الأحد، 27 مارس 2016

حكايات العائد 3



الجحيم 

جحيم حقيقي إنك تعيش علاقات مع ناس وإنت شايف أخرها وعارفه وبرضة تكمل ، إن كل المشاهد تكون متكررة ، إن ربنا يرزقك الفطنة والبصيرة تفهم لبعيد لكن تضطر ترتب الأمور لصالح كل اللى حواليك وتيجى على نفسك وتنزف علشانهم وإنت على يقين إن فى النهاية كلهم ماشيين من حياتك ، لإنك مرحلة مؤقتة فى حياتهم ، مش سهل أبدا إنك تعيش تضحك ضحكة صافية تبسط الناس ، ويفهمها أقرب الناس لك على إنها ضحكة فرح وجواك وجع الدنيا ، بس بتكمل ، وتمشى ، وتعافر وتقابل ناس تانية ، وتالتة وعاشرة وألف ، والمشاهد بتتكرر ، تستنزف ويتلككوا باللاشئ لما يحبوا يبعدوا أو لما يلاقوك ضعيف علشان يبعدوا ، وتسند إنت على الولاحاجة علشان تقوم من تانى ، وتسند حد تانى وتستنزف تانى والمشاهد تتعاد من جديد ، وفى كل مرة تقول بلاش وتحاول تبعد ، ولما رجلك تيجى تقول هتبقى الأخيرة  ، بس برضه مفيش فايدة .

يمكنك دا إدمان الوجع ، يمكن دا قدر ، يمكن علشان مش لاقى حاجة تانية أعملها ، يمكن علشان مابقتش فارقة ، يمكن حاجات كتير ، مش عارف .

كتير بيحاولوا يقولوا لى عيش ، شوف بكرة ، انسى اللى فات ، إعرف ناس جديدة ، اللى راحوا مش هيرجعوا ، لكل من ناسه وصحبته ، وكلام كتير كده ، لا قدر يقنعنى ولا قدر يجيب لى إجابة عن السؤال ، اشمعنى دول اللى ارتحت معاهم ، ليه مفيش منهم ناس تانية تقابلنى ، ليه من بعدهم وأنا فى الضباب ، لا قادر أشوف حد ولا أعرف حد ، واللى أحاول أعرفه أو أقربه ألاقى جرحه أقرب من فرحه ، مش عارف .


بافتقد فيهم الصاحب اللى بجد ، الكتف فى الكتف والضهر المحمى ، كنت لا بأشيل هم بكرة ولا عامل له حساب ، كانت كل حاجة بتهون  ، كنت باضحك بجد ، كنا لما بنزعل ولو من بعض كنا نروح لبعض نفضفض ونشتكى ، كنا روح واحدة فى أجساد كتير .


جحيم إنك تبقى الأخير ، إنك ما تعرفش تفضفض وقت ما تكون مخنوق ، إنك تدور على حد يشاركك الفرح ما تلاقيش ، إنك تتوجس من الكل ، خايف من اللى ما تعرفوش ، واللى تقربه خايف تفقده ، واللى تفقده وهو عايش تعيش بجحيم سوء اختيارك له .



دايرة مش باين لها نهاية ، وحكايات من غير معنى ، وأدينا عايشين . 

هناك 3 تعليقات:

الفاطِمَة يقول...

أنت جيلي أنا ولا ايه ؟
كأنك بتتكلم عني بالملي :(
أتمنى نوصل لإجابة السؤال أنا وانت واللي زينا
تحياتي

اخبار سيارات يقول...



thank you

اخبار السيارات

حمزاوي يقول...


This is a wonderful work we wish you success and excellence and thank you

شركة شام للخدمات المنزليه هي من افضل الشركات التي تعمل في مجال الخدمات المنزليه وذلك بسبب امتلاكها للعديد من عناصر التميز مثل الايدي العامله المدربه صاحبة الخبره العاليه في هذا المجال وايضا التقنيات الحديثه التي تستخدمها الشركة في تنفيذ ما تقدمه من خدمات , ومن الخدمات التي تسعد شركة شام بتقديمها لعملائها الكرام مايلي
شركة رش مبيدات بالدمام
شركة تنظيف مسابح بالدمام
شركة مكافحة حشرات بالدمام
شركة تنظيف سجاد بالدمام
شركة تنظيف خزانات بالدمام