الجمعة، 29 مايو، 2009

سالمة يا سلامة + اعتذار

أصدقائى الأعزاء
كانت نيتى أن يوم الجمعة هو أجازة أعود فيها إلى متابعتكم والتعليق على الجديد قدر المستطاع ولكن للأسف بعد تعليقين أو ثلاثة فوجئت بوجود فخ وضعه لى احد الأصدقاء تسبب فى تدمير الكثير من نظام التشغيل لدى ولاسباب معينة يتعذر استبداله فى الوقت الحالى مما استتبع أن أقوم بإصلاح ما فسد مما استغرق منى اليوم بطوله
لذلك أرجوا المعذرة ممن قد يجد أننى علقت عند أحدهم ولم أعلق عنده
وموعدنا الجمعة القادمة بإذن الله
***************************************************************************
رحنا وجينا بالسلامة

الحمد لله يا جماعة رجعت البيت بسلام بصراحة كنت خايف كتير إن الموضوع يبقى صعب لكن الحمد لله كان سهل
إيه ؟
حصل إيه ؟
خلاص نحكى الموضوع من الأول أنا بس كنت فرحان برجوعى لكم والحمد لله يوم الأربعاء فوجئت بصوت جميل فى التليفون بيكلمنى ، وهوب تتطلع أحلى مدونة موجودة



وتخيلوا بتستأذن منى إننا نتقابل علشان أتعرف عليها مش عارفة إن مجرد بس أمر منها يخلينى فى ثوان أروح لها ولو كانت فى نيوزلندا
المهم طلبت كمان إنها تعمل قعدة صلح مع مندوبين من حزب الشر والأذى وهنا يا جماعة حوالى أربع أو خمس فئران بدؤا يلعبوا فى عبى أنا أضمن شمس برقبتى ماشى إنما هم مستحيل
لكن هى طمنتى وقالت لى إن أنا أروح تحت حمايتها وإنها هاتجيب اتنين أمناء شرطة يوقفوا على الباب وتكون هى رسول السلام ما بينا
الخلاصة وافقت بس علشان أتعرف عليها ولجل الورد ينسقى كل حاجة فى الدنيا واتفقنا على كوستا النادى الأهلى
لكن بصراحة يا جماعة انا برضه كنت خايف وهو اتنين أمناء يكفوا برضه ؟
قلت اعمل حسابى
واتصلت بشوية من أصحابى القدامى من أبطال الجمهورية السابقين لزوم التواجد وتأمين المكان من بعيد لبعيد والتدخل عند حدوث أى طارىء ، وكمان اتصلت بأصحابى من أيام نادى الكلية الحربية وبلغتهم بالموضوع كله ، ووعدونى يتصرفوا وفعلا يوم الخميس بالليل بلغونى إن المشير أمر بعمل استنفار عام لجميع الوحدات القريبة من المكان زى الجبل الأخضر والمرج وكمان كتيبة من الحرس الجمهورى و تم وضع أربع أسراب جاهزة للإنطلاق من مطار ألماظة الحربى للتدخل مع أول إشارة
وأنا بعد ما سمعت كده إطمنت شويتين لكن وأنا رايح اتصلت بوالدتى مين عارف يمكن تكون آخر مرة وصليت الجمعة ودعيت ربنا يكون معايا فى المواجهة دى وإن القوات دى تكفى لمواجهتهم حاكم إنتم عارفين إنهم جبروت .
ورحت هناك وطبعا وصلت الأول وعدت فى الدور الأرضى مع أختى ( كانت معايا نوع من الحماية برضه ) وهوب وعدى اتنين كده ممكن تقولوا شبه المفتش
كرومبو والمساعد بتاعه ( وأعذرونى لعدم ذكر أسماء لأنى وعدت بالحفاظ على سرية الشخصيات )


