الثلاثاء، 22 مارس 2011

لماذا قلت لا


الحمد لله رب العالمين خلص الإستفتاء بسلام وضحكنا على نكت اللجان ، يبقى باقى نتكلم
أنا قلت فى الإستفتاء لأ ..ليه ؟ خلونى أشرح حاجة بسيطة جدا ، أنا فى اللجان من الساعة سبعة ونص الصبح تقريبا ، وأدليت بصوتى بعد صلاة المغرب ، كنت متحير ما بين نعم ولا ، بس اللى شوفته خلانى أقول وبكل ثقة لا ، وهأحكى مشهد من مشاهد كتير حصلت فى اليوم ده ، أولا كنا اللجنة الوحيدة من غير توجيه لإنى طردت أى حد بيقول للناس نعم أو لا سواء من الإخوان او المسيحيين ، بس واحدة غلبان داخلة على وأنا واقف بأدخل السيدات اللجنة وبتسألنى ..أقول إيه يا ابنى ؟ فرديت كعادتى قولى اللى إنت عايزاه يا ست الكل . فسكتت لحظة وقالت بس انا مش عارفة حاجة ، فقلت لها ببساطة يا ست الكل أدخلى الراجل هيسألك عايزة نعم ولا لأ _ إنها كانت زى كتير لا لها فى القراءة ولا الكتابة وبيتعلم لهم على صوتهم من المراقبين _ وأول حاجة ربنا يجيبها فى دماغك ويهديكى لها قوليها على طول .
وطبعا الكل عارف حجم التوجيه والشحن المعنوى عند الناس تجاه آراء معينه لها مصالح ، بس الكارثة إن الموضوع عام جدا ، لدرجة غن كتير من المثقفين والمتعلمين جايين وبيصوتوا وهم مش فاهمين فى إيه أساسا ، اللى يقولى نعم علشان المادة التانية ما تتغيرش ، واللى يقول لى لأ علشان المادة التانية تتغير مع إن الدستور أصلا واقع ولا فى مادة تانية ولا تالته وإحنا أساسا كنا بنقول رأينا على مواد الإعلان الدستورى لإن الدستور معطل وواقع من زمان .
تخيلوا بقى الناس البسطاء حالتهم إيه لما المتعلمين بقوا كده ؟
علشان كده قلت لأ ، لإننا محتاجين فترة كافية علشان نوعى الناس بكيفية التفكير والإختيار وكمان البحث عن المعلومة الصح وسط الغث اللى بيبقى منتشر ، ومحدش يقول مستحيل أنا بأتكلم من واقع عملى وتجربة قمنا بيها ومش مستحيلة ، ولا فيها ضرر ، صحيح ماغيرتش بالكامل بس كان فى تغيير وغلطتنا إننا انشغلنا بالدراسة وبدأنا متأخر .
أدخل فى المرحلة التانية ائتلاف الثورة والأحزاب وغيرهم من اللى قالوا لأ ودعوا لها - سواء اتفقت معاهم أو اختلفت - اسمحوا لى اصف كل اللى عملتوه بلفظ واحد بس ، الغبااااااااااااااااااااااااااااااااااااااااااااااااء ، كتبتم فى الجرايد ووقفتم احتجاج ودا أكبر دليل على إنكم ما بتتعلموش من الفترة اللى فاتت أى حاجة وإنكم لسه بتشوفوا الناس من منظور بعيد ودا اكبر دليل على فشلكم فى المرحلة الجاية ، فى الوقت اللى الحزب الوطنى والإخوان فهموها صح ونزلوا للناس الشوارع ، هتقولوا التكلفة ، تكلفة وقوفكم فى الشارع والمظاهرات صدقونى أكتر ، إحنا عملنا حملة ككاملة للتوعية فى مدينتنا ، وكلفتنا تقريبا 80 جنيه اول عن آخر لطبع الورق والباقى عملنا لقاءات فى النادى وفى الشوارع لتوعية الناس ودا كان مجهود شخصى ، يعنى لو حسبناها هنلاقى ان كل واحد فى المجموعة اتكلف خمسة جنيه تقريبا وضحى بجزء من وقته ، التلكفة فى المظاهرات اللى الشعب البسيط زهق منها وبقى فى عندها اختناق منها _ حتى لو هى صح ومن حقكم _ أعلى ولا التوعية أعلى ؟ ، وطبعا صعب حد يتكلم عن أمن الدولة اللى بيمنع والكلام الفاضى القديم .
بالله عليكم انزلوا الشارع ، كلموا الناس فى المواصلات ، كفاية كلام فى الجرايد والتليفزيون والفيس بوك _ ومش بأقول بطلوه دا أسلوب كويس بس يطور _ علشان لسه فى قطاع كبير من الناس لا بتسمع تلفزيون ولا لها فى الكلام بتاع الفيس بوك والتويتركلنا فاكرين الفيديو بتاع الدعوة ليوم 25 يناير والتحرك الناس وكلنا شفنه نتيجته الفيديو  هنــــا  .

