الأحد، 25 يناير 2009

تسقط الصداقة وأشياء اخرى

تسقط الصداقة وأشياء اخرى

طبعا تسقط الصداقة
اذا كان فى الموضوع اللى فات كنت خلاص قربت اخلص خالص والهانم رفعت السلاح وخلاص كنت شايف الموت بعينيه وانتم ولا اكن فى اى حاجة كله ييجى يضحك وبعدين يقولى حاسب من اللى هيحصل
ولما انت وهو وهى عارفن اللى هيحصل تسيبونى كده فى وش المدفع وتهربوا
صحيح الندالة ادب
ووسط ده كله قال الهانم التانية معرفش اسمها ايه جايه تتهمنى ان الحبر ما وصلش
طيب اذا كا انا معايا وصل ممضى منها بالاستلام جابهولى صاحب الشركة بعد ماكنت قربت اقفلهاله لما قالت انه ما وصلش
طيب مش انا من حقى ارفع قضية واطالب بالتعويض
لكن طبعا ما اقدرش
لانكم وبكدا هتوقفوا معاها برضه
ما انتوا شوية مدونين خوافين اساسا
طيب كل ده مقدور عليه وكان ممكن اعمل نفسى مش واخد بالى واطنش اهو الواحد خد على الحرب برضه ويقدر يقف ويصمد ورزقنا على الله وانا عاذركم الناس بعد 11 سبتمبر غير الناس قبلها
القرموطى طبعا كان عنده حق
وكل ده يهون
لكن انا امبارح كنت فى الامتحان وربنا سهلها كده بدعا الوالدين وجاوبت اربع اسئلة بعدين اتزنقنا ونجيب الخامس شمال نجيبه يمين مفيش فايدة زرجن وحلف ماهو متجاوب غير بدعاء حد تانى
انا شغلت الطبق وضبطت الاستقبال وعمال اجيبه من اتجاه للتانى مفيش واغير الريوستات واضبط التردد ان فى دعوة واحدة تيجى ابدا ولا ممكن واقول طيب يمكن الهانم اللى دعينالها فى السيمينار تفتكرنا وتقول اى حاجة
برضه مفيش
شوفتوا الناس بقى هيه يوم السيمينار قالت ادعولى سيبنا كل حاجة وقعدنا ندعى واسرائيل اعلنت الهدنه مع فلسطين وامريكا قررت تسيب العراق وروسيا قالت هننسحب من الشيشان والصرب اتفقوا انهم يسيبوا البوسنة فى حالها وكمان السودان اتحدت وكل ده علشان الناس تفضى تدعيلها
لما بقت داخله عليهم فى القسم بترسانة دعوات لو كان نصها مع غزة كان الوضع اتغير من زمان وبقت تشخط وتنطر فى الدكاترة وبقى ناقص تشيل رئيس القسم وترميه من الشباك وفى الاخر وافقولها على انها تسجل ماجستير من اول سيمينار فى حادثة هى الاولى من نوعها فى القسم
بعد كده راحت وادى وش الضيف ولا اكنها تعرفنا هاقول ايه سبحان مغير القلوب
المهم فجأة لقيت دعوة جامدة قوى جت وجابت السؤال معاها انا ما صدقت لقتها وضبطت الارسال على الموجة دى لغاية نهاية الامتحان وبعدين شغلت الباحث علشان اعرف دعوة مين دى اتاريها دعوة الحاجة شمس النهار وهى على عرفة ربنا يخليها لى يا رب وان شاء الله اقابلها فى عرفة السنة الجاية وينولها زيارة بيته الحرام كل سنة
المهم وبعد اللى حصل ده ولا يمكن يغتفر ابدا
