بشرى لأهالى المنصورة الكرام

من سنين وأنا عايز أعترف بحاجة مهمة جدا يا جماعة ، بصراحة كاتمه على نفسى وخلاص قربت أطق ، وهى إن والدتى أساسا من المنصورة يعنى عندنا أربعة وعشرين ضلع من هناك ، وكمان هى أساسا من طلخا لو حد يعرف هناك وكمان ابن خال جدى هو فضيلة الإمام جاد الحق على جاد الحق وطبعا انا عارف إن كتير منكم ولا سمع عنه ، المهم أنا افتكرت أعرف اليومين دول ليييييييييييه ؟

علشان .... علشان ...... شكلى نسيت ولا إيه ؟

آه افتكرت من فترة كده وانا مختفى شويه بعيد عن الناس دا غصب عنى ولأمور خير إن شاء الله بس مشكلتى إن كل ما أرجع ألاقى حد كويس مختفى وغالبا السبب يا إما الضجر ، يا إما السخط بسبب موقف مش كويس من أشخاص سواء داخل التدوين أو براه ، ويمكن كمان خانه أو خان ثقته أو أو أو أو .....................

خلينا نتكلم بالعقل حبتين كده وأعذرونى علشان اتخنقت وناخد آخر مثال بجد زعلت كتييييييييييييييير بسببه .

واحده مدونه من المنصورة بلد الصمود واللى لسه فيها دار ابن لقمان اللى اتسجن فيه لويس التاسع عشر بعد ما أخد هو وقواته علقة تمام هناك ، أنا يا دوب راجع البيت قبل المغرب تقريبا بساعة وقلت على ما يجهزوا الأكل أدخل أشوف الدنيا فيها إيه ومين مات وخلصت منه ( وخاصة بتوع الحزب ، من قلبى والله ) ومين عايش وفرحت بأخباره وكده يعنى . ألا وفوجئت برثاء عجيب هناك وقرار امتناع عن التواجد لأسباب تم ذكرها هنـــــــــا ولم تقنعنى مقدار بصلة ، لسبب بسيط جدا إننا كلنا هنا تقريبا جايين نقول رأينا فى مكان مفتوح ومجتمع من غير حدود يعنى ببساطة لازم نتوقع كل حاجة يعنى لازم نلاقى ناس كويسة نحبهم جدا ونتعلق بيهم ويبقى فى مشاعر بيننا مبنية على الإحترام المتبادل والأخوة الصادقة الخالية من المنفعة ، وكمان لازم يبقى فى نماذج برضه من صنف الخيانه والغدر ، عادى جدا ولازم نعرف إزاى نتعامل مع ده وده . مش من أول ولا تانى ولا عاشر مطب نقع خالص لأ والف مليون لأ ، لازم يبقى فى إصرار إننا نفضل عايشين ولنا صوت ، لازم نحاول تانى وتالت ويبقى عندنا أمل فى بكره ، لازم يبقى فى إصرار علىالهدف مهما كانت المصاعب اللى فى طريقنا وحتى سخافة أسلوب أى انسان بيتعامل معانا ، يا جماعة كفاية بقى نبقى مهزوزين وفى أول اختبار يبقى سقوط مريع بالشكل ده ( وأنا بأتكلم هنا عموما ) ، أن قلت قبل كده كتير إن الإصرار بيجيب نتيجة قوية جدا وأظن موضوع الكاراتيه لسه فى الذاكره وكمان ألف موضوع هنلاقيه فى ألف مكان بيتكلم بس كلام من غير نتيجة أو تنفيذ عملى ، يا جماعة أرجوكم كل واحد يصر إنه يكمل مشواره .

ونداء أخير لصاحبة المدونة بسرعة العودة وإلا..................................

وألا بلاش خليها مفاجأة ( هيبقى انتقام جبابرة ) .