السبت، 18 مايو، 2013

فرحينى يا حياة



فرحينى يا حياة 

فرحينى بضحكة صافية 
فرحينى بحضن دافى 
وسط ليلة حب دايم 
والحنين جوه القلوب 

فرحينى ببحر هايج 
والسفر جوه المراكب 
فرحينى بلاد جديدة 
ترمى ذكرى ف القلوب 
تمحى حزن من اللى فات 
احساس ذنوب 

فرحينى كتير كتير 
بكرة جاى 
هنبتديه بكلام كبير 
هنبتديه والحلم صاير 
هنبتديه  والحب مالى 
قلب كل المجروحين 

بكفاياك يا ليل حزين 
بكفاياك الشمس غابت
عن قلوبنا من سنين 
بكفاياك الغربة مرة 
جوه جوفنا زى علقم 
قوم يا ليل وبسرعة لملم
وهات شروق لبكرة أحلى 
طفى شوق الحيرانين 

فرحينى بحلم تايه فى الضباب 
أحدوه زمان 
من قلب شاخ 
راح فى الغياب 
قتلوا الأمل 
واللى قتل حر وطليق 
من غير حساب 

فرحينى بكلمتين والتالتة لينا 
تمشية ساعة العصارى 
بره أسوار المدينة 
والنسيم يعلى يهفهف
صوت هدير البحر طاير
والحنين جوانا حاير 
إمتى نفرح يا حزين 

فرحينى يا حياة 

والأمل لا زال جنين

هناك تعليقان (2):

رشيد أمديون. أبو حسام الدين يقول...

تغريدة مليئة بأمل الفرحة
تبهج النفس حين نرددها
هذا ما قرأت هنا

مودتي

ندى الربيع يقول...

ربنا يفرح قلبك دايماً
ويملا حياتك ضحك وسعادة