الاثنين، 16 أغسطس، 2010

بشرى سارة


بطاقتى الشخصية
الإسم : أسامة مصطفى محمد سعودى
العنوان : مدينة العياط بمحافظة الجيزة ( أى حد هيقول أكتوبر هأقتله )
السن : اتولدت فى 20/4/1986 وكل واحد يحسبها
البرج : دوروا بنفسكم بلاش كسل
المؤهل : بكالوريوس علوم قسم الكيمياء الخاصة ( طبعا جامعة الأزهر مش محتاجة ذكاء ) وبإذن الله الماجستير عن قريب
الهوايات : القراءة والكاراتيه والرياضيات واللغة العربية
المواهب : التمثيل والإدارة والمقالب
البريد :
asas_2010_1@yahoo.com
طبعا يمكن الناس تستغرب ايه اللى حصل وخلانى أحط البطاقة دى فى الميعاد الغريب ده ومن غير سببب ، بصراحة فى غيبتى الأخيرة كنت مع نفسى لوقت كافى إنى أعيد حسابات كتير فى حياتى وأحاول أحط إيدى على مواطن الخطأ فيها علشان أخلص منها ، وبدايتها كانت إنى موزع نفسى فى ألف حاجة وبما إن صعب انسان يكسب كل حاجة فكنت بأخسر أحيانا حاجات مهمة وأساسية فى حياتى منها على سبيل المثال حياتى الأسرية يعنى فى المرة الأخيرة اختفيت تقريبا ستة أسابيع كاملين ومن غير ما انتبه ولا آخد بالى لولا إن أخوى الصغير بعت لى يوم 29 شعببان رسالة بسيطة وصغيرة ( يا أسامة وحشتنا أوى ونفسنا نشوفك يريت نشوفك بكرا أمين يا رب ويارب تتشوف شأتك . حمزة ) طبعا أنا نقلتها بأخطائها وكل ما فيها ومش قادر أقول لكم كمية الحزن جواياا لما قرأتها وفعلا ركبت حوالى 6 أو 7 مواصلات لحد ما وصلت البيت فى نفس اليوم والحمد لله حضرت معاهم إعلان الرؤية والسحور والفطار وكمان شاركت فى أمور عائلية مهمة .
المهم قررت إنى أقلل النشاطات الجانبية وأكتفى بالدراسة والشغل وممكن نشاط خفيف ( ولو إن ده الباب الللى بيفتح على أبواب جهنم ربنا يستر ) .
وكمان بإذن الله أحاول أكون مع الناس وأخليهم يعرفونى سواء على النت أو بره النت لإنى بره برده لا بأتكلم عن نفسى ولا فاضى أحكى ، تخيلوا وإحنا فى مدينة الطلبة من سنين وكان معايا زمايل فى التعليم من 15 سنة تقريبا مع بعض ومع ذلك مفيش حد منهم عرف يقول عنى خمس معلومات صح نهائى ، لا بأعمل إيه ولا شغال فى إيه ولا بألعب إيه حتى بأكون معاهم وأختفى وأظهر ولا أجدعها عفريت لحد ما بقى لا حد بيستغرب غيابى ولا حد بيسأل مين راح فين ولو مت هيعرفوا بعدها بسنتين ولو إنى قاعد فى الأوضة اللى جنبهم ، وكانت عادتى إنى ولا بأتكلم عن نفسى ولا عن شغلى نهائى . بس قررت إنى أحاول أكون مع الناس أكتر وربنا يقدرنى .رغيت شووية ، عادى ما الكل بيرغى وحزب الشر مصدع دماغى خاصة بعد ما الأمين العام أعلن الخطوبة وربنا يوفقها ويكرم الباقيين وأخلص منهم ومن إخواتى البنات بضربة واحدة وأقعد لوحدى كده سلطان زمانى ، يااااااااااااااااااااااااااه يا مين ينولنى الحلم ده ، كنت أوزع شربات على جنوب الجيزة كله .

هناك 23 تعليقًا:

شمس النهار يقول...

اهلا اهلا
هل هلالك شهر مبارك
او شخص مبارك
انت فين اصلا
انا لو من ناسك ابلغ فيك واسجنك علي الاقل يلاقوا حته يعرفوا يشوفوك فيها ويبقوا عارفين مكانك

:))
مسيرك في يوم تحط الرحال وترسي في مكانك

التواجد مع الاهل نعمة
في ناس يتمنوا يكون ليهم اهل وبيت ومش لاقيين
دي نعمة ياازهري

كل سنه وانت طيب وربنا يكرمك
يارب
الصورة ليه؟؟
:))
سلامي

الازهرى يقول...

