الأربعاء، 9 مارس 2011

ابتدت بنون النسوة

وما أدراك مانون النسوة
امبارح كنت رايح النقابة وكان بعدها عندى مشوار تانى فقلت أعى على الميدان اتفرج على البشر هناك أخبارهم إيه ؟

أول ما دخلت الميدان لقين إنى كنت محظوظ وإن الشعب كله كان متفق من ورايا يكونوا هناك .

أول ما دخلت لفت نظرى هتافات ولوحات مطالبة بحقوق المرأة وبصراحة ما فهمتش ، ليه ؟ لإنى كنت اعتبرت إنى خلصت من الليلة بتاعت مجالس المرأة دى من بعد ما اتحرق المجلس بتاعهم ( ودى أكبر حسنة فى حرق مقر الحزب الوطنى الرئيسي ) ، يااااااااااااااااه كنت حاسس إنى فرحان جدا لما شوفته فححححححححححححم .

ما علينا دخلت وشوية وفهمت إن ده اليوم العالمى للمرأة ، مش عارف الناس افتكرت الموضوع ده إزاى وسط اللى بيحصل ، مع إنى قربت أنسى اسمى أساسا ، كان فى هناك عدد لا يقل بحال من الأحوال عن 300 نفر بيطالبوا بحاجات غريبة ، ومع قراءة اللوحات وسماع الهتافات قلت أنقل لكم المشهد .

- أول لوحة ( محدش فاهم حاجة خالث ) وعلى الضهر ( لما الحشيش خلص الشعب فاق )

- تانى لوحة ( لا مساومة على حقوق النساء )

- تالت لوحة ( عدم تغليب دور المرأة الإنجابى ، على باقى أدوار المرأة العامة والخاصة )

- رابع لوحة ( يا سى السيد عصرك فات )

- خامس لوحة ( ائتلاف المنظمات النسائية )

- سادس لوحة ( دستور مدنى جديد يحترم المواطنة ويكفل المساواة ويلغى كافة أشكال التمييز )

- سابع لوحة ( مصر لكل المصريات والمصريين )

- ثامن لوحة ( دولة مدنية لا دينية ولا عسكرية )

- تاسع لوحة ( مشاركة المرأة فى صياغة المستقبل الدستورى والقانونى والسياسى لمصر )

- عاشر لوحة ( نريد قانونا يمنع ويعاقب على اغتصاب الزوجات )

أما الورقة اللى بتتوزع فمكتوب فيها

أهداف مليونية المرأة

اليوم العالمى للمرأة – 8 مارس 2011 – مبادرة شعبية 100/100

* مشاركة المرأة فى صياغة المستقبل الدستورى والقانونى والسياسى لمصر

* دستور مدنى جديد يحترم المواطنة ويكفل المساواة ويلغى كافة أشكال التمييز

* تغيير منظومة القوانين المختلفة بما فيها قانون الأحوال الشخصية بحيث تضمن المساواة التامة والحقوق الكاملة

* عدم تغليب دور المرأة الإنجابى ، على باقى أدوار المرأة العامة والخاصة

* وضع عقوبات رادعة تعمل على الحد من أشكال العنف المختلفة ضد المرأة المصرية خارج وداخل المنزل

* يجب أن يسمح الدستور للمرأة بالترشح لرئاسة الجمهورية

هذا ما قرأت وسمعت وأترك لكم الحكم .

بعدها بشوية خطوات ناحية كوبرى قصر النيل

كان فى بعض السلفيين للأسف مريت جنبهم بسرعة فكان فى هتافين رئيسيين

- بالروح بالدم نفديك يا أختاه

- بالروح بالدم نفديك يا إسلام

وأختاه هنا كان المقصود بيها كاميليا اللى أعلنت إسلامها واختفت

بعدها على ماسبيرو وكان هناك الإعتصام المشهور من أهالى أطفيح ومن جاء معهم من مسيحيين ومسلمين

وكانت برضه لوحاتهم الرئيسية كالآتى :

- يا أعيش فى بلدى بكرامتى يا أموت شهيد على اسم ربى

- يا مينا يا بلال أصل الثورة صليب وهلال ( مع رسم للصليب مع الهلال )

- دعوة عامة .. شهداء تحت التنفيذ ( التوقيع شهيد قبطى )

