الاثنين، 11 أكتوبر 2010

جمعية المرأة المتوحشة





تاجر أنا منذ الصغر ، ولدت فوجدت والدىّ يديران تجارة صغيرة للأجهزة الكهربائية بجانب عمل والدى وقد نمت وبفضل الله تعالى مع الأيام ، وبالطبع وكمجتمع بسيط كان لا بد من أن يكون هناك ركن للأجهزة المستعملة بما يناسب جميع الإحتياجات ، وكانت الأجهزة المستعملة تحتاج بالطبع إلى من يثمنها قبل أن نأتى بها من بيوت أصحابها وكان العبد لله من يقوم بهذا الدور ، ومع الأيام كاد الأمر يصل بى إلى إزالة المرارة وربما الكبد والطحال معها ، وإليكم أمثلة على تدبير المرأة المصرية من موقع الأحداث .


فى مرة جانى واحد وأنا قاعد فى المحل وسلم فرديت السلام أقعد ياأبو فلان فقعد ووبعد ضحك وسلامات والأخبار والأهرام وخلافه ، سألته خير إيه اللى فكرك بينا ؟ فرد يا عم عندنا بوتاجاز عايزين نبيعه وقلت أجيلك تشوف لو تقدر تصرفه ،قلت له : عينى ، بس البوتاجاز ده فين ؟ رد عندى فى البيت ، فاستغربت وقلت له وبتاع مين ده ؟ فقال بتاعنا ، فسألته على نوعه فقال لى عليه ، وهنا وبقيت قربت أطق ، بس يا أبو فلان مش دا اللى انتم لسه مخلصين أقساطه من شهرين ، قال لى أيييوه أديك افتكرته ، هو بعينه اللى كنا واخدينه من هنا ، بس يا أبو فلان دا لسه ما عداش عليه سنتين لحق يخرب وألا إيه ، دا حتى نوعه نضيف ، فرد الراجل وهو بيفرك فى إيده بس أم العيال بتقول إنه بقى شغله مش تمام ولازم يتغير ، فقلت له طيب ما تشوف الحاج فلان يمكن البوتاجاز محتاج فونية وألا تسليك مواسير والسلام بدل ما تغرم حق واحد جديد خاصة وإحنا داخلين على موسم والبيوت كلها حالها زى ما إحنا عارفين ، الراجل بعصبية رد وقال والله يا ابنى أنا غلبت والجماعة مصرين إن كده عمره خلص ولازم يغير ، فرديت وقلت له الأمر لله وحده بإذن لله أفوت عليك يوم كذا آخر النهار بحيث تكون رجعت من الشغل وأشوفه .


ورحت فى الميعاد ودخلت والراجل رحب بيه ودخلت المطبخ وإذا بالبوتاجاز كل اللى فيه إن الوش بتاعه محتاج نضافة من الإهمال وشغال تمام وميت فل وعشرة ولا فيه أى عيب داخلى يعنى لو الشيراتون عملنا اختبار لمطابخه عمرها ما تبقى أحسن من كده ، ففكرت شوية كده وسألت الجماعة وإنت يا أم فلان عايزة تغيريه ليه ؟ فردت والله يا أستاذ بقى بيهبب الحلل والطبيخ بيشيط وكمان الفرن كان هيهب فى من كام يوم والبنت لحقتنى وقفلت الأنبوبة ، وأنا أدور على دليل على أى حاجة من اللى هى بتقوله مش لاقى ، من هنا لهنا قلت لهم على تمن اتعمدت إنه يكون أقل كتيير من الحقيقي ، وبرضه وافقت ، فسألتها وعايزه بداله بوتاجاز زيه برضه ؟ قالت لأ عايزة من نوع كذا ، فبصيت لها وقلت مش ده النوع اللى أنا كنت جايبه لأم فلان ؟ قالت أيييوه اسم الله عليك بالظبط هو تمام الله ينور عليك ، وبإذن الله تجيبه لنا إمته قلت لها والله تمن البوتاجاز ده على بباقى المقدمه وبعدها طبعا نخلص الورق أنا وأبو فلان ويكون عندك قوام مفيش مشكلة ، طيب ما تخل خير البر عاجله وتخلصه لنا النهاردة ، فبصيت لها وقلت فى سرى حسبنا الله ونعم الوكيل .


وعنها ورجعت المحل وقلت لزوجها بص يا أبو فلان بوتاجازك ده يسوى كذا وأنا بخسته عندكم فى البيت قلت يمكن ترجع فى كلامها لكن حد الله ما بينى وبينك وباقى المقدمة يبقى كذا إيه رأيك ؟ قال على بركة الله وتمت البيعة ، وبعدها برضه بسنتين ونص تقريبا نفس البوتاجاز رجع لى تانى وأخدوا بداله بوتاجاز تانى مع العلم إن القديم شغال عند اللى أخدوه وتمام جدا وبيشكروا فيه .