شموووووووووووووووسة
قبل أى حاجة ألأف مليون سلامة لرجلك أنا لسه راجع من عند ندى الياسمين وعارف من هناك وبإن الله يكون فى اتصال الصبح على غيار الريق لزوم الإطمئنان ومعرفة المجرم لزوم التار وخلافه

أما بالنسبة للسجن فأنا رجعت فعلا لقيت والدى ووالدتى متفقين مع أصصحابى من ورايا وبنوا الدور التانى واسقف اتعمل كمان
وربنا يستر على الباقى ( دعوة واحد لسه مخلص صلاة التهجد )
لسه بدرى على ما أحط الرحال صدقينى لسه سفرى طويييييييييييل سواء بسبب الشغل أو أى أسباب تانية
تعرفى ممكن جوه البيت وبرضه فى غربة عنهم أنا جوايا كتيييييييير
وأنا والله عارف النعمة بس ظروف أقوى منى وهم عارفين كده كويس جدا
وربنا يقدرنى على شكره على نعمه

كل سنةوانت وكل حبايبك فى إيمان وأمن وسلام وخير وهناء

بالنسبة للصورة فدى أول صورة قابلتنى على النت هى وتامر حسنى طبعا الإختيار مش صعب بينهم

سلام حتى الصباح

Foxology يقول...

حمد الله على السلامة يا استاذ اسامة ايه الغيبة الطويلة دى ؟؟؟

كل سنة وانت طيب ورمضان كريم :)

بمناسبة صورة البطاقة الشخصية لسلطان عمان متعرفش تجيبلنا بتاعة سلطان مصر ؟

تحياتى

لحظة تأمل يقول...

كل سنة وانت طيب :)

دلوقتى طبعا اقدر اقولك انك فى سن اخويا الصغير يعنى لازم تسمع كلام اختك الكبيرة

على فكرة اوقات كتير لما بننشغل اوى بننسى نفسنا فى الزحمة.. بس حلوة اعادة الحسابات مع نفسك

واتشرفنا بيك يا استاذ اسامة :)

دمت بكل خير

gogo!sf يقول...

حمد الله على سلامتك يا سمسم

كل سنه وانت طيب ورمضااااااان كريم

والله انا شايفه ان اللى انت بتعملو ده مش غلط اوى يعنى الغلط الوحيد هو انك تختفى عن اهلك بس
اما انك تحارب عشان تكون المركز الاول فى شغلك او فى اى حاجه تانيه تخص حياتك ده مش وحش بالعكس بيكون مفيد جدا للانسان فيما بعدعلى الاقل بتحس انك عملت نفسك صح

شوف اختفى يا ابنى براحتك واعمل اللى انت عايزة دلوقتى قبل ما يفوت الاوان وتتكلبش لا تعرف تروح يمين ولا شمال
وقتها هتقولك انت رايح فين هتقولها انت ابدا يا روحى داخل انام طبعا وانت بتعيط ههههههههههه

بجد ما تغبش كتير كده تانى وربنا يوفقك ان شاء الله

وكل سنه وانت طيب يا جميل

الازهرى يقول...

العزيز فوكسولوجى

الله يسلمك يا رب

تعرف إن عندى البيانات الشخصية لمعظم المسئولين المصريين كنت أخدتها من فترة من واحد صاحبى ولسه محتفظ بيها

تحياتى دوما

الازهرى يقول...

لحظة تأمل

لالالالالالالا
أنا أصلا مواليد 72 بس هم نسيوا يقيدونى ساعتها

أحسن حاجة إن ربنا أعطانى القدرة إنى أحاسب نفسى بكده بأقدر أعدل من مسارى

وأنا لى كل الشرف إن لى أخت زيك

الازهرى يقول...

جوجو
الله يسلمك وربنا يجعل كل أيامك خير زى رمضان

لأ غلط لإن مش كويس إنك تعيش فى كهف جواك وتبعد عن الناس
تعرفى أحيانا لما بأكون فرحان أو زعان بأبقى محتار أعمل إيه لإنى مش متعود إنى أحكى لأى حد سواء فى فرح أو حزن وبأعيش اللحظة دى لوحدى وسواء فرح أو حزن بيبقى شعور سخيف إنك لوحدك

وممكن أحارب علشان المركز الأول بس فى أولويات فى الحياة لازم أراعيها

وأكتر حاجة مخوفانى هى الكلابشات

ربنا يستر شكر الحرب هتنتهى بهزيمتى هزيمة نكراء

ربنا يكرمك دايما يا رب

كيــــــــــــارا يقول...

هننصب بئا الصورة مش واضحة علي فكرة اننت هتخم الناس

كل سنة وانت طيب يااسامة

ومش عارفه اقول ايه بس عن نفسي انا بدات من مدة انعزل تاني زي ماكنت زمان وبصراحه كدا افضل علي الاقل حاليا

ورمضان كريم ياعم

مبسوطة لظهورك واني اطمنت عليك بدل اللهو الخفي اللي انت عايش فيه

طوبه فضه وطوبه دهب يقول...

حمد لله على سلامه رجوعك للمدونه ولاهلك وما ينفعش الومك لاننا اوقات كتير بنكون ذيك بس ظروف الشغل والدراسات العليا وممكن نرجع البيت شويه نكون ميتين من التعب ومش عايزين غير ننام رتم الحياه بقى سريع بشكل غريب لدرجه انك ممكن تكون موجود فى نفس البيت ومش كل الاحداث متابعه ربنا يعينك ويكرمك بجواز اخواتك البنات يارب كل سنه وانت بالف خير وصحه وسعاده

غير معرف يقول...

كل سنة وانت بالصحة والعافية وراحة البال يا أزهري

صدقنى وخدها نصيحة من واحدة كانت قوقعة قافلة على نفسها واصبحت رغاية
(هو مش رغاية قوي يعنى) :D


الفضفضة أريح بكتييييييييير من قفلة الواحد على نفسه


وبعدين متفكرش ان حزب الشر غايب
لااااااااا
أبتا
حاااااااضرين بعون الله


منوووووش

rovy يقول...

كل سنة و أنت طيب و رمضان كريم عليك و على كل أحبابك يا رب ..
حمدا لله على سلامتك و سعيده أنى أتعرفت على أخويا الصغير أكثر و أكثر ..
ربنا يخليك لأهلك و يخليهم لك و ما يحرمكم من بعض أبدا ..
أرق تحياتى لك دائما ..

الازهرى يقول...

خياراااااااااا

طيب اعمل ايه انا انا غير الصورة مرتين
هى كده بقى واللى مش عاجبه يوح اسكندرية

وكمان انا بقالى 20 سنة باخم الناس هتيجى على المرة دى
كل سنة وانت بالف خير سلام

اتمنى يكون ده الأفضل لك ولو انى مش موافق عليه بتاتا

وكمان مين اللهو الخفى ده انا خط الصعيد

الازهرى يقول...

طوبة فضة وطوبة دهب
الله يسلمك من كل سوء

رتم الحياة بقى مرعب مش سريع وبس

وربنا يستر واقدر احقق اللى فى دماغى

عقبال الجميع وكل سنة والكل بخير

الازهرى يقول...

زعيمة الحزب

موافقك جدا بس عادة قديمة حاولت أخلص منها مرة وقبل ما انجح بخطوة قلبت بكارثة بس ان شاء الله المرة دى ربنا يتمها على خير

وانا ورايا غير الحزب ومشاكله ربنا يكون فى عونى هالاقيها منين والا منين

كل سنةوانت والجميع بخير وسلام

الازهرى يقول...

اختى الغالية ام مريم

كل عام وانت وكل احبابك فى خير وسلام
وربنا يخلى لك مريم واخواتها ويكونوا قرة عينك

أتنين حبيبين يقول...

السلام عليكم

كل عام وانت الى الله اقرب
ربنا يوفقك يارب ويكتب ليك كل الخير
ويحقق ليك كل ما تتمنا وترتاح من اخوتك بجوازات تليق بيهم
ربنا يسترهم ويفرح قلبهم
نورت مكانك من تانى

توتا

ن يقول...

السلام عليكم
رمضان كريم يا استاذ أسامة
ان شاء الله تكون ايامك القادمة عامرة بالمحبة والعطاء .
شكرا على معلومتك بخصوص موضوع استرجاع الصوت بس ياريت لو عندك موقع البحث للإطلاع عليه وان توفرت لديك فيما بعد اى مواقع او ابحاث بخصوص هذا الموضوع واكون شاكرة جدا
مع خالص تحياتى

دموع القمر يقول...

ارغى براحتك
لو مش رغيت هنا هترغى فين
هههه وانا اللى كنت فاكراك حقوق :)
ان شاء الله ربنا يوفقك وتحقق كل اللى تتمناه
المواهب : التمثيل والإدارة والمقالب انت هتقولى هههه
حمد لله على سلامتك

دموع القمر يقول...
أزال المؤلف هذا التعليق.
صدى الصمت - عاشقة الورد - يقول...

أزيك يا أسامة يا أزهرى
الحقيقة التعريف بنفسك شىء جميل والفضفضة كمان شىء مطلوب فى أغلب الأحوال
تشرفنا بمعرفة شخصك الكريم
ورمضان كريم
وكل عام انت بألف خير
ويبقى التواصل بإذن الله

اقصوصه يقول...

رمضان كريم

وكل عام وانتم بخير

TWEETY يقول...

ازيك ياعمو
اخبارك ايه
انا جيت ازورك
يارب تكون بخير
ابقى زورينى ماشى
مع السلامة
كل سنة وانت طيب