الأحد، 20 مارس 2011

قليل البخت يلاقى العضم فى الكرشة

طبعا الكل عارف إن امبارح كان فى استفتاء على التعديلات الدستورية ، نعم ؟ مين اللى بيتكلم ؟...آه الأستاذ هناك إنت ما عرفتش مفيش مشكلة فى ناس كتير زيك عادى لا إنت الأول ولا الأخير .

نرجع لموضوعنا فى اللجان إمبارح تم تكليفى قيادة مجموعة الشباب المنظمين للجان بإحدى المدارس عندنا ، ورحنا هناك مع فريق حقيقي جميل ورجالة بجد وقفوا معايا طول النهار بعزيمة ربنا يجزيهم خير عليها ، لكن كان فى حاجات تخلى الواحد تضحك جدا ، طبعا ما فى هم بيضحك زى ما فى هم بيبكى ،يعنى على سبيل المثال وإحنا واقفين كان فى واحد فى صف الرجالة فضل يقول النظام يا جماعة ويتكلم ويتناقش لحد ما وصل لبداية الصف بعد نص ساعة انتظار وفجأة قال : لأ خلاص انا مش داخل ولف ومشى . طبعا أنا وقفت مذهول واللى كان معايا كان قرب يجرى وراه ويضربه على الصداع اللى هو عمله على مفيش ، وبعدها يخدعنا ويمشى . كنت هأطق .

مرة تانية واحد بيقول انا عندى شغل ومستعجل ومصر على كده ، فى الآخر رفعت صوتى وانا ماسك كتفه وقلت يا جماعة اللى مستعجل وعنده شغل ييجى ورا الأستاذ ده ويعمل طابور ، طبعا اللجنة كلها بقت وراه فبص عليهم وبص فى الأرض واعتذر ورجع مكانه فى الصف ، شوية على الساعة 11 وبدأ إقبال الحريم يزيد واللجنة بتاعتهم تكبرأكتر وأكتر لحد ما الشاب اللى كان واقف هناك رقع بالصوت واتنرفز وقال الحقونى يا بشر، فجرت على هناك وفوجئت بيه ف حالة شبه انيهار من ضغطهم عليه والمستشارة اللى كات هناك وقفت اللجنة تماما لحين رجوع الإنضباط ودورت على أمين الشرطة لقيته هربان وواقف على باب المدرسة ورافض يرجع لجنة الحريم بتاتا وعنا وخليت الراجل بتاعى يروح على لجنة تانية ووقفت أنا على باب اللجنة وربعت إيدي ووقفت ساكت حاجة كده ولا الحجاج لحظات وكنت هأقول إنى ارى رؤوسا قد أينعت وحان وقت قطافها ، الحريم لقيونى ساكت ومش بأرد عليهم فبدأوا يهدوا مستنيين هأقول إيه ، فردين بهدوء وبدون لا شخط ولا صوت عالى بعد إذنكم صفين واحد هنا والتانى هنا وفى دقايق أوعدكم تروحوا غير كده وربنا أسيب اللجنة وأمشى وخليها مقفولة لما اليوم يخلص ولا تصوتوا ولا نيلة وترجعوا بيوتكم .

فبدأوا ينتظموا شوية بشوية وبدأت أخفف معاهم من حدة الكلام وأضحك هنا وأضحك هناك علشان يسكتوا عنى ويقفوا كويس وساعدنى على كده إن فى كتير منهم أعرفهم مأيام ما كنت بأقعد فى المحل بتاعنا من يتوع المنطقة وبقيت زى الأراجوز وأصحابى واقفين من بعيد يضحوا على وعلى الذل اللى أنا عايش فيه ، ما أنا مضطر يعنى لا قادر أزق واحدة فيهم علشان تدخل الصف ولا أشخط زى ما كنت بأعمل فى الرجالة وناخدها بأضحك علشان نمشى الأمور ، يا ربىىىىىىىىىىىىىىىىىى كان ذلك حقيقي لدرجة إنى بقيت فين أيامك يا مبارك كنت مريحنا وقاعدين فى البيوت لا حاملين هم استفتاء ولا انتخابات

طبعا قبل ما أمشى لازم أقول إنى رجعت البيت عندى إرهاق رهيييييييب ، تخيلوا من الساعة سبعة الصبح ولحد الساعة سبعة بالليل غير إننا كنا نايمين متأخر لإن كان عندنا شغل فى اليوم اللى قبله ، بس كل ده يهون وسط فرحتى وانا شايف الناس كلها وهى خايفة على بلدها وطالعين يشاركوا سواء فاهمين أو لأ مؤيدين أو لأ تخيلوا من 4 آلاف أيام زمان شاملين التزوير والميتين والمسافرين وخلافه نعمل 9500 ومن غير تزوير .

الحمد لله يا رب إن الحلم اتحقق وانا عندى المقدرة إنى أكون جواه

هناك 20 تعليقًا:

SHAPE YOUR LIFE (ABOALI) يقول...

اول تعليق على الاستفتاء
اثبات حالة لحين العودة

SHAPE YOUR LIFE (ABOALI) يقول...

ومش عاوز اقول نعم فى تانى تعليق
بس نعم مع نعم

SHAPE YOUR LIFE (ABOALI) يقول...

وجايز نقول لاء بس مش اختلاف ده اسمه وجهات نظر

SHAPE YOUR LIFE (ABOALI) يقول...

وحشتنى يا ازهرى يا مناضل الامة فى كل العصور واهم عصر كان العصر الفرعونى

الله عليكى وانت جنبى فى التخته
ااااااااااااه عليك

SHAPE YOUR LIFE (ABOALI) يقول...

