الأحد، 20 فبراير، 2011

يا جماعة أرجوكم نعقل


يا جماعة بالله عليكم نفكر بهدوء ، نحاول نعقل اللى بنقوله

رجعت من شوية ودخلت المدونات لقيت تعليق بيتنشر فى المدونات بيقول


جمعــــة الحســاب 25 فـــبرايـــــر

مظاهرات مليونية في ميدان التحرير وكل المدن المصرية

الشعب يريد

مجلـــس رئاســـــي

حكومـــة إنقــــــــاذ

محاكمــة مبــــارك

سيتبع ذلك الدعوة إلى إضراب عام وعصيان مدني شامل حتى تتحقق مطالب الثورة

النظام كما هو لم يتغير ، لم تتم محاسبة الفاسدين .. تم حبس أربع أغبياء كباش فداء فقط ، أين زعماء العصابة الكبار؟

أين عمر سليمان الذي هرب أموال مصر للفاسدين حينما كان رئيسا للمخابرات؟

أين صفوت الشريف؟

أين زكريا عزمي؟

أين فتحي سرور؟

أين أين أين عشرات الفاسدين؟


النظام مازال موجوداً بكل قوته في الحكومة ، المحافظات ، المحليات ، الأحياء ، وزارة العار الداخلية وأمن الدولة القذر مازال يمسك بالمعارضين حتى اللحظة ؟ إذن اين هو التغيير ؟ بل أين الثورة التي تدعي أنك تحميها يا جيشنا العظيم؟


الجيش في كل بقاع الدنيا لم ولن يهزم شعباً مهما أوتي من قوة .. مستحيل مستحيل .. وهذا هو السبب الرئيسي في حسن تعامل الجيش مع المتظاهرين لأنه ليس لديه أكثر من هذا أمام ملايين المتظاهرين ، إن فعل غير هذا سوف يخسر خسارة رهيبة لا يطيقها ، فقد هرب قبله جيش البوليس الذي يفوقه عشرات المرات فماذا عساه أن يفعل الجيش مع شعب ثائر؟ لقد رأينا جميعنا على الفضائيات تعامل الجيش وضرب المتظاهرين الذين تبقوا في ميدان التحرير منذ أيام لأنهم قلة.


جيشنا العظيم يحمي الفساد .. يحمي مبارك وأعوانه في شرم الشيخ .. يمارسون حياتهم بشكل طبيعي كأن شيئاً لم يكن .. وكأن النظام لم يسقط .. يسعون إلى امتصاص الثورة وتطويقها .. ولكن لن نترك لهم هذه الفرصة أبدا .. نازلين نحقق أهداف ثورتنا بنفسنا بالمظاهرات المليونية والإضرابات والعصيان المدني.

http://ibnbahya.blogspot.com/


http://www.facebook.com/event.php?eid=185218911516253


أرجوكم يا جماعة دى مش خناقة فى حارة تتاخد بالجدعنة ووقفة خاصة ضد الحارة التانية ، دى بلد ولها حسابات ، أولا الجيش لا خايف ولا بيخاف ولا هيخاف ولا يمكن مقارنته بالشرطة ، الجيش مهمته الرئيسية ودا اللى انا لفيت الميدان كله ووضحته يوم 29 يناير لما كانت الناس خايفة ، الناس اللى هناك دى مهمتها الحفاظ على الدستورية الشرعية وتأمين البلاد ، ودا مش كلام إنشاء وخلاص ، أنا كنت مجند من شهرين بس وخدمت مع الناس اللى بتحرس ميدان التحرير حاليا ، واللى كانوا معايا فى التحرير شافونى مع المجندين والضباط هناك ، خدمت مع الناس دى سنة وكنت فى القيادة يعنى كل حاجة على عينك يا تاجر ، والوضع الحالى بيقول إن الدستورية الشرعية هى الشعب فهو بيحمى الشعب ، ومش معنى كده إن كل حاجة عايزها الشعب يبقى العصا السحرية تنفذها والسلام ، فى حسابات كتير قبلها ، يمكن ناس تتخيل إن الجيش أبطأ مما ينبغى وهم من حماسهم مستعجلين ، لأ الجيش بيتحرك بهدوء وحكمة شديدة لإن المرحلة صعبة ، يعنى ما بين محاكم الفساد ودا على مستوى كبير قيد التحقيق ، مش مجرد أربعة دخلوا السجن لسه الباقى فى الطريق ، ورجال الأعمال بتضغط على الحكومة بإنهم قفلوا الشركات والمصانع وشردوا الناس اللى كانت شغاله معاهم وبرضه الإجراءات ماشية ، وفى كمان الغربان اللى مرابطة فى البحرين الأحمر والمتوسط والتعبئة العامة للجيش الإسرائيلى التى لا زال مستمرة بشكل غير مبرر ، وأظن الكل لاحظ سرعة سحب الجيش للوحدات الموجودة فى أماكن لا تعتبر ضرورة حيوية قصوى ، وكمان مسئولية إدارة البلاد ، ومعالجة الإعتصامات ، وكمان الكل فاكر السادات عمل إيه مع مراكز القوى هل أول ما بقى رئيس مسكهم وسجنهم وألا حاصرهم بهدوء وأخدهم فى لحظة خاطفة ؟ 
يا جماعة الجيش عمره ما كان ساحر ولا اللى حصل دا قليل ، غيرنا بقالهم أكتر مننا بكتير ومع ذلك مش عارفين لا يروحوا يمين ولا شمال ، أرجوكم بلاش شغل الحماس الزايد ونهدر كل اللى كسبناه .

وكلمة أخيرة لأى حد يحاول يقارن قوة الجيش بالشرطة ، الشرطة مهما تضرب فأسلحتها محدودة يعنى دانتين من الدبابات بكل شهداء ومصابين أسلحة الشرطة وكمان مجندينها كلنا عارفين طريقة اختيارهم ، أما الجيش فبيحوز ثقة رجالته ، وأسلحته أعلى بكتير وأوامره بتبقى أكثر صرامة ، وبأقولها ألف مرة لو العساكر أخدت أوامر بالضرب مفيش واحد فيهم إيده هتتهز لإنهم واثقين إن القرار سبقته دراسة واسعة وإنه فى مصلحة البلاد حتى لو اللى واقف قدامك أخوك ابن أمك وأبوك وهتبقى مدبحة مفيش حد متخيلها ، الجييييييييييش يختلف عن الشرطة فى ألف نقطة ، أهمها إنه بياخد قراره بهدوء ولصالح البلاد بس وعلشان كده كل قراراته وتصريحاته هنلاقيها فى الجون مش شغل المعاتيه القديم بتاع الشرطة .

أرجوكم فوقوا ، الأيام الجاية صعبة جدا جدا جدا جدا ولازم نبقى صاحيين ، مش نقضيها اضرابات واعتصامات بدون وعى .












هناك 19 تعليقًا:

sony2000 يقول...

ربنا يسترها بجد
اللهم امين

شمس النهار يقول...

ربنا يكرمك ياازهري

كلام عاقل موزون

ربنا يستر

الاصابع الخفيه عماله تشتغل

ثـــوره الــغضب يقول...

الله المستعان على ما تصوف

وربنا يستر على الى جاى وكان الله فى عون الشعب والجيش

الازهرى يقول...

سونى

الموقف بيتعقد أكتر
وبجد خايف من بكره
يارب
كملها علينا بالخير
إحنا تعبنا ونستاهل يبقى بكره أحسن

الازهرى يقول...

شمس

ربنا يكرمك
بس الكل لازم يتكلم
يا جماعة البلد ممكن تضيع مننا فى لحظة ونرجع أسوأ مما كنا بكتيييييييير جدا

ودى مش مجرد أصابع بسيطة الموضوع بيكبر ولازم يتلم وإلا هيبقى الضحية الشعب والجيش وكمان الشرطة
بالعربى البلد كلها ممكن تقع فى فوضى

الازهرى يقول...

ثورة الغضب

شوف يا آدم
الله تعالى فى عون العبد ما كان العبد فى عون أخيه
يعنى لازم نخاف على بعض وعلى مصالح البلاد وبعدها نطلب من ربنا عز وجل النصر
يا رب استر من بكره

عمرو يسرى يقول...

كنت عايز ارد على مدونه ابن بهيه ديه الصبح ومالقتش كلام
احيك على الرد عليها بجد قولت اللى انا عايز اقوله
شكرا

لـــولا وزهـــراء يقول...

ربنا يعزك على كلامك ويجعله ربى فى ميزان حسناتك

نفسى اقولهم يا جماعة الخير نصبر شويه نشوف الايام الجايه شكلها ايه

يا جماعه الجيش مافيش عنده هزار مافيش عنده قنابل مسيله للدموع مافيش عنده رصاص مطاطى

كلامك عاقل جدا وموزووووون اوى ياريت الناس تقرا وتسمع وتفهم

ربنا يستر من القادم

زهراء

Foxology يقول...

تسلم ايدك يا هيثم

قلت وهفضل اقول ان الناس اللى عمالة تعمل اضرابات واعتصامات دى حد مالى دماغهم واكيد بقايا النظام الفاسد ورا اللى بيحصل لكن مرتاح شوية من تعامل الجيش مع الموضوع والدليل قلت الاعتصامات زى مثلا هيئة النقل العام وغيرها وده بيدل ان الجيش بيتشغل فى صمت وبيحاول يمشى الأمور بالهدوء والحكمة بس يارب الناس البغبغانات تفهم مهو مش معقول فساد 30 سنة هنقضى عليه فى يوم !

تحياتى

الازهرى يقول...

عمرو يسرى
ربنا يكرمك
بس احنا محتاجين نتحرك مع الكلام

واعتقد إن لقاء منى الشاذلى مع المجلس أكد الكلام ده

بلاش نستعجل

الازهرى يقول...

زهراء

الجيش أعقل من انه يستخدم القوة المفرطة
بس برضه بلاش نحطه موضع اختبار

والحمد لله اللقاء الجديد وضح كتير

تحياتى دوما

الازهرى يقول...

