الجمعة، 7 أغسطس 2009

ظلم

ظلم ظلم ظلم

أصعب حاجة فى الدنيا هى الإحساس بالقهر والظلم وعدم القدرة على إنك تنصف نفسك من الظالم .
مش عارف صراحة يا جماعة ، صحيح أنا معترف إنى من النوع المشاغب حبتين كده ، لكن دايما فى الصح وممكن أعمل قلبان فى أى حته ، لكن لازم يبقى لهدف ، وده شىء معروف عنى من زمان ، يعنى أنا فاكر شيخ المعهد بتاعنا أيام ثانوى كان فى أى موقف يلاقى فيه الطلبة عارفين حقوقهم وبيتكلموا منظمين ، يقول بركاتك يا أزهرى ويضحك ، لأنه بيبقى عارف إنهم عدوا على قبل ما يروحوا عنده ، ودخلنا الكلية والموضوع اتطور كتير ، فى أول سنتين كنت فى حالى وساكت لان كان عندنا عميد شديد وبصراحة ككان ليه رهبة كبيرة جدا ، لكن الحق يقال كان بيجيب الحق لصاحبه ولو من التخين ، لدرجة ان الأمن كانوا بيخافوا منه وكان صعب جدا أى فرد من الأمن ياخد طالب من جوه الكليه أو يتعرض له .
وبعد كده جه عميد جديد كا فيه كل صفات العميد التانى ما عدا انه بسيط شويه فى معاملته وبيحبب الطلبه فيه ، واشتغلت معاه فى تنظيم المؤتمرات ورحلات علمية للطلاب وحاجات كده ، لدرجة انه لما جه العميد الجديد وكانت اول مرة ينزل حاجه فى اتحاد الطلاب اسمها اللجنة العلميه وصاه انى امسكها بالاسم ، وفوجئت انى رحت الكليه بعد العيد واسمى مكتوب القايمه بتاعت الأسماء ، وقلت أمرى لله ، وبدأنا الشغل ، لكن بصراحه العميد الأخير كان خنقه وبيروقراطى بطريقه رهيبه خاصة بعد تعاملى مع السابقين له واللى كانوا بيمضوا على الورق لو قلت لهم ان فيه مصلحة للطلبة وبعد كده يقرأوا المكتوب أو لأ حسب الظروف ، المهم الحمد لله بعد بداية السنه بشهر واحد كنت قررت انى أخلى بالى من أمورى وأسيب الاتحاد والعميد يولعوا بجاز وسخ ، لكنه كان غتت وبايخ ومصر انى اعمل له شغل زى العميد السابق ( وشتان ما بين أنواع الأنشطة الأول كان لمصلحة الطلبة والتانى منظرة وخلاص زى بتوع الحزب ) وطبعا أنا رفضت لأنها نشاطات غير مفيده وبالتالى من غير فايده وأخلى بالى من مصالحى أحسن وقضينا السنة كلها فى خناق ومشاكل وقلاف بينى وبينه ، وطبيعى ان الكل حذرنى انه يستقصدنى ويخلى حياتى مهببه ، وكانت نصيحتهم حقيقيه ، للأسف فوجئت بواحد من أساتذتى بيتصل بى وبيبلغنى قرار حرمانى من دخول الكلية ، وحاولت كتير استأنف القرار وأراجعه وألف حواليه وأعمل أى حاجه لكن القرار كان نهائى
تخيلوا يا جماعه يكون آخر خدمتى فى الأزهر 17 سنه مجرد ورقه مكتوب فيها ناجح
الأمر لله وحده

هناك 68 تعليقًا:

أمل حمدي يقول...
أزال المؤلف هذا التعليق.
فراشة يقول...

والله يا ازهرى بجد دمى اتحرق
ده قهر مش ظلم بس

الله يعينك
والله ربنا حيرجعلك حقك وحيكرمك
هو ابتلاء شديد
محتاج صبر

اكثر من حسبى الله ونعم الوكيل
وربنا المنتقم

تحياتى وقلوبنا كلنا معاك
وبعدين رمضان كريم والدعاء فيه بإذن الله يستجاب

اعشق فى الليل ضوء القمر يقول...

لا حول ولا قوه إلا بالله العلى العظيم
أصبر أخى و أصتبر ولا يجف لسانك بالدعاء و الأستغفار
فلا تعلم اين الخير ولا تعلم ما مدبر لك الله غدا
حسبنا الله و نعم الوكيل
وإنا لله و إنا إليه راجعون

سمكه واحده يقول...

لا حول ولا قوه الا بالله
معلش يابني بص
احنا في ايام مفترجه ادعي عليه ومتقلقش طلاما انت مظلوم ربنا هياخد حقك ان شاء الله
بص بردو زي ما اعشق في اليل ضوء القمر قال
ربما لا اكيد ده خير ليك
قل لن يصيبنا الا ما كتب الله لنا
احمد ربنا وان شاء الله اكيد خير
متزعلش نفسك
خير والله ان شاء الله
ولو ليك حق تأكد انك هتحصل عليه ان شاء الله
كل سنه وانت طيب
رمضان كريم

SHAPE YOUR LIFE (ABOALI) يقول...

قالوا يا فرعون ايش فرعنك قال متلقتش حد يلمنى


اكيد فى بعض الاحيان يكثر الظالمون ويعلون فى البنيان
واحيانا تحدث لهم مرعة وكبر
نتيجة ثقتهم ان الضعيف لن يبذل جهد فى الحصول على حقهم

لذا ادعوك للعمل بنصحية الجيش
صعد الامر مادمت على الحق

وان كنت على غير حق فالزم بيتك


شكرى ومودتى

romansy يقول...

ازهرى
دا افترى دا ليه دا كله والله يا ازهرى اكيد ان شاء الله هتلاقى حل
اكيد لكل كبير اكبر منه
الموضوع مش سهل كده ولو حصلت انك تروح لشيخ الازهر نفسه
ربنا معاك يا ازهرى

Kiara يقول...

مفيش فايده فيك

الف الف الف مبرووووووووووووووووووووك
علي النجاح

SHAPE YOUR LIFE (ABOALI) يقول...

بقى كده يا ازهرى

بقى انا افتكرت انى قلبك جبنة جهينة

طلعت عصير وكوكتيل كمان


ماشى يا ازهرى

شربات يا واد شربات

أمل حمدي يقول...

مبرووووك يا ازهري

معقول شربتني المقلب

على العموم فرحة نجاحك تشفعلك

الف الف مبروك عليك يارب

الازهرى يقول...

فراشتنا الرقيقة

ربنا يسلم دمك الشربات ده من انه يتحرق

أناالحمد لله ربنا نصرنى

لكن لو عايزة الحقيقة هو برضه ابتلاء
والحمد لله
على كل حال

الازهرى يقول...

عاشق ضوء القمر

أدعوا الله تعالى أن يجعل لسانى ولسانك دوما رطبين بذكره تعالى

وأدعوه أن يرزقنا الصبر ويجزينا عليه خيرا


تحياتى أخى الغالى

الازهرى يقول...

سمكمك
والله وشربتى المقلب انت كمان
صدقينى انا فرحان مووووووووووت بكده

هو عموما أنا مؤمن أنه لن يصيبنى إلا ما كتب الله لى


وكل لحظة واكندرية واهلها بخير وسلام
وربنا يعيد الأيام بخير

الازهرى يقول...

أبو علىىىىىىىىىىىىىىىىىىىى

لالالالالالالا
مقلبين فى أسبوع واحد
لا كتير على فعلا أنا مش مصدق نفسى


على فكرة أنا بأعمل بنصيحة الجيش دى من زمان
ولو إنى أول مرة أعرفها

الازهرى يقول...

خياراااااااااااااااااا

ربنا يبارك فيك يا رب
ونقول أول واحدة تطلع من المطب سليمة

عقبال الباقيين يا رب

ادم المصرى يقول...

كان الله فى عونك
مرسى جدا يا ازهرى على كلامك وتعاونك ديما معى اخ وصديق عزيز

الازهرى يقول...

رومانسى الغالى

والله وشربت المقلب انت كمان
إقرأ مرة ثانية تجد المفاجأة

الازهرى يقول...

أبو علىىىى

كلاكيت تانى مرة

بس المشكلة
شربات نوعه إيييييييييييه؟

وإلى اللقاء فى مقالب أخرى

الازهرى يقول...

ماما أمولة الغالية

آسف
صدقينى المقلب كان لناس تانية لكن اعمل ايه بقى

ربنا يبارك لنا ولأولادك فى وجودك معانا دايما يا رب

تحياتى وخالص مودتى

الازهرى يقول...

أخى الجميل آدم المصرى

أدعوا الله أن يكون فى عوننا جميعا
وهكذا الأخوة بعضهم لبعض كالبنيان المرصوص

بس برضه انت شربت مقلب ذكريات ارجع وإقرأ من تانى

saragebaly يقول...

هههههههه

انا مش شربت المقلب اوي

تقدر تقول نص شربة كدة بس

الف مبروووووووك النجاح

ومن نجاح لنجاح اكبر واكبر ان شاء الله

وكل عام وانت بخير بمناسبة رمضان

اللهم بلغنا جميعا رمضان

تحياتي لك

سارة

لحظة تأمل يقول...

يعنى لازم عشان تقول ناجح .. توقع قلبنا كده

انا بعد كده هقرا من الاخر للاول

الف مبرووووووك
ويارب دايما من الناجحين
وربنا يوفقك فى تحقيق كل ما يحب ويرضى

rovy يقول...

الف الف مبرووووووووووووك
بس برافوا عليك عرفت تسبكها تمام
يارب دايما ناجح فى كل حياتك و ربنا يوفقك دايما يا اجدع ازهرى عرفته

حقيقى فرحانه جداااا ..
الحمد لله بناتى كمان نجحوا و كل الناس اللى امرهم يهمنى نجحوا السنه دى سنه و لله الف حمد و شكر جميله جداا .. ربنا يديم فرحتنا و يتمم نعمته علينا يااارب

خالص و اطيب امنياتى و تحياااتى

شمس النهار يقول...

الف الف الف الف
مبروك ياازهري عملتها ونجحت
الف مبروك فرحت قلبي بجد
عقبال الدكتوراه
وباقي طلبة وطالبات البلوجر ومصر كلها

الازهرى يقول...

سارة جبالى

لالالالالالا
اعترفى وبلاش عند
انت شربتى المقلب بالكامل

اللهم بلغا رمضان
ومن علينا فيه بالمغفره والرحمه
وتقبله منا

كل سنة والجميع بخير

الازهرى يقول...

لحظة تأمل

سلامة قلبك يا أحلى أخت فى الدنيا

لكن أعمل ايه العاده تحكم
اصلى مشهور بالمقالب حبتين

ويا رب دايما اسمع عنكم كل خير

الازهرى يقول...

أختى الجميلة روفى

ربنا يبارك فيكى ويبارك لك فى كل البنانيت الحلوين
وربنا يكتب لهم دايما النجاح
وتفرحى بيهم

وادعوا الله ان يرزق كل احبابك ومعارفك النجاح والتفوق

الازهرى يقول...

شموووووووووووووسه

تصدقى بالله انا نفسى ما كنتش مصدق انى هانجح تمام كده وبتقددير حلو زى ده

يلا بقى ارجعى بسرعه خلينا نحتفل

صدى الصمت - عاشقة الورد - يقول...

طبعاً أنا شربت المقلب بالهنا والشفا
ومافهمتش الحقيقة غير لما قرأت تعليقات الناس وعرفت إنك بتهزر
ماشى يا عم ألف مليون مبروك على النجاح
وكل رمضان وانت طيب

فراشة يقول...

ازهرى ليه بتقول انى قريت التعليقات بس ومقريتش الموضوع

بالعكس انا اساسا مقرتيش التعليقات عندك خالص
انا قريت الموضوع نفسه وهو ده اللى انا فهمته

انا حاسه انى ضايقتك فى حاجه بس مش عارفه هى ايه

ومش عارفه تعليقى فيه ايه غلط

على فكرة يا ازهرى انا مش من طبيعتى انى اعلق على حاجه مش بقراها
ده كمان بيكون سبب تأخيرى فى زيارة كتير من المدونين انى لازم اختار الوقت اللى اكون مركزة فيه عشان اقرا موضوعاتهم
لانى زى مابحب انكم تهتموا فى قرايتكم لموضوعاتى ده لازم يكون نفس الشىء متبادل

ازهرى ياريت توضحلى الموضوع بجد
لأنى مضايقة جدا انى اكون بتعليقى ضايقتك
بس حقراه تانى عشان اتأكد

تحياتى

yoyo يقول...

