الأحد، 7 نوفمبر 2010

هدنة مؤقته






بعد اعتراف الطرف المغرض والقائم بأعمال قائد الجناح السرى لجمعية المرأة المتوحشة بالعجز عن التصدى لحضرتنا وطبعا بدون ذكر أسماء كالعادة ، وبعد يأس رئيسة الجمعية من وجود أنصار معاونين لها وبرضه بدون ذكر أسماء ، واللى بيفكرنى برئيسة حزب الشر والأذى القديم واللى تم حله بعد محاولته الوقوف فى طريقى وبرضه بدون ذكر أسماء منعا للإحراج ، ونزولا على رغبة الجماهير الغفيرة اللى بأحترم رأيها ، تم إقرار الآتى : يتم إيقاف الحملة المعلنة ضد جمعية المرأة المتوحشة إلى حين ، على أن يتم استئنافها فى حالة صدور أى فعل يوحى بالشر من طرفهن .


وإمعانا فى حسن النية هأحكى النهاردة على موقف حصل وأنا فى الثانوية وكان ضحيته مجموعة منهن . وأنا فى الثانوية كنت بأخد درس فى مادتين ، الإنجليزى لإنى كنت سىء فيه جدا ، والفيزياء علشان التجارب والنظرى كانوا كارثة بالنسبة لى لأن آخر حاجة ممكن تحصل إنى أحفظ تجربة وأعرف اكتبها زى الكتاب ما بيقول ، وكان فى مدرس جميل قررنا ناخد عنده ، لكن كنا عاملين له مشكلة وكان بيسمينا مجموعة النايمين ، لإن الدرس كان الصبح بدرى قبل المعهد وكنا بنروح فاصلين خالص ، يعنى يشرح وإحنا فى الباى الباى ، وكان اللى جاب له الضغط إنه يسألنا يلاقينا فاهمين ، يبص فى وشنا يلاقينا نايمين ، المهم ففى يوم من الأيام قرر يعمل امتحان مجمع للمجموعات وطبعا بنات وبنين بقى وهيصة واتحدد الميعاد الساعة أربعة بعد العصر ، وجه اليوم وان كان من عادتى أيامها إنى أنام القيلولة ( كانت أيام عز الحمد لله على كل حال بقى ) المهم صحيت من النوم كانت الساعة أربعة وعشرة تقريبا فطلعت بسرعة ورحت على بيته اللى كان على بعد خمس شوارع مننا ودخلت عليه وأنا لسه حتى ما غسلتش وشى ، وصباح الفل يا أستاذنا قال لى : أدخل اغسل وشك وتعالى ، المهم فقت وقعدت ، لقيت إن كل اللى جايين معانا هما ولدين زمايلنا وأربع بنات ، والمدرس وزع علينا ورق الأسئلة مطبوع وشكله حلو وفيه أربعمسائل كلهم فى الكهربية ودوائر المقاومات والكلام ده ، المهم أخدت الورقة وطلبت منه قام ، فبص لى باستغراب وكان عايز ياكلنى ، فضحكت وقلت له ما انت شفت إنى جاى من على السرير على هنا على طول ، وأخدت القلم ورميت عينى على ورقة الأسئلة وبدأت أقرأ المسألة واكتب رقم جنبها وفى خمس دقايق تقريبا كنت بأديله الورقة ، فقال أنا عارف إن طول عمرك خايب إيه اللى جابك ما دام مش مذاكر ، فقلت له وهى دى أسئلة محتاجة مذاكرة بلا كلام فاضى ، فرد يعنى إيه ؟ فقلت له الإجابات عندك ، وبص على الورقة وفوجىء إنى برضه عملت أسخف حاجة هو بيكرهها فى وهى حسبت المعادلة فى دماغى وكتبت الناتج النهائى والسلام ( وكانت دى عادتى أيامها حتى المدرسين كانوا بيقولوا إنى بأور لهم تمن آلة حاسبة )، ولقيته بيقول ما ينفعش يا ابنى لازم تكتب خطوات كد هيقولوا إنك غاشش وهنا فوجئت إن فى بنت من البنات اتنفضت وبدأت تزعق وانت يا أستاذ قلت لنا إننا أحسن منهم وإن أنت جايبنا هنا علشان هنقدر نل أحسن منهم وبكده يذاكرو ، إنت جايبنا هنا علشان نتهزأ وهو لقيت البنت قلبت هستريا والبنات يهدوا فيها وأنا مش فاهم حاجة وسوية ومشيوا وفو جئت بالمدرس بيقول لى منك لله انت إيه اللى جابك ما كنت كملت نوم وريحتنا ، دا البنات مفيش واحدة منهم نامت من امبارح بسبب الإمتحان وجايين على آخرهم روح يا شيخ منك لله

وخرجت وبرضه مش فاهم حاجة لكن بعد خروجى مع زمايلى اكتشفت إن المسائل كانت صعبة بالنسبة لهم هم كمان ومفيش حد عارف انا حليتها بسرعة إزاى ، وخمسة وخميسة فى عين العدو .



