الأربعاء، 3 مارس 2010

قطار المفاجأت




النوم سلطان


بعد الإستراحة القصيرة دى من موضوع الرحلة نرجع تانى ونقول ألو ...إيه ده آسف يا جماعة افتكرت نفسى على الهواء

ما علينا بعد بنى سويف رجعت تانى مكانى إن الأخ اللى قعدته قبل ما أتحرك كان نازل هناك وكمان قلت بقى أستريح حبتين وأنام شوية وكلام من ده ، وأنا أحط دماغى من هنا وهوب أصحى ألاقى إننا داخلين أسيوط

بصراحة كانوا شوية نوم زى العسل وبعمق رهيب ، طبعا مفيش حد مصدق حكاية بعمق دى ، لإن الكل بقى بينام بالمهدئات أو يتحايل على النوم ساعتين علشان ينام عشر دقايق وبعدها أقل حاجه تصحيه ، لكن أنا لأ

فاكر أيام مدينة الطلبة (الموجودة فى شارع عرابى لو حد يعرفها ولو لأ مش مشكلة أهى مدينة طلبة والسلام ) كنت فى سنة تالته كلية وسكنت غرفة فردى ، وكان عادتى إنى بعد الكلية أرجع إما على النادى أو الشغل أو خلافه وبعدها أرجع المدينة أذاكر حبتين وأنام تقريبا الساعة اتنين أو تلاته بالليل وأصحى الساعة سبعه تمام وطبعا بكل الأسف كان بيفوتنى فى أحيان كتيره لما أكون مرهق صلاة الفجر ( طبعا لما أكون فايق لازم أقوم أصلى وبعدها أكمل نوم ما الكل عارف إن الصلاة خير من النوم ...مش زى النكته القديمة فكرونى أحكيها بعدين ) وكان معانا مجموعة من المشايخ ربنا يكرمهم كانوا بيلفوا على الغرف يصحوا الناس علشان صلاة الفجر ، وأنا ولا أعرف عنهم حاجة وفى مرة فوجئت بزميل لى فى الدور بلدياتى دخل على وبيضحك فسألته : خير

قال إن واحد من المشايخ سألوا عنى ، وإنى مش بأسمع خبطهم على الباب ولا بأصحى لما بينادوا على الناس فسألهم وهو مندهش : إنتم حاولتوا تصحوا ده ؟ فرد الشيخ : أيوه .

يعنى إنتم عايزين تقنعونى إنكم بتحاولوا تصحوه بالخبط على الباب والنداء وكده يعنى ؟ فرد الراجل وبكل حيرة : أيوه بنحاول نصحيه زى باقى الناس .

فرد عليهم وقال : أقول لكم على نصيحة حلوة ، إنتم اجتمعوا كلكم واخبطوا على الباب لحد ما يتكسر وبعدها ادخلوا عليه ، افتحوا الشباك وشيلوه بالسرير وارموه منه ( من الدور التالت ) وبعدها انزلوا من على السلم وروحوا شوفوا هو صحى ولا لسه نايم .

والشيخ يا عينى افتكره بيهرج معاه وإنه بيسخر منه ، لكن لما اشتكى لواحد تانى معانا برضه طلع موافق على النصيحة تماما ومتأكد إنى فى النهاية مش هأصحى برضه .

وطبعا الكل متأكد لإنهم جربوا معايا قبل كده أكتر من مره ومفيش حد فلح . يعنى قبلها بسنه كنت فى غرفة ثلاثى ونمت حوالى الساعة 10 مساء وفين الصبح صحيت رايح الكلية كالعادة بدرى عن الباقيين ( اللى كانوا معايا كانوا شريعة وقانون ودول محاضراتهم متأخر ) لقيت حلة مكرونة على المكتب شبه ممسوحة تماما ورحت الكلية ورجعت وبأعتب عليهم إنهم يعملوا أكل ويبقوا بخلاء ولا حد يصحينى آكل معاهم ولا حتى يسيبوا لى شوية للصبح ، وكل ما أكلم واحد يبص لى ويهز راسه ويسكت لحد ما انفجرت ، واحد منهم قال لى إن كان فى زوار زمايل لنا من البلد وطلعوا عندى علشان يسلموا على وعلى الناس اللى معايا واجتمع الكل عندنا ( وتخيلوا العدد مع حجم الغرفة ) وطبخوا وأكلوا وهرجوا وحاولوا كتيييير يصحونى من غير فايده لحد ما واحد منهم اقترح إنى أروح المستشفى بدل ما يكون فى حاجة كده ولا كده وأكون تعبان ولا حاجة لكن الباقيين رفضوا وقالوا إن ده الطبيعى بتاعى وطبعا الكل كمل الليلة ومع كل العجب من سوء حالتى .