القاعدة الشعبية هى الأغلبية وهى اللى الناس الفاهمة بتلعب عليها ودول بيبصوا للكتاب ورجال الإعلام بريبة أنما لما يشوفوا الشخص قاعد معاهم وبيكلمهم وواحد منهم بيسمعوا له وينصتوا له ومع الوقت يقتنعوا .
اللى حصل حصل بس نتعلم منه ، الفترة الجاية فى تحد كبير وإحنا هنا شغالين عليه ، المرحلة الأولى إزاى تعلم الناس تختار مرشح سواء للشعب أو الشورى أو الرئاسة أو حتى اللجنة الدستورية ، كفاية لحد كده اختيار علشان هو راجل طيب وبيخدم ولا من عيله ولا كلامه حلو ، ومش عايز حد يقول لى الشعب اتغير أنا عايش مع الشعب وسامع كلامه ، فى اللجنة واحد بيقولى تفتكر منكن نرشح فلان ، فقلت له ليه ؟ قال والله راجل محترم وأى واحد يقصده فى خدمة بيتحرك معاه ، تخيلوا واحد من المثقفين وبيفكر كده يبقى باقى إيه على انهيار الثورة ، يا جماعة عيشوا مع الشعب كفاية كلام فى الواقع الإفتراضى وارجعوا للواقع الحقيقي وابدأوا الشغل الصح علشان لسه عندنا موال كبير كبير ولازم نتحرك بدرى بدل ما نلاقى نفسنا رجعنا لمبدأ الحزب الواحد تانى .
وبأكررها انا مستعد أقبل بمجلس شعب وشورى ورئيس كلهم وبنسبة 100 % من الإخوان او السلفيين أو الوطنى أو التجمع أو حتى الملحدين ، بشرط واحد إن الشعب يكون اختاره بإرادته الحرة من غير توجيه وعن فكر سليم .
اللهم اعنا




هناك 27 تعليقًا:

Foxology يقول...

كلامك صح يا هيثم والناس دى المفروض تبطل بأة الغباء اللى بيمارسوه وينزلو للناس الشارع وانا فاكر تعليق مهم جدا على نتيجة الرافضين للتعديلات اللى بلغت 22% ان كل المثقفين والمعارضين اللى عمالين يتكلمو ويعترضو مقدروش يأثرو الا على 22% فقط من الشعب ! وده طبعا لأنهم بيناقشو بعض فى النوادى وع الفيس بوك محدش بينزل للشارع ويوعى الناس

تحياتى على الفكرة

لــــ زهــــــراء ــــولا يقول...

بالله عليكم انزلوا الشارع ، كلموا الناس فى المواصلات ، كفاية كلام فى الجرايد والتليفزيون والفيس بوك _ ومش بأقول بطلوه دا أسلوب كويس بس يطور _ علشان لسه فى قطاع كبير من الناس لا بتسمع تلفزيون ولا لها فى الكلام بتاع الفيس بوك والتويتركلنا فاكرين الفيديو بتاع الدعوة ليوم 25 يناير والتحرك الناس وكلنا شفنه نتيجته الفيديو هنــــا .

القاعدة الشعبية هى الأغلبية وهى اللى الناس الفاهمة بتلعب عليها ودول بيبصوا للكتاب ورجال الإعلام بريبة أنما لما يشوفوا الشخص قاعد معاهم وبيكلمهم وواحد منهم بيسمعوا له وينصتوا له ومع الوقت يقتنعوا .

" الكلام ده كمان واصل متأخر قوي هما لعبوا على المصريين بأسم الدين كلا الطرفين... "
لولا

sony2000 يقول...

