السبت، 29 نوفمبر، 2014

فضفضة عن الثورة

 
 

ما اتعودتش أكتب هنا سياسة بس فى فضفضة لازم تتقال وخنقانى قوى

الثورة ناجحة
آه والله ناجحة وناجحة جدا كمان
يكفى إنى بأشوف فى عيون الطلبة كل يوم التحدى لكل أساليب النظام
يكفى إنى باسمع الناس البسيطة بتتكلم وتنتقد وتطالب ولو في ما بينها وبين بعض
يكفى التريقة الكتير اللى بياخدها النظام الحاكم
الناس عرفت الطريق
وعرفت إنه ممكن
الباقى هو الأسهل
أى حاجة بيعملها النظام الحالى هى شهقة المذبوح وانتفاضته الأخيرة
اللى بيحصل دا مش تمكين لإن التمكين لأى حد فى التوقيت الحالى هو الإستحالة بعينها
والكلام ده قلته أيام المجلس وأيام مرسى وأيام العادلى
التمكين يحصل بعد الإستقرار
ومفيش استقرار قبل الوصول
يمكن أكون واهم أو حالم أو مثالى أو قارئ غلط للتاريخ
بس دا اللى أنا شايفه

طب كل ده ولسه كمان ؟؟؟؟
آه لسه كمان
وممكن أقول لسه كتير مش قليل
الثورة مش تغيير فى ديكور الدولة
شيلنا رئيس وبرلمان ودستور
ونجيب غيرهم
الثورات وخاصة الإجتماعية منها وربنا ييسر وتكون مصر منها ( ودا اللى أنا شايفه ) بتاخد وقت ضخم جدا للنضوج
تخيل الفرق بين إنك تاخد ملف بعجلة صغيرة
وإنك تبقى راكب أوتوبيس أو سكانيا كبيرة محملة حمولة ضخمة
دا الفرق بين التغيير فى حياة الفرد وحياة الأمم وخاصة الأمم المثقلة بحمل تاريخى وحضارى كبير زى شعوب منطقتنا

إحنا فعليا ( ودا كلام مراكز دراسية كبيرة فى أكتر من مكان ) فى منحنى تاريخ ربما نوصل زاويته لأقل من 90 درجة بكتير
العالم كله بيتنفض وبيحاول يرمى كل الأحمال اللى على أكتافه من فساد السنين اللى حكمت فيها الأيدولوجيات العالم واتسببت فى دمار كبير وموت كتييييييير
يمكن اتكتب علينا نكون طليعة الحدث ومن الفساد اللى نخر جوانا طول قرون فاتت وغياب الرؤية وتواجدنا فى منطقة مهمة كان لازم يبقى الصراع فى أعلى قممه

جيلنا اتكتب عليه إنه يعيش المعركة دى
صعبة يمكن ، وأكثر صعوبة من أى حد يتخبلها ، لكن مش مستحيلة
مات وهيموت مننا كتير دا صحيح
هنتعصر ونتبهدل ونضيع حياتنا فيها دا أكيد
لكن أهم حاجة ما يفعش فى وسط كل ده ننسى المعركة الأصعب
وهى إننا نبنى الجيل اللى بعدنا إنه لازم يحدد معركته ويخوضها للنهاية
دا مش هروب ومش اتكال زى ما البعض ( ربنا يهديهم ) اتكلم فى إننا لازم نرضى بالواقع ووحاول نغير النظام من جواه ونمشى فى ركابه
دى أفشل الطرق للثورة وأظن تجربة فترة مبارك لحد النهاردة تثبت ده بما لا يدع مجال للشك  إطلاقا
إحنا هنحارب ونهاجم وندافع وهتفضل المعركة فى الشارع قائمة
لإن ببساطة هو دا ميدان المعركة الحقيقي
ودا اللى قلته من قبل حتى برلمان الإخوان الأول والرئاسة بمراحلها وكل الهرى ده
ومش معنى الشارع هو العنف
لأ
كل التجارب العنيفة بتنتهى بالفشل
دا درس التاريخ الأول
المعركة معركة وعى
انزل وقول رأيك
انزل اتظاهر ( فى وجود القانون أو عدمه )
انزل وكلم الناس
خلى كل يوم الناس تعرفك أكتر
بطل النغمة الممجوجة بتاعت ( شعب جاهل وناس ما بتفهمش )
لإن أولا الناس أثبتت فى أكتر من موقف إنها بتفهم وبنفهم جدا كمان
لكن لها أولويات مختلفة
حاول تقرب منهم وتحاول تعيد ترتيب الأولويات من جديد
كلم الناس عن ثورتك ومعناها والمطلوب منها
هتلاقى إنك كل يوم بتكسب أرض جديدة
والقمع ؟
أكيد هيبيدك ويحاول يستأصلك من جذورك
بس عمره ما هيقدر
أيوه عمره ما هيقدر
دا درس التاريخ التانى
وكل ما يزيد فى القمع زيد فى النزول
وفى الكلام
وفى الحركة بين الناس
اتكلم عن الصح والغلط
وإيه المفروض يكون أكتر
لإن زيادته فى القمع ببساطة معناها خوفه منك
أنا شفت الخوف دا فى عيون كل اللى حكموا مصر ( أو ظنوا إنهم حكموا مصر ) فى الفترة الأخيرة
والله العظيم شفته
لإنه مهما حاول يخفى ده بيظهر

 

إنزل وحارب علشان تفرح بثورتك
أو يفرح بيها اللى بعدك
مش مهم
المهم إنك دايما تبقى واثق إنك منتصر
 
وإن بكرة جاى

هناك تعليق واحد: