السبت، 12 فبراير 2011

شكر ولخبطة

ورجعنا من جديد والحمد ، طبعا كان المفروض أبدأ بالكلام ده لكن الظروف اللى كانت موجودة فى البلد شغلتنا كلنا ، الحمد لله الغياب كان لخير طبعا الكل عارف فترة ما بعد الجيش وترتيب الأوضاع من جديد وكمان كان فى مشاكل فى أرض الجبل بتاعت اعمامى وتم استدعائى كخبير قديم وراجل من المطاريد المتمرسين للتعامل مع الأزمة وتم حلها بأغرب طريقة ممكنة حتى أنا ما صدقتش لما ده حصل ، طبعا نخلى الكلام ده لبعدين فى حكايات منفصلة .

طبعا لازم أوجه الشكر لكل اللى سأل عنى وعلى رأسهم أختين يعلم ربنا قربهم لقلبى ومكانتهم عندى ححتى من قبل السؤال ودا لإنهم فعلا من الشخصيات الصادقة جدا جدا جدا ، بأشكر لحظة تأمل ( اللى أقول لها كل سنة وانت طيبة على عيد ميلادك اللى عدى وأنا مشغول ) وفاتيما على سؤالهم وتعليقاتهم اللى كتير أسعدتنى وخلتنى طرت من الفرح ومست قلبى كتيييييييييييييييييييييير ، طبعا مش هنتكلم عن النيات فى الموضوع لإن كل واحد ونيته ، فى ناس كانت بتسأل عنى علشان عايزينى أرجع وقلقانين على وفى محبة لله بين وبينهم ، وفى ناس تانية كانوا بيسألوا علشان يتأكدوا إن انا رحت فى أى مصيبة ولا فى الروح وممكن أرجع أنكد عليهم وأفضح الجميعة الخايبة بتاعتهم وأكشفهم على الملأ ، وطبعا لا داعى لذكر الأسماء وكل واحد عارف نفسه كويس جدا جدا جدا جدا جدا جدا جدا جدا جدا برضه .

ما علينا وخلى الطيب أحسن وإنت الكبير يا ابنى برض ولازم يبقى قلبك واسع وتسامح .
أما أبو على فله شكر خاص على متابعته لى خلال افترة الى فاتت بالتليفون ، ومكانته فى قلبى هو أعلم الناس بها .

إمبارح بعد ما خلصنا تنضيف فى التحرير وحقيقي كان المشهد أكتر من رائع والعدد أكبر مما كنت متخيل أسعدنى إنى ألاقى بره التحرير برضه ناس كانت بتنضف وتزيل آثار الأحداث فى أكتر من مكان داخل القاهرة والجيزة ، حقيقي كان المشهد أكتر من رائع وحسيت فعلا إن المعدن الأصيل رجع من تانى يلمع ، بس المهم لازم نحافظ على الوضع ده ونحسنه ، يعنى مش يبى يوم وعدى خلاص وكلواحد يروح لحاله ، خلاص الثورة والحمد لله وصلت لوضع جميل جدا ، لكن المرحلة الجديدة بدأت وهى مرحلة البناء ودى أصعب وأشق ألف مرة ، المجالات كتير وفى كل مكان محتاجين ناس مخلصين الوضع مش هيتحسن لوحده لله فى لله وبرضه مش فى يوم وليلة ، عجبنى جدا مبادرة إنقاذ البنوك والبورصة المصرية هتلاقوا تفاصيلها فى فى الفارس الأخير و بنت خيخة وأى كلام اللى هى أصلا مش خيخة وأجدع من ناس كتير بس خايفة من الحسد ، وغيرها من المواقع والجروبات على النت أنا مش فاضى أفضل أحط فى لنكات خلى عندكم نشاط ودوروا بنفسكم يا باى على الكسل ، وأنا ناقشت ناس كتير فيها وأنا بأتنقل امبارح وكتير من الشعب رحب بس مش عارفين التفاصيل فياريت الكل ينشرها فى نطاق تواجده .

