ثورة ولا انقلاب

 

قبل ما أرجع الفضاء الحلزونى بتاعى بناء على نصيحة من القريبين من قلبى حابب أقول كلمتين .

اللى حصل فى مصر ثورة ، ثورة مكتملة الأركان والمعالم ، كل اللى أعرفهم نزلوا الشوارع ودمهم روى الأرض وشيلناهم على أكتافنا ( وما قدرتش أحضر دفن أى حد منهم ) نزلوا علشان حلمهم بالثورة دى ، وحلمنا وحلمهم بيتحقق ، مش لسه هيتحقق ، قليل مننا عاش علشان  يشوف اللحظات الجميلة دى ، وأقل هيكمل ، ويمكن مفيش حد مننا يوصل لنقطة النهاية ويشوف مصر اللى اتمنيناها طول عمرنا ، بس برضه إحنا فرحانين وهنفضل مؤمنين إن اللى حصل ثورة ، ثورة بكل مراحلها ، ثورة حقيقية ثورة بتقلب ( مش هتقلب )  كيان العالم مش مصر بس ، والثورة هى التغيير ، التغيير الكامل ، التغيير فى النظم كلها مش النظام السياسي وبس ، مش تغيير مبارك وعصبته بعصبة تانية أو تالتة أو رابعة أيا كانت المسميات والتوجهات  لأ تغيير نظام الفكر نفسه ، وده طريق طويل ، وحلم بعيد ، بس بيتحقق ، كل الغليان والتصفية والصهر وإزالة الخبث اللى بتحصل بتأكد إننا على الطريق ، وبإذن الله مش هنرجع .

طريق صعب وشاق وطويل ومش مفهوم وممكن أقول كمان مضطهد ، بس اليقين بإنه الطريق الصح والعلامات اللى بتظهر إننا صح بتزود عندنا اليقين ، وبتخلينا أٌوى كل يوم ، هيتصفى ناس وتختفى ناس وتظهر ناس تانية ، بس كل ده يهون لإن مصر هتبقى أجمل ، هتبقى أم الدنيا زى ما كانت وغصب عن أى حد وبعيد عن أى حد بيستعمل الكلام ده بشكل أجوف ، هتبقى لإن شعبها هو الأعظم مهما حاول أى حد يقول غير كده لإن التاريخ أثبت ده فى عصور كتير ومواقف أشد بكتير من كل اللى إحنا عايشينه دلوقتى بس مش مشكلة سنين صعبة فى عمر الزمن لحظات

 

يا رب