نيجى لمثال تانى وألا أقول لكم خليه المرة الجاية .

هناك 28 تعليقًا:

جايدا العزيزي يقول...

الازهرى

حلوة القصه اووووووووى

راقت لى

اشكرك

تحياتى

الازهرى يقول...

جايدا العزيزى

تخيلى لسه كنت بأعيد عندك

ولسه باقى القصة كتييييييييييييير

تحياتى دوما

Kiara يقول...

لا والله

عندي كلام عاوزه اقوله بس لسانى مش مطاوعني

حسبي الله ونعم الوكيل في ناس عاوزه نصه

وفي ناس جوازتها متاخرة عشان كدا

بس ليه الاسم هااا الاسم ليه بئا هه مش ملاحظ حاجه كدا اعترررررررررف

ستيتة يقول...

انت بتجيب سيرة الجمعية؟:)
ايوة يا سيدي
انا وصبرني عملين من زمان جمعية المرأة المتوحشة ومعنا لفييييييييف من "السادة" المدونات
بس يالا
في بيتها

الحقيقة الست مش متوحشة خالص
الراجل هو اللي ....... وخلي عقلك يحط اي شيء مكان النقط مينفعش يتكتب وانا موافقة
انا ضد قهر المرأة
ده صحيح
لكن انا مع المناقشات العقلانية
جبت خبير
الخبير قال قدامي ان الجهاز تمام ومحتاج يتنضف علشان اللي بتطبخ عليه مكينة حرث
اقول خلاص
متشكرين يا عم
واتهدي يا ام فلان
واحاول بصفتي جوزها اكلمها بالعقل وفي الغالب ها ينفع
ولو منفعش كل بيئة وكل بيت له طرق تعامل بتنفع
وكده كده مروحش اجيب تقسيط وعندي التزامات لأن الست غيورة من جارة

عرفت ليه هي متوحشة
علشان يا فرعون ملقتش حد يناقشك ويقنعك :)

Beram ElMasry يقول...

صديقي العزيز الازهري
شكرا علي الاطراءويسعدني مرورك فلا تحرمني ودك الجميل تحية وسلام ولاسلام مع بني اسرائيل

الازهرى يقول...

أيييييييييييوه
الإسم مقصود تمام

وبلغى فاتيما إن الحرب بدأت وقد أعذر من أنذر
ويا ريت تعلن إنسحابها بدرى بدل ما الدم يسيح ويبقى يا ريت اللى جرى ما كان

أدينى اعترفت
ورينى هتعملوا إيه بقى

الازهرى يقول...

دكتورة ستيته
أولا بأعتذر عن استخدام اسم الجمعية دون استئذان
بس أعكل إيه بقى لعضوات الجمعية اللى استفزونى
بصراحة كده وبيع علنى فاتيما هى السبب وهى اللى هتجيب ضلف الجمعية
يا إما تلغوا عضويتها

أما بخصوص الراجل فالحكاية الجاية هتبين إن مش دايما الحوار بينفع وأحيانا الزوجات وبكل أسف بيلجأوا لطرق ملتوية تجبر الشخص إنه يرضخ
طبعا متفق معاكى فى الرأى بخصوص الراجل ده
إنما تابعى وقولى لى على رأيك فى الراجل والست اللى جايين
عندها هتقولى متوحشة بمعنى الكلمة والراجل لا حيلة له على الإطلاق

عامة صعب تقنيعينى إن فى ست يسهل إقناعها أو حتى يصعب
دا يستحيل

تحياتى دوما

الازهرى يقول...

أستاذنا الغالى
بيرم المصرى

تحياتى دوما وخالص مودتى

SHAPE YOUR LIFE (ABOALI) يقول...

هههههههههههههههههههه
الازهرى والستات العمرانه

بص يا ازهرى دى ارزاق والله

ربنا هادى الزوج ومطيع ومؤستئنس
والست عاوزة الجديد
علشان عجلة الحياه تدور
طريقة التفكير واستنباط ما يفيد
تعتمد على مافى جوف الانسان من علم وادراك ومعرفة لحقيقة الحياه
ودول يا انسان مركونين داخل البوتاجاز

بس دى ارزاق يا جدع
وبالنص يا زميلى بلاش كده
البوتاجاز بالنص احسن ابلغ عنك الغاز

ولالالالالالالالالالالالالالالاايه

shimaa elkholy يقول...

