الخميس، 9 أبريل 2009

طبق اليوم


تحيا المكرونة


من يوم ما قلت انى عايز وصفة طبخ الفراخ وناس وعدتنى بيها ونسيوا بعدها او تناسوا المهم والكل بيسأل هل هى أكلتى المفضلة ؟
وفى الأول سكت ، وبعدها عملت نفسى مش واخد بالى ، ولما الموضوع اتكرر قلت خلاص الأمر لله نقول لهم على الموضع يمكن يستريحوا ويريحونى معاهم
أكلتى المفضلة هى المكرونة بالباشميل
ليه ؟
من غير سبب ، من وأنا صغير وأنا باحبها وممكن ومن غير مبالغة وبالعكس نبقى بنقلل من الحقيقة نقول إنى أعشقها إلى أقصى حد
ومنذ سنوات طويلة ومفيش حد بيعرف يخلينى اتكيف منها غير أمى وخالتى (أو بمثابة خالتى )وبنتها اللى يا رب أشوف فيها خمس إيام حلوين ورا بعض
ودول أنا إتربيت معاهم طول حياتى من وأنا عندى سبع سنين تقريبا
وفاكر وأنا صغير كانت تحب تحرق دمى وتقولى إنها أكبر منى لإنها فى سنة تانية وأنا لأ
وكل ما أقول رأيي فى حاجة تقولى أسكت أنا أكبر منك وكان اضطهاد وتعذيب ولا النازى وأمن ال.... والا بلاش دى
المهم
وكنت أغضب وأزعل لكن من غير فايدة
وفى يوم كان والدها موجود وشافنى وأنا شكلى مقتول لى 100 قتيل مش قتيل واحد وسألنى فقلت له
فضحك كتيييييييير
وبعدها سألنى إنت تاريخ ميلادك كام ؟ وبعد ما عرف ضحك أكتر ونادى عليها وسألها عن تاريخ ميلادها وهو برضه بيضحك ولما جاوبت أنا الدنيا نورت فى وشى وحسيت إن الكون كله اتغير
واكتشفت ان انا اكبر منها
لكن لانها كانت فى مدرسة خاصة فدخلت بدرى سنة عنى
وتخيلوا بقى موقفى بعدها
لالالالالالالالا
ممنوع أى حد يقول العفو من شيم الكرام والكلام الغريب ده
كان انتقام أسطورى غالبا ما سيسجل فى التاريخ مع الإلياذة والأوديسة وسيرة الهلالى وأوديب وأوريست وغيرها من قصص الإنتقام الملحمية
وعدت الأيام وبقت سنين وفضلت هى كعادة النساء تخزن وتخزن وتخزن
وفجأة وبعد أن أعدت العدة لكل شىء ظهر الإنتقام الشنيع
كنت عندهم فى يوم وكان عندهم المكرونة وكلتها وكانت جميلة جدا وفيها نكهة جديدة غير معتادة ولما سألت خالتى عليها قالت إن بنتها هى الطباخة النهاردة
وأنا سمعت كده واحترت ، وطبعا طلع الوش الحلو منى وبقى كلامى بهدوء وقلت لها كلام حلو كتير
لكن على مين دى عجنانى وخبزانى ووكلانى كمان
وبدأت من يومها تذلنى وكل ما أطلب منها تعمل لى مكرونة تطلب هى قصادها لبن العصفور والهدهد اليتيم وحاجات زى كدة وأنا أتذل زيادة
وعرفت يعنى إيه الدنيا يومان يوم لك ويوم عليك
المهم أمى من ناحية وخالتى من ناحية وكانوا بيسندونى فى مواجهة الطاغية ( وللعلم هى ستقرأ الكلام هذا بعد نشره مباشرة لإنها تتابع المدونة وليكن الله فى عونى)
وكبرنا أكتر وبقينا شباب واتخطبت لواحد محترم جدا واتجوزوا ، وكانت الطامة الكبرى لما عرفت ان الأستاذ كان بيكدب علينا واتضح إنه متفوق وطالع بعثة فرنسا يدرس للدكتوراه هناك وسافروا وربنا رزقهم ببنت زى القمر (شبهى كده ) بعتوا صورتها لكن مستنى لما ينزلوا علشان أشوفها
وطبعا هى مش رحمانى كل يوم والتانى تعمل له صينية مكرونة شكلها يهبل وتصورها وتبعت لى الصورة على الميل و كمان الأفندى يبعت لى رسالة يوصف لى فيها حلاوة الأكلة ، وأنا أولع
وكمان زاد الطين بله إختلافى مع أمى وخالتى على وجهة نظر فى موضوع ( أقوله بعدين ) ومنعوا عنى حصتى منها
وبقت حالتى كرب وتصعب على المسلم والكافر وحتى النمل
إيه بتقولوا إنى أحاوا أبطلها ؟ وإن دى علامات إدمان ؟
ممكن لكن أبطلها إزاى بس ، يا جماعة نتكلم بالعقل دى مكونة بالباشميل مش أى حاجة
وإيه يعنى ؟
لا إنتم شكلكم مش جايبينها لبر