يا لهووووووووووووووووز
و الله حرام عليك
ينفع الكلام دا يعنى
كل دا عشان تاكل علينا حلاوة النجاح
يا ساتر على البخل
ايه الناس دى
بصراحة مقلب محترم
سوسة سوسة يعنى مش اى كلام
ههههههههه

yoyo يقول...

مسائك سكر بقى
الواحد دخل كدا من غير لا احم ولا حتى دستور
الله وايه يعنى
هو مش البيت بيتنا برده ولا ايه

yoyo يقول...

ربنا يوفقك بقى و تبدا مرة جديدة من الحياة
شد حيلك يا بطل
لسه التقيل جاى ورا

yoyo يقول...

والله يا بنى انا كنت قربت اخلص المناديل واهىء اهىء اهىء بقى وكدا
قوم ايه بقى
الاقيك عامل فينا مقلب
عشان مش يكون فى لا ساقع ولا حتى جاتوه كدا
طيب حتة شيكولاتة
ولا مصاصة يا اخى

yoyo يقول...

الف الف مليون مبروك يا ناجح
ربنا يوفقك يارب

كل سنة وانت طيب
رمضان كريم
وبلاش كدا و الله وقعت قلبى

دمت اخى بالف خير و سعادة
تحياتى
يويو

الازهرى يقول...

صدى الصمت

بألف هناوشفا وعقبال المرة الجاية

ربنا يبراك فيكم كلكم
ويفرحك دايما بابنتك الجميلة

كل سنة وانت وجميع أحبابك بخير وسلام

الازهرى يقول...

فراااااااااشة

تعرفى انك بتفكرينى بأختى الأضغر منى
برضه طيبه
وسهل جدا انها تشرب مقالبى

انت لاحظتى انك أول التعليقات أساسا
يعنى صب تكونى قريتى التعليقات وبعد كده علقتى
ولازم تكونى قريتى الموضوع الأساسى

أما بخصوص إنك بتقرى كل المواضيع
فصدقينى أنا واثق من كده جدا جدا جدا
وتعليقاتك أكبر شاهد على كده

وعلى العموم علشان أوفر عليكى المقلب الأول موجود فى آخر سطرين
إقريهم وانت تعرفى

تحياتى وخالص مودتى

الازهرى يقول...

يويو

والحمد لله كلتها عليكم فعلا
كل الناس تقريبا اخدت لمقلب كاااااااامل مكمل

على فكره
ده مقلب بسيط كده
تجربه يعنى انما التقيل جاى فى السكه

الازهرى يقول...

يويو

صباح الجمال
وبما ان البيت بيتك
يا ريتتعمليلى واحد نعناع لانى داخل من السفر مرهق جدا
ومحتاج استرخى

الازهرى يقول...

يويو

أشد حيلى اكتر من كده ازاى بس
دا لو سنه صغيرة كمان
ينقطع على طول

الازهرى يقول...

يويو

أنا كتبت المقلب أساسا وأنا على الباب تقريبا
يعنى نزلته وطلعت على القطر
يا دوب واصل من نص ساعه تقريبا

يعنى لا لحقت اشترى مصاصه ولا غيره
ولو فرضنا انى اشتريت
برضه انت مفيش لكى نصيب فيها
انا كاره المدرسين أساسا

الازهرى يقول...

يويو

أختى الغاليه
ربنا يكرمك يا رب
ودايما نسمع عنك كل أخبار النجاح

وكل سنه وانت وأحبابك طيبين وبخير وسلام

فراشة يقول...

ازهرررررررررررى

حسابك معايا عندى فى التعليقات
ومن هنا ورايح حتشوف مقالب من الآخر

بقه كده يا ازهرى تعمل فى فراشة كده

انا دلوقتى بصرخ منك

اقولك على حاجه بس تصدقنى
لما قريت الموضوع لاول مرة قلت ايه 17 سنه خدمة
وبعدين رحت قايلة لنفسى اصل ازهرى طبيعته لازم يدخل الفكاهه حتى وهو زعلان
فكانه بيقلد عادل امام
يعنى انا اللى اشتغلت نفسى من الآخر

يعنى اخدت بالى من المقلب بس ماخدتش بالى انه مقلب

حسابك معايا بعدين

mohamed ghalia يقول...

