بشرى سارة

بطاقتى الشخصية

الإسم : أسامة مصطفى محمد سعودى
العنوان : مدينة العياط بمحافظة الجيزة ( أى حد هيقول أكتوبر هأقتله )
السن : اتولدت فى 20/4/1986 وكل واحد يحسبها
البرج : دوروا بنفسكم بلاش كسل
المؤهل : بكالوريوس علوم قسم الكيمياء الخاصة ( طبعا جامعة الأزهر مش محتاجة ذكاء ) وبإذن الله الماجستير عن قريب
الهوايات : القراءة والكاراتيه والرياضيات واللغة العربية
المواهب : التمثيل والإدارة والمقالب
البريد : asas_2010_1@yahoo.com
طبعا يمكن الناس تستغرب ايه اللى حصل وخلانى أحط البطاقة دى فى الميعاد الغريب ده ومن غير سببب ، بصراحة فى غيبتى الأخيرة كنت مع نفسى لوقت كافى إنى أعيد حسابات كتير فى حياتى وأحاول أحط إيدى على مواطن الخطأ فيها علشان أخلص منها ، وبدايتها كانت إنى موزع نفسى فى ألف حاجة وبما إن صعب انسان يكسب كل حاجة فكنت بأخسر أحيانا حاجات مهمة وأساسية فى حياتى منها على سبيل المثال حياتى الأسرية يعنى فى المرة الأخيرة اختفيت تقريبا ستة أسابيع كاملين ومن غير ما انتبه ولا آخد بالى لولا إن أخوى الصغير بعت لى يوم 29 شعببان رسالة بسيطة وصغيرة ( يا أسامة وحشتنا أوى ونفسنا نشوفك يريت نشوفك بكرا أمين يا رب ويارب تتشوف شأتك . حمزة ) طبعا أنا نقلتها بأخطائها وكل ما فيها ومش قادر أقول لكم كمية الحزن جواياا لما قرأتها وفعلا ركبت حوالى 6 أو 7 مواصلات لحد ما وصلت البيت فى نفس اليوم والحمد لله حضرت معاهم إعلان الرؤية والسحور والفطار وكمان شاركت فى أمور عائلية مهمة .
المهم قررت إنى أقلل النشاطات الجانبية وأكتفى بالدراسة والشغل وممكن نشاط خفيف ( ولو إن ده الباب الللى بيفتح على أبواب جهنم ربنا يستر ) .
وكمان بإذن الله أحاول أكون مع الناس وأخليهم يعرفونى سواء على النت أو بره النت لإنى بره برده لا بأتكلم عن نفسى ولا فاضى أحكى ، تخيلوا وإحنا فى مدينة الطلبة من سنين وكان معايا زمايل فى التعليم من 15 سنة تقريبا مع بعض ومع ذلك مفيش حد منهم عرف يقول عنى خمس معلومات صح نهائى ، لا بأعمل إيه ولا شغال فى إيه ولا بألعب إيه حتى بأكون معاهم وأختفى وأظهر ولا أجدعها عفريت لحد ما بقى لا حد بيستغرب غيابى ولا حد بيسأل مين راح فين ولو مت هيعرفوا بعدها بسنتين ولو إنى قاعد فى الأوضة اللى جنبهم ، وكانت عادتى إنى ولا بأتكلم عن نفسى ولا عن شغلى نهائى . بس قررت إنى أحاول أكون مع الناس أكتر وربنا يقدرنى .رغيت شووية ، عادى ما الكل بيرغى وحزب الشر مصدع دماغى خاصة بعد ما الأمين العام أعلن الخطوبة وربنا يوفقها ويكرم الباقيين وأخلص منهم ومن إخواتى البنات بضربة واحدة وأقعد لوحدى كده سلطان زمانى ، يااااااااااااااااااااااااااه يا مين ينولنى الحلم ده ، كنت أوزع شربات على جنوب الجيزة كله .