هناك 35 تعليقًا:

جايدا العزيزي يقول...

هههههههههههه

محروس من العين

وخمسه وخميسه فى عين اللى مايصلى على النبى

طول عمرك نبغه وعبقرى وسابق سنك

ههههههههههههههه

تحياتى

SHAPE YOUR LIFE (ABOALI) يقول...

ياااااااااااااااه
ده ستر من ربنا على عباده
بقى فيه مسئله تتحل كده
بدون كتابة الخطوات والذى منه
هى ملوخية يا حضرة

روح ربنا يسلط عليك فيثاغورث وتعرف قيمة تربيع الوتر وتنزل منه على اينشاتين يعلمك النسبية ومنه على الدالة
وتتدلى من فوق ومرة من تحت
وربنا يجعلك عااااااااااااامر

سسسسسسسسسسسسسلامى للبنت الرقيقة دى
هى لسه موجودة ولا راحت فين

Foxology يقول...

ههههههههههههههههههههههههههههههه

والله انت فنان يا هيثم
تحياتى

فاتيما يقول...

يا حلااااااوة
حليتهم ف دماغك ؟!!
و النبى ايه؟

علينا الحركات دى ؟


انتا تلاقيك كنت
موالس مع الأستاذ
و مطبخينها سوا
و قاصدين تجيبوا
للبت "اونهيار عصبى" على رأى الواد يسوفة ابنى



يعنى حتى النموذج اللى جه على بالك و جادت بيه القريحة مطلع البناتيت هستيريات و خايبات و ابصر ايه
يا لهوتينىىىىىىى عليك يا زيزو


لأ و خمسة و خميسة كمان
هنحسد على ايه .. امشى انجر كدا
ما قولنا موالس
عموماااااااا
طوايب
انا هخلينى ساكتة
و كويسة
و الم التعابين
ما دمت عملت هدنة
و قولت الطيب احسن



بس دا لا يمنع
انى اقول
انكم
لا غنى و لا صيت
و جنس حويط
و كتاب ما يبان من عنوانه


ومسمعش حسك بقى و تغالط
واصل دا مش كلامى
دا كلام الرائع صلاح جاهين
و اهو راجل من وسطيكو اهو
و مش أى راجل
دى سيدى الرجالة كمان
و اعترض بقى
و افتح بوقك
عشان الم عليك البلوجر
ييجى يقيم عليك الحد




عموما
الهدنة مكبولة يا فندم
و لنوقف اطلاق النار كليلأ
عشان يسود الهدوء بالمنتقة
و اعمالاً للصالح العااااام

كان معاكم
الطرف المغرض
والقائم بأعمال
قائد الجناح السرى
لجمعية المرأة المتوحشة


و بدون ذكر اسماء اهو

:)

عمرو يسرى يقول...

ههههههههههه
فكرتنى بشبابى

Butterfly يقول...

ههههههههههه
ماشاء الله
فكرتنى بأيام زمااان اللى نفسى ترجع تانى والله

همسات وبحــ الحياه ــر يقول...

لالا انا كنت بكره الفيزياء وبلافخر جبت فيها 36 من 50
ههههههههه
عارف وانا بقرأ فكرتنى بنفسى بس فى رياضه اتنين كنت بحل مساءل رهيبة
والله الاستاذ مرة ادانا مسئلة وقال حلوا
المهم فضلنا ربع ساعه ولا حد اداله الكراسه قال انتوا اصلا اغيبة مفيش دماغ مفيش ......كل الكلام الحلو اتقال وبعد كدا حل المسأله ساعتها نطيت زى فرقع اللوز كدا وقولتله اهى وربنا انا كنت حالاها اعجب جدا بحلى وتفكيرى لان المسألة دى كانت من اعدادى هندسة

همسات وبحــ الحياه ــر يقول...

حليتهم فى دماغى
دى كلمة اخويا هههالاقيه كاتب الحل ياابنى فين الحل يقولى فى دماغى يوه هو انا لسه هكتب هو مش الحل صح خلاص بقى

لكن انا كنت بحب اشخبط واكتب وامسح واعمل مسودة هههه

لــــ زهــــــراء ــــولا يقول...

بسم الله
ما شاء الله
لا قوة الا بالله
ازاى زويل سايبك كده وهو اللى بيدوا جايزة نوبل مش عارفين يوصلوا لعنوانك ازاى ؟؟؟؟؟
انا كنت علمى وكانت باستخدم ورق كتير اوى فى حل المعادلات انت بقى بتحلها فى دماغك يا ما شاء الله المفروض تخاف من الحسد
طيب سؤال كنت بتوصل للحل مره واحده كده ازاى من غير خطوات ؟؟؟

ربنا يوفقك يارب ويجعل عيونا عليكى بارده

زهراء

الازهرى يقول...