لكن أنا ما اهتمتش بيهم وشوية وعدت حتة بنوته جميلة جدا جدا جدا ورشيقة كده وواضح احترامها من أسلوب مشيها ولبسها وصراحة فكرت أروح اسألها إن كانت مرتبطة أو لأ وبعدها أتصل بالبيت ونروح نخطبها لكن فقت فجأة على تليفون شمس وهى بتقول إنها وصلت ومستنيانى فى الدور التانى ف طلعت وهوب اتسمرت مذهول طلعت البنوتة الحلوة شمس
أن أتخيل إزاى إن دى يا جماعة ممكن تكون اكبر منى أساسا أنا جنبها جدو عبده وحفيدته
الموقف عدى على خير والحمد لله وأنا اتسحبت وقعدت جنب شموسة علشان حماية مفيش حد عارف إيه ممكن يحصل وبابص بعينى كده ولقيت مين قاعد معاها
المفتش كرومبو والمساعد بتاعه لكن المرة دى من غير النضارات وكانت عينيهم أقول إيه بس ، أنا وعدت شمس إنى أسكت ومش أقول لكن بجد يا جماعة اسمحوا لى انتقد
عمرو بدرلأول مرة فى حياتى ( وكنت أتمنى يكون موجود لكنه مشغول فى الصعيد للأسف)

على الرغم من قوة ملاحظته لكنه كان بيقول عن شمس النهار ( أميرة ) لكن يا جماعة دى ملكة بكل ما نتخيله عن كلمة ملكه من معانى جمال وثقافة وحزم وحسم وكمان هيبة كبيرة جدا
كانت كل ما حد يحاول يغمز ناحيتى بأى حاجة تبص له بعينها يقع فورا
وأنقذت حياتى أكتر من مرة لإنى لاحظت المساعد بتاع كرومبو أكتر من مرة بيحط إيده ناحية جيبة شكله كده كان شايل فيه مية نار أو حاجة زى كده وطبعا كنت أنا المقصود
لكن الحمد لله شمس كانت مسيطرة على الوضع سيطرة كاملة مش بأقول لكم ملكة حقيقية
وبدأنا نتكلم لقيتهم فعلا أحسن عينة من الحزب ، عارفين البنات الغريبة دى اللى بتبقى مثقفة كده وبتحب القراءة وعارفين هموم بلدهم وبيحاولوا يحاربوا علشان يشيلوها عنه أهم دول ، بنات كده من النوع اللى يخلي أهله فخورين إن دول بناتهم ، وتفخر بلادهم بيهم
بالذمة دى بنات تنطاق ، فين بس البنات المكبرين دماغهم وعايشين فى الغيبوبة بجد الواحد مفتقدهم
المهم فضلنا نتناقش ونحاول نوصل لحلول سلمية بينى وبين الحزب بتاعهم لكن فى الأخر وكطبيعتنا انتهينا إلى وعد بلقاء جديد لبحث الأمور وجولة جديدة من المباحثات بين الأطراف المعنية بالصراع ، وتم سحب القوات والتأكيد على انتهاء حالة التأهب المعلنة
وبعدين مشيت صراحة وأنا زعلان لإنى بجد كنت أحب إن أقعد اكتر لكن ظروفى وظروفهم للأسف كانت صعبه وكان الكل مرتبط بأشياء تانية
وكمان أنا شرفت بتعرف شخصية جميلة وهى كيمو صاحب مدونة صوت من مصر وبصراحة كان انسان جميل وإلى اللقاء فى جولة أخرى من المباحثات


الاثنين، 18 مايو، 2009

وكمان تاج

لا يلدغ المؤمن من جحر مرتين

بالذمة دا كلام يا جماعة يعنى أنا قلت أسدد ديونى قبل الإمتحانات وأخلص وبدأت بأول تاج وبعدين لقيتكم بتقولواخليك فى المذاكرة وبعد الإمتحانات الباقى ، وأنا صدقت وبدأت انتبه للمذاكرة بشكل أكبر وامبارح رحت الإمتحان وأنا داخل شى ء إلاهى كده قال لى يا واد اعتمد على مذاكرتك وبلاش دعوات مفيش حد ضامن ممكن دعوة زى بتاعة الترم الأول توديك فى داهية وعنها وقفلت جهاز الإستقبال وقلت بإذن الله ربنا يكرمنا بالمذاكرة وبدعاء الوالدين الموجود معايا دايما لكن برضه شغلت جهاز التسجيل وقلت برضه أى حد يدعى دعوة حلوة نعرفها ونردها له فى مناسبة كويسة والحمد لله خلصت إمتحان على خير وبعد ما خرجت بأراجع الجهاز وألاقى كمية دعاوى مكثفة بطريقة غير عادية وكلها من قلوب أعوذ بالله من سوادها وطبعا الدعاوى دى من حزب الشر والأذ ى بقيادة
يويو و تشفيدة هانم
علشان التاج بتاعهم المتأخر عندى من فترة وهم من ساعة ما شافوا اجابة التاج اللى فات والغل فى قلوبهم وطبعا اجتمعوا على هم والحزب بتاعهم تخيلوا إنهم كانوا بيدعوا بمعدل 30 دعوة فى الدقيقة يعنى لولا كرم ربنا كنت أنا رحت فى داهية وعليه فأنا قلت ادخل أجاوب محدش ضامن الظروف
المهم

