الأحد، 27 يونيو، 2010

تساؤل عاجل وملح

لنفكر معا
اتعودت ان حياتى كلها شغل بأصحى أشوف شغلى ومن مكان لمكان لحد ما اليوم يخلص أنام وأقوم من اليوم ويبقى يوم تانى متكرر ، إنما الحفلات والتمشية وخلافه من أمور الترفيه فدى بعيد خالص عن حياتى حتى ضحكى ومرحى بيبقى فى وقت الشغل مش بعيد عنه . ولما دخلت التدوين لقيت إنى بأستفيد آراء جديدة وأفكار جديدة وبأكون أصحاب مفيش بينى وبينهم غير الأخوة والمحبة ومن غير مصالح مشتركة بيننا ودى كانت متعة جميلة جدا بالنسبة لى . ومع إنى غايب من فترة أنا عارف لكن على الأقل لما بأرجع بيبقى عندى شوق أنى ألاقى المدونات اللى بحبها موجودة وأقدر أدخلها وأستمتع بحياتى من تانى جواها وألاقى أصحابى ونتكلم ونتناقش وأحس إنى انسان من تانى له حياة بسيطة ، وبأفرح كمان بتطر الأفكار ومعرفة المزيد عن حاجات كتير ن مدونة بتكتب شعر وتانية سياسة وتالته ضحك ورابعة وخامسة وسادسة . بأحس فعلا بنبض الشارع اللى أنا بعيد عنه هنا . لكن للألسف من فترة والععد اللى يعرفه بيقل لحد ما تقريبا اختفى ودا محيرنى كتير
حبشتكنات فلسفية من أروع المدونات الموجودة نمت بالليل صحيت الصبح لقيته اختفى بأسأل عنده مشروع وعدت أكتر من سنة وهو بعيد ومش قادر أقول واحشنى لدرجة إيه .
شمس النهار مفيش اتنين اختلفوا على إنها بيت المدونين وكانت أجمل المناقشات والحوارات هناك والخلاف للصبح وفى النهاية نفترق أصحاب أكتر من الأول .
يلا نحب .. kz خرج ولم يعد ولم أعثر له على أثر حتى الآن ورابط المدونة عندى لا يوصلنى إليه .
نبضات قلم كتلة من الإخلاص والحب للوطن نقل المدونة إلى مكان جديد ثم تركها ورحل .
فشكوووول دوت كوم و فـركـشاوي..نـاوي... و حـسين حـامـد سـباق ( رئيس التحرير ) الفرسان الثلاثة خرجوا للحرب , وأنسحبوا واحدا وراء الآخر ولا أدرى السبب فى الإنسحاب .
رودى هانم و paradise-lost و خواطر و طوبة فضة وطوبة دهب و عالم مولان مدونات تم إغلاقها لسبب أو لآخر ولا تعليق .
اللؤلؤة و Mariam ( Crazy Rama ) و محارة اللؤلؤ الندية من تربة القدس الابية و كلمات و طعمية سخنة و صعبان علىّ حالنا و الشاعر و hanin و مركـــــــب ورق و حيــــــــــــــــــــاتي و عايزه اتطلق و و Princess&Sunset و وميض ابتسامة و زمن الشيكابالالالا و نبض الروح مدونات تم هجرها بدون سببب وبدون أى كلمة على الإطلاق .

حـــــبــــــة صـــــمـــــت و احنا حبايب و دمــــــــــــــــوع القمـــــــــــــــــــر و غلطة مطبعية و ح ـــروف متنـاثـره و Me... My Thought ذهبوا للإمتحان منذ شهور طويلة ولم يعثر لهم على أثر حتى الآن
محمد مارو كلام و فش غليل تائه فى التعليم بأمريكا وأدعوا الله تعالى أن يكود إلينا سالما .
هذا إلى جانب المدونات التى لم تعد تكتب أو تتفاعل كما كانت فى القديم .
الآن ليخبرنى أحدكم ما الفرق بين التدوين وخارجه وما المتعة التى يجنيها الفرد من وجوده هنا

هناك 26 تعليقًا:

MR.PRESIDENT يقول...