انا قررت اقطع صداقتى بكل طقم النفاق ده وممنوع بعد كده حد يدخل المدونة الا اذا كان بيدعى لى ومش اى دعوة لازم تكون من القلب علشان مفيش وقت للمحاولة والغلط الامتحانات شغالة وكمان لازم يكون فى نظام الدعاء على مدار اربعة وعشرين ساعة ان ربنا يفتحها عليا واذاكر اما يومى الاربعاء والاحد من الساعة 10 الى الساعة 1 فيكون بان ربنا يفتحها عليا واحل كويس فى الامتحان وطبعا مش عاوز اتكلم عن الدعاء المضاد كان في اتنين منهم النهاردة لكن بلاش فضايح كفاية هما عارفين نفسهم
خلاص اتفقنا
على بركة الله
*************************************************************************************
نتكلم بقى فى الاشياء الاخرى
أعرف أن الكثيرين ربما يغضبون من كم السخرية والضحك وخاصة فى المواضيع الثلاثة الأخيرة التى أعتذر بشدة لمن ذكرت أسمائهم فيها ، ولكننى تعلمت منذ سنوات مبدءا جميلا وهذا بعد حادثة مررت بها جعلت منى حجرا صوانا لا يعرف البسمة ولا المشاعر ولا يجيد سوى العمل والمزيد من العمل حتى لقبت بالإنسان الألى
حتى رزقنى الله بمن علمنى فلسفة البسمة وأنها فى مواجهة الشدائد سلاح قوى للغاية فهى تقوى النفس وتبعث فيها الأمل والتفاؤل وتساعدنا على التفكير بهدوء
والأهم أنه فى وسط البسمة لا ننسى هدفنا وأن نخطط لكى نصل إليه وأن نعمل دائما على ذلك ونحن وسط كل تلك الشدائد بالفعل فى حاجة إليها ، فما زال أمامنا الكثير
الحرب قائمة فى غزة وكلنا مهددون بها ، المجتمع فى داخله يحتاج منا الكثير من الإصلاح ، الأزمة العالمية طالتنا بشدة والأرقام تهدد بالركود الذى توقعه الخبراء هذا إلى جانب الكثير من الأمور التى تتعلق بمشاكلنا الفردية
ولذلك أنا أدعوا للبسمة بالفعل فلإكتئاب لن يصلح من أحوالنا ولن يجعلنا نتقدم للأمام ، وبلدنا يحتاج منا إلى الكثير فى المرحلة القادمة ، فدعونا نتكاتف كى نبنيه كما نريد له أن يكون ، فهذا لن يكون سوى بأيدينا ولو انتظرنا ألف عام
وكما يقول شاعرنا الجميل إيليا أبو ماضى
أيّها الشاكي الليالي إنَّما الغبطةُ فِكْرَهْ
ربَّما اسْتوطَنَتِ الكوخَ وما في الكوخِ كِسْرَهْ
وخَلَتْ منها القصورُ العالياتُ المُشْمَخِرَّهْ
تلمسُ الغصنَ المُعَرَّى فإذا في الغصنِ نُضْرَهْ
وإذا رفَّتْ على القَفْرِ استوى ماءً وخُضْرَهْ
وإذا مَسَّتْ حصاةً صَقَلَتْها فهيَ دُرَّهْ
لَكَ ، ما دامتْ لكَ ، الأرضُ وما فوق المَجَرَّهْ
فإذا ضَيَّعْتَها فالكونُ لا يَعْدِلُ ذَرَّهْ
أيُّها الباكي رويداً لا يسدُّ الدمعُ ثغرَهْ
أيُّها العابسُ لن تُعطَى على التقطيبِ أُجْرَهْ
لا تكنْ مُرَّاً ، ولا تجعَلْ حياةَ الغيرِ مُرَّهْ
إِنَّ من يبكي لهُ حَوْلٌ على الضحكِ وقُدْرَهْ فتَهَلَّلْ وتَرَنَّمْ ،
فالفتى العابسُ صَخْرَهْ سَكَنَ الدهرُ وحانتْ غفلةٌ منهُ وغِرَّهْ
*************************************************************************************
تحياتى وحتى نهاية الإمتحانات أستودعكم الله الذى لا تضيع ودائعه