- يا طنطاوى ساكت ليه شفت مبارك جرى له إيه

- عالكنيسة رايح أصلى مهما جرى لى مهما حصل لى

- جايب كفنى وجاى أموت لو الكنيسة مش هتعود

- أوفى بوعدك يا مشير وابنى كنيسة الشهيدين

- إلى أكبر حزب فى مصر الأخوان المسلمين أين أنتم مما يحدث فى أطفيح ( التوقيع مسلم بيحب مصر )

- مطالبنا

* بناء كنيسة الشهيدين

* محاسبة الجناة المعروفون دون تقص فالحقائق معروفة

* رحيل محافظ حلوان ومحافظ المنيا الموالين للنظام الفاسد
دا إلأى جانب عدد من اللوحات بنفس المعنى تقريبا مع اختلاف الكلمات

 
أما اللوحة الرئيسية للمطالب فكانت كالآتى

* بناء الكنيسة فى نفس مكانها وعدد أدوارها ومبنى الخدمات التابع لها

* رجوع أقباط القرية إلى منازلهم وتعويضهم

* محاسبة الجناه ومرتكبى أحداث الشغب

* محاسبة المتقاعسين من قيادات الجيش

* محاسبة المسئولين عن مهاجمة دير الأنبا بيشوى من الجيش وإطلاق الرصاص الحى على الرهبان

* وعد بمناقشة قانون العبادة الموحد فور بدء الجلسات بمجلس الشعب

* لا للتعديلات الدستورية نريد دستور جديد

* اسقاط الإعلام المصرى الفاسد

أنا عايز الناس اللى بتفهم تحاول تفهمنى

إيه القاسم المشترك بين كل الهتافات واللوحات فى كل مظاهرة والرابط بين المظاهرات دى كلها


هناك 16 تعليقًا:

لــــ زهــــــراء ــــولا يقول...

انا اول تعليق وبما انى اكتشفت انك بتحب الاحتلالات التدوينيه يبقى على بركة الله

نقول بسم الله

زهـــــراء

الازهرى يقول...

بسم الله والحمد لله

بس مش أى حد يحتل

دا محتاج مهارات كتييييييير

لــــ زهــــــراء ــــولا يقول...

بصراحه البوست بتاعك دسم اوى يا ازهرى ومليان حاجات كتير

تعالى نبدا بموضوع نون النسوه بس خليك هادى كده ومش تقول عليا اى لفظ مش تماموز من الكلام اللى هاقوله ...

بكل صراحه ان الستات او نون النسوه حاجه تفقع المراره كان لهم مجلس وكان لهم حاجات كتييييييير وحورات وخد وهات وعاوزين حقنا فى كذا وكذا وكان نفسى اشوف لهم اى دور فعال وبما انى احد بنات حواء اقولها بكل الصراحه الستات بقيت حاجه فظيعه من يوم ما بعدنا عن روح الدين اللى كرم المرأه وحط لها حاجات كتير اوى تحافظ عليها ....
وبصراحه اكتر الموضوع مش ناقص بقى مظاهرات والستات تطالب بحاجات ياريت نشوف مصلحة بلدنا الاول وبعدين نبقى نتكلم على حقوق المراه اللى هى اخدتها تالت ومتلت وعلى فكره اقسم بالله العلى العظيم ويمين امام الله سوف احاسب عنه يوم القيامه ان كل واحده شايله لوحه ورايحه تطالب بحقها فى كذا او كذا هى تعبانه فى بيتها وقرفانه ومش عارفه تعمل ايه وجايه تطلع شويه من القرف اللى عندها بصراحه موضوع مطالب المراه بقيت حاجه تقفع المراره

اه يا خوفى تدخل اى واحده من بناء حواء وتستبيح دمى ساعتها هنزل اقف فى ميدان التحرير واطالب بحقى فى انى اقول رايى بهدوء ومن غير ضرب ...

شويه كده وارجع لك تانى نكمل تعليق

زهــــراء

لــــ زهــــــراء ــــولا يقول...

ياريت اعرف المهارات اللى مطلوبه عشان اكمل احتلال

زهراء

لــــ زهــــــراء ــــولا يقول...