يارب كل المدونين اللي فكرهم محترم يرجعوا .. كل اللي اعرفه إن شموسة ( شمس النهار ) مشغولة وهتكون مبسوطة جدا برسالة من المدونين .. يلا سلام
لحين رجوع المدونين

SHAPE YOUR LIFE (ABOALI) يقول...

كيفك يا ازهرى لعلك تكون فى افضل حال

غياب بعض المدونين
انعكاس لحال وتذبذب بلدنا الغالى
وهبوب رياح من اللامبالاه والكسل والزهق والملل
ودخول بعض الشاطحين بافكارهم واستفزازهم للغير بكلام غير لائق
ادى لنزوح البعض
ولغة التلسين احيانا على البعض
جعلت من فتح مدونته لانطلاق الفكر يخاف من الهرتلة ويهرب

ضعف اليقين باءن هناك تغير قد يحدث نتيجة كلمة او فكرة او حديث

ادى ايضا لهروب البعض
انشغال البعض بملاهى الحياه وما فيها
وتخرجه وبحثه عن العمل
ادى ايضا الى تنازله عن تقديم وجبة من فكره وكيانه للغير
حتى يحدث تبادل للخبرات

يقينا
قد ذكرتنى بالكثير ممن افتقدهم
وربنا يهدى الكل

gogo!sf يقول...

ازيك يا ازهرى باشا واخبارك ايه يا رب تكون بخير دايما

وان شاء الله يرجعو بالسلامه من تانى وينورو مكانهم

وبجد انت حد جميل جدا انك بتحاول تسأل عن الاصدقاء الغيبين وتطمأن عليهم

مشكور جدا يا ازهرى

mohamed ghalia يقول...

أنا قولت اجى اسلم على اخويا وصاحبى وادعيه لحفلة توقيع كتابى ياريت بجد تشرفنى
تتشرف دار المصري للتشر بدعواتكم لحضور حفل توقيع كتاب هل تبحث عن السعادة للكاتب محمد غالية
بمكتبة عرابى المهندسين وذلك يوم يالسبت الموافق 3/7/2010 فى تمام الساعة السادسة مساء

ألـــــــوان الحيــــــــاة يقول...

السلام عليكم

ايه اخبار حضرتك ؟؟؟يارب تكون بخييير

بجد فرحت جداا ان حضرتك لاحظت غيابى وسؤالك الجميل ده

انا قفلت المدونة عشان مش حاسة انى اخدت الاتجاه اللى كنت رسماه ولا حققت الاهداف اللى كان نفسى فيها اول ما عملتها


ده غير احساسى انى عاوزة اغير فيا حاجات الاول قبل ما ابدأ اكتب من جديد

بعد كده ممكن ابدأ تدوين تانى من خلال مدونة جديدة او حتى افتح القديمة

ولحد ما يحصل انا ان شاء الله موجودة فى التعليقات على كل الكلام الحلو اللى من شخصيات احلى من اهل تدوين

شكرا مرة تانية لحضرتك

واحد من العمال يقول...

السلام عليكم

كيف حالك ياأزهرى واحشانى مدوناتك والله
وبالنسبه لغيابى فأنا بصراحه أخدنى الفيس بوك شويه لأنه أكثر تفاعليه وتواصل
لكنى بأرجع تانى وكلى حنين لمدونتى ومدونات الأصدقاء
أما بالنسبه لكثير من المدونين اللى بيغيبوا عن مدوناتهم تقدر تقول أن مشاغل الحياه غلبتهم وغيبتهم عن التدوين لكنهم بيرجعوا
أما من أغلقوا مدوناتهم يمكن لأنهم لم يجدوا جدوى من التدوين لأنهم بيدونوا سعياً للأفضل ولغد أفضل ليهم ولمصر
وشايفين رغم محاولاتهم الوضع والفكر محلك سر
ويارب يرجعوا يدونوا تانى
وتدوينتك دى خلتنى أهجر الفيس بوك أو أحدد له يوم معين وباقى الأسبوع لمدونتى ولمدونات الأصدقاء
وعلى فكره أنا دخلت مدونتى من عندك ومن رابط مدونتى الموجود فى هذه التدوينه

ودمت أخى بخير حال وبتدوين

الازهرى يقول...

السيد الرئيس

اضم صوتى اليك فى الدعاء الى الله بذلك

اوتمنى منهم فعلا الرجوع فالمكان من غير ذوى العقول الجميلة والهادفة موحش للغاية

سلام

الازهرى يقول...

أبو على

الحمد لله أنا بخير سلام

أن دخلت التدوين أساسا لما لقيت إن العقول الموجودة هنا كويسةوعندها هدف وبتحاول تبنى بلدها
لما دول يسيسلموا للحالة دى يبقى المطلوب من الناس العادية إنها تنتحر أو يهربوا من هنا

التبادل الثقافى والمعرفى مطلوب والتنقيح مطلوب أكثر للخروج بالأفضل أما الركون فستكون عواقبه وخيمة

تحياتى دوما

الازهرى يقول...

جوجو

الحمد لله بخير ربنا يكرمك يا رب

انتم الناس الجميلة صدقينى انا استفدت منكم كتيييييييييير جدا وبقي لى كيان هنا صعب اسيبه وامشى

تحياتى دوما

الازهرى يقول...

الغالى محمد غاليا

الف مليون مبروك على الكتاب وباذن الل نحتفل مع بعض بالكتاب المائة لك
بس طبعا تعذرنى لانك عارف الظروف

تحياتى وتهنئاتى

الازهرى يقول...

ألوان الحياة
وعليكم السلام ورحمة الله وبركاته

ربنا يعينك وتقدرى تحددى طريقك
بس المهم التفاعل يفضل موجود والمناقشة متواصلة فى المدونات المفتوحة مش ما دام انت مش هتكتبى يبقى مفيش تعليق كمان
ادخلى المدونات وناقشى واتكلمى وخلى الحوار مفتوح
وبكده الكل يستفيد

تحياتى دوما لأختى العزيزة

الازهرى يقول...

واحد من العمال
وعليكم السلام ورحمة الله وبركاته

صدقنى أنا واحشنى كل الناس الحلوة اللى كانت موجودة
كنا بنتناقش نتفق نختلف ونفترق أصحاب وتبقى الحياة أحلى

إنما الكل يغيب يبقى مش حلو

بخصوص من لم يجد جودى من التدوين فأنا لا أكتب وأنام لأصبح رائيا مصر أفضل البلاد المشوار طوييييييل وعايز صبر ونفس أطول وإيمان بالله وبإننا نقدر نوصل فى النهاية بعد عمر طال أم قصر لمصر أفضل

المشكلة كانت فى رابط المدونة التانى عندى والحمد لله صلحته

دمت ودامت الأخوة والمحبة دائما

Foxology يقول...

الحقيقة مش هقدر اجاوبك لكن ممكن تلاقى ان فى ناس كتيرة لقت انه مفيش فايدة والمتعة الأولى ذهبت بلا رجعة

الله اعلم بأحوال الناس

تحياتى

gogo!sf يقول...

انت بجد حد جميل جدا

وشخصيه رائعه كتير

ربنا يكرمك انت كمان ويوفقك اللهم امين يارب العالمين

احترامى وتقديرى

غير معرف يقول...

في الوضع دا بجد افضلي اني ابقي قافلها ومش ناوية افتحها

كيارا

فراشة يقول...

ازيك ازهرى

مش لاقيه كلام اقوله بجد
مخلصنيش اسمع النداء العاجل وماجيش
بس الصراحه بجد فيك الخير
ماتعرفش قد ايه كنت سعيدة لما لقيت اسم مدونتى من ضمن المدونات اللى اخترتها كاحد المدونات اللى بتفتقدها او بتتسأل عن غيابها
بجد ربنا يخليك وفيك الخير
وحبيت اطمنك انى بخير

مهما شكرتك مش حينفع
انت انسان قلبك طيب وابيض قوى ربنا يحميك ويكرمك

بسنت يقول...

