الخميس، 14 فبراير 2013

قرار هااااام

لالالا من غير كلام بعد إذنك
لو سمحتى على جنب ومش عايز كلام كتير قلنا
أيوه يا ابنى
هات لى أخر اتنين على اليمين دول
والواد اللى لابس مخطط فى رابع صف هناك ده
والأربع بنات اللى جنب بعض وبيكتموا فى ضحكتهم
واللى لابس نضارة معاهم
ناقص واحد كمان راح فين ؟؟؟؟ هرب ؟؟؟؟ الجبان
ما علينا
لمهم هنا كده جنب الباب اللى هناك ده
لالالالا فى الركن اللى بعده لحد ما يقرأ الحكم
قول يا ابنى وسمعهم
لقد قرر جلالته وبناءا على ما صدر منهم من آثام وما ارتكبوه من جرائم فى حق المجتمع أدت إلى انهيار العديد أسس ودعائم وراكائز الدولة وهددت بالإنهيار العاجل لمقدراتها ، وما حاولوه وثبت فى عليهم من محاولة الإضرار العمدى والتعرض بالقول والفعل لأيقونتها الساهرة على رعايتها ، وما كادوا يتسببون فيه من دمار تمت السيطرة عليه بفضل الله وشجاعة وقوة التدريب وما تتمتع به قواتنا من خبرات واسعة فقد تكرر الآتى :
            * يتم حرمان المذكورة أسمائهم من البشاميل لمدة عام على الأقل
            * يتم تكليفهم بالعمل ضمن المسخرين لاستصلاح الأراضى الصحراوية لمدة عام أيضا
            * يتم تغريم كل منهم عدد 4 قطع شيكولاتة مستورد من الحجم الكبير
هذا ويتم التنفيذ عقب إبلاغ كل منهم بالقرار
حفظ الله جلالته وأدام لنا حكمته وحكمه العادل
انتهى القرار .
 
خدهم يا ابنى من هنا
علشان كل واحد يفكر ولو للحظة يدعى على وأنا فى الإمتحان يبقوا عبرة ليه
أنا هأوريكم يا بشر الوش التانى من النهاردة ورايح ما دام الإحترام مش نافع معاكم

هناك 12 تعليقًا:

مصطفى سيف الدين يقول...

و أنا بقى هاكافئهم بعزومة غدا
مش قديم و عسل اسود
مادام عصبوك يستاهلوا المكافأة

شمس النهار يقول...

في ايه ياريس
ايه حصل
ماذا حدث اذا هكذا
:))
ومين الناس دول
وايه الصورة دي
:)))

الازهرى يقول...

مصطفى سيف

ومالوا
ما هو العدس طمر فيك
ما كنتش قلت كده

إنما نقول إيه
زى الكطط على رأى ناس

الازهرى يقول...

شموستنا

يعجبك أبقى فى الإمتحان ويدعوا على ويخلونى أحل وحش ؟؟؟

ينفع كده ؟؟؟؟؟

دى صورتى وأنا بأصدر القرار :)

بذمتك مش قمر

aya mohamed يقول...

هههههههههه
عجبنى القرار الاخير جدااا
مين بقى اللى هياخد كل الشيكولاته دى
بس الصورة ادتنى ايحاء فى الاول ان فى
جريمة حصلت :)))

SHARKawi يقول...

والله انت ما لكش حل .
ربنا يكرمك ويوفقك يارب دايما .
باستمتع دايما بكلماتك واسلوبك .
ربنا يديم بسمتك .

لك احترامي وكامل تقديري . دعواتي . لك مني تحياتي

الازهرى يقول...

آيه

طبعا أنا اللى هآخد الشيكولاتة
واللى هيحاول يقرب
وربنا لأكسر رجله

وهى دى مش جريمة سيادتك ؟؟؟؟

الازهرى يقول...

شرقاوى
انا ماليش حل ؟؟؟؟
الله يسامحك

دا أنا حتى وربنا ملاك
وبجناحين كمان

كل الإحترام والمحبة يا صاحبى

وفى انتظار نهاية الكرسى :)

candy يقول...

إيه الوحشية دى !
العالم بيتكلم فى إلغاء عقوبة الإعدام ، تقوم أنت تدخل عقوبة إلغاء الباشميل لمدة عام !!

سنة كاملة يا قاسى القلب من غير باشميل ؟؟ إيه الجرم اللى على وجه الأرض اللى يستحق عقوبة بالقسوة دى ؟


بالتوفيق فى نتيجة الامتحان طيب :)

شمس النهار يقول...

مين دول اللي دعوا عليك؟؟
والاهم عملت لهم ايه اوم دعوا عليك :))

الازهرى يقول...

كاندى

دى أقل عقوبةعلى فعلتهم الشنيعة

ربنا يكرممك يا رب
يا أجدع مهندسة فى الوجه القبلى كله

الازهرى يقول...

شموسة

دا أنا ملاك وربنا

هم المفتريين :))))