الخميس، 16 مايو 2013

علمينى يا حياة



علميني يا حياة


علميني أكدب أخون

علميني أرمي قلبي 

تحت رجلي

علميني القسوة بدري





علميني بكرة لي


إن مفيش غاليين علي

إن كل الناس ف داهية

وإلا قلبي يكون ضحية





علميني أمشي بدري


وإن كل الناس بتجري

إني أرمي انتظاري 

إن حنيني كلام بيهري





علميني الصحبة كذبة


والخيانة مش بس فكرة

وإن سنينك اللي كانت 

واللي جاية

فيها الوحدة أحلي فكرة




علمينى إزاى محبة

وف ثوانى تكون ضغينة 

علمينى أركب سفينة 



علمينى أسيب بلادى 

علمينى أهجر ولادى 

زينى لى الغربة زينة 

فرحى ليالى الحزينة 

ع اللى كان وف لحظة راح



علمينى أنسى الجراح 



علمينى أشوف لبكرة 

أرمى ذكرى 

وسعى الخنقة براح 



علمينى أكون سخيف 

جلدى ناعم 

نظرى ساكن 

زى تعبانى المخيف 



علمينى اهجم بقوة 

أقتل بخفة 

أكون فتوة 

علمينى أجرح قلوب

علمينى أنسى الغروب 



بكفايانا يا ليل هروب 

م اللى صاير واللى كان 

علمينى يا حياة 



علمينى أكون جبان 

هناك 13 تعليقًا:

فشكووول يقول...

ايه السوداويه دى ..
هو ايه الموضوع
اضطريت ارجع اقرأ بوستات كتير ورا عشان افهم .. بس ما فهمتش
المهم انا حاولت اتصل بيك كام مره عشان سمعت انك تعبان .. خير؟

الازهرى يقول...

أنا الحمد لله تمام يا عمنا
وأحسن بكتييييييييير
وبقيت بأتحرك بشكل شبه طبيعى

المهم إننا اطمنا عليك إنت

أخبارك إيه بعد المعاش ؟؟؟؟؟؟؟
وأم أسامة عاملة لسه مخوفاك برضه ؟؟؟؟

رحلتنا في الحياة يقول...

:(

الواحد كان بصراحة ناقص اكتئاب وكملت بكلامك دا

الازهرى يقول...

أيوشة

تعليقك شجنى أشوف أنا كاتب إيه

واضح إنى كنت فى عالم غريب وقتها
معلش
عديها لى المرة دى ينوبك ثواب

L.G. يقول...

طب والله الكلام ده هو اللي صح ويخلي الواحد ميكتئبش لو نفذه . هو الكلام ده بتاعك صح مش منقول يعني ؟
اذا اقول لك يا اسامة استمر على بركة الله يابني لو قدرت تنفذ يبقى عرفت طريق السعادة
تحياتي
سماح

شمس النهار يقول...

يعني لما الواحد يجي يقرا الكلام ده علي الصبح يعمل ايه ان شاء الله؟؟

داليا ..قوس قزح يقول...

اعرف ناس اساتذة فى الحاجات دى ..كانوا السبب انى اتعلمت شوية منهم

الازهرى يقول...

إل جى

صدقينى طريق غلط
أنا جربته سنين
وآخرته زى الزفت
بس الحنين :(

الازهرى يقول...

شموستنا

طبعا يفرح :)

الازهرى يقول...

داليا

نصيحة منى بلاش

أنا كنت فى الطريق ده زمان

والرجوع له معناه التدمير صدقينى

ندى الربيع يقول...

علمينى يا حياة أنسى أحلى ذكرياتى وأنسى كمان بكرة الآتى
علمينى أنسى حبى وأنسى قلبى وأدوس عليه
علمينى أبقا قاسى أرمى طيبتى جوا بحيرتى وأجرى دايماً وأطلع فوق لوحدى
وأبقا ظالم وأبقا ناسى ؛؛؛
دى بهديها ليك
شكراً لكلماتك المعبرة اللى خلتنى أعبر زيك
لك تحياتى وأمنياتى ؛؛؛؛؛

ندى الربيع يقول...

ع فكرة أنا فوجئت إن اللوجو بتاعى ف حد عامل لمدونته زيه بالضبط
صدفة وليس أكثر

Unknown يقول...

فكره حلوه اننا نطلب من الحياه انها تعلمنا كل الكلام ده بس تفتكر بعدها هنرتاح ؟ ضمرنا هيرتاح ؟
لو مشينا بالتفكير ده اكيد ولا هنرتاح ولا هنعرف للراحه معنى غير بقا اننا هنموت ناس كتير ويمكن نحول ناس لنفس الحاله الى انت بتتكلم عنها دلوقتى
يعنى عدم الراحه هيكون مضاعف اتقتلنا واقتلنا فى نفس الوقت
بلاش قسوه على النفس بالشكل ده ربنا مخلقش النفس لينا عشان نعلمها ما لا يرضيه
فى فرق كبير بين الخير والشر وانك قادر تسيطر على نفسك وتعلمها وتقومها وانك سيبها كده تطيح يا تازيك يا اما تازى غيرك وكلاهما امر
قسوه الققلوب والحقد والغل وعدم التسامح وخلافه مش هيعود علين الا بالضرر وهلاك عمر ورصيد حسانات بيقل ورصيد ذنوب بيضاعف تحت شعار مش هنسيب نفسنا لطيبه قلب تانى وحد يضحك علينا وهكذا
لو زرعنه التقوى فى قلوبنا هنرتاح كتير
اخى الكريم كل ما عليك فقط احسن الظن بالله لينير قلبك ويهديك لما يرضى