نتكلم شويه بالعقل انا طبعا مع اى حد عاوز انه يحصل على حقه فى بلدنا مصر لاننا بكل بساطه حقنا كان ضااااااااااايع او مقهوووووور او مسروووووووووووق ايا كان المسمى بس المهم كان حقنا بخ ...
دلوقتى المفروض كلنا نطالب بحقنا فى نفس اللحظه هو مولد بقى واللى يلحق حاجه يعملها كده صعب اوى !!!!!
يعنى مثلا لما الاخوه الاقباط يطالبوا ان الكنيسه تتبنى فى نفس المكان ونفس المساحه انا معاهم طبعا لان المكان اصلا ده كان كنيسه وده فعلا لازم يتعمل لكن لما يطالبوا وعد بمناقشة قانون العبادة الموحد يبقى ده نصبر عليه شويه لغاية ما مجلس الشعب يبقى موجود ويبقى له دور فعال ....
على فكره كل الناس اللى طالعه بمظاهرات فئويه فاكرين ان فى مصباح علاء الدين مع الجيش او الحكومه وكل حاجه هتتحل فى نفس ذات اللحظه ماحدش عنده صبر ....
هاقولك مثل ان كل العاملين فى مكاتب البريد عاملين اعتصام ليه بقى الاعتصام والامتناع عن العمل عشان اعوزين مرتبهم يزيد طيب يا جماعة الخير فى نسا عاوزه تصرف معاشتها وانتم معطلين حالهم وفى نفس الوقت عاوزين حقكم ياريت بقى حد يفهمنى الحل ايه

ياه رايك كفايه احتلال او نكمل


زهــــــراء

لــــ زهــــــراء ــــولا يقول...

نسيت اقولك ان الصوره اللى فى الاخر بتاعة الشاب اللى بيشد شعره عجباااااااااااانى جدا جدا لانه بيعبر عن حاجه نفسى اعملها من اللى باشفوه وباقراه وباسمع عنه


زهــــــراء

لــــ زهــــــراء ــــولا يقول...

فى حالة العثور على شخص بيفهم ويفهمك اللى بيحصل ده ليه وازاى وايه القاسم المشترك ياريت تستضيفه فى المدونه عندك وتعمل اجتماع لكل المدونين ونحاول كلنا نتعلم ونفهم


زهراء

Ahmed Mohamed يقول...

القاسم المشترك بينهم هوه نون النسوة
نون حق المرأة المزعوم
نون كامليا شحاته
نون الفتاة التي يقال انها علي علاقة حب مع شاب مسيحي

Diyaa' يقول...

اليد المشتركة هي أمن الدولة
:D
هي أخف تأثيراً في حالة نون النسوة وكفاية كام واحدة بس بيحركوها بشكل مباشر او غير مباشر لرفع يافطات تعبانة زيها

وأشد تأثيراً في حالة الكام غلبان بتوع عايزين أختاه ترجع
وكارثية في حالة المسيحيين الغلابة اللي هيموتوا نفسهم بناءاً على كام إشاعة سمعوها ... ولو رجعوا واتلموا في مكان بناء الكنيسة كان زمانها اتبنت

ما تنساش تعرفني لما تكتب عن الندوة :)
بإذن الله

Ahmed Mohamed يقول...

دعنا نبحث عن الحقيقة
ولن ابتدئ بنون النسوة
فالسلفيين او من يدعونها لانفسهم
لهم كل الحق فيما يتظاهرون من أجله نظرا للغموض الذي شاب الموضوع ولا اعرف لماذا تصر الكنيسه علي هذا الغموض
كان يكفي ان تظهر المرأة بنفسها وتعلن عن دينها بدون خوف من احد ,ولكن السؤال هنا
هل هذا وقته ولماذا الان اين كانو بعد ان بداء الامر يدخل في طي النسيان والجواب انه
امن الدوله الي ان يثبت غير ذالك

حرق الكنيسه التي لم تكن كنيسه فلم تأخذ حقها في التقديس
فكما يقال انها كانت دار مناسبات للمسيحيين تم تحويلها الي كنيسه حسب رواية اهل القريه والسؤال هنا
كيف يتم هذا التغيير في اسم وصفة العقار بكل سهوله
والجواب هوه امن الدوله الي ان يثبت غير ذالك

ولن يثبت غير ذالك لانه يحرق نفسه وفي اوراق ادانته

اما حقوق المرأة فعليها وبيتها اصلح لها ومش عايزين وجع دماغ
أمكن عاشت في بيوتهن حتي أتت بكن
فسألوهن كيف عشن وكيف ربتكن
الله يخربيتكـــــــــن

أنا - الريس يقول...