يارب
ساعدنا
اللهم امين

Butterfly يقول...

عندك حق انا كمان قلت لأ وحصلت مواقف برده عند اللجنه
ودخلت فى صدام مع ناس
بس خير المهم نركز على اللى جاى بقى

وردة الجنة يقول...

اللهم اعنا

آمين يارب العالمين

مفيش بصراحة عندى تعليق على اى كلمة لان كل كلامك انا مقتنعة بيه فعلا وارجوا انه فعلا يتنفذ والناس تكون عندها وعى اكتر من كده

تحياتى لك

صدى الصمت - عاشقة الورد - يقول...

بصراحة أنا كمان قولت لأ
بالطبع إنت عارف إن كواليس الإستفتاء ما بتستخباش وكل حاجة بتتسرب ويؤسفنى فى هذا الإستفتاء أن جزء كبير 70 % تقريباً من الذين قالوا نعم لم يقولوها عن إقتناع بأن هذا هو الحل الأمثل لإنقاذ البلاد مثلاً أو إستقرارها أو ماشابة ولكنهم قالوها عن عدم دراية أو فهم بأى شىء من مجريات الأحداث فمنهم من قال نعم لأن شيخ البلد قال نعم ومنهم من قال أن الشيخ محمد حسان قال قولوا نعم ولذلك سنقول نعم ومنهم من قال نعم لأنه مازل يخاف من العهد البات رغم إنتهاءه ومنهم من قال نعم حتى لايتم المساس بالمادة الثانية من الدستور ومنهم من قالها عنداً فى المسيحيين ويوجد قله أخرى قالت نعم لأن العلامة كانت لونها أخضر (عشان سكتنا تبقى خضراْ بإذن الله)ومنهم من كان يعتقد إنها إنتخابات رئاسية والبعض كان يسأل فى اللجنة ماذا أنتخب وماذا أفعل ....إلخ
فى الواقع أنا لم أتفاجىء بالنتيجة ولكن حدث لى إحباط عام من الأسباب التى أدت إلى هذة النتيجة وتيقنت أننا سنحتاج سنوات طويلة لزيادة الوعى العام والإدراك خاصة فى المحافظات والقرى حتى نتعلم مبادىء الديموقراطية إن إستطعنا تعلمها, تحياتى

جايدا العزيزي يقول...

يبقى باقى إيه على انهيار الثورة ، يا جماعة عيشوا مع الشعب كفاية كلام فى الواقع الإفتراضى وارجعوا للواقع الحقيقي وابدأوا الشغل الصح علشان لسه عندنا موال كبير كبير ولازم نتحرك بدرى بدل ما نلاقى نفسنا رجعنا لمبدأ الحزب الواحد تانى .

هو ده المفيد

وزى ما قلت انا سمعت واحد بيقول والله مبارك كان مريحنا

والله بدأت اخاف يا هيثم

خايفه الثورة تروح هدر

انا معاك

تحياتى

اقصوصه يقول...

الله يكتب لكم ما في الخير لشعبكم

♥نبع الغرام♥♪≈ يقول...

اللهم اعنا


اللهم اعنا


ربنا يستر على مصر بالايااااام الجايا وخلاص

معنديش كلام اقوله اكتر من كده

رحلتنا في الحياة يقول...

بالله عليكم انزلوا الشارع ، كلموا الناس فى المواصلات ، كفاية كلام فى الجرايد والتليفزيون والفيس بوك _ ومش بأقول بطلوه دا أسلوب كويس بس يطور _ علشان لسه فى قطاع كبير من الناس لا بتسمع تلفزيون ولا لها فى الكلام بتاع الفيس بوك والتويتر

جبت المفيد يبتاع لا انت ههههههه انا قولت نعم عن نفسى P:

رحلتنا في الحياة يقول...

صحيح اول مرة اعرف ان اسمك هيثم ياازهرى :))

SHAPE YOUR LIFE (ABOALI) يقول...