إسمك ؟
- تصدقوا بالله أنا أشتريت استمارة علشان البطاقة الجديدة وبإذن الله أول ما تطلع أكتب لكم بياناتها كاملة
المشهور بيه وسط اصحابك ؟
كالعاده لكل مكان شهرة معينة لكن فى الأغلب لقب الأزهرى
سنك ؟
يوم شم النسيم كان 23 واحسبوا انتى الفرق بقى

مجال دراستك ؟
المجال الأساسى الفنكوش ( تفتكروا يبقى إيه ، نخلبها مسابقة الموسم )

اسم مدونتك ؟
بعيد عن الناس أم عيون مدورة أنا عندى اتنين
- الفارس الأخير
-ذكريات
صورتك الرمزية فى المدونة بتعبر عن إيه؟
أنا عندى عادة إنى معظم مستنداتى الإلكترونية بأحملها على إسطوانات ويوم ما قررت أدخل التدوين كانت الصور الموجودة على الكومبيوتر أربع صور بخلاف الخاصين بنظام التشغيل وكلهم عن الأحصنة فكانت الصدفة هى السبب فى وضع الصورة لاأكثر
هل فكرت فى إغلاق مدونتك؟ و السبب؟
إطلاقا ولو فكرت أبعد برضه تفضل مفتوحة لأنها أراء يهمنى الناس تعرفها
إيه رد فعلك لو حد قل أدبه عليك فى المدونة ؟
أرد بأسلوب مهذب وأفهمه حسن الحوار ، لو كان بألفاظ قد تجرح الأصدقاء الذين يدخلون عندى عندها مضطرا أحذفه

أسوأ مدونة دخلتها ؟
المدونات التى تهاجم دون استناد إلى فكر ورأى ولكن لمجرد الهجوم ، كما لا تفتح مجالا لنقاش ما عرضته

هيحصل إيه للايميلات بعد ما تموت ؟
لم أخطط لذلك

إديت الباسورد لحد من قبل ؟
أبدا ، ولو أن هناك من أصدقائى من يمكنهم التوصل إليه
السفر بالنسبة لك ؟
عمل وتعلم وهروب

المود بتاعك إيه ؟
هادىىىىىىىىىى جدا لدرجة تغيظ الكثيرين وأنا منهم

بتعمل ايه فى وقت فراغك ؟
لم أتعود أن يكون عندى وقت فراغ

الأكلة المفضلة ؟؟
منتجات الألبان عموما
لكن فى المطبوخ طبعا المكرونة بالباشميل تليها اللحوم

الصفات اللى اخدتها عن والدك ؟
عشق القراءة والنحو والرياضيات
مكتبة تحوى 800كتاب معظمها من المراجع الكبرى وقد زات إلى الأضعاف الأن
صوته وحب الناس له

الصفات اللى اخذتها عن والدتك ؟
الإصرار على الوصول للهدف
أن يكون اليوم هو أساس الغد
النظرة الواقعية
احترام الناس لها

أكثر 6 حاجات بتكرههم ؟
الخيانة
العشوائية
عدم الإنتماء
التظاهر
السلبية
الكتابة
أكثر 6 حاجات بتحبهم ؟
النظام
النجاح
مساعدة الأخرين
القراءة
المقالب
لعبتى

شخصيتك نوعها ايه ؟
صعب الانسان يوصف نفسه (مقتبسة من يويو)
لكن والدى وأصحابى دايما يقولوا
إنى بأنافس الكومبيوتر فى إنى بأتم كل شىء بسرعة ودقة وإنى من غير مشاعر