خامس تعليق
الممبار جميل وفيه حظ كتير
ابقى رم عضمك وفك الحزام

SHAPE YOUR LIFE (ABOALI) يقول...

نقرء الموضوع ونعلق بس بعض فاصل طويل
علشان نتيجة الاستفتاء لسه شوية

لــــ زهــــــراء ــــولا يقول...

الازهرى

انت فين ؟؟ كل ده غياب
من قوت ما عملت لك احتلااااااال وانت اختفيت وعلى ذلك قررت انى كمان مش اكتب اى كومنت بس النهارده انت كنت فى بالى قولت اجى اسلم واطمن عليك
يا سيدى كل استفتاء وانتخاب وانت بخير
فاكر ايام مبارك كنا نام واحنا عارفين ان النتجيه بتكون نعم بنسبة 99.9 %
ياااااااااااه كانت ايام وبصراحه كنا مش ننزل من البيت وكانوا فى ناس ربنا بقى يجازيهم بأفعالهم كانوا بيدلوا باصواتنا كاااانت ايام الله لا يرجعها بقى

المهم رغم المتاعب ان الحريه جميله والديمقراطيه اجمل

ربنا يكرمك ويفرح قلبك ويسعد ايامك
وعندى سؤال هو بجد صعب ان الواحد يلاقى عضم فى الكرشه ؟؟؟

زهـــراء

لحظة تأمل يقول...

دايما كده ظالمنا

مش عارفة اقولك كنت مبسوطة ازاى امبارح وانا شايفة الناس كلها رايحة الاستفتا

وردة الجنة يقول...

احلى حاجة فعلا ان الناس كلها اشتركت فى الاستفتاء وده يدل ان مصر ان شاء الله هتتقدم بولادها لان الكل بدا يشارك بالفعل فى التطوير ويبحث ازاى هنطور ونعمل حاجة للبلد

ربنا يعمل اللى فيه الخير لمصر ان شاء الله

تحياتى لك ...........

جايدا العزيزي يقول...

بأضحك علشان نمشى الأمور ، يا ربىىىىىىىىىىىىىىىىىى كان ذلك حقيقي لدرجة إنى بقيت فين أيامك يا مبارك كنت مريحنا وقاعدين فى البيوت لا حاملين هم استفتاء ولا انتخابات

ههههههههههههههه

والله سمعت نفس الكلام بالظبط

وضحكت

دائما تعجبنى قفشاتك يا ازهرى

وماينوب المخلص الا التاخير عن شغله

تعيش وتاخد غيرها

تحياتى

الازهرى يقول...

أبو علىىىىىىىىىىىىىىىىىى

وحشتنا يا كبير
ومنتظرين تعليقك من سنين


تحياتى دوما

الازهرى يقول...

زهراء

شكلى خفت من الإحتلال وهربت
شكرا على السؤال بس كنت فى حالة بحث مزمنة ومفيش دماغ غنى اكتب


كانت أيام روقاااااااان
وكلنا كنا كده برضه

وربنا يجزيكى خير على سعيك

الكرشة أساسا جسم لحمى عضلى سمين
وحاجات كتير كده يقولها بتوع الأحياء أنا كت دايما بليد فيها

تحياتى وخالص مودتى

الازهرى يقول...

لحظة تأمل
ويستمر الإختفاء

كلنا كنا مبسوطين

وانا المظلوم مش البشرية اللى فى بالى

ربنا يقل منهن

الازهرى يقول...

وردة الجنة

فعلا تعداد رهيييييييييب
وعلى الرغم من تعبنا كنا فرحانين جدا جدا وإحنا بنساعد الناس
بس الحمل الأكبر جاى
وهو إننا لازم نوعى الناس إزاى تقدر تختار مرشحك سواء للمجالس او الرئاسة ودا مطلوب من الكل

والله المستعان
تحياتى دوما

الازهرى يقول...

جايدا العزيزى

وأنا والله قلتها ككتير

فين أيامك يا مبارك كنت مريححنا من هم الاستفتاء والإنتخاب وخلافه

تأخير ن شغله مين بس
انا اتسحلت
كنت واقف عمال أقول فينك يا أمن الدولة

وبلاش والنبى غيرها دى
مرة كمان وهأروح فى أبو نكله

تحياتى دوما
وحمد لله على الرجوع من السفر

همسات وبحــ الحياه ــر يقول...

ازهرى ازيك
بجد وحشاااااانى المدونة كتييير ووحشنى الرغى فيها
ربنا يقويك ويعينك ويجازيك خييير

بجد الواحد كان مبسوط جدا جدا من الاستفتاء سواء نعم او لا
المهم انا نازل اقول رأى بدون اى ضغط من حد ولا عشان خاطر حد
^________^
دمت بكل خير
ويارب تكون لسه فاكرنى

sony2000 يقول...

حد قلك تروح لجنه الستات

تستااااهل:)

بس بجد اللي كان عندنا صعب عليا

اخد شويه زوند من الستات
عجب:))

يلا خير

الازهرى يقول...

همساااااااااااااات غيه هو بخ الأرنب اختفى وخدعة من الساحر ولا إيه

والأهم حاليا إننا نعرف الناس إزاى تختار فى الإنتخابات

وكمان أنسى إزاى دا عيش وملح وخنقة واستبداد للمدونة

كنت فرحان باختفائكم

الازهرى يقول...

سونى

الحمد لله إنى ما كنتش عندكم
ينى يبقى تعب وصداع


اللهم لك الحمد على نعمك

غير معرف يقول...

link building service seo services backlink service how to build backlinks