جايدا العزيزى

طبعا نابغة وعبقرى
وهو نافع البلد دى فى الظروف اللى إحنا فيها إلا عبقريتى

تحياتى دوما

الازهرى يقول...

أبو على

الحمد لله المرة دى مفيش احتلال

أيوه بالنسبة لى كانت أسهل كمان من الملوخية ودا كان الخلاف بينى وبين المدرسين دايما

وكمان الجذر التربيعى والنسبية الحمد لله اتعلمناهم وبق ىفى أصعب منهم والله المستعان

المهم ربنا يكفينا شر القلوب السوداء

البنت دى دخلت هندسة وكانت شبكتها من شهر تقريبا

تحياتى دوما

الازهرى يقول...

فوكسولوجى

تعرف الحاجة اللى نفسى حقيقي أعرفها

مين هيثم ؟

تحياتى دوما

الازهرى يقول...

فاتيما

وبعدين بقىىىىى
موالس مين بس إنت نسيتى إننا أزهرية يعنى غش يوك كذب يوك

وكمان أنا جبت البنت مظلومة مش نافع
قلت الحقيقة مش نافع
أطلع من هدومى أحسن
وأنكش شعرى وأقعد جنب الحسين علشان تستريحوا

وأيوه خمسة وخميسة
وكمان تعابين إيه اللى بتتكلمى عليها
بقى بعد ما قلت أصالحهم وكفاية كده وكان الله بالمحسنين رؤوفا رحيما

تقولى تعابين
كانوا فين من زمان إن شاء الله
على رأى المثل
أقرع ونزهى
ولا المثل التانى
القرعة تتباهى بشعر بنت أختها

وكمان عمنا جاهين على عيننا وراسنا
بس و كان مجامل حبتين ومغلوب على أمره
كان أيام المرأة الطاغية وحقوقها اللى مش عارفين آخرها
قال على آخر الزمن المرأة بقى لها حقوق
وشوية شوية سكتنا له دخل بحملره وعسكر كمان

والهدنة أساسا مقبلة من غير كلام
دى فرصة لكم من الطرف المتسامح
اللى هو شخصنا الكريم
علشان تقدروا تلموا جرحاكم وتشموا لكم نفسيين حلوين

وكمان عايز احترام تام بدل ما أقلب عليكم
ويبقى نهاركم زى ليلة 28 تمام

وفى الناية بأشكرك على عدمذكر الأسماء
حفاظا على المنظر العام
إحنا يهمنا عدم إحراج الزيون

ويبقى تعالوا كل يوم

الازهرى يقول...

عمرو يسرى

يا راجل
شبابك إيه بس
إنت لسه بصحتك
أمال مين هيربى العيال

تحياتى دوما

الازهرى يقول...

همسات

لالالالالا
تخيلى بقى إنى جبت 57 من ستين فى كل المواد العلمية
درجة موحدة لما الدفعة كلها ضحكت على

أما الرياضة فدى عشقى طول حياتى وهى مع التجارة اللى خلوا دماغى صاحية وحساباتى سريعة جدا
وفى الكلية كنت لما أحب أصحح وأدخل فى مود المذاكرة أبدأ بالرياضة
وكمان اعدادى هندسة اعداى طب
الرياضة محتاجة تفكير ودماغ بتفهم
بعدها كله سهل

الازهرى يقول...

همسات

أيوه حليتهم فى دماغى
كنت بأحط القانون وأعوض فيه وأحسب وأطلع النتيجة النهائية من غير ما اكتب أى حاجة

إنما المسودات كانت فى الرياضة علشان التعويضات الكتير

الازهرى يقول...

زهراء

ما هو أنا كنت مع زويل من سنة ونص تقريبا لما كان فى مصر
والحمد لله إديته عنوانى ومستنى الجواب

تعرفى هأقول لك كلمة سر
فاكره موضوع المنجمون ؟
هنا السر

كل الموضوع اللى مفيش حد واخد بال منه
إنى قلت إنها مسألة كهربية
يعنى حاجتين
أولا إنها محتاجة بس الفكرة إنما قوانينها قليله
ثانيا إنى كن دايما بأختصر القوانين مع بعض وأخلى التعويض فى النهاية بحيث تكون الأرقام قليلة والباقى ربنا بيوفقنى فيه بدماغى لإن شغلى فى التجارة مع حبى للرياضة خلى الحسابات عندى سريعة
وكانت هى دى المشكلة إن المدرسين كانوا مصرين على الخطوات
يعنى مش ميزة دى عيب بالنسبة لهم وكانوا بيحاربوا لموضوع ده جدا

تحياتى دوما

الازهرى يقول...