لماذا دخلت عالم التدوين ؟
أستأذن فى تأجيل إجابة هذا السؤال لمناسبة قريبة

أهمية التعليقات بالنسبة لك ؟
يبين لى أننى هل ما زلت أسير فى الطريق الذى رسمته أم أننى حدت عنه فأصحح المسار ، كما أنه يعطينى الكثير من الأفكار مما يكون عندى حصيلة جيدة
اجمل كلمه اتقالت في وصف مدونتك.....؟
شمس النهار يقول.
عندما وجدت الاسم فيه الازهر توقعتان اجد مدونه متجهم زي الموضه اللي ماشيه ديني متدين يعني تجهم وعبوس وتكشيرهبس الحمد لله وجدت مدونه مبهجه وجميلهوكلمات رقيقه جداربنا يكرمك ان شاء اللهكل سنه وانت طيب
أحلى بوست كتبته مع لينك له والسبب؟؟
كلهم أجمل من بعض طبعا لكن أقربهم لقلبى
اللعنة لأنه كان يحكى عنى فى الواقع لا فى الذكرى
أفضل مدونة قرأتها ؟
هنا سأقوم بترتيب بسيط إلى حد ما للمدونات التى أتابعها وبالطبع ليس نهائيا كما أنه من الممكن أن تقع بعض المدونات منى فليلتمس لى أصحابها العذر سواء للإمتحانات أو خلافه
- فى البداية مدونة
قبل الطوفان وهى من الأسباب التى أعادتنى إلى عالم القراءة فى الكتابة الحديثة كما أنها تحتوى على فكر قوى وقلم نظيف
- مدونات فكرية متميزة
أمة الله و يلا نحب .. kz و نبضات قلم و ن و ميامسا و غواية...مجرد غواية و فارس قديم و صباح الفل و شمس النهار و مواطنون ضد الشعب و حبشتكنات فلسفية و القادمون و وميض ابتسامة وغنى عن الذكر أن الترتيب لا معنى له

- وطبعا الفرسان الثلاثة فشكوووول دوت كوم و فـركـشاوي..نـاوي... و حـسين حـامـد سـباق ( رئيس التحرير ) والترتيب له معنى (والكلام لك يا جارة )

- مدونات المتأملين فى الحياة قــصــاقيــص و عالم جيجي الصغير و The Lost Princess و بسم الله الرحمن الرحيم و الطريق الى الله و مواجهات و خواطر و الزمن الجميل و الدنيا ريشة وقلم و SHAPE YOUR LIFE و قصاقيص حبيبه و t3alo nfakr sawa و nostalagia و فتافيت الملح و تــنــفــيــس مـلـكـش فـيـه و سمكه واحده و الكــيــت كـــات و اوتار مدونة تبع مزاج صاحبتها سياسية دينية اجتماعية بين قوسين كل حاجة واصحي يا مصر و عوده مملكه الزمن الجميل و عودة الحياة و تنهيدة و [جمعاوي gam3awey و هل تبحث عن السعادة؟ و ح ـــروف متنـاثـره و عايزه اتطلق و و المدونخانة و نظرة و خواطر شابه تعيش مع الآخرين وتريد ان تكون هى و رودى هانم و feelings و قررت أكون عانس و جَـــنـًـــــة و الـمـلـتــــقى و عندما تعجز الكلمات و Butterfly و بلاش فضايح و محاولات للبحث عنى و يا دنيا ... يا غرامي وأكرر أن الترتيب لا معنى له

- مدونات القصص الجميلة كوارث و Rosa و حـــكاوي القهـــاوي و اعشق فى الليل ضوء القمر وأعذرونى إن قلت أن الترتيب هنا حسب رأيى الشخصى وإن كنت أثق فى تفهمكم

- أفض مدونة شخصية هى إنها الحياه - مدونتى الرئيسة - بجد يا جماعة صعب ألاقى عندها جديد وأقرأ غيرها حتى لو فى قبلها لم أقرأه بعد لإن فعلا روحها خفيفة فى الكتابة وعندها فكر جميل لكن لو عايزين نصيحتى ابعدوا عنها دى مفترية دى فاضحه اخواتها وصحباتها واساتذتها والشارع اللى جنبها والبلد اللى بعدهم بعشرين كيلو

- أفضل زوجين فى التدوين زمن الشيكابالالالا و صدى الصمت والترتيب له معنى ففى اللغة العربية يقدم الرجال وليس النساء أولا ( هى كده ) المهم فعلا قمة فى التوافق ربنا يخليهم لبعض ويبارك لهم ويهنيهم دايما بحياة سعيدة وآمنة (بشرط يفتكروا وعدهم لى)
- مدونات خفيفة على المعدة والعقل والقلب
حـــــبــــــة صـــــمـــــت و غلطة مطبعية و مين فين ليه و تررم و Me AnD My FrIeNdS و القدر و انا و Princess&Sunset و طوبة فضة وطوبة دهب و اقاصيص
- مدونات عالم الصحافة ربنا يعيذنا منه
دقي يا ساعة الجامعة و التحدى ما هو إلا اكبر دليل على إثبات ذاتنا ..........