الأحد، 11 يناير 2009

آخر الأحزان

اعتذار عام لكل الشعوب
تم قطع التعليق على مباراة الاسماعيلى وفريق ما لإذاعة خبر الهجوم البرى على غزة
وقد تم معالجة الأمر بسرعة والعودة لإذاعة التعليق نظرا لأولويته القصوى فى هذا التوقيت
يا أمة لم تعد تضحك عليها الأمم بل تنظر مذهولة من الإنحطاط التى وصلت إليه
ولم يسبق له مثيل
*************************************************************
آخر الأحزان

تاج رقم تلاتة
من الصديقة الجميلة
والسياسية المحنكة
الدكتورة ( باعتبار ما سيكون )
لا يا جماعة بلاش النية الوحشة دى ، طبعا دى مش صورة مها ولا حتى الشبه كبير للدرجة دى
صحيح أنا لسة ما قابلتهاش لكن أنا سألت عنها صحباتها

لأ لألأيا جماعة شكل المدونة فيها حاجة غلط
عمالة تحط صور غريبة وطبعا أنا برىء منها
أنا غلبان وكلكم عارفين
وكمان انا متأكد إن مها قمر 14 ومن صغرها كمان
ما هو مش ممكن تكون سياسة ووحشة يبقى الموضوع بايظ من الناحيتين
بصو يا جماعة أنا عارف من كتاباتها إنها إنسانة رقيقة جدا جدا
وعلشان ما حدش يركبنا غلط أنا هجاوب على التاج ده وأخلص نفسى قبل ما الواحد يتورط أكتر من كده
نيجى للسؤال الأول
1- لو كان ينفع تختار عصر تعيش فيه هيبقى انهى؟ ومين الحاكم؟
أختار العصر الحالى ومش مهم مين الحاكم المهم إننا مهما كانت الأمور حوالينا نستفيد من الأشياء الجميلة ونحارب علشان نصلح الأشياء الفاسدة . المهم عدم الإستسلام للظروف وترك الأمور بحجة الأحلام ، لأنه لن يصلح أمورنا غيرنا
2- إيه اكتر حاجه بتحبها فى رمضان؟
لمة الأهل والأصحاب
وزمان كانت الروح الجميلة فى الشهر الكريم لكن للأسف ضاع كتير منها فى الوقت الحالى
3- اوصف أجمل فطار ممكن تفطره؟
بداية كل منتجات الألبان يأتى بعدها اللحوم ثم اللحوم ثم اللحوم وطبعا السلطة طبق أساسى فى كل الأكل أما الأطباق الجانبية فأى حاجة
4- لو انت حاكم هتكون عادل ؟ وهتعرف ازاى؟
صعب السؤال
على الأقل هاحاول أكون
وممكن أعرف لإن أول حاجة هتكون حرية الصحافة ومن مجموع الرأى العام للصحف والتجمعات الشبابية فى اللقاءات المختلفة يمكننى معرفة ذلك
5- مين أكتر اعلامى بتحبه؟
أعتقد حمدى قنديل ول إن آخر برنامج سمعته له كان من حوالى
أربع سنين نظرا للإنشغال
6- لو ممكن شغلانه تانيه تختار ايه؟
أعتقد مدرس علشان ابنى الجيل الجديد من البداية
7- تانى بلد تحب تعيش فيه بعد مصر ؟
المانيا لأنهم يعملون ثم يتكلمون و لأن بها شعب استطاع فى سنوات معدودة بعد الحرب أن يعيد بناء نفسه من جديد
8- اوصف ترتيبات أجمل فرح ممكن تحضره؟
أجمل فرح هو اللى كل الناس فيه فرحانين بجد
وليس الفرح الذى يكون معظمه قادم لرد جميل أو شىء من هذا القبيل
9- بتراعى كلام الناس والقيل والقال؟ وليه؟
ليس فى كل الأحوال فهناك أمور أصبحت فى نظر الناس عادية وهى فى رأيي مذمومة والعكس بالعكس
10-صحيت من النوم لا موبايل ولا كمبيوتر ولا كاميرا ديجيتال ورجعنا لعصر الأحصنه والحمام الزاجل؟
أولا أنا ما عنديش موبايل والحمد لله ورنا ما يكتبش علينا العذاب ده
ثانيا ماعنديش كاميرا ديجيتال برضه ولست من عشاق التصوير واتصور مرة كل خمس سنوات وبعدها ابعث بالصور الى المحل علشان يطلع عليها
اما بالنسبة للمعسكرات فلى فيها الاف الصور ليس عندى منها سوى عدد محدود جدا والباقى مع اصحابى
نيجى بقى لموضوع الكمبيوتر أنا استعمالى ليه يا دوب فى الابحاث ومحاثة الأصدقاء وهذا هو ما سأفتقده منه ولكنها أضرار يمكن الإستعاضة عنها بقليل من المرونة والتدريب
أما بخصوص عصر الأحصنة فيمكننى التكيف معه بسهولة خاصة وأن من حولى جميعا يفضلون لى الحياة فى العصر الحجرى وهذا رأيهم
11-لما بتحب تهرب من كل حاجه بتروح فين ؟
ليس مكانا محددا ولكن فقد أى مكان أكون فيه مع نفسى لأعيد ترتيب الأمور من جديد وأعرف ما الذى يدور بداخلى
12-امتى أول مره أخدت فيها نفس وقلت ياااااااه أنا كبرت؟
مرتين
الأولى فى أحد الأوتوبيسات عندما أتت فتاة فى الثانوية وقالت : الساعة كام يا عمو
الثانى عندما قمت فى أجازة واحدة بحضور أكثر من أربعين حفل زفاف لأصدقائى فى الدراسة
13-بتشرب سجاير ولا لا؟ وايه رأيك فى الرجاله والستات اللى بتشرب؟
طبعا لأ
ليس رأيا محددا فهناك العديد ممن أحترم عقولهم بشدة ولكنهم يشربونها فأقف حائرا بين عقولهم الجميلة وتلك العادة السيئة

