 1900
وما أعتقدش إنك فاكرة الفيلم أساسا
دا فيلم للعواجيز اللى زيي بس

 أقول لك
تعالى نسترى لك منه صنارة
علشان لما نوصل للنيل ونقعد هناك نصطاد
وطبعا لو رميتى نفسك فى النيل ولا هتلمسى صنارتى
الندالة أدب

الثلاثاء، 28 مايو، 2013

خلونا نحكى ونتفسح

الفكرة  بدأت من مدونة ( ست الغلب )
 
وكعادة كل عضوات الجمعية معايا قرروا يدبسونى وإن أنا أكون البادىء للدعوة
عايزين نزور كل الأماكن بعيون بعض
ما دمنا مش قادرين نزورها فعلا
شاركونا :)

*******************************************************************

يا جايين لنا بالفرحة فى القلوب

شوفى يا ستى
ممكن تركبى القطر من عندكم
أو العربية من الموقف
اللى عندكم تحت الكوبرى على اليمين ده
بس لازم تنبهى على السواق إنه ياخد الطريق الزراعى
أو الشرق زى ما بيقولوا
ولا أقولك خليك فى القطر وريحى دماغك
هتركبى وتنزلى عندنا فى العياط مرة واحدة
ولا تتتعبي قلبك مع السواقين
ولا ريحة البنزين والمطبات والحر تخنقك
بس المهم تحاسبى من القطر اللى بيتحرق أو يتقلب وأو يخرج عن القضبان
لإن عندنا دايما بيحصل الموضوع ده

المهم أول ما تنزلى على الرصيف هتلاقينى مستنيكى ونطلع فى الجولة جواها
ولو لأ
سهل توصلى للبيت عندنا
إنتى أساسا وإنتى فىالمحطة هتلاقى على يمينك مبنى فخيم شويتي
دا المحكمة
وجنبها على اليمين مبنى جميل برضه هو مركز الشركة بعد التجديد
هو ما اتحرقش فى الثورة ولا حاجة
بس هم اتلككوا وجددوه بالمرة وخلاص

سيبك منهم وكملى الرصيف لآخره وانزلى اتمشى الكام متر دول على القضبان
علشان توصلى المزلقان وتدخلى منه
صحيح إتى ممكن تعدى كوبرى المشاة
وتمشى فى الشارع الممهد
بس مش هتحسى بالمتعة نفسها لإك هتخرجى على جنينة صغيرة قدامها محل تصوير ومحل مجمدات
وعلى يمينك عمارة الكهرباء
وعلى شمالك مراحيض عمومية
وبعدها شارع عادى ولا فيه أى حاجة
يمك باستثناء ضصيدلية كده صغيرة صحيح
بس البنات اللى فيها قمرات
وشطار جدا جدا جدا
وأهالى المنطقة بيحبوهمم

المهم وصلتى للمزلقان
هتلاقيه زى أى مزلقان فى بر مصر
جنبه بياعين الليمون والفسيخ
والفول السودانى
ومحلات فاكهة
وقصاده
وعلى الجنبين على فكرة نفس الوصف بطريقة تضحك
محل العصير
ومحل الكشرى
والصيدلية
وجملة البقالة
والقهوة
و

إنتى رحتى فين بس
بالمة دا وقت طفاسة
فسيخ إيه اللى نفسك فيه سيادتك
بأقول لك رايحين ناكل من خيرات الله
تقولى لى فسيخ
تصدقى بالله
إن الغلطان أساسا إنى جبتك من أسيوط

وهأسيبك واقفة كده وتايهة لحد ما تعتذرى
وبعدها نكمل

الاثنين، 27 مايو، 2013

علمينى يا حياة 2



علمينى يا حياة

علمينى الحب صادق
ينتشر جوه القلوب
ينتصر بره الخنادق

علمينى أجرى فى بلادى
أنشر محبة بين صحابى
أزرع أمل فى نفوس ولادى

علمينى أكون كبير
بقلب طفل والبراءة
أعلم الدنيا البساطة
نسمة هادية م الغدير

علمينى الإنتظار
علمينى الصبر دايم
والليالى راجعة تانى
فيها ضحكة والولايم

علمينى أعشق جنانى
والجنون دا عيشة حلوة
فيها حلم وشوق أمانى


علمينى أدوب فى فكرة
والأمل أهو جاى بكرة
نجرى ع الشط اللى حاير
بين قلوب العاشقين

علمينى الزرعة طلة
بعد صبر وطول مذلة
والإيدين تحصد تدندن
بالأغانى والهزيج

علمينى إن البعيد عن المكان
هو القريب
جوه القلوب
مهما ابتعد بيننا الزمان

علمينى أهتف وأنادى
فى البلاد وصوتى عالى
يا عباد الله فوقوا
دى المحبة أغلى حبه
الكراهة ضياع وغربة
والزمن ماشى فى طريقه
رغم كل الزعلانين
 