- أفضل مدونة للقراءات من قراءاتى

- مدونات أفتقدها كثيرا الأستـــــــاذ و مذكرات زوجة شابة جدا و بنت القاضي و لا تحاول أن تجعل ملابسك أغلى شيء فيك حتى لا تجد نفسك يوماً أرخص مما ترتديه و فارس... ولكن... بلا جواد و هى فوضى و أكون أو لا أكون... الحريه لمنتظر الزيدي.. و المهاجر و أيام وعيشنها و شمس اللقاء و مركـــــــب ورق و !!عجبى!! و احنا حبايب و نبض الروح و Me... My Thought و مجرد رأي و انا والعالم من حولى وطبعا مدونة قلب شاعرة والتى للأسف لا يوجد رابط لها يعمل على الرغم من أنها كانت جميلة جدا

- مدونات تعرفتها حديثا وبإذن الله أسعد بهذا التعارف ومضات و محارة اللؤلؤ الندية من تربة القدس الابية و طعمية سخنة و صعبان علىّ حالنا

- مدونات حزب الشر والأذى عوووووfokaak meny و ضد التيار و انا والنجوم والدلو وهواك و عالم مولان و مخنوقة و life is still smiling on u و تخاريف آيوشة
والترتيب هنا لا يهم المهم يولعوا كلهم ( ملاحظين حاجة فى الحزب ده )


أفضل بوست قرأته ؟
من المستحيل إجابة السؤال لأنهم يختلفون فى الموضوع وفى كيفية طرح

الشغل بالنسبة لك ؟
حياتى.

الانترنت بالنسبة لك ؟
وسيلة جيدة لعرض الأراء والتعرف على الشخصيات الجميلة والتواصل مع من أبعدتهم الأيام عنى
تمرر التاج لمين ؟
كما قلت من قبل
لا يؤمن أحدكم حتى يحب لأخيه ما يحب لنفسه
*********************************************************************************
بأستأذ نكم يا جماعة بعد التعليق على التاج ألاقى رأيكم
هنــــــا ضرورى

الجمعة، 8 مايو، 2009

تاج




طبعا يا جماعة أنتم عارفين إن الإنسان فى لحظات الخطر بيفتكر كل الماضى بتاعه وبيندم على أخطائه وأكتر حاجة أنا بأخاف منها هى الديون وبما إن الإمتحانات داخله ةالواحد ناوى يدخلها نضيف علشان ربنا يكرمه قررت أسدد ديونى ودى البداية تاج تم إهدائه من
الأميرة و الوردة البيضا على التوازى وربنا يعينى وأقدر أسدد الباقيين قبل ما أمو...... لالالا يا جماعة أقصد قبل ما الإمتحانات تنتهى وبمناسبة جدول امتحانى فهو نفس الجدول القديم ويبدأ فى 17 مايو وحتى 20 يونيه ولا حول ولا قوة إلا بالله

السؤال الأول : متى بدأت التدوين؟ وكيف دخلت هذا العالم؟

- بدأت التدوين فى 20 سبتمبر 2008 وكانت اول مرة أسمع فيها عن هذا العالم حين اعتقل محمد عادل وقامت المظاهرات لأجله فى الجامعات ولم أهتم بذلك ظنا منى أنه مثل عالم المنتديات الذى لا أدخله لأنه غالبا ما يناقش أشياء غير ذات أهمية بالنسبة لى ، ولم أحبه وما زلت كذلك ، وبعد مرور وقت فوجئت بالعديد من الأصدقاء يدعوننى إلى أن أدخل المنتديات للرد على العديد من الشبهات التى تثار حول الأزهر والإسلام وأقتصر الأمر على ذلك بعض الوقت إلى أن فوجئت بأن خالى هو أحد المدونين ومن قائمة المدونات عنده دخلت على العديد من المدونات الأخرى ووجدت أناسا يحترمون الكلمة ويدافعون عنها ويكتبون أشياء قيمة وكانت مدونة قبل الطوفان هى القشة التى قصمت ظهر البعير فبعد فرائتها بدأ التفكير فى الدخول إلى عالم التدوين بعدها أصبحت بينكم هنا .

السؤال الثاني : ماذا كان انطباعك في البداية؟

- الحماس المشوب بالحذر من أن أخطىء الطريق الذى رسمته لنفسى أو أن أكون غير قادر على توصيل رسالتى إلى المتواجدين بهذا العالم ولكن أعتقد أننى نجحت فى ذلك إلى حد كبيروالحمد لله

السؤال الثالث: من أكثر شخص تحب تعليقه على البوست الجديد؟

- كل الناس بلا استثناء وخاصة الذين يخالفوننى الرأى لأننى أكتسب منهم وجهة نظر جديدة ربما تقودنى إلى طريق أصوب من الذى كنت أمشى فيه أو تبعدنى عن خطأ كنت أقوم به .

السؤال الرابع: ما أهم الأمور التي تعلمتها من عالم التدوين؟

- أنك يمكن أن تكون أصدقاء من جديد وتنهى تلك الحياة المغلقة التى عشتها لسنوات ، وأنك يمكن أن تفتح صدرك للناس لتخرج ما بداخله دون خوف أو وجل.

السؤال الخامس : ما أكثر شيء كرهته هنا؟

- من يتعامل بأسلوب غير حضارى يستخدم ألفاظا غير لائقة فى التعبير عن رأيه ، وأكره أكثر الذى يهاجم الآخرين لمجرد الهجوم دون وجود ما بستدعى أو دون الإستناد إلى أساس معين ، فثلا أنا على أتم الإستعداد لتقبل أن يهاجم أخد الإسلام بشرط أن يكون ذلك بناء على نقاط واضحة وأن يتقبل الحوار ولا ينغلق أمام المناقشة لأراءه .
السؤال السادس: هل تشعر أن للتدوين تأثير؟

- على المستوى الفردى فقط ، أما على المستوى العام فما زال أمامه الكثير .

السؤال السابع : اذكر ستة أسرار لا يكتشفها من يقابلك لأول مرة؟
- قوتى
- ضعفى
- إنى بأفهم
- إنى نشيط
- إن عندى قلب

السؤال الثامن: 7 أشياء تتمنى أن تفعلها؟

1- أن يكون لى دور فى عودة مصر درة العالم الإسلامى وفى عودته سائدا على العالم من جديد.
2- أن أعيد للأزهر ما ضاع من مكانة فى قلوب الناس.
3- أن أزرع ثقافتنا داخل قلوب الناس من جديد.
4- أن أرى السعادة دوما فى عيون والدى بما أقدمه لهم من أشياء بسيطة هى كل ما أملكها.
5- أن أعيش فى هدوء .
6- أتمنى أن أتعلم كيف أتعامل مع الناس فى غير العمل
7- أن أبكى

السؤال التاسع : 7 أشياء لم تستطع أن تفعلها؟

1- ان أتجاهل المخاطر التى أرى وطنى يواجهها
2- أن أترك صديقا فى محنة
3- "تكبير دماغي"
4- أن أرفض طلبا لإنسان أستطيع أن ألبيه له ولو كان على حساب مصلحتى
5- أن أخبر الناس بما بداخلى
6- أن أحافظ على أكبر اسباب سعادتى
7- أرجع سنة تانية ثانوى من جديد

السؤال العاشر: 7 عبارات ترددها دائما؟

- يا الللللللللللله
- لله الحمد من قبل ومن بعد
- يااااااارب
- المهم
- يالا يا تنابله
- صباح الفل !!
- دنيا!!