السلام عليكم
شوف فى كتير من المدونين نقلوا نشاطهم على الفيس بوك وتوقفوا عن التدوين على بلوج مثلا
وهناك اخرين طبعا تشغلهم الحياه
الجميل انه مهما نغيب نرجع تانى وزى ما انت قلت نلاقى اللى نعرفهم ونعرف الاخبار لان عالم التدوين بجانب تكوين معارف جديده استفاده من اراء وافكار اخرين وجزء كبير منه ترفيه

كل التحيه ازهرى

♥♥ شذا ♥ الروح ♥♥ يقول...

اهو انا حسيت بس بطعم الذل والهوان وعرفت ليه الناس بتقفل مدونتهم
من شوية عالم زباله متعرفش يعنى ايه رب مطلع ولا عندهم دين

يلا الحمد لله على كل وربنا يسترها علينا يارب

دمت اخى بكل الخر

حنان سعيد يقول...

اده انا اسمي مكتوب :)
بجد ربنا يكرمك يا ازهري
انا فعلا كنت غبت كتير اوووي
يمكن كان عندي حاله من الياس من حجات كتير
للاسف استسلمت ليها وسلمتلها كل حياتي وتوقفت حتى عن اني اعبر عن حالتي دي
بس بجد مش قادره اوصفلك سعادتي لما لاقيت مدونتي موجوده عندك هنا يمكن حسيت شويه بقيمه لوجودي
وسبحان الله يصادف انها قبل كتابتي يادوب بيومين
ادعولي اني ارجع تاني من غير يأس وانا ان شاء اله اوعدكم اني مش هغيب تاني
بجد انا بحب حياتي هنا اوووي
تحياتي لك

الازهرى يقول...

فوكسولوجى

يبقى نبدأ بالمقربين لنا ونشوف الأسباب ونحاول نعاجلها

لازم يبقى لنا خطوات إيجابية تجاه مشاكلنا والمشكلة الصغيرة أساس الكبيرة

تحياتى دوما

الازهرى يقول...

جوجو

ربنا يوفقنا كلنا للخير يا رب أسمع عنكم كل خير دايما


بكل الإحترام والتقدير والأخوة

الازهرى يقول...

غير معرف

طبعا أحترم القرار جدا جدا جدا
بس برضه من حقى أتمنى كل إخواتى يجعوا حوالى من تانى ولا كمان ممنوع أحلم

ربنا يكرمك ويكون كل أمورك خير وسعادة

الازهرى يقول...

فراشتنا

لو عايزة تشكرينى بجد ارجعى فعلا
ممكن يكون فى أجازة من الكتابة
إنما نتشارك الأراء ونكون مع بعض ونختلف ونتفق ونحس بالحياة

بس أنا زعلان
هو فى شكر بين الأخوة ؟

الازهرى يقول...

بسنت
وعليكم السلام ورحمة الله وبركاته

سمعت على كده برضه من أصحابى
بس الفيس بوك فى رأى زى نظام المنتديات ومش بأحبه مع إنى اشتركت فيه بس هو كام يوم وما عمرناش مع بعض

ومتفق معاكى إن هنا مكان للرأى والنقاش ويا ريت الكل يعتبره كده

تحياتى دوما وخالص مودتى

الازهرى يقول...

شذا الروح

أنا موافق على السبب بس رافض النتيجة
لو استسلمنا هنا يبقى بنستسلم فى حياتنا الواقعية ويبقى هنقضى باقى حياتنا استسلام ودا طبعا أنا أرفضه تماما

لازم يبقى لنا موقف من مشاكلنا مش نهرب والسلام

تحياتى دوما

الازهرى يقول...

حنان

صدقينى لما أقول لك إن سعادتى بالتأكيد أضعاف مضاعفة لما عرفت برجوعك وبإذن تكتمل فرحتى برجوع الكل وألاقى المجتمع اللى أن عشت معاه موجود وبيكتب والحياة ترجع طبيعية من تانى

فى انتظار أول الكتابات

تحياتى دوما