الحاجة بقى اللى حزت فى نفسى وسط كل ده هى أمى تخيلوا وسط كل ده والبلد مقلوبة ورحت لها بالليل وهى عند أختى وفوجئت إنهم حاطين راسهم فى راس بعض وهات يا مؤامرات ضدى ومسكونى فى النص وإنت يا ابنى كبرت وقربت تعجز ، وشعرك طاروحالتك بقت صعبة ولازم تتصرف وتخطب بسرعة قبل ما الموضوع يخرج من إيدك ،ويبقى فى رجلك والكلام الثورى اللى باالكم منه ده ، وأنا بأسمع وعمال أدعى على نفسى وعلى اللحظة اللى قررت إنى آجى فيها المكان ده ، وسط كل ده كانت واحدة زميلة أختى قاعدة فسألتنى بهدوء : هو إنت شروطك إيه بس فى العروسة ؟ فرديت علها أنا مفيش عندى غير شرط واحد بس ( تكون بتفهم ) وعنها ولقيت الناس كلها سابتنى وقامت وباين عليهم اليأس وزوج أختى لما كنا نازلين قال لى : يا ابنى خدها نصيحة من أخ قديم شرطك صعب وكده إنت مش هتتجوز ولو بعد ألف مليون سنة .

الحمد لله عدينا من المطب وحطينا شرط جامد على ما يقدروا يحققوه ( ودا أشك إنه يحصل فى وقت قريب ) يكون الواحد أخد نفسه ودبر حاله ، ولله الأمر من قبل ومن بعد .

الصورة من مدونة الكيت كات









هناك 21 تعليقًا:

سمكه واحده يقول...

صباح الفل والجمال والحريه
صباح اجمل من صباح جدتي زمااااان
مبروك عليك وعلينا كلنا الحريه والكرامه
مبررررررررررررروك يا ازهري
الحمد الله

SHAPE YOUR LIFE (ABOALI) يقول...

اولا بنهنى نفسنا قبل اى حد
وان شاء الله تكون طاقة نور لينا نتنفس بجد ونعيش كلمة انسان معنى واسما

الجميل فى الوطن انى كل واحد شارك بشكل ما
حتى اللى شارك بالسلب ساهم انى الايجابى يزداد اصراره انه يحقق هدفه
يعنى كل واحد ساهم انى طاقة النور تظهر للعيون

اكيد ليك شكر خاص يا ازهرى لاحساسك الوطنى العالى واللى ظاهر فى اسلوبك وتفاعلك الرائع مع ما تم
وده اكيد بتعمله مش لوجه لله انا عارف
شكلك هدفك الجنة يا عمنا

ربنا يهبك ما تستحق ويعفو عما سلف

اما عن الزواج
اكيد هو شرط صعب ولكنه فى ظل التفتح وما بعد الثورة احتمال يتغير
لانى فيه نون نسوة زاى الورد بس تقريبا النظام غطى عليهم
شد حيلك قبل ان تتنحى

وخالص التقدير

Foxology يقول...

حمد الله على السلامة يا باشا والف مبروووك مصر والف مبرووك برضه اللى هيحصلك مقدما كدة :)

تحياتى

نبع الغرام يقول...

حمد على سلامتك ياقمر

ويارب اللى جاى بيكون خير للجميع

المهم
الف مليووووووووووون مبرووووووك

كيــــــــــــارا يقول...

موضوع البورصة دا فعلا حصل رواج جامد عندي في الشغل وفي ناس قررت انها تستغني عن مرتب شهر عشان تنعنش البورصة


وحملات التنضيف بقت في كل شبر في البلد

مصر بتاعتنا

ونزلت ياعم اهوووو

الازهرى يقول...

سمكتنا

يا صباح الورد والحرية
مبروك لنا كلنا
النصر جه نتيجة مجهودنا كلنا ومستحيل واحد ينسبه لنفسه

والحمد لله على اللى قدرنا نوصل
بس المهم بلاش خمرة النصر تسكرنا

يلا نبنى بلدنا

الازهرى يقول...

أبو علىىىىىىىىىىى

هنى يا أخويا هنى
ما إنت قاعد جنب أم زجزج وسايبنا نموت هناك
بس بأطلع لك لسانى واقول لك
خدنا ثواب أكتر منك وإنت لأ

وكمان جنة إيه دى اللى هنطلبنا
إنت نسيت إنى أزهرى
وعندما أطلب فأنا بأطلب الفردوس الأعلى
وربنا يقدرنا ونوصل لها


وكمان يا عم تفتح مش تفتح
القاعدة ثابتة وليس لها استثناءات

وأنا شخصيا مش هأتكبر زى اللى فى بالنا وهأتنحى وأريح دماغى

مع خالص حبى واحترامى

الازهرى يقول...

فوكس الغالى

الله يسلمك يا كبير

ألف مبروك لنا كلنا
وخليك فى حالك بدل ما أنقحك دعوة تجيبك الأرض
مش يبقى أمى وحزب الشر وانت على

تحياتى دوما

الازهرى يقول...

نبع الغرام

ما ترسى على اسم بقى يا بنتى حيرتينا معاكى

الله يسلمك
واللى جاى بإذن الله فى إيدينا
وإن شاء الله يكون أحسن
ألف مليون مبروك لكل مصر

الازهرى يقول...

خيارا

المهم الفعل مش الكلام
إحنا اتكلمنا بما فيه الكفاية

فاكرة لما كنت بأقول إن احنا اللى هنبنى مصر مش هنستورد شعب يبنيها
أهو جه اليوم الى اتحققت فيه كلمتى

مش هتتخيلى فرحتى وأنا شايف أعظم أمانى بتتحقق

وما دتى نزلتى
يبقى لازم أكون أنا كمان طماع
نزلى أخوكى محمد وكل اللى تعرفيهم معاكى
لسه المشوار طويل

بس المهم إننا أخدنا خطوة البداية

كيــــــــــــارا يقول...

ههههههههههههههههههههه

بتحلم

اخويا محمد بيقولي هو مين خالد اصلا


وكل معرفته بتنحى الرئيس

" قالولي ان حسنى اتنحى "

مش تجبلي سيرته خالص

دا وقت البنا وبصراحه مبسوووووووطة وحاسه اني بغير بلدى دلوقت

الازهرى يقول...

يبقى لازم تترجمى احساسك لشغل وشغل أكتر
البلد محتاجة مننا كتير
والدمار طار جزء كبير سواء قبل الثورة أو أثناءها
وإيدينا فى إيد بعض
هنبنيها زى ما بنحلم
واحلامنا بحلوها ووحشها لينا فى النهاية

حاولى أكتر وخصوصا مع محمد لإنه مش لوحده
غيره كتير
ولازم ناخدهم معانا

دى بلدهم ززى ما هى بلدهم
الفرق إنهم محتاجين يفهموا اللى انت فهمتيه وبعدها هتلاقيهم طاقة جبارة
صدقينى دا عن تجربة

فشكووول يقول...

السلام عليكم
يعنى انت عايز منى ايه
هتاف .. ماشى قفلت الأوضه على نفسى وقعدت اهتف على اخرى .. تبرع بالدم اتبرعت وعملت معايا شله من 12 ورحنا اتبرعنا بالدم .. يا أخى انا معاكم بقلبى وبالدعاء انت عايز منى ايه بقى
على العموم يجب ان تتركز مطالبنا فى الفتره القادمه على اعداد دستور يهيئ لدوله برلمانيه واذا حدث هذا فسوف تتخلص مصر من مشاكلها باقصى سرعه
تحياتى يا ممكافح افندى

kochia يقول...

اه صحيح حاجة صعبة اوي
حكاية بتفهم دي
المهم انت منور
وحبيت ارمي السلام
واهنئ بنظافة التحرير

تحياتي

الازهرى يقول...

فشكولنا الغالى
وعليكم السلام ورحمة الله وبركاته

بصراحة وبوضوح ومن غير أى لف ولا دوران عايز أشوفك

بجد وحشتنى كتير كتير كتير

إيه رأيك بقى ؟

الازهرى يقول...

كوشيا

بس فى استثناءات طبعا علشان تثبت القاعدة

وصل السلام وعقبال ما نقدر ننضف بلدنا من افساد

تحياتى خالص مودتى

شمس النهار يقول...

جاااااايه اسلم وامشي
وياله اظهر وبان عندنا شغل كتييييييير

غير معرف يقول...