السبت، 25 مايو، 2013

الأربعاء، 22 مايو، 2013

انتبهوا أيها السادة + تحديث



وكمان هنا ( بؤجة الخير )

كلام اتقال جميل جدا 
وكلام رائع 
وصعب أزود عليه حاجة 

انا نقطة فى بحر إبداع الناس دى :)

وأتمنى كل الناس تنشر الدعوة وإننا كلنا نقدر نرسم بسمة على وجوه الناس البسيطة 

**************
أول الغيث قطرة ( اغسل قلبك )
وبعدها ينهمر المطر 
( بؤجة الخير )
( ربــــى )
( بؤجة حبنا )
( سنة الحياة )

الأحد، 19 مايو، 2013

بكرة :)



شايل لبكرة من زمان

الذكريات

مليانة عشق وشوق حنين

 

شايل لبكرة ضحكتين

الأولى ضحكة الأمل

والتانية ضحكة من سكات

على اللى فات


السبت، 18 مايو، 2013

فرحينى يا حياة



فرحينى يا حياة 

فرحينى بضحكة صافية 
فرحينى بحضن دافى 
وسط ليلة حب دايم 
والحنين جوه القلوب 

فرحينى ببحر هايج 
والسفر جوه المراكب 
فرحينى بلاد جديدة 
ترمى ذكرى ف القلوب 
تمحى حزن من اللى فات 
احساس ذنوب 

فرحينى كتير كتير 
بكرة جاى 
هنبتديه بكلام كبير 
هنبتديه والحلم صاير 
هنبتديه  والحب مالى 
قلب كل المجروحين 

بكفاياك يا ليل حزين 
بكفاياك الشمس غابت
عن قلوبنا من سنين 
بكفاياك الغربة مرة 
جوه جوفنا زى علقم 
قوم يا ليل وبسرعة لملم
وهات شروق لبكرة أحلى 
طفى شوق الحيرانين 

فرحينى بحلم تايه فى الضباب 
أحدوه زمان 
من قلب شاخ 
راح فى الغياب 
قتلوا الأمل 
واللى قتل حر وطليق 
من غير حساب 

فرحينى بكلمتين والتالتة لينا 
تمشية ساعة العصارى 
بره أسوار المدينة 
والنسيم يعلى يهفهف
صوت هدير البحر طاير
والحنين جوانا حاير 
إمتى نفرح يا حزين 

فرحينى يا حياة 

والأمل لا زال جنين

الخميس، 16 مايو، 2013

علمينى يا حياة



علميني يا حياة


علميني أكدب أخون

علميني أرمي قلبي 

تحت رجلي

علميني القسوة بدري





علميني بكرة لي


إن مفيش غاليين علي

إن كل الناس ف داهية

وإلا قلبي يكون ضحية





علميني أمشي بدري


وإن كل الناس بتجري

إني أرمي انتظاري 

إن حنيني كلام بيهري





علميني الصحبة كذبة


والخيانة مش بس فكرة

وإن سنينك اللي كانت 

واللي جاية

فيها الوحدة أحلي فكرة




علمينى إزاى محبة

وف ثوانى تكون ضغينة 

علمينى أركب سفينة 



علمينى أسيب بلادى 

علمينى أهجر ولادى 

زينى لى الغربة زينة 

فرحى ليالى الحزينة 

ع اللى كان وف لحظة راح



علمينى أنسى الجراح 



علمينى أشوف لبكرة 

أرمى ذكرى 

وسعى الخنقة براح 



علمينى أكون سخيف 

جلدى ناعم 

نظرى ساكن 

زى تعبانى المخيف 



علمينى اهجم بقوة 

أقتل بخفة 

أكون فتوة 

علمينى أجرح قلوب

علمينى أنسى الغروب 



بكفايانا يا ليل هروب 

م اللى صاير واللى كان 

علمينى يا حياة 



علمينى أكون جبان 

والكل فى القلب ساكن

هناك اشخاص يمرون في حياتك ..


فيتركون أثر جرح .. وهم كثر ..



وأشخاص يمرون .. فيتركون رائحة عطر .. وهم قلة ..

واخرون يمرون ..


فيتركونك .. شخصاً أخر ..!