14- بتعرف ايدك الشمال ازاى؟
إنها فى نفس الجنب مع رجلى الشمال
15- اكتر اله موسيقيه بتحبها؟
البيانو
16- ليه قله الذوق والنخوه اتعدموا؟
هم لم ينعدموا ولكن فقد الناس للهوية والإنتماء والفراغ الدخلى نتيجة لما يحيط بنا من غموض أدى إلى ضياع الكثير من القيم
17- ايه الحاجه اللى لو حصلت هبقى سعيد ؟
أن يكون لى بصمة فى رجوع مصر منارة للعالم الإسلامى واشعاع حضارى للعالم أجمع كما كانت من قبل
18- تحب أرض زراعيه ولا اجنس عربيات ولا كام عماره ولا فلوس فى البنك؟
فلوس فى البنك أشترى بجزء منها أرض زراعية وبالباقى أزرعها
19- تحب؟ البحر ولا النيل؟
زمان كان النيل لأننى كنت أجد أماكن جميلة أقف فيها عنده أما الأن فالبحر للسبب ذاته
مركب ولا طياره؟
على حسب الغرض منها لو شغل طيارة
ولو نزهة يبقى مركب
شخص مجنون ولا عاقل؟
اخنلفنا أنا بقول عاقل وأصحابى يقولوا لأ مجنون
تقرا كتاب ولا تتفرج على فيلم؟
على حسب الكتاب والفيلم
التاج لمين؟
لم أكن أحب أن أهديه لأحد لأن البعض لا يحب ذلك ومنهم أنا
ولكن أهديه إلى كل الأصدقاء الذين يزوروننى دائما ويجدون فى أنفسهم الرغبة فى حله بدون تكليف
***************************************************************************
الحمد لله خلصت كمان دين وده هيكون الأخير لأننى أريد أن أبدأ فى الكتابة عن عدة مواضيع أخرى ولذلك سيكون هذا الأخير مؤقتا
المفروض أن هذا التاج كان يوم الجمعة الماضية وذلك لمحاولة رسم الإبتسامة على شفتى مها قبل السيمنار
وبعدين بقى
لا يا جماعه أنا هاختم قبل المدونة ما تجيبلى مشاكل أكتر من كدة
وعموما أسألكم الدعاء لأهل غزة
ولنا
وللجميلة مها أن تتم الماجستير الخاص بها