الخميس، 18 مارس 2010

ساعدونى




ساعدونى يكرمكم ربنا

مع التطور التقنى لمستلزمات الحاسب الآلى والثورة التكنولوجية الموجود فى العالم حاليا ، ومقارنتها بوضعنا العلمى والثقافى وما صار إليه حال الشباب فى مصر كان من اللازم أن ننتبه إلى ..

ثوانى يا جماعة إيه اللى انا بأكتبه ده ؟ آسف جدا الأسلاك دخلت على بعضها دا كان المفروض مقال بأفكر فى كتابته فى مكان تانى بس شكلى دماغى ضربت من قلة النوم

نرجع تانى لمكاننا الطبيعى كنا بنتكلم فى إيه يا واد يا أزهرى ؟ كنت ناوى تقول إيه يا سرحان أفندى ؟

آه افتكرت

مين فيكم جرب يمشى فى الشارع من ميدان الجيزة للجامعه وبعدها يمشى مع سور الجنينه لحد ما يرجع تانى الميدان من شارع مراد فى شهر يوليو عند نص الليل تقريبا ؟

ها مين قال أنا ؟ يا خسارة مفيش حد

على العموم الحال من بعضه أنا برضه عمرى ما جربتها لكن جربت أمشى من على الكورنيش من الجيزة لحد مكتبة مبارك فى الدقى بتبقى متعه ، إحم لو عايزين الحقيقة مش قوى للدرجة ، ليه ؟ لنفس السبب الأولانى ، آه افتكرت ما انا لسه عند الميدان

كان فى واحد صاحبنا الله يرحمه ( اتجوز من سنتين وما زال البحث جارى عنه ) كان مشيها فى مره من المرات ورجع يحكي لنا عنها ، دخل علينا يومها وراسم علامات العجب والدهشة على كل ملامحه وطبعا استغربنا وسألناه خير ؟

قال : مش عارف أقول إيه با جماعه بس أنا هأحكى لكم يمكن تقدروا تحلوا اللغز ده معايا

إمبارح وأنا راجع من الشغل بعد مانزلت ميدان الجيزة كنت مخنوق فقلت أتمشى حبتين يمكن أفك من اللى أنا فيه ويا دوب كام خطوة وخلاص هأدخل فى السرحان كالعادة بعد مبنى الجمعية بتاعت الكشافة ألا وبدأ سور جنينة الحيوانات ولقيت كده فى ضل شجرة اتنين اتنفضوا لما عديت من جنبهم مش عارف ليه وكمان مش عارف ازاى ما كنتش شايفهم شكلهم كانوا لازقين فى الشجرة قوى ، يمكن مستخبيين من حد بيجرى وراهم ، لكن على امتداد الشارع مفيش حد بيجرى ، ما علينا قلت يا جدع انت فى ايه ولا فى ايه ، خليك فى حالك

وعنها ومشيت من تانى هوب تانى شجرة ولقيت اتنين تانيين شدوا بعض بعيد عنى وبيوضبوا هدومهم قلت يا جدع يمكن كانوا واقفين وراحت عليهم نومه والواحد لما بيقوم من النوم بردوا بيبقى مبهدل حبتين ولا يوضب نفسه ، بس رجعت احترت هو فى بنى ادمين بيناموا واقفين زى الخيول ؟ ثوانى ونفضت دماغى وقلت يا جدع دع الملك للمالك .

شوية وبعد البوابة التانية للجنينة لقيت اتنين راسهم فى راس بعض قلت حلو دول بقى انا عرفت بيعملوا ايه ، أكيد بيقول لها على سر والسر لو خرج من ما بين اتنين ما يبقاش سر ، يبقى لازم يقرب منها قوى ويبقوا مع بعض جدا علشان مفيش حد يسمعهم ، لكن اللى مش فاهمه سر ايه اللى حبك فى الوقت ده ، وكمان لو مش عايز حد يسمع سرهم ما يروحوا بيتهم ويقولوه هناك .

