هدنة مؤقته



بعد اعتراف الطرف المغرض والقائم بأعمال قائد الجناح السرى لجمعية المرأة المتوحشة بالعجز عن التصدى لحضرتنا وطبعا بدون ذكر أسماء كالعادة ، وبعد يأس رئيسة الجمعية من وجود أنصار معاونين لها وبرضه بدون ذكر أسماء ، واللى بيفكرنى برئيسة حزب الشر والأذى القديم واللى تم حله بعد محاولته الوقوف فى طريقى وبرضه بدون ذكر أسماء منعا للإحراج ، ونزولا على رغبة الجماهير الغفيرة اللى بأحترم رأيها ، تم إقرار الآتى : يتم إيقاف الحملة المعلنة ضد جمعية المرأة المتوحشة إلى حين ، على أن يتم استئنافها فى حالة صدور أى فعل يوحى بالشر من طرفهن .

وإمعانا فى حسن النية هأحكى النهاردة على موقف حصل وأنا فى الثانوية وكان ضحيته مجموعة منهن . وأنا فى الثانوية كنت بأخد درس فى مادتين ، الإنجليزى لإنى كنت سىء فيه جدا ، والفيزياء علشان التجارب والنظرى كانوا كارثة بالنسبة لى لأن آخر حاجة ممكن تحصل إنى أحفظ تجربة وأعرف اكتبها زى الكتاب ما بيقول ، وكان فى مدرس جميل قررنا ناخد عنده ، لكن كنا عاملين له مشكلة وكان بيسمينا مجموعة النايمين ، لإن الدرس كان الصبح بدرى قبل المعهد وكنا بنروح فاصلين خالص ، يعنى يشرح وإحنا فى الباى الباى ، وكان اللى جاب له الضغط إنه يسألنا يلاقينا فاهمين ، يبص فى وشنا يلاقينا نايمين ، المهم ففى يوم من الأيام قرر يعمل امتحان مجمع للمجموعات وطبعا بنات وبنين بقى وهيصة واتحدد الميعاد الساعة أربعة بعد العصر ، وجه اليوم وان كان من عادتى أيامها إنى أنام القيلولة ( كانت أيام عز الحمد لله على كل حال بقى ) المهم صحيت من النوم كانت الساعة أربعة وعشرة تقريبا فطلعت بسرعة ورحت على بيته اللى كان على بعد خمس شوارع مننا ودخلت عليه وأنا لسه حتى ما غسلتش وشى ، وصباح الفل يا أستاذنا قال لى : أدخل اغسل وشك وتعالى ، المهم فقت وقعدت ، لقيت إن كل اللى جايين معانا هما ولدين زمايلنا وأربع بنات ، والمدرس وزع علينا ورق الأسئلة مطبوع وشكله حلو وفيه أربعمسائل كلهم فى الكهربية ودوائر المقاومات والكلام ده ، المهم أخدت الورقة وطلبت منه قام ، فبص لى باستغراب وكان عايز ياكلنى ، فضحكت وقلت له ما انت شفت إنى جاى من على السرير على هنا على طول ، وأخدت القلم ورميت عينى على ورقة الأسئلة وبدأت أقرأ المسألة واكتب رقم جنبها وفى خمس دقايق تقريبا كنت بأديله الورقة ، فقال أنا عارف إن طول عمرك خايب إيه اللى جابك ما دام مش مذاكر ، فقلت له وهى دى أسئلة محتاجة مذاكرة بلا كلام فاضى ، فرد يعنى إيه ؟ فقلت له الإجابات عندك ، وبص على الورقة وفوجىء إنى برضه عملت أسخف حاجة هو بيكرهها فى وهى حسبت المعادلة فى دماغى وكتبت الناتج النهائى والسلام ( وكانت دى عادتى أيامها حتى المدرسين كانوا بيقولوا إنى بأور لهم تمن آلة حاسبة )، ولقيته بيقول ما ينفعش يا ابنى لازم تكتب خطوات كد هيقولوا إنك غاشش وهنا فوجئت إن فى بنت من البنات اتنفضت وبدأت تزعق وانت يا أستاذ قلت لنا إننا أحسن منهم وإن أنت جايبنا هنا علشان هنقدر نل أحسن منهم وبكده يذاكرو ، إنت جايبنا هنا علشان نتهزأ وهو لقيت البنت قلبت هستريا والبنات يهدوا فيها وأنا مش فاهم حاجة وسوية ومشيوا وفو جئت بالمدرس بيقول لى منك لله انت إيه اللى جابك ما كنت كملت نوم وريحتنا ، دا البنات مفيش واحدة منهم نامت من امبارح بسبب الإمتحان وجايين على آخرهم روح يا شيخ منك لله

وخرجت وبرضه مش فاهم حاجة لكن بعد خروجى مع زمايلى اكتشفت إن المسائل كانت صعبة بالنسبة لهم هم كمان ومفيش حد عارف انا حليتها بسرعة إزاى ، وخمسة وخميسة فى عين العدو .