الأحد، 8 يونيو 2014

دور كمان


دور جوا قلبك
ع اللى كان
صاحب مكان
ماشى وسايب
طرحته
سبحة صلاته
وضحكته
سايب عيونه
والأمل
واخد معاه
ذكرى جميلة
لفرحته
وكمان جراية
لرحلته
واخد بحار
من الزعاق
قرصة خدود
لمسة رقية للجباه
واخد حياة

دور وتانى من جديد
يمكن هنا
يمكن هناك
قاعد فى ركن الذكريات
تحت السرير
فوق الدولاب
جنب الكنب
بيقول آهات
يا ليل زمان
فاكر كلام
فاكر ورق
بسطور كتير
حانى وخطير
دمعة لقا
لحظة سكوت
قلبى يرفرف م الفرح

أصله خلاص
شاف الأمل
ضحكة جميلة
منورة
لحظة كسل
جنب الحبيب
لمسة إيدين
زغرة عينين
من رمش ساحر
تقتلك
تبقى خفيف
طاير بعيد عن البشر
جنب القمر
وسط النجوم
فى دنيا تانية
من نعيم
جنة وحور
بسمة ثغور
غمازة تيجى بالبراح
حمرة خجل
ترسم حياة
جوة الحياة

ةتعيش هناك
وإنت هنا
عيشة هنا
ترحل وترجع
من جديد
تصبح عنيد
وتقول كمان
رايح لفين  ؟
وسط البشر ؟
طب والملاك
طب صبح ليه
وليل لمين
كل الحياة متشبكة
ومفيش جديد
غير الدفا
جوا القلوب
صبح وليل
متجمعين
كل الزمان
جوا العينين
رمش كحيل
جواه طفولة
مضحكة
 جواه تغوص
تنسى الهموم
ترسم حياة
ترجع تقول
ناسى يا خلق
والقلب صادق
يتنفض
لما يلاقى بسمها
نهج الحروف
فى اسمها
نور الحياة
فى ثغرها


صابر أنا
رغم السنين
لأجل اللقا
لأجل الحياة
حالف يا بكرة لأغلبك
وأفرح كتير
رغم البعاد
رغم الحنين
رغم حكايا السكرانين
عن الحياة جوه الحياة
عن عيش بقى
دا العمر فات
وهينتهى
هتروح بلاش
وتختفى
وسط السكات
وكلام كتير
من غير شجون
ولا أمل

هناك تعليق واحد:

Unknown يقول...

حلوة أوى
كم من ذكريات
قد يبدوا لنا أننا
نسيناها ولكنها حية
فى الوجدان تنتظر مجرد
إشارة لتظهر لنا واضحة