الجمعة، 6 سبتمبر، 2013

عن الأمل



عن الحياة

عن ضحكة باينة فى الوشوش
من غير رتوش

عن ليلة صافية من الغيوم
عن النجوم
عن قمرة طالة بتبتسم
تخلق حياة

عن طفلة جواها الحنين
تمشى تطبطب ع القلوب
تمسح دموع المهمومين

عن حب راحل ف الزمن
عن الشجن
ع فرحة بالجاى اللى شايف ضحكته

عن رحلة تايهة من سنين
مركب وماشى فى سكته
لا البحر عارف وجهته
ولا الزمن عارف نهاية للى كان

عن الأمان

عن نقش بارز فى النفوس
لا حد يقدر يشتريه
ولا يتمحى
ولا لحظة تيجى فى سكته
يلقى خياله بيتوهم إن اللى كان هيتنسى
أو بكرة ضايع مننا وسط الخراب
بكرة هييجى بحلمنا
زى اللى قلنا ومن زمن
رغم الألم
رغم الصعاب اللى عاملها الزعلانين
رغم الضحايا اللى اتنسوا
وفى لحظة قالوا الحلم مات
رغم الأنين
رغم السكات

رغم الخطاوى الهينة
وطريق طويل
بكرة هييجى بضحكته


والخطوة تنهى ألف ميل 

هناك 5 تعليقات:

لــــ زهــــــراء ــــولا يقول...

اسامه
ايه الكلام الرائع ده تحفه بجد
بسييط جدا لكنه عميييييق اوى اوى
تسلم الايادى ويارب على الدوام عندنا امل فى بكره وانه جاى ومعاه خير


زهـــراء

hams ali يقول...

رغم الخطاوى الهينة
وطريق طويل
بكرة هييجى بضحكته

يـــــــــارب

رحاب صالح يقول...

بكرة هيجي بضحكته
^_^

Gamal Abu El-ezz يقول...


عن طفلة جواها الحنين
تمشى تطبطب ع القلوب
تمسح دموع المهمومين


كلمات جميلة ومعانى فائقة الروعه
تحياتى لك أخى الكريم

بسنت يقول...

ان شاء الله
قول يارب