وزعقت لنفسى يا واد خليك فى حالك وكملت مشى هوب انا لفيت حوالين مبنى الهندسة وبعد موقف الأتوبيس بكام شجرة كده عارفين انتم قبل بتاعت الشاى اللى هناك بشجرتين كده ولقيت لكم خير اللهم اجعله خير اتنين واقفين ماسكين فى بعض ومايلين بزاوية 60 درجة تقريبا يعنى باقى درجتين ويقعوا على الأرض ، بصراحة خفت قلت شكله كده بيستغل الضلمة اللى هم فيها وبيخنقها وممكن يرميها فى مكانها ويجرى وطبعا انا أقرب واحد واقف هنا ، يبقى ألبس القضية وأروح مؤبد ، لا ياعم مشيت فى حالى ولا كأنى شفت حاجه وقلت فى نفسى كفاية كده انا أروح بيتنا مخنوق بدل ما اروح على أبو زعبل وربك يفرجها فى البيت ، وعنها وقلت ارجع من شارع مراد يمكن يكون احسن ووجع الدماغ فيه اقل ، لكن تقول إيه بقى فى حكمة ربك ، هى كام شجرة جوه الشارع ولقيت واحد ضامم واحده جدا وحاطط جاكت بدله عليهم قلت فى سرى الواد ده جدع خايف عليها من البرد وبحميها ربنا يحميه لشبا... ، بس ثوانى برد إيه ده اللى فى شهر يوليو ؟ وكمان لو برد ليه لما وقفت مندهش قريب منهم لقيتهم مشيوا بسرعه وكانت هدومهم خفيفه ، شكلى اتجننت ، وعنها يا رجالة وقلت لأ الطيب أحسن انا أخد الكام متر دول مواصلات وأريح دماغى وعنها ووقفت أشاور لما عربية وقفت لى ورحت بيها لحد الميدان ومن هناك ركبت على بيتنا عدل ، حد فيكم بقى ربنا يكرمكم يفك لى كل الألغاز دى لحسن انا خلاص دماغى هتنفجر

هناك 22 تعليقًا:

♥نبع الغرام♥♪≈ يقول...

احم احم

انا هنااااااااااااااااااااااااااا

♥نبع الغرام♥♪≈ يقول...

صباح الفل

جمعه مباركه عليك وعلى الامة الاسلاميه جمعاء

Foxology يقول...

كل ده ومش عارف حل اللغز ؟؟؟

البطيخة :))

تحياتى وربنا يسترها علينا

♥نبع الغرام♥♪≈ يقول...

ساعدونى أنا كمان لو حد فهم حاجه يفهمنى انا كمان مش فاهمه
عااااااااااااااااااااا

هو ايه اللى انت كاتبه يا ازهرى

مممممممممممممممممم

بسم الله الرحمن الرحيم
الأجابه
الصومال
هههههههههههههههههههه

♥نبع الغرام♥♪≈ يقول...

على فكره اللى جاى العن أنت لسه شفت حاجه

ربنا يستر يارب

صمت المشاعر يقول...

بسم الله الرحمن الرحيم

الاجابه كوبري ابو العلا

هههههههههه هي دي مصر وهي دي الدنيا

هنقول ايه غير عمار يا بلد

طوبه فضه وطوبه دهب يقول...

الاماكن دى مشينا فيها انا وصحباتى كتير بس بصراحه فى عز الضهر لان كان دا طريقنا للكليه ما شفتش بقى ايه اللى بيحصل بالليل بس تصدق الموضوع فعلا لغز ومحتاج تفكير ياريت لما توصل للاجابه اتصل على تلت تصفار صفرين صفر هترد عليك واحده اقفل السكه فى وشها ههههههههههههه ايه يا ابنى اللى انت كاتبه ده الحاجات دى فى صفحه الحوادث مش على المدونه

فراشة يقول...

هههههههههه
ههههههههههههه
انت بجد مشكلة
كعادتك طبعا يا ازهرى بضحكنى بطريقتك
انا مش عارفه اكمل قرايه من الضحك
بس طبعا الرسالة وصلت

اسلوبك جميل جدا
ربنا يديم عليك البسمة يارب
قول لصحابك مايمشيش على رجله تانى يركب احسن
ولاونك بتقول مازال البحث عنه جارى
شكله مشى مرة تانيه ومحرمش والله اعلم بقى

فراشة يقول...

نسيت اقولك ان الطريق ده تقريبا انا مشيت فيه مرة واحدة
ده طبعا لانى من اسكندرية
بس اللى اتذكره انه كان فى النهار وكنت اساسا خارجه من حديقة الحيوان طالعه بجرى منها هربا من الزحمه الفظيعة
ساعتها قلت مالها حديقة الحيوان فى اسكندرية صغنونه وبنت حلال
وشفت الطريق اللى بتوصفه ده
بس كان طويل قوى

القدر و انا يقول...

ازيك يا ازهرى
ايه ده
هو فين اللغز !!!!!!!!!!!!
دى واضحة دول يا اما مستنيين الميكروباص
والتانيين بياخدوا مقاسات بعض لزوم الهدايا
وغيرهم بيدوروا على نملة فى الا رض
واللى بيقولها على سر تعب الشعب ويا الحكومة
اما بتاع الجاكت فى يوليو ده خاف لا الشمس تطلع فى الليل وغطاها
فيها حاجة دى
بلاش سوء النية يا اخواننا
كل البنات والشباب اللى تحت الشجر الى ما بعد نص الليل بيناقشوا مشاكل الحكومة
يعنى الحكوووووووووووووومة السبب

صدى الصمت - عاشقة الورد - يقول...

فى الحقيقة أنا مابأعديش من الشارع دة خالص لكن بيصادفنى شوارع كتير غيرة بنفس الوصف والشكل
ربنا يلطف بينا فى الزمن الغريب دة
تحياتى

الازهرى يقول...

احم احم

يا هلا يا هلا

الازهرى يقول...

ابتسامة ملاك

صباح الفل والياسمين وكل الزهور الجميلة

جعل الله تعالى كل الأيام مباركة وسعيدة
عليك وعلى جميع المسلمين

الازهرى يقول...

فوكسولوجى

تصدق حل لذيذ خاصة واحنا داخلين علىالموسم بتاعه

ربنا يسترها علينا كلنا

الازهرى يقول...

ابتسامة

لالاللالالالالا

هى منشوريا

والله أعلم

الازهرى يقول...

ايوه انا شفت اكتر واكتر

وتخيلى برضه لسه اللى جاى كتير

الازهرى يقول...

صمت المشاعر

لالالا
مصر مخلفة كتير عن كده
انا عارفها كويس

المشكلة فى الأشكال القذرة دى

تحياتى وتمنياتى بدوام التواصل

الازهرى يقول...

طوبة فضة وطوبة دهب

الو الو الو
مين؟
قفلت السكة

واعمل ايه بس
العهدة على الراوى ولقيته لغز محير قلت يمكن الاقى الحل هنا


ربنا يستر

الازهرى يقول...

فراشة

اخيرا فهمتى انى مشكلة
انا اصحابى هنا فهموها من زماااااااااااااان


المشكلة انى صحبى بطل مشى وركوب وبطل يظهر فى الشارع اساسا
ما هو بعيد عن السامعين وربنا يلطف بعباده

اتجوز

الازهرى يقول...

فراشة

انا بقى مشيت مه كتييييييييير
بس مش ف التوقيت ده صراحة

انا غالبا بأكون يا اما فى البيت يا الشغل فى التوقيت ده

وبصراحة انا طول عمرى نفسى ادخل الحديقة بتاعت اسكندرية انما كل ما اكون هناك
انسى

وتخيلى بقى عدد الشجر فى الطريق الطوييييييل ده

الازهرى يقول...

القدر وأنا
تصدقى أول حلول مقنعه النهاردة

تكسبى ربع جنيه

الف مبروك وتيجى مبنى التليفزيون يوم الجمعة 14-3-2019 تقبضيه كاش

وفعلا سوء النية يودى فى داهيه

ربنا يلطف بينا

الازهرى يقول...

صدى الصمت


تعرفى كتير بأقعد أفكر
هل الزمن اللى غريب والا احنا اللى خليناه كده

ربنا يسترها علينا