هو منين بيودى لفين
وايه ده
يابنى انت تقصد ايه
يعنى نجحت ولا ايه طيب

اعشق فى الليل ضوء القمر يقول...

هههههههههه
أخر كلمه
مبارك اخى
انا فهمت من انك ناجه انك اساسا خلصت الكليه و بتكمل دراسات علشان كده حزنت
يلا مقلب و شربته عقبال التانى
كده هتخلينى احزر منك
ههههههه

حلوه حلوه
فين اللحمه و الفته طيب

Sweet Violet يقول...

الف الف مبروك
^_^
بس ليه الشر اللى انت فيه ده
خلاص بقيت متعهد مقالب ولا ايه ؟؟

سفروتة يقول...

ده انت
اقول فيك ايه بس
اقول ايه
والله انا كنت دخلت بقي في موود النرفزة وهتعصب
والاقيك في الاخر كاتب ناجح ومش عارفة ايه
فيه حد يعمل كده عشان يقول انا نجحت
لولا انك والدي انا كنت عملت.........

هههههههههههههههههههههههههه
خلاث خلاث
انا اسفة

المهم الف مبروووووووووووووك يا فندم النجاح
ودايما في تقدم من مقلب لمقلب

دمت بخير
:)

Ahmed Othman يقول...

مبروك يا أزهري
و كويس انك شفت ده في اثناء الدراسة
يمكن يفيدك مستقبلا في عملك
لأن في الغالب
نفس نماذج العمداء هتلاقيهم في الشغل مديرين
عموما احنا مش بنختار اللي نتعامل معاهم
عشان كده
اوصيك بشعرة معاوية


تحية

فرفشة الوان يقول...

تمالكي يا دموعي بجد فعلا الظلم حرام

سلمى يقول...

نظرا لانى انا اصلا ازهريه لكن الحاجه اللى انا اكتشفتها السنه دى بعد تخليص الثانويه العامه انى بتعامل مع حبه اغبيه وكلهم بلا استثناء
معلش الله يسامحهم
بس هو ايه سبب منعك دخول الكليه
او هما قالولك ممنوع من دخولها ليه؟
دمت فى سعاده

ألـــــــوان الحيــــــــاة يقول...

يا سلااااااااام

هى الناس امابتنجح بتحتفل كده دلوقتى

يعنى ازعل واتضايق ولا اتصرف ازاى انا دلوقتى

مبروك وخلاص

ناس غريبه D:

Unknown يقول...

الظلم ظلمات يوم القيامة
والحمد لله انه عدى وفات
واخذت شهادتك لان
بلدنا وللاسف
بلد
شهادات ياأزهرى
ولو كنت أمير فى ذات نفسك
(حكمن ولابدن)يبقى معاك شهادة
بـــــــــرضه بلد شهادات ياأزهرى

EMMY BABY يقول...

يخربيت كدة
روح يا شيخ




وتعالى بسرعة


والله وقعت قلبى قلت خلاص بقى الدنيا باظت

وبعدين تصدمنى بناجح

هههههههههههههههههههه لا بس حلوة منك


مبروووووووووووووووووك يا باشا النجاح

مفروض كانوا يكتبولك ناجح مع كامل الحب والتقدير ومتحرمناش منك وكدة وتعالى زرنا

مستفز صحيح

هههههههههههه

تحياتى

ايمى

الازهرى يقول...

فراااااااااشه

وهو برضه فى بين الخيرين حساب
ولا يهمك الحساب وصل من غير اى حاجه

وكمان فى حاجتين
انا صعب اقلد عادل امام لانى مش باحبه
ثانيا انت اشتغلت نفسك وانا مالى
ذنبى ايه ؟

اما لو عايزه تدخلى تبع حزب الشر وتشتركى فى حرب المقالب ادخلى وانت الجانيه على روحك

وقد اعذر من انذر

الازهرى يقول...

محمد غاليا

يا عمنا ركز بس انت حبتين كده
وانت توصل
ايييييييييييوه قربت خلاص

الازهرى يقول...

عاشق ضوء القمر

وادى كان واحد شرب المقلب

ياعمنا انا ذنبى ايه ؟
طبيعتى كده
اغيرها ازاى بعد العمر ده كله

امابخصوص الفته واللحمه
فنجاحى ده اساسا اشاعه مغرضه تم نشرها للاضرار بالامن الاقتصادى للدوله

يعنى بلاش تصدق الكلام ده

الازهرى يقول...

