طبق اليوم

تحيا المكرونة

من يوم ما قلت انى عايز وصفة طبخ الفراخ وناس وعدتنى بيها ونسيوا بعدها او تناسوا المهم والكل بيسأل هل هى أكلتى المفضلة ؟
وفى الأول سكت ، وبعدها عملت نفسى مش واخد بالى ، ولما الموضوع اتكرر قلت خلاص الأمر لله نقول لهم على الموضع يمكن يستريحوا ويريحونى معاهم
أكلتى المفضلة هى المكرونة بالباشميل
ليه ؟
من غير سبب ، من وأنا صغير وأنا باحبها وممكن ومن غير مبالغة وبالعكس نبقى بنقلل من الحقيقة نقول إنى أعشقها إلى أقصى حد
ومنذ سنوات طويلة ومفيش حد بيعرف يخلينى اتكيف منها غير أمى وخالتى (أو بمثابة خالتى )وبنتها اللى يا رب أشوف فيها خمس إيام حلوين ورا بعض
ودول أنا إتربيت معاهم طول حياتى من وأنا عندى سبع سنين تقريبا
وفاكر وأنا صغير كانت تحب تحرق دمى وتقولى إنها أكبر منى لإنها فى سنة تانية وأنا لأ
وكل ما أقول رأيي فى حاجة تقولى أسكت أنا أكبر منك وكان اضطهاد وتعذيب ولا النازى وأمن ال.... والا بلاش دى
المهم
وكنت أغضب وأزعل لكن من غير فايدة
وفى يوم كان والدها موجود وشافنى وأنا شكلى مقتول لى 100 قتيل مش قتيل واحد وسألنى فقلت له
فضحك كتيييييييير
وبعدها سألنى إنت تاريخ ميلادك كام ؟ وبعد ما عرف ضحك أكتر ونادى عليها وسألها عن تاريخ ميلادها وهو برضه بيضحك ولما جاوبت أنا الدنيا نورت فى وشى وحسيت إن الكون كله اتغير
واكتشفت ان انا اكبر منها
لكن لانها كانت فى مدرسة خاصة فدخلت بدرى سنة عنى
وتخيلوا بقى موقفى بعدها
لالالالالالالالا
ممنوع أى حد يقول العفو من شيم الكرام والكلام الغريب ده
كان انتقام أسطورى غالبا ما سيسجل فى التاريخ مع الإلياذة والأوديسة وسيرة الهلالى وأوديب وأوريست وغيرها من قصص الإنتقام الملحمية
وعدت الأيام وبقت سنين وفضلت هى كعادة النساء تخزن وتخزن وتخزن
وفجأة وبعد أن أعدت العدة لكل شىء ظهر الإنتقام الشنيع
كنت عندهم فى يوم وكان عندهم المكرونة وكلتها وكانت جميلة جدا وفيها نكهة جديدة غير معتادة ولما سألت خالتى عليها قالت إن بنتها هى الطباخة النهاردة
وأنا سمعت كده واحترت ، وطبعا طلع الوش الحلو منى وبقى كلامى بهدوء وقلت لها كلام حلو كتير
لكن على مين دى عجنانى وخبزانى ووكلانى كمان
وبدأت من يومها تذلنى وكل ما أطلب منها تعمل لى مكرونة تطلب هى قصادها لبن العصفور والهدهد اليتيم وحاجات زى كدة وأنا أتذل زيادة
وعرفت يعنى إيه الدنيا يومان يوم لك ويوم عليك
المهم أمى من ناحية وخالتى من ناحية وكانوا بيسندونى فى مواجهة الطاغية ( وللعلم هى ستقرأ الكلام هذا بعد نشره مباشرة لإنها تتابع المدونة وليكن الله فى عونى)
وكبرنا أكتر وبقينا شباب واتخطبت لواحد محترم جدا واتجوزوا ، وكانت الطامة الكبرى لما عرفت ان الأستاذ كان بيكدب علينا واتضح إنه متفوق وطالع بعثة فرنسا يدرس للدكتوراه هناك وسافروا وربنا رزقهم ببنت زى القمر (شبهى كده ) بعتوا صورتها لكن مستنى لما ينزلوا علشان أشوفها
وطبعا هى مش رحمانى كل يوم والتانى تعمل له صينية مكرونة شكلها يهبل وتصورها وتبعت لى الصورة على الميل و كمان الأفندى يبعت لى رسالة يوصف لى فيها حلاوة الأكلة ، وأنا أولع
وكمان زاد الطين بله إختلافى مع أمى وخالتى على وجهة نظر فى موضوع ( أقوله بعدين ) ومنعوا عنى حصتى منها
وبقت حالتى كرب وتصعب على المسلم والكافر وحتى النمل
إيه بتقولوا إنى أحاوا أبطلها ؟ وإن دى علامات إدمان ؟
ممكن لكن أبطلها إزاى بس ، يا جماعة نتكلم بالعقل دى مكونة بالباشميل مش أى حاجة
وإيه يعنى ؟
لا إنتم شكلكم مش جايبينها لبر

أقولكم
طيب نتفاهم بالعقل
المكرونة مكونة من دقيق وبيض ولحمة وبعض الإضافات الخفيفة والطبيعية (وأعذرونى إن نسيت شيئا فأنا خبير فى الأكل وليس الطبيخ ) يعنى كلها مواد كويسة وجميلة وبدون ضرر
بخصوصكم إنتم بقى مصرين تاكلوا معلبات وكلام وفاضى وكمان كيك ورولز وتوينكيز و لحوم مغلفة ومطبوخة و حاجات كدة كلها مواد كيميائية ومكسبات طعم ومواد حافظة
وبتشربوا صودا بأسماء مختلفة وبرضه مضرة وفى مواد منها أثبتت الأبحاث إنها بتؤدى إلى أمراض ليس السرطان سوى أحدها
وكل الحاجات دى كلها ضرر ومش قادرين تبطلوها
وقلتم تعود
لكن لما نعرف إن معظم المواد دى بعد ما تؤذينا وندفع تمنها بيروح لناس همهم فى الدنيا إنهم يبيدونا ويحتلوا أرضنا وكل يوم نسمع عن مذابحهم وكل شوية نطلع ونقول لازم نحارب وتطلع المظاهرة طويلة عريضة وبعد المظاهرة الناس التعبانه تروح على مطاعم اسمائها مختلفة لكن فى النهاية تعطى نفس الكوارث من أكلات غريبة وأرباح تزيد فى جيوبهم
فلماذا ننسى بهذه السرعة
هلا ثبتنا على مبادئنا ومواقفنا وعندما نقول أننا سنقاطع نقاطع ، وسنحارب فنبدأ بحرب أنفسنا الأمارة بالسوء قبل أن نطالب بحمل السلاح ومحاربة الأعداء