والناس اللى رفضت الإقتراح بتاع المستشفى كان لهم سبب وجيه ، إننا فى الأجازة اللى قبلها كنا فى جمسة مع بعض فى معسكر جامعة الأزهر هناك ، واخترت إنى أنام فى وش الباب علشان الحر ( الغرفة كلها 3*5 تقريبا ) المهم وفى يوم صحيت من النوم بدرى كالعادة وبعد الصلاة والجرى والتمارين وخلافه لقيت المشرف صحى وبينادى على فرحت له وسلمت عليه وداخل عليه على ضحك كالعادة لقيت وشه مكشر وزعلان وبيقول لى : ينفع اللى حصل منكم ده يا ابنى ؟ وطبعا أنا استغربت وسألته : حصل إيه بس يا أستاذنا ؟ شكلك زعلان ؟ خير فى إيه بس ؟ حد من الطلبة عمل حاجة فى البلد إمبارح ؟ حد عاكس ولا نام بره ولا ولا ولا ...؟ ............وهو باصص على من غير ما يرد .

ولما سكت قال : إنت يلا بطل شغل العبط أنا بأتكلم عن الشاليه بتاعكم ، وعن اللى عملتوه إمبارح ؟ فاستغربت وقلت له بس أنا لحد ما نمت إمبارح كان كل شىء تمام ومفيش حد عمل حاجه ؟

فضب واعتبرنى بأسخر منه ، وقال لى : يعنى تصحونا فى نص الليل وتصحوا المعسكر كله ويبقى طبيعى عندكم ، دى آخر مره أخدكم معايا رحلة تانى . وسابنى ومشى من غير ما أعرف أرد عليه .

فرجعت وصحيت الباقيين وسألتهم فيه إيه ؟ وقلت لهم على اللى حصل ، فحكولى إن اللى نايم جنب مفتاح النور كان رافض يطفىالنور والكل مصر يطفوا النور وعليه بدأت معركة بينه وبينهم (8 أشخاص) وطبعا انتهت بطرده من المكان وطبعا أكتر هو مش هايسكت وهات يا ضرب على الباب لما صحى المعسكر كله وجه المشرفين وجات الطلبة واستمر النقاش لما للساعة تلاته وبعدها دخلوا ومش يسكتوا لأ استمروا برضه فى الخناق والتهريج جوه ييجى ساعة كمان وكل ده وأنا ولا هنا ، مع إنهم قالوا لى إن أنا اللى فضيت الموضوع وخليت الواد يقعد ساكت ويتهد وينام ( بس خلوا الجزء ده مرة تانية لإنى طولت ) وطبعا الكل بيقول إيه لزوم الحكاية دى ، ببساطه افتكرتها لإنى بعد ما صحيت لقيت الناس بتتكلم عن خناقة كبيرة حصلت وكان فيها مصابين نزلوا فى مغاغا وأنا ولا أعرف عنها أى حاجة مع إن حكايتها لذيذة جدا بس نخليها مرة تانية .

هناك 29 تعليقًا:

غير معرف يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههه

معلش بس اصل بجد مش مممكن حد يبقى بينام بالطريقة دى

غير معرف يقول...

يسسسسسسسسسسسسسسسسسسسسسسسسس

اول تعليييييييييييييييك

♥نبع الغرام♥♪≈ يقول...

تانى بقا

♥نبع الغرام♥♪≈ يقول...

ضحكتنى جميله والله
ربنا يروق بالك

فينك كده مختفى ابقا طمنى عليك

الازهرى يقول...

star in the sky

امال هتقولى ايه بقى لو تعرفى ان فى انيل من كده كمان
انا والدى كان بيقول لو الحرب قامت والبيت وقع أنا ولا هاعرف إلا لما أصحى فى الأخرة

الازهرى يقول...

يسسسسسسسسس
ونو كمان ولا يهمك
الأول معفو عنه

الازهرى يقول...

ابتسامة ملاك

أخيييييييييييييييييرا

وقعتى من المركز الأول للتانى

دنيا عمرها ما دامت لحد

الازهرى يقول...

لأ ولسه

دا الجزء التانى من الأحداث أفظع كتير

الحمد لله انا بخير بس ظروف الحياة كده

sony2000 يقول...

ههههههههههههههههههه
الحمد لله اني بنوته علشان لو حصلي كل دا
ياااااااااااااااهتجنن
ياااااااااااااااهتجنن
بجد بوست جامد ومستنين الباقي
تقبل مروري وتحياتي

gogo!sf يقول...

ازهرى ازيك واخبارك ايه يارب تكون بخير دايما

هو طبيعى جدا انك تنام ومش تحس باللى حواليك
عشان المجهود القاسى اللى بتعملو يوميا

بس فى حاجه ازاى تكون نايم وتحل مشكله من غير ما تحس

اوع تكون بتصحى تتكلم وانت نايم بردو

على العموم احلى حاجه انك بتصلى الفجر حاضر ربنا يتقبل ان شاء الله

تحياتى ليك يا جميل

يارب اطمن عليك دايما

جوجو

الازهرى يقول...

sony 2000

طيب اشمعنى 2000 يعنى احنا بقينا 2010

ما علينا خلينا فى الماضى

الله الله الله
لأ ما فيناش من كده تتجننى ايه بس
امال لما تعرفى اللى حصل بعد كده حتعملى ايه ؟

وكمان حاولى تراجعى القديم علشان تاخدى شوية حصانة المواضيع هنا مش سهلة ابدا
وروحى السرايا الصفرا اسألى هناك هتلاقى نصهم بسبب هنا

مرورك أشعرنى بالسعادة الشديدة
وأتمنى دوام التواصل

الازهرى يقول...

جوجو

الحمد لله بخير
ربنا يكرمك يا رب وأسمع عنك كل خير

وبعدين بقى هو لازم نقول يعنى كل حاجه
ما علينا

لالالالالالا
انا بأنام قتيل لا بأتكلم ولا حاجه


الحمد لله صلاة الفجر من الأساسيات التى لا استغناء عنها

وأدعوا الله أن يثبتنا جميعا على الحق

rovy يقول...

ههههههههههههههههه
و الله كانت وحشانى حكاياتك ..
بأسمع عن ناس نومها ثقيل .. لكن بالشكل ده صعب جدااااااااااااا
طبعا شوقتنا جداا نعرف أزاى نهيت الحكايه و انت نايم !!! و كمان حكاية خناقة القطر .. :))
متتأخرش علينا .ز

تحياتى الدائمه

رحلتنا في الحياة يقول...

اولا ازيك
ثانيا كنت بتعمل ايه فى بلدنا
ثالثا ربنا يكون فى عونك بنومك التقييييييييييييييييل جدااااااااااا ده
اهل الكهف بالظبط بس المثل بيقول نوم الظالم عبادة p:

طوبه فضه وطوبه دهب يقول...

يانهار ابيض دا انت حالتك صعبه اوى ربنا يعينك يا ابنى ويكون فى عون اللى هتكون من نصيبها فكرتنى بواحده صاحبتى كانت نايمه فى بيتها ودخل حرامى قعدت تصحى فى جوزها على ما صحى كان الحرامى نضف الشقه على البلاط ولما صحى من النوم قالت له الحمد لله انه جت على العفش بس ماليش غير طلب واحد طلقنى المره دى سرق العفش وانت نايم المره الجايه يدبحنى برضو وانت نايم ولحقت نفسها ياعينى ههههههههههههههه

SHAPE YOUR LIFE (ABOALI) يقول...