الكلولكشن دا ممكن نجمعه في صالون أمن دولتكوا لسه بخير يا رداله .. ولا عزاء للسيدات .. وعلي الرجال السفله أن ينظموا مظاهرة مليونية لمشاركة المرأة في المطالبة بحقها .

ايوشا يقول...

ردى ان اللى بيحصل دا شئ غير منطقى بالمرة وربنا يعدى الايام دى على خير

ندا منير يقول...

دلوقتى مبقاش فى اى حاجة اطلااقا مفهومة

اولا بالنسبة لطلبات المراة فدى ناس بتافرو كل حاجة يعنى اه دور المراة مهم جدا ومحدش يقدر ينكر دا بس مش كل حاجة ينفع المراة تشارك فيها ويعنى ايه طلب تشريح للرئاسة هو هبل وخلاص
فبالصراحة راييى فى الناس دى انهم بيهيصوا مع الهيصة اما اطلب طلبات معقولة وفى وقت مناسب مش الوقت دا خالص وكل يوم مظاهرة والدنيا تبوظ بعدها اما مطلبش

ثانيا بالنسبة لموضوع المسيحين والمسليمن
فدا الى امره غريب جدا
طلع قسيس وحكى قصة الكنيسة وتبين فعلا ان فاسدين هما اللى خططوا لدا وغير كدة كمان المشير طنطاوى ودكتور عصام شرف رجعلهم حقهم دا غير كمان ان المسلمين والمسيحين كانوا وقت الازمة ووقت هيجان الثورة كانوا بيقولوا محدش يقدر يفرقنا واحنا ايد واحدة واحنا عارفين كل الخطط اللى بيدبروا ليها طب وطالما انتوا عارفين ان دا تخطيط يبقى ليه الهبل للاى بيحصل دا
داخلين مجازر مع بعض
حرام والله اللى حصل امبارح وربنا يستر فى مظاهرة بكرة
لازم الطرفيين يهدوا وكدة غلط جدا
وغلط على مصر كلها

♥نبع الغرام♥♪≈ يقول...

مش عارفه اتكلم

ولا لاقيه كلام يتقال
ربنا يستر بجد على الشعب المصرى
وعلى مصرنا الحبيبه يااارب

جمعه مباركه

فشكووول يقول...

عزيزى
تحياتى
اولا انا مش عارف ايه الرابط المشترك فى الحكايه دى كلها .. مخى تخين وعايز حد يفك لى الطلاسم اللى بتحصل
المظاهره الاولى النسائيه خد بالك ان كلهن وخد بالك من نون النسوه دى .. كلهن كاسيات عاريات شعورهن ناعمات صدورهن كاشفات ودول بتوع الهبل القديم من المجلس القومى للمرأه ومهرجان مش عارف ايه وايه وطبعا كانوا بياخدوا من التورته مرتبات وحاجات ومحتاجات ولما ضاعت الحاجات دى انهبلوا وبيطالبوا ببدلات وفلوسات
بالنسبه للمظاهره المسيحيه .. لهم حق فى بعض الطلبات ومالهمش حق فى طلبات اخرى والموضوع من اولا فيه نوع من اللامعقوليه
لكن مين قال ان المرأه ممنوعه من الترشيح لرئاسة الجمهوريه .. الدستور لا يمانع .. بس يا سلام لو واحده عسل كدا تترشح انا كنت اول واحد يديها صوته .. بس لو كانت حلوه وشعرها ناعم كدا وزى العسل .. ايه المانع يعنى ان تكون واجهتنا واحده تفتح النفس المقفوله
طبعا انا عارف انت ليه رحت الميدان واتفرجت على المظاهره النسائيه .. يا نمس

ألـــــــوان الحيــــــــاة يقول...

سلام عليكم

بعد كل الاحداث والغياب واللى حصل واللى بيحصل

ارجع الاقيك لسه حاططنا فى موقف عدائى بحت

مع ان نون النسوة دماغها اتغيرت كتير بعد 25 يناير

بصرف النظر عن اللى كانوا فى الميدان ^_^

ما علينا

انا قلت اجى اسأل على حضرتك

يارب تكون بخير حال

خالص تحياتى