الستااااااااااااات

قنبله ذريه

يا ساااااااتر ايه ده هو فى كده

لا وشوف الكهن بقى بتهب وبتاع

ستيتة يقول...

فاتيما؟
لأ تبقى بقى تستلقى وعدك
اي نعم فاتيما تبان مش من الجمعية
لكن دي التنظيم السري بتاعها
وطبعا الاغلبية مرأة متوحشة
وياازهري
يسهل اقناعها
يصعب اقناعها
يندر اقناعها
كل ده مش مهم
اللي يعرف يستغنى يورينا شطارته :)

همسات وبحــ الحياه ــر يقول...

اقول ايه خلينى ساكته احسن اصل مرارتى هتتفقع لو اتكلمت

هى المشكله فى جارتها ام فلان اللى انت جبتلها بوتجاز
ههههههههه
هو ايه اللى جايبنا وا غير انها لازم تجيب زى دى زى دى
ربنا يرحمنا والله
اانا ليا جارتنا كول يوم مطلعه عين اهل جوزها بسبب المواضيع دى

شمس النهار يقول...

تصدق ضحكتني

تسلم ايدك

فعلا في ستات ماترتحش غير لو اشترت زي جارتها
:))

الازهرى يقول...

أبو على

الكارثة الكبرى إن العينات دى بقت أغلبية حاليا وفى ازدياد مش نقصان
السوق الاستهلاكية لم تتأثر إطلاقا بما يوجهه الناس من غلاء بالعكس
وهذا يجعل هناك سؤالا هاما
بيجيبوا الفلوس منين ما دام كانوا بيشتكوا قبلها ؟

تحياتى دوما

الازهرى يقول...

ندى الياسمين

ابعد عن الستات وغنى لهم

دا أحد المبادئ الأساسية الثلاثة لحياتى

وعلى فكرة آخر الأسبوع هأجى لمدة يومين المننصورة
وافرحى يا بلد

تحياتى دوما

الازهرى يقول...
أزال المؤلف هذا التعليق.
الازهرى يقول...

دكورة ستيته

أنا هو وموريكم شطارتى وقاعد سلطان زمانى ومريح دماغى واسألى شموسة تقول لك عن التاريخ

وورونى بقى هتعملوا إيه
أنا بفضل الله فشكلت حزب الشر والأذى قبل كده والدور على جمعية المرأة تتشطب
أنا حذرت لكنكم مصرين

أنتم تريدون الحرب
فليكن ما تريدون

الازهرى يقول...

همسات

وهى لسه ما تفقعتش
أنا بقى لى جيراااااااااان
كل يوم على الحال ده ومع إنى مستفيد لكن برضه مش عارف اعمل إيه معاهم

تحياتى دوما

الازهرى يقول...

شموسة

أيوه أصدق
ما أنا طول عمرى بأضحكم
فاتحها سيرك أنا هنا ؟ مش كده

ويا ريت ترسى علىزى جارتها وبس
دا اللى جاى أفظع

رجعت لكم يا بنات حوا وهوريكم

لحظة تأمل يقول...

شكلك كده اعلنت الحرب :)

تحياتى دوما

الازهرى يقول...

لحظة تأمل

والله أنا أنذرتهم بما فيه الكفاية وبرضوا مصرين
الأمر لله بقى

المهم إنت هتبقى تبع ميييييين ؟

فى أيي خليكى على الحياد أحسن لك

ساسو يقول...

قصه جميله جدا
عجبتني موت
تسلم ايديك

Unknown يقول...

الحياة مليئة بنماذج عجيبة ومثيرة للدهشة

رحــــيـل يقول...

هههههههه جميل جدا بجد

فى ستات كتير دماغها فاضيه جدا بالشكل ده وان جيت للحق الراجل برضه مش عارف يشكمها ههههههه

الازهرى يقول...

ساسو

سعيد أنها عجبتك

تحياتى ددوما

الازهرى يقول...

محمد الجرايحى

المهم أن نحاول مع هذه النماذج كى نعرفها لطريق الصحيح

تحياتى دوما

الازهرى يقول...

رحيل

تابعى وانت تعرفى ان ممكن برضه الراجل يبقى مغلوب على أمره

زينب علي حبيب يقول...

ودا برضو بيسمي نفسو راجل ؟

دا زوج الست !!!!


و ايه الست دي


على فكرة بتلاقي كتير بنات عقلهم كدا


و شباب برضو عقلهم صغير


حدث ولا حرج ...

بس بجد موووووووقف يغييييييييييظ بشكل !