جميل الكلام يا ازهرى والدعوة التى تدعو بها
وتلاحظ انها عملية مستمرة ومتكاملة ليس لها معياد محدد
ولكنها مستمرة الى حين قيام الساعة
فالناس تختلف تريبيتهم وطرق تعليمهم
وهناك فئة نحتاج ان نقترب اكثر منهم كما قولت
ولكن تلك الفئات لن تستجيب الا بتحسن الاحوال المعيشية وحملة تثقيف دينية تحاورها من داخلها و تتكلم بلغتها وتبدء تدريجيا" فى الارتقاء بطريقتها

المطلوب حاليا ليس الدور الفردى وان كان مطلوب
بل دور مؤسسى للنهوض بالشعب
وذلك من المنظومة الاعلامية التى تصل الى كل الناس
وتغير لغة المسلسلات لتكون موجهة تعمل على الارتقاء بالناس البسطاء
وهذا لاينافى كل الدور الفردى الذى يجب ان نقوم بها كلنا لنرتقى من جديد

تقديرى لموضوعك ومجهودك المؤثر فى نتيجة الاستفتاء
ولالالالالالالالالالالالالالالالاايه

الازهرى يقول...

فوكسولوجى

هى دى الفكرة لازم نأثر فى المحيط بتاعنا
والتأثير مش بآه ولا لأ
بس بالتفكير
لازم الناس تفكر وتقرر مش تقليد والسلام حتى لو تقليد لآرائناإحنا

وأموت وأعرف مين هيثم ؟

الازهرى يقول...

لولا

اللعبة لسه فى بدايتها
ومفيش تأخير كتير
بس المهم نتحرك بسرعة
الأخطر جاى فى الطريق لاوزم ننتبه وننبه الناس له

ربنا يعيننا

الازهرى يقول...

سونى

اللهم آمين
اللهم آمين

الازهرى يقول...

فراشتنا

فعلا اللى جاى أصعب وأصصعب

والله المستعان

الازهرى يقول...

وردة الجنة

التنفيذ مننا ولنا لازم نساعد بعض ونفهم اللى مش فاهم


تحياتى دوما

الازهرى يقول...

صدى الصمت

هذه السنوات يمكننا اختصارها إذا بدأنا مبكرا
وكففنا عن المشاحنات والمشاجرات الجانبية والحزبية والدينية

والله المستعان

الازهرى يقول...

جايدا

الثورة المضادةحقيقة واقعية جدا
وأقوى أسلحتها الجهل وعدم الوعى عند الناس ولاز نبقى درع قوى ضدهم
ولازم نخاف
بس نتحرك علشان نهزم أسباب خوفنا
وبإذن الله ربنا معانا

والسؤال التاريخى
مين هيثم ؟

تحياتى دوما

الازهرى يقول...

أقصوصة

ربنا مع كل شعوبنا
وبكره أحلى إن شاء الله

الازهرى يقول...

نبع

لسه فى كلام كتير
إحنا لسه فى البداية
والطريق طويل
بلاش نقعد فى أوله

تحياتى دوما

الازهرى يقول...

أيوشا

مش مهم نعم أو لأ
المهم عن رأى وتفكير واقتناع

الازهرى يقول...

أيوشا

السؤال الحيوي هنا
مين هيثم ؟

الازهرى يقول...

أبو علىىىىىىىى

الدور المؤسسى لسه فى بدايته ومحتاج وقت
بس الدور الفردى بسيط وسهل ونقدر عيه بسرعة

بس المهم نبدأ
سواء مؤسسى او فردى

والله المستعان

شمس النهار يقول...

عارف لو كنت جيت المؤتمر كنت اطمنت الجبهة هتركز علي الحوار مع الناس
وخصوصا البسطاء منهم
لايسأل الجاهل عن جهله
ولكن يسأل العالم لما تركه جاهلا
الناس دي ذنبها في رقبتنا
وخصوصا ان الامية في مصر مش بس اللي مابيعرفوش يقروا ويكتبوا لا
في ناس بتعرف تقرا وتكتب ومطلوب محو اميتهم ايضا

ندا منير يقول...

من الاخر كانت نتيجة الاستفتاء سواء نعم او لا واحدة

وفى النهاية برده الدستور سقط

وهو اصلا كان سقط من البداية

الموضوع كان غريب ومش مفهوم

gogo!sf يقول...

صباح الخير اولا

ثانيا مش محتاجه كل الاعتذار ده

الظروف جت كدا وانا مقدرة
واكيد انا اللى حظى وحشى لانى مشوفتش حضرتك بجد وكمان كان نفسى تشوف بنتى ام كتكوت هههههههههه

بس ملحوقه ان شاء الله
الجايات اكتر
جوجو