ضد التيار

ربنا يبارك فيك يا رب

اعمل ايه بقى
الطبع يغلب التطبع

سنين يا بنتى

الازهرى يقول...

سفروووووووووووووووته

يا بنتى حتى لو حقيقه لا تتنرفزى ولا تعملى
خلى اعصابك فى تلاجه
دا قانون التعامل معايا

وكمان اعمل ايه شايف الكل مكتئب
قلت اضحك حبتين

واعملى اللى انت عايزاه ولا يهمك
انا مسامح

ربنا يبارك فيكى وعقبالك انت وايمى باذن الله نبارك لكم

وكل سنه وانتم طيبين

الازهرى يقول...

أخى الغالى د/أحمد عثمان

شكرا على النصيحه الجميله
وأنا أحاول بالفعل اتباعها فى حياتى العمليه
وان كنت كثيرا ما افشل
لانى حاد بعض الشىء

تحيات دوما
وكل سنه وانت طيب

الازهرى يقول...

فرفشة ألوان

دموع ايه بس ؟
حاولى تقرأى تانى من جديد

تحياتى دوما

الازهرى يقول...

سلمى

احىل حاجه انك قلت الله يسامحهم فى الأخر
وألف مبروك على نجاحك فى الثانويه وعقبال الكليه


أم بخصوص الطرد أو المنع من الدخول فبصراحه
انا مكسوف جدا ان اول زيارة لك ومش الأخيرة ان شاء الله
تقعى فى المقلب ده


هم منعونى من الدخول علشان انا ببساطه نجحت

تحياتى وتمنياتى بدوام التواصل

الازهرى يقول...

ألوان
يا بنتى كفايه لون واحد قلنا
الله؟!!!!!!

وتعملى ايه بقى فى الزمن
حكم !!!!!!

تعرفى انك لولا الابتسامه الحلوه دى فى الأخر والأسنان الؤلؤى دى كنت افتكرت اتك زعلتى صحيح


كل سنه وانت واحبابك طيبين

الازهرى يقول...

نور هاتى

وادينا والحمد لله أخدنا الشهاده وحطيناها جنب إخواتها
ويا رب نلاقى حاجه تنفع فيها الشهادات دى كلها


تحياتى وكل سنه وانت طيبه

الازهرى يقول...

ايمى

وادينى جيت

ايوه كان لازم يكتبوا
ناجح وبكل الحب والتقدير
وما ترمناش من طلعتك البهيه
ويا ريت مت تنساش الجوابات
وكده يعنى

والا ايه ؟

عقبالكم السنه الجايه انت والسفروته ان شاء الله

وكل سنه وانتم طيبين

miro يقول...

السلام عليكم

اخى الازهرى ..
انا جايه اشكرك جداا جداا على التعليق الجميل اللى كتبته لمريم
حقيقى فرحت جداا به و كانت طايره من السعاده .. رزقك الرحمن كل السعاده يارب .. و ان شاء الله اكتب لأولادك فى مدوناتهم قريب و ده طبعا بعد ما نفرح فيك .. قصدى بك ..:)
بجد شكرااااااااا
كل سنه و انت طيب و اطيب و اطيب

خالص و ارق تحياتى

روفى .. لقاء الاحبه

Mariam Galal يقول...

خلى بالك . ده كل اللى أقدر اقولهولك
بما انى أزهريه زيك ده أولا وبما انك بتقول على نفسك مشاغب شويتين .. حتى لو فى الحق
أحب اقولك ان النوع ده بيحظى باهتمام جامد ممكن يضره من المسؤليين
عاجبنى فيك انك عارف حقك .. بس خلى بالك وربنا يعينك

Mariam Galal يقول...

خلى بالك . ده كل اللى أقدر اقولهولك
بما انى أزهريه زيك ده أولا وبما انك بتقول على نفسك مشاغب شويتين .. حتى لو فى الحق
أحب اقولك ان النوع ده بيحظى باهتمام جامد ممكن يضره من المسؤليين
عاجبنى فيك انك عارف حقك .. بس خلى بالك وربنا يعينك

Mariam Galal يقول...

نستنى أقولك ألف مبرووووووك

Mariam Galal يقول...

نستنى أقولك ألف مبرووووووك