أقولكم
طيب نتفاهم بالعقل
المكرونة مكونة من دقيق وبيض ولحمة وبعض الإضافات الخفيفة والطبيعية (وأعذرونى إن نسيت شيئا فأنا خبير فى الأكل وليس الطبيخ ) يعنى كلها مواد كويسة وجميلة وبدون ضرر
بخصوصكم إنتم بقى مصرين تاكلوا معلبات وكلام وفاضى وكمان كيك ورولز وتوينكيز و لحوم مغلفة ومطبوخة و حاجات كدة كلها مواد كيميائية ومكسبات طعم ومواد حافظة
وبتشربوا صودا بأسماء مختلفة وبرضه مضرة وفى مواد منها أثبتت الأبحاث إنها بتؤدى إلى أمراض ليس السرطان سوى أحدها
وكل الحاجات دى كلها ضرر ومش قادرين تبطلوها
وقلتم تعود
لكن لما نعرف إن معظم المواد دى بعد ما تؤذينا وندفع تمنها بيروح لناس همهم فى الدنيا إنهم يبيدونا ويحتلوا أرضنا وكل يوم نسمع عن مذابحهم وكل شوية نطلع ونقول لازم نحارب وتطلع المظاهرة طويلة عريضة وبعد المظاهرة الناس التعبانه تروح على مطاعم اسمائها مختلفة لكن فى النهاية تعطى نفس الكوارث من أكلات غريبة وأرباح تزيد فى جيوبهم
فلماذا ننسى بهذه السرعة
هلا ثبتنا على مبادئنا ومواقفنا وعندما نقول أننا سنقاطع نقاطع ، وسنحارب فنبدأ بحرب أنفسنا الأمارة بالسوء قبل أن نطالب بحمل السلاح ومحاربة الأعداء

هناك 92 تعليقًا:

مواطن مصرى نايم يقول...

اول معلقة من الطبق
قصدى اول تعليق عالبوست

مواطن مصرى نايم يقول...

على فكرة انا بحب الباشميل جداااااااااا
يعنى حتى ممكن اكلها قبل ما تدخل الفرن
دا لازم كل مرة اكل حبه قبل ما تتعذب و تدخل الفرن
اختيار موفق

بالنسبة لجزء انها اكبر منك
كان نفس الوضع بيحصل معايا
بس واد جارنا رخمممممممممم
يغيظنى انه فسنة سابقنى فالمدرسة
اكتشفت بعد كده انه ادى
و كمان ربنا نصرنى عليه
خلصت انا الثانوى قبله
لانة بعيد عن السامعين طلع بيعشق الثانوية العامة
و قرر يقعد فيها كام سنة
ههههههههههههه

بلاش فضايح يقول...

ومين مبيحبش المكرونة بالباشميل
جوعتنى ...

بس ظريفة اوى حكاية البنت دى شاطرة عرفت توهمك انك انت اصغر منها ههههههههههههههههههههه

آدى البنات ولا بلاش بس المشكلة انها نسيت انها هتنكشف كان المفروض تربط مع باباها علشان تفضل مخدوع هههههههههههههههه

SHAPE YOUR LIFE (ABOALI) يقول...

يا ازهرى يا بشميل
هههههههههههههه
يا تارى المدونه خليط
كلها سمن وزيت
وحتة لحمة من غير بفتيك

بس يا عينى
حوا ضحكت عليك
ونفشت ريشها عليك
وقالت روح يا ازهرى
ربنا يسلط عليك
المكرونه تعمل وتذل فيك

ههههههههههه
يا ازهرى يا بشميل

ألـــــــوان الحيــــــــاة يقول...

هو فيه اصلا بنى ادم طبيعيى بكامل قواه العقليه مبيحبش المكرونه بالشاميل
انا بجد بمووووووت فيها بس انا بقى ماما بتعملاهالى كتيييير مهى اما صدقت لقت حاجه بحبها عشان تعملها
واكيد واكيد المكرونه بالشاميل احسن كتير كتير من هوهوز وتوينكس والفراخ العيانه بتاعتهم دول ربنا يبعدنا عنها يارب ويخلينلنا البشاميل قولوا امين

Kiara يقول...

انا بحبها بس هي مره كل كام شهر كويس اما بالنسبه لوجباتهم فاصلا من مصادر موثوق منها
ان الفراخ بتاعتهم مبقتش علي الفرازه زي زمان وخطر كمان

mohamed ghalia يقول...

ايه يا أزهرى قلبت المدونة ولا ايه
وحشتنا مواضيعك
بس كده جوعتنا معااااااااااك

شمس النهار يقول...

يابني انا مابنساش حاجه خالص انت اللي مشغول قلت لما تفضه عشان تعرف تدخل المطبخ وتعملها مش معقول نعمل فراخ وانت مشغول
اما موضوع المقاطعه انا ليه في تحفظ لما نقاطع نقاطع شئ غربي مئه بالمئه مش نقاطع رؤس الاموال المصريه
يعني في مطاعم دافعه بس حق استغلال الاسم لكن مافيش شريك اجنبي
يبقه المