مقالب

الأمامير

بصراحه يا جماعه أنا كانت هوايتى المقالب من زمان جدا جدا جدا ، يهيألى إنى ميلادى نفسه كان مقلب تقيل على كل الناس حواليا ، وصعب تلاقوا واحد نجى من مقالبى ، ابتداء من أمى وانتهاء بأى انسان تانى حتى مأمور القسم عندنا وأعضاء مجلس الشعب ، وطبعا ده خلانى محبوب بطريقة سهل تخيلها ، لكن طبعا الكل عارف إن الدنيا يومان يوم لك ويوم عليك وزى ما بتعمل فى الناس هيتعمل فيك ، ودين وداير على الكل ، وكل الحاجات دى ، فدايما كان فى ناس تقف لى وترد المقالب ، لكن أكبر المقالب فى حياتى كانت من جنس النساء ، مش عارف ليه لكن دايما كان مقالبهم تطلع من النافوخ على طول ومش سهل تعدى كده والسلام ، وأظن الكل لسه فاكر موضوع المكرونه ، مش عارف ليه ناس بيقولوا عليهم أمامير صراحه ، مع إن المثل الشعبى بيقول إن كيدهم غلب كيد الشيطان وفوق كده القرآن قال ( إن كيدهن عظيم ) ومع كل ده بيعتبروا نفسهم الجنس الرقيق واللطيف
يا لطيف ، ما علينا
النهارده الذكرى الأولى ليوم جميل فى حياتى ، كان يوم جواز واحده زميله لنا من أيام الطفوله لكن مش هأتكلم المره دى على الفرح ، أنا ناوى أتكلم عن الخطوبه ، كان يوم 20 مايو 2008 ، أنا فاكره لأنه كان بعد بداية امتحاناتى ب3 أيام وكان يوم الثلاثاء ، وطبعا لإنها أخوها كان عنده 10 سنين يا دوب كانت الشغلانه كلها على دماغنا إحنا ورجعت يوم السبت من الإمتحان على هناك ورتبنا مع أصحابنا كل واحد يجيب إيه ويعمل إيه بحيث يكون الشغل موزع بينا فنقدر نتابع الإمتحانات مع إجراءات الحفله ، وكمان توضيب وتغيير فى البيت استعدادا لإستقبال المدعوين ، مع إنى اقترحت التأجيل وخاصة إن أختها فى تالته ثانوى وقتها ، لكن تعمل إيه العريس مستعجل ( شكله مفيش حد قال له على الحقيقه ) ، المهم وضبنا كل حاجه ، وجه يوم الخطوبه رجعت من الإمتحان على النادى على كام مشوار كده وبعدها على المدينة ، وغيرت ووضبت نفسى وطلعت على هناك والشيطان بيلعب فى رأسى ، وأنا أقول له بلاش ، يا ابنى اهمد ، خليك ساكت وعدى اليوم على خير ، ومن شارع عرابى ولحد ما وصلت البيت فى شارع مراد وأنا بأحاول أخليه يعقل مفيش فايده ، ودخلت وقلت ربنا يستر ، وأول ما دخلت كنت متأخر والمعازيم معظمهم مشى وسألت عن العريس قالوا إنه قاعد فى الصالون مع العروسه ورحت وكان العريس قاعد كده مالى مركزه وشكله طيب وعلى نياته وأمور ومسمسم ، والعروسه مش موجوده كانت جوه بتصلح لبسها أو تحجيبتها أو أى حاجه من حاجات الحريم دى ، وعلى كده يا جماعه لقيت الجو رايق وبقى صعب أمسك نفسى ، ودخلت على العريس وعلى وشى علامات الحذر والتسلل ، وأول ما شافنى طبعا ابتسم وانتظر إنى أقدم نفسى وأبارك له ، لكن أنا دخلت عليه دخلت جواسيس كده وبصوت واطى وقلت له أخبارك إيه ؟ إنت كويس لحد الوقت ؟ الأمور ماشيه كويس؟
وطبعا استغرب واندهش ومش فاهم أى حاجه ، فكملت أنا وقلت له حد اتعرض لك بحاجه ؟
فسأل تقصد إيه حضرتك ؟
فقلت له لأ شكلك سليم ربنا يعدى الموضوع على خير بإذن الله ومن غير إصابات ، من هنا يا جماعة وبدأ العرق يصب منه ، ويتردد وحالته بقت صعبه وإن أنا أسكت أبدا ، كملت وقلت له شكلك مفيش حد حكالك وألا إيه ؟
فسأل مندهش حكى إيه ؟ تقصد إيه ؟
فقلت له باستغراب : إنت ما شفتهاش وهى متنرفزه أو غضبانه أبدا ؟ إنت ما تعرفش هى كانت بتلعب إيه ؟
فقال عارف بس ......... ( هى على فكره أول جيزه وسادس جمهوريه فى التايكوندو ) فقاطعته وقلت له وكانت بتلعب ليه ؟ فقال وهو قرب يموت هوايه
فبصيت وهو صعبان على وقلت له هواية ايه بس ؟ دى اصلها موضوع أعصابها والهياج بتاعها كانت بتفرغه على الملعب لكن من يوم ما اعتزلت وهو بيرجع لها من وقت للتانى معقول ما تعرفش ؟
ولقيته بدأ يفك الكرافته والعرق بقى للركب ولقيت نفسى فى حضنه
لأ مش محبه ، ولا مراضيه ، المشكله إن الهانم كانت رجعت ومن ورايا وبرجلها فى ضهرى خليتنى أعدى الترابيزه الصغيره وأقع عليه ، والتفت لها ولقيت علي وشها أشرس تعبير يمكن تخيله وزمجرت ولا النمره المفترسه ، والطبيعى فى الحالة دى إنى أسكت ونضحك لكن على مين ، أنا رسمت على وشى الرعب وقلت له مش قلت لك ، مش قلت لك أهى الحاله جت لها ، وهى سمعت كده وبدأت تحضر للهجوم التانى على ، لولا إن خالتها سمعت الخبط وجت جرى على عندنا ومسكتها وسألتها فى إيه ؟ فشاورت على مطرح ما كنت واقع على الأرض وهنا بدأت أضحك وخرجت كل المكبوت جوايا من أول ما وصلت والعريس واقف مسبهل ومش فاهم أى حاجه
وخالتها شافتنى من هنا شخط وزعيق حاجات كتيره كده وإنت مش ناوى تعقل ، وأنا قلت لأختى بلاش تخلوه يحضر أساسا وعلى النعمة بتيجى بخرابها
وعلى صوتها طبعا حضر والد العروسه ووالدتها وأصحابنا اللى فضلوا للأخر وكل ده وأنا مش قادر أمسك نفسى من الضحك ووالدها شاف الموقف وفهم كل حاجه وقال جمله واحده ( ربنا يهديك يا ابنى ) فقمت وسلمت على العريس وقلت له ألف مبروك وعرفته بنفسى ، وهو سمع الإسم من هنا ، وفهم كل حاجه وقعد مكانه يمسح عرقه ويقول يخرب بيت كده أنت رعبتنى ، هى كانت بتحكى لى عنك وعن مقالبك لكن عمرى ما تصورت إنها ممكن تكون بالشكل ده إنت خليت قلبى وقع فى رجلى وحالتى بقت كرب ، روح يا شيخ منك لله ، يعنى أول تعارف وتعمل كده ، طيب راعى المناسبه
وطبعا المجموعه كلها ( باستثناء العروسه وخالتها كانت كرهانى لله فى لله ) فطسوا على نفسهم من الضحك حتى العريس اشترك معاهم وقام جاب العروسه جنبه وقعد يهدى فيها ويحاول تخليها تسامحنى علشان خاطره ، طيب علشان خاطر والدك ، علشان خاطر الحبايب كلهم أبدا وأبوس على راسها وهى برضه مكشره ، فين نص ساعه على ما هديت وهى بتحلف وتستحلف إنها هاتهد البلد على دماغى إن خراب بيتى عن قريب على إيديها ، ووالدها قال لنا نسيبهم لوحدهم شويتين ونطلع نقعد إحنا بره شويه وطلعنا وأنا بأحكى لهم على اللى حصل وقعدنا نضحك وشويه ووقفنا نستأذن علشان نمشى ، لكن على مين والدها أصر إننا نفضل قاعدين لحد ما نوضب الشقه من تانى ونرجع كل حاجه فى مكانها زى ما وعدنا وقت ما قعدنا الأيام اللى قبلها نكركبها ، وكان فيها شغل للفجر وبعدها فطرنا معاه ومشينا ، لكن أنا كنت نسيت النوته الصغيره بتاعتى هناك ، وبصراحه وأسألوا أى حد إتعامل معايا ، لازم تكون فى جيبى ، عامله زى البوصله ومن غيرها أتوه خالص ، وعليه اتصلت بيهم وعرفت إنها وقعت منى هناك واتفقت مع والدها انى أروح يوم الخميس اخدها ورحت ويا ريتنى ما رحت