فراشتنا

والله أنا كمان نفسى

بس يرجع إزاى

تحياتى دوما

Beram ElMasry يقول...

صديقي الجميل الازهري
صدقت والواجب علينا ان نؤدي دورنا بالتصويت والاختيار بحرية ومن المؤكد ان تكون النتيجة ايجابية ان لم يكن عاجلا فيكون اجلا
تحية وسلام ولاسلام مع بني اسرائيل

ستيتة يقول...

هههههههههههههههههههههههههههههه
اضحك الله سنك
كفاية اني اقرأ بوست "كوميدي" وادعي لك
والهدنة غير مقبولة
واشك شك يرتقي لدرجة اليقين ان استحالة واحدة من الجمعية تكون طلبت هدنة
نحن جبلنا على الحروب
ويا أهلا بالمعارك :)

طوبه فضه وطوبه دهب يقول...

فكرتنى بايام الفيزياء انا يوم امتحان اخر السنه كانوا خارجين معيطين وانا حليت الست اسئله مش خمسه بس يااااااااااااه كانت ايام بقى وبعديم مالك ومال المراه سبوها فى حالها بقى هى نقصاكم ههههههههه على فكره البوست الاخير بتاعى مجرد خاطره والغياب والتقصير انا اسفه بجد عليه بسبب امتحانات الدراسات العليا بتاعتى بعد العيد ومطحونه فيها ادعيلنا يا ازهرى بالله عليك اخواتك فى زنقه وهنيالك يافاعل الخير والثواب ويارب تكون بخير وفى احسن حال

ذو الوجه المبتسم يقول...

كل سنة وانت بخير

عيد مبارك

تحياتى

أبو فارس يقول...

السلام عليكم
جمبل ماخطته اناملك
كل عام وانت طيب
تقبل مروري

دمت في حفظ الرحمن

ساسو يقول...

هههههههههههههه
والله عسول
ماشاء الله
نمسك الخشب
ربنا يوفقك

لحظة تأمل يقول...

يا سلاااام
طول عمرى اقول الازهرى طيب وقلبه قلب خساية :)

كل سنة وانت كيب :)

لحظة تأمل يقول...

كل سنة وانت طيب

شمس النهار يقول...

حتي في الدرس برضوا

ده انت مش ممكن مالكش حل

المهم

عجبتني الهدنه دي
وخصوصا بدون ذكر اسماء السفر خلص علي خير

:)))
كل سنه وانت والاسره الكريمه بخير وصحة وعافيه

:))

الازهرى يقول...

بيرم المصرى

أوافقك تماما

تحياتى دوما وخالص مودتى

الازهرى يقول...

د ستيته

كفاية على جدادعوة بظهر الغيب

ممممممممممم
غير مقبولة ؟
واضح إنكم بتلعبوا فى عداد عمركم
وكمان بتشكوا فى كلامى
لاااااااااااااااا

ااعترافهاموجود فوق فى التعليقات لو مش مصدقانى
لحد بعد العيد لو ما افقتوش داخليا على قبول الهدنةمن عدمه
يبقى الحرب
ونحن لها

كل سنة وانت والجميع بخيروسلام

الازهرى يقول...

طوبة فضة وطوبة دهب

طيب ما انا كمان عندى امتحانات يا ناس
مخلينى احس إنى مش بشر
وقال يقولوا المرأة بتتحمل أكتر قال

وكمان الفيزياء لسه معاها عندى ذكريات كتييييييييييييير

والأيام بيننا يا جنس اكس اكس على رأى الدكتورة ستيته

الازهرى يقول...

ذو الوجه المبتسم

وإنت بخير وفرحة وسلام

تحياتى دوما

الازهرى يقول...

ابو فارس

شكرا على الكلام الجميل

وكل عام وانت بخير

وعيد سعيد على الجميع

الازهرى يقول...

ساسو

تمسكى الخسب
تمسكى النحاس المهم تبعدى عنى عينيكم المدورة
ربنا يستر

تحياتى وكل عام وانت بخير حال

الازهرى يقول...

لحظة تأمل

طول عمرك رافعة من معنوياتى

كل سنة وانت طيبة

وعيد سعيد على الجميع

الازهرى يقول...

شمس النهار

لالالالا

فى حل

يسيبونى فى حالى
أسيبهم فى حالهم

يا رب بس يقبلوها أنا بكره أسيح دمهم كده والسلام وخاصة إنهم مش قدى والكل عارف
دول خيش وقش

أما بخصوص السفر اللى خلص على خير
فأنا عرفت
وبأقسى طريقة تتخيليها
بجد قلوب أسود من أبو جهل فى زمانه

كل سنةوانت وكل أحبابك فى خير وسلام