السؤال الحادي عشر: 7 مشاكل في حياتك ممكن تحلهم بالفلوس؟

- رحلة حج للكثيرين من أحبابى ومن غير القادرين المشتاقين لذلك
- رحلة إلى اليابان لدراسة الإلكترونيات وبعض الرياضات
- رحلة إلى ألمانيا لاستكمال دراستى الجامعية
- رحلة إلى أمريكا لاستكمال دراستى للبرمجيات
- استصلاح جزء كبير من الصحراء
- بناء جامعة تعتمد على المصريين فى تعليم المصريين تعليما صحيحا
- بناء نادى أعلم فيه كيف تكون الرياضة منافسة لا حرب

السؤال الثاني عشر: 7 أماكن تحبهم؟

- بيتنا
- أرضنا الزراعية
- كليتى
- شط النيل عندنا وليس فى القاهرة
- مطروح
- نادى الجيزة
- إسكندرية

السؤال الثالث عشر: أشخاص تحبهم غير ماما وبابا وإخواتي؟

- ممكن نقول صلاح توئمى فى الحياة على الرغم من المسافة بيننا ، دينا تعتبر أختى الصغيرة وهى بالمناسبة فيها شبه من كيارا ولن أذكرالشبه منعا للزعل ، صاحبة المكرونة لو فاكرينها وزوجها انسان محترم فعلا وابن بلد "أدينى قلت كلمتين حلوين عنكم اهه"، أحمد أحسن فلاح فى مصر فى رأيي الشخصى ، علاء واحد من أكبر العقول فى مجال حماية الشبكات وعقدة أمى ، حاتم إنسان ممتاز وساعدنى كتير ، محمود مهندس عبقرى كان ناقصه بس يحب القراءة وأحبها وأنطلق ينهب من مكتبتى ، سهام كارثة من كوارث الزمن ، طه رئيس مجلس إدارة الحديد والصلب وهيثم وزير الزراعة جيرانى ومن العقول الجميلة ، كريم صاحب أحلى ضحكة وأجمل نكته ، خالد ومحمد دكاترة الشلة ، محمد ممدوح المفكر التائه ، أحمد عادل عبقرى رضى بأن يسجن عقله ، أسماء "قاسم السماوى" ، رمضان النائب العام ، محمد على مدربى ، كفاية كده يا جماعة الباقى التاج القادم إن شاء الله .

السؤال الرابع عشر: مدونين تحب أن تقرأ لهم؟

كل من دخلت عندهم أحب أن أقرأ لهم وهذه ليست دبلوماسية ولكن من يعرفنى يعرف أن أكثر ما أكرهه المجاملة وخاصة عندما لا تكون مضطرا لها ، وأنا لا أحد يجبرنى أن أدخل وأقرأ له ، وأعلق عنده .

السؤال الخامس عشر: ما الحالة التي تكون فيها أثناء الكتابة وما طقوسك؟

لا طقوس معينة فقط أن توجد داخلى الرغبة فى أن أكتب ، وأكثر ما نشر فى المدونة كتبته فى المواصلات ، لأننى عندما أركب يكون هناك احتمالين إما أن أجلس أو أظل واقفا ، لو جلست أو وقفت مع عدم وجود زحام أقرأ ، أما لو وقفت مع زحام فهذا معناه أن أبدأ فى الشرود وتكوين أفكار وكتابة موضوعات داخل العقل ثم تفريغها على الورق فى وقت لاحق.السؤال الأخير: لمن تمرر هذا الواجب؟لا يؤمن أحدكم حتى يحب لأخيه ما يحب لنفسه ، وبذلك لن أمرره لأحد

والسلام عليكم ورحمة الله وبركاته

الجمعة، 1 مايو، 2009

باركولى




يا جماعه باركولى
أنا قابلت فشكوووووووووول
أيوه صدقونى قابلته فى الدقى يوم الأحد الماضى بعد صلاة الضهر
وكانت مقابله جميلة جدا وأنا كنت طاير من الفرح
بتقولوا إيه كداب ؟
لا كداب إيه يا جماعه ، أنا أزهرى والكذب من أكبر الكبائر
والله يا جماعه قابلته
ولقيته شاب زى العسل بتاع كده أربعة وعشرين خمسة وعشرين سنة مش أكتر من كده
لكن هو وعلشان خايف الناس تحسد العسل والإحترام ده كله بيقول على نفسه عجوز
وتخيلوا إنه وعلشان يخلى الموضوع يبقى حقيقى صبغ كام شعره كده باللون الأبيض
قال إيه فاكرنا هنصدق
يا جماعة أنا من هنا بأنادى على صعلوك ابنه وأقوله يخلى باله من أبوه ويبلغ والدته إنها تحبسه فى البيت وتمنعه من الخروج منعا باتا
راجل بالحلاوة دى كلها وبيركب المواصلات ويسافر ورايح وجاى والبنات يا عينى صعب تستحمل وممكن فى أى وقت يلاقوه إتأخر بره البيت وبعدين يعرفوا إن فى بنت خطفته واتجوزته عافية كده
صدقونى يستاهل أكتر من كده بكتيييييييييييييير
لكن الصراحة يا جماعة أنا فى الأخر كنت ماشى وفى نفسى حاجة كده ناحيته برضه
تخيلوا إنه انضم لحزب أمى وخالتى ضدى
أيوه فاكرين لما كلمتكم عنهم يوم المكرونة والضغط بتاعهم ضدى
أهو بقى فشكول أول ماشافنى ويا دوب بنتكلم ولقيته بيقول لى إنت لازم تتجوز يا أزهرى
أيوه ما هى دى مشكلة الساعة بينى وبينهم
هما عايزين إنى أتجوز وفاتحين فى الموضوع ده من يوم ما خلصت الثانوية والموضوع معشش فى دماغهم وكل ما أقول يا جماعة الصبر حلو ، طيب مش وقته يقولوا لأ
كل أصحابك وأولاد أعمامك إتجوزوا ومنهم ناس خلفت كمان وكلهم من سنك وأصغر منك
يبقى أنت قاعد ليه وساكت
أٌقولهم يا جماعة نأجل الموضوع شويتين
أمى تقول جدك الشيخ جاد الحق إتجوز وهو فى سنك وكمان الشيخ الشعراوى
وأنا رافض
وبدئوا معايا خطة الحصار النفسى والمعنوى وخطط قصيرة المدى وطويلة المدى ومتوسطة المدى وربنا يعينى فى الحرب الأهلية الموجودة فى بيتنا
لالالالالالالا يا جماعة بلاش الابتسامة الخبيثة دى والنظرات من تحت تحت والهمس ده أنا بأكرهه
أنا عارف إن فى ناس منكم بتقول إن العكس هو الصحيح وإن أنا اللى بأتحايل عليهم
طيب تخيلوا كده شاب عسولة زيي جسم رياضى ولا عبد الفتاح القصرى وطولى لا يقل بأى حال من الأحوال عن 122 سم وطبعا أوسم من الشاويش عطية ( يعنى الصراحة مش بكتير ) وكمان عندى حساب فى البنك لا
يقل عن 14 جنيه 75 قرش ، وعندى كده اللهم صلى على كامل النور وعين الحسود فيها عودين مش عود واحد عجلة رالى موديل 86 إنما إيه تحفة ، لما أمشى بيها على الطريق السريع بتبقى معجزة
وعندى السكن والحمد لله وكلها كام شهر وأتخرج ، وطبعا بأتميز عن أى خريج تانى بإنى حاجز مكانى على شط النيل عندنا ، يعنى صعب أتمرمت فى الشوارع أدور على قهوة أو خلافه زى باقى الخريجين مكانى جاهز والحمد لله
بالذمة مش أبقى عريس لقطة ، يعنى فى كام مصرى تلاقى فيهم المميزات دى
سبب الرفض ؟
بسيطة جدا
إنى إتعودت دايما على التخطيط لحياتى كل حاجة لازم تكون فى ميعادها ، ولازم نرتب حياتنا ونخلى بالنا ونعمل حساب خطوات أى مشروع ننوى نقوم بيه
هل الهمجية واتخاذ القرارات العشوائية هو ما يمكن أن يكون صحيحا ، وما الذى يؤدى إليه التسرع فى قراراتنا من هدم للبيوت وضياع للحقوق والهزيمة النفسية التى تنشأ داخلنا ، لأننا لم نعمل العقل ولو للحظات قبل أن نتخذ القرارات ، أسمع البعض ممن يقولون أتركها لله ، فهل الله سبحانه وتعالى أمرنا أن نترك الأسباب ونمشى بلا ضابط ولا رابط ، هل وأنا أعلم أن ظروف دراستى ونوعيتها وما بداخلى من خطط يمنعنى أن أتخذ تلك الخطوة أكون مخطئا ، هل الصواب أن أخطط لكل الأمور قبل الإقدام عليها ؟ أم أتحرك دون خطة واضحة يرممينى تيار الحياة أنى شاء ؟ ولا أتحدث هنا فى هذا الموضوع فقط بل كل حياتنا وكل أمورنا وإنما ضربت هذا للمثل فقط