يا هلا يا حاج ازهرى يا هلا

فعلا نوم الازهرى عبادة
ربنا رحمك ورحم غيرك من حاجات كتيرة
ممكن لو ادخلت فيها كان حصل اى محصول
بس دايما اى واحد ينام ويستغرق فى النوم
ده بيكون بعد يوم شاق مشحوون
بالتالى الجسد يبحث عن راحته

على العموم
نااااااااااااام يا بنى مصر كلها نايمة
نااااااااااااااااام ناااااااااااااام
شد اللحاف
شد اللحاااااااااااف
كمااااااااان
كمااااااااان

ايون ايون
انت حاليا فى السفينة الفضائية اللى موجودة فى ميدان رمسيس على اليمين
اوعى بقى تشرب عصير من الراجل الوحش اللى هنااااااااااك


تقديرى
ناااااااااااااام

Kiara يقول...

هههههههههههههههههههههههههههههههههههه


يالهوووووووووووووووووووووووووووي

كل دا نوم


مش ممكن بجد

انا مزهولة

ربنا يكون في عون اي حد يعرفك بئا

ههههههههههههههههههههههههه
صحيح

انا عاوزه اعرف النكتة بئا

حنين يقول...

السلام عليكم
ازيك يا ازهرى
احييك ع البوست
وصحيح النوم سلطان

الازهرى يقول...

طهر فؤادك

وعليكم السلام ورحمة الله وبركاته

شكرا على الدعوة وأدعوا الله تعالى أن يعيننى على التلبية

الازهرى يقول...

روفى

بعدين بقى فى النق ده على الصبح
أنا نومى كده يا جدعان

نيتى صافية مش زى ناس تانية

وحكاية القطر فى الطريق إن شاء الله

الازهرى يقول...

أمين سر حزب الشر والأذى

أولا انا الحمد لله بخير

ثانيا أنا لولا الضرورة ما كنتش عديت عليها بتاتا بس نعمل إيه بقى فى الزمن

ثالثا ودا بقى الأهم
أنا نومى تقيل لإن نيتى صاافية وقلبى أبيض مش زى ناس فى بالى

والظالم دده بيفكرنى بمين ؟ بمين ؟
ما علينا خلى الطابق مستور

الازهرى يقول...

طوبة فضة وطوبة دهب

والله كويس إنك نبهتينى
أهى دى الأخوة وألا بلاش
أنا كده أخد القرار وانا مطمئن
بلاش أتجوز أحسن وأريح دماغى

ولو إنى كلام فى سرك حرامية المنطقة بتاعتنا حبايبى وبيننا عيش وملح

يعنى أمان بالنسبة لى

الازهرى يقول...

قيس بن الملوووح

شكرا على الدعوة وبإذن الله أزور المدونة

تحياتى دوما

الازهرى يقول...

أبو علىىىىىىىىىى

يا صباح الجمال

أهى دى الناس ولا بلاش
مش النق والكلام الفاضى
انصحنى بالنوم تبقى حبيبي على طول

وكمان حلو جو الخيال ده

أهى دى الناس وألا بلاش

الازهرى يقول...

خياراااااااااااااااااااااا

أخيرا رجعتى

أيوه فى ناس كده
خمسه وخميسه فى عيونكم كلكم

وكمان نكتة إيه دى إحنا فى السيرك هنا ؟

بره

محرومة من الميراث

الازهرى يقول...

حنين

وعليكم السلام ورحمة الله وبركاته

النوم سلطان السلاطين كلهم

Kiara يقول...

هو انا كنت مشيت ولا اية ؟

واه عاوزه اعرف النكته بئا

الازهرى يقول...

طيب عندى فكرة

خليكى معايا على الخط انا بأكتبها وممكن تنزل
فى خلال دقايق

إيه رأيك ؟

Kiara يقول...

مممممممممممممممماشي انا مستنية