فوكسولوجى

الجيش طلع ع منى الشاذلى ووضح كلل الخطوات واتمنى الناس تعقل

تحياتى
ونفسى أفهم مين هيثم ؟

kochia يقول...

انا معاك شكلا وموضوعا
وشايفة ان الثقة في الجيش دي حاجة مطلقة وبدون تحفظات
ونصبر وهنجد خير ان شاء الله


اما بالنسبة لموضوع الخدمة الصحية للمصابين عندنا هسال واتقصي وبكرة هرد عليك ان شاء الله

تحياتي

نبع الغرام يقول...

معااااااااااااااااااااااااااك يا ازهرى قلبآ وقاليآآآآآآآآآآآآآآآ

ربنا يسترررررررررررررررررر

الازهرى يقول...

كوشيا

الحمد لله الخطاب الجديد بتاعهم كان منظم وهدى الناس كتير جدا

شكرا على الخدمة وأتمنى يكون الناس عندكم بخير

تحياتى دوما

الازهرى يقول...

نبع الغرام

المحد لله

وربنا معانا فى الفترة الجاية الأصعب بكتيير من اللى فات

SHAPE YOUR LIFE (ABOALI) يقول...

ايه ده يا ازهرى انت بتشجع الناس على العقل والفهم
ياااااااااااااه ايه اللى حصلك يا ازهرى
انت كده ماشى ضد الناس الكشرى اللى بتنادى انى البلد تكون ملوخية
وده خطر عليك يا ابنى

حاول ترجع لنفسك وتقعد كده
وتعيد الكلام تانى

وتقول
يا عاااااااااااااالم
خلق الله الكون فى سبع ايام وهو العلى القدير
ووكان المولود فى بطن امه 9 اشهر

فاءن كان العقل فيكم عنوان
فحاولوا اعطاء الحياه انفاسها لتعيد تقوية ذلك النفس الذى كان


مششششششششششششششششكور يا ازهريكا

kochia يقول...

مسا الخير
انا علقت علي الموضوع سابقا انما النهاردة عاوزة اقولك اني سألت علي موضوع الخدمة الطبية في السويس لمصابي المظاهرات واتضح انها سيئة للغاية وبالفلوس وفلوس كتير (عدة الاف)ومحدش كتير معاه اسعار العمليات خاصة عمليات العيون اللي منتشرة جدا اصابتها في المظاهرات ويادوب الاسعافات الاولية بس اللي شغالة معقول .. وللاسف ..
انا اتاخرت عشان اتاكد من الموضوع بس مكنتش فاكرة ان الخدمة الطبية فعلا وحشة كدة
ربنا يلطف بالناس
تحياتي

غير معرف يقول...

اولا كده ازيكم ازيكم ياللى احنا ماجيناش عندكم
:وش باصص فى الارض:
بس والله انا بقالى ردح من الزمان مادخلتش مدونات خالص وان دخلت مابعلقش اللهم هى بس مدونة عنبر العقلاء بتاعة استاذ احمد سعيد وكان الله يحب المحسنين
وايون
الامتحانات خلصت من زمان والنتيجة طلعت وعدينا الحمد لله وربنا يسترها معانا فى الترم التانى اللى مش ناوى يجى ده
بالنوسبة بقى
للبوست
فانا معاك ان الجيش فلة شمعة منورة وقوى وكله تمام
بس التحركات بطيئة بطء السلحفة
ماهو ينفع ابقى حكم وقرارتى كويسة ونافعة وبسرعة برده
مش لازم الميتنة دى
وبعدين اللى انا اعرفه انهم كانوا نازلن النهاردة عشان شفيق بيه اللى عاملى فيها كونداليزا رايس معملش حاجة فى حاته غر انه اتكلم وعمل مؤتمرات واهم حاجة انه يقف
عشان بيين للناس انه محترم ويجذب الناس ليه باحترامه وادبه الجم ولباقته فى الكلام بس انا عن نفسى زهقت منه مابيعملش حاجة غير انه يقووول انا هاعمل وهاسوى وسوف انظر وسوف اتحقق وسوف اتنيل اما كرهت حرف الهاء والسين دول بسببه
من يوم غزوة الجمل اللى حصلت وطلع يقولك انا معنديش علم بيها ومعرفش عنها حاجة وهاشوف والظاهر ان النظارة باظت فماشافش حاجة-كان يقولى وانا اسلفه نظارتى-وقطم على كده وماشوفناش منه لا ابيض ولا اسود

انا عن نفسى مش ضد الجيش ولا مستضعفاه خالص كقوة وكسلاح
بس مستبطأه من بطء يعنى :)

المشكلة فى شفيق ياراجل ده واعوانه(ذيول مبارك يعنى)
حاسة انهم بيلعبوا وبينخوروا ولسه مااتعلموش حاجة
http://www.youtube.com/watch?v=XTRBcjhlFJ4&feature=player_embedded
ابراهيم عيسى قال حاجات كتر معرفتش اقولها ولسه للحلقة بقية بس مش عارفة هى فين

دمت سالما غانما كويسا وكده يعنى
:)

بيطرية المتخفية