وهولاء قد لا تراهم سوى مرة واحدة في حياتك”



نوف الحزامي 

الثلاثاء، 14 مايو، 2013

مكملين



حزن وفرح
بسمة أمل
بتداوى قلبى انطعن يوم
واجرح

لحظة وراحت م الحياة
كانت زمان
لكن اللى كان
حى وجميل جوه القلوب
وف كل لحظة ومن سنين
بيزيد حنين

متفرقين
بين الحوارى والبيوت
متجمعين
جوه القلوب

نعشق ندوب

نرسم لبكرة حلمنا
زى اللى فات
نصدح بغنوة فرحنا
رغم السكات

ماشيين بسرعة
مكملين
رغم الرفات
رغم اللى زهقوا واللى قالوا
الحلم مات 

الاثنين، 13 مايو، 2013

أختى أنا )



زى النهاردة من سنة
كنا سوا
والفرحة باينة فى الوشوش
أكلنا سوا
ضحكنا سوا
وسوا سوا
كنا وهنرجع من جديد

دا شئ أكيد

زى النهار الصافى
من الغيوم

زى الليالى المقمرة
فيها النجوم
تلمع بشدة فى الأفق
تهدى الحيارى للطريق

دى طوق نجاتنا
اللى اترمى
فى لحظة صعبة
واتلحق بيه الغريق
راح للطريق

رمز الحنان

بإيديها بتطبطب ع الجرح
اللى مالى قلبنا
تدى الأمل
تدى الحياة
وتحول الفرحة الحزينة
لضحكة عالية
ف السما

عدت سنة
وسنين هتيجى وتنتهى
ونعيشها أحلى
من السنة

دى أختى أنا :)





السبت، 11 مايو، 2013

مجنون أنا :)

وأنا فى الأتوبيس  حصلت مناقشة بينى وبين واحد حبيبى عن يوم عيد ميلادى اللى فات 
وقعدت أضحك لإنه معتبرنى مجنون رسمى 
مع إنى شايف إنه طبيعى جدا 
يومها كان آخر يوم لى فى المستشفى 
وبعت اتنين من التمريض ( طبعا بعد الإكرامية )

واحدة جابت لى هدية من مكان عرفته لها 
وجابت لى هدية تحفة على ذوقى 
وما زلت محتفظ بالهدية والكارت اللى كتبته لنفسى يومها :)
والتانية بعتها لمحل حلويات فى المعادى بأحبه 
جبت لى تورتة شيكولاتة تححححححححححححفة 
ورفضت أخليهم يشاركوا معايا فى الحفلة اللى عملتها لنفسى 
لكن بعدها خليتهم يقسموا التورتة بينهم 
لإن الدكاترة كانوا مانعينى منها تماما
ونمت وصحيت يومها وأنا حاسس بفرحة رهيبة :)

الجمعة، 10 مايو، 2013

أمل :(



أتدري ماهو الجحيم ؟
إن الجحيم هو ، ألا تستطيع أن تحب

دوستويفسكي

الأربعاء، 8 مايو، 2013

ألم



حبنا لشخص لجماله ليس حبًا، ولكن عندما نحبه رغم عيوبه فهذا هو الحب بكل تأكيد٠ #جبرانيات

الأحد، 5 مايو، 2013

أنا انسان




أنا انسان

أنا عايش
فى ليل الغربة وبأعافر
أضل طريقى
وفى لحظة ألاقى النور
ومن تانى
أعود شايف

وأفقد قلبى ف السكة
وأدور ع اللى كان ضحكة
وكان ف القلب من جوه
كنافة جميلة وقطايف

وهأكتب تانى
وهأغنى
سنين من عمرى مستنى
وهأستنى
ما دامت فرحتى فى قلبى
وضحكة جميلة مرسومة
على وشى
وحزنى بعيد ومتخبى
عن إنه يبان

أنا انسان

عايش خايف
من الدنيا وم اللى كان
وزادى فى رحلتى صاحبى
بيدبحنى
ويرمينى فى أقرب خان

وأنا المدبوح بسكينته
لا عمرى هأقول ولا هأنادى
بإنه خان

أنا انسان

عايش فى الدنيا
وبأدور على الغلطات
وباستغفر
وبأغلط تانى م الأول
وبأرجع أدعى للرحمن

ويبلينى ويغفرلى
وأرجع تانى استغفر
وخايف
بكرة ما يغفر
ويرمينى فى شر مكان

أنا انسان

أنا اللى الدنيا حابسانى
فى ساقية تلف من تانى
لا عارف أعيش واطمن
ولا أقتل حلمى وأكمل
شايف بكرة
وامبارح مكتفنى
ويومى يعدى والتانى
بييجى بضحكة وبفكرة
تموت فى المهد من تانى
وأرجع عيشه
عاجبانى
أكون فيها
وزى ما قالوا أجدادنا

حطام انسان