ثقافة الهزيمة .. أنها حقا عائلة محترمة‏

فى 6 فبراير 2011 نشرت شبكة الأخبار الأمريكية CNN كشفت صحيفة الجارديان البريطانية نقلا عن محللين مختصين بشؤون الشرق الأوسط قولهم أن ثروة الرئيس المصري حسني مبارك بلغت نحو 70 مليار دولار، جزء كبير منها موجود في بنوك سويسرية وبريطانية، أو على شكل عقارات في لندن ونيويورك ولوس أنجلوس، أضافة إلى ممتلكات خاصة على طول شاطئ البحر الأحمر، وقال تقرير أن المصدر الرئيسي لهذه الثروة هو أطلاع الرئيس على صفقات أستثمارية حققت مئات الملايين من الدولارات لمصر، ولهذا تم نقلها إلى حسابات سرية في بنوك أجنبية، أو أستثمارها في البورصات العالمية والعقارات، وأكد التقرير أن علاء وجمال مبارك هم إيضا من أصحاب المليارات، ونقلت الصحيفة عن أماني جمال، أستاذة العلوم السياسية في جامعة برينستون، قولها أن ثروة العائلة تتراوح ما بين 40 و 70 مليار دولار، وهي أرقام تقارب ثروات بعض من زعماء دول الخليج، الغنية بالنفط...

باقى المقال ضمن مقالات ثقافة الهزيمة بالرابط التالى www.ouregypt.us

Beram ElMasry يقول...

صديقي واخي الازهري
تحية لك ولامثالك من الشباب الفذ الواعي المتدفق بالقوة والشجاعة وحب الوطن نصركم الله جميعا واسعدني مرورك بعد انقطاع
صباح جميل من مصر في ثوبها الجديد

سلام ولاسلام مع بني اسرائيل ولا عودة للعهد البائد

لحظة تأمل يقول...

حمدلله على سلامتك ونورت بلوجر كله

وبجد مبسوطة جداوشرف ليا ان اسمى يبقى مكتوب عندك وبجد متشكرة ووانت طيب وبخير

وان شاء الله اللى جاى احسن بكتييير

ربنا يكرمك بزوجة صالحة وبتفهم :)

IBN BAHYA - إبــن بهيـــــــــــــة يقول...

جمعــــة الحســاب 25 فـــبرايـــــر
مظاهرات مليونية في ميدان التحرير وكل المدن المصرية
الشعب يريد
مجلـــس رئاســـــي
حكومـــة إنقــــــــاذ
محاكمــة مبــــارك
سيتبع ذلك الدعوة إلى إضراب عام وعصيان مدني شامل حتى تتحقق مطالب الثورة
النظام كما هو لم يتغير ، لم تتم محاسبة الفاسدين .. تم حبس أربع أغبياء كباش فداء فقط ، أين زعماء العصابة الكبار؟
أين عمر سليمان الذي هرب أموال مصر للفاسدين حينما كان رئيسا للمخابرات؟
أين صفوت الشريف؟
أين زكريا عزمي؟
أين فتحي سرور؟
أين أين أين عشرات الفاسدين؟

النظام مازال موجوداً بكل قوته في الحكومة ، المحافظات ، المحليات ، الأحياء ، وزارة العار الداخلية وأمن الدولة القذر مازال يمسك بالمعارضين حتى اللحظة ؟ إذن اين هو التغيير ؟ بل أين الثورة التي تدعي أنك تحميها يا جيشنا العظيم؟

الجيش في كل بقاع الدنيا لم ولن يهزم شعباً مهما أوتي من قوة .. مستحيل مستحيل .. وهذا هو السبب الرئيسي في حسن تعامل الجيش مع المتظاهرين لأنه ليس لديه أكثر من هذا أمام ملايين المتظاهرين ، إن فعل غير هذا سوف يخسر خسارة رهيبة لا يطيقها ، فقد هرب قبله جيش البوليس الذي يفوقه عشرات المرات فماذا عساه أن يفعل الجيش مع شعب ثائر؟ لقد رأينا جميعنا على الفضائيات تعامل الجيش وضرب المتظاهرين الذين تبقوا في ميدان التحرير منذ أيام لأنهم قلة.

جيشنا العظيم يحمي الفساد .. يحمي مبارك وأعوانه في شرم الشيخ .. يمارسون حياتهم بشكل طبيعي كأن شيئاً لم يكن .. وكأن النظام لم يسقط .. يسعون إلى امتصاص الثورة وتطويقها .. ولكن لن نترك لهم هذه الفرصة أبدا .. نازلين نحقق أهداف ثورتنا بنفسنا بالمظاهرات المليونية والإضرابات والعصيان المدني.
http://ibnbahya.blogspot.com/

http://www.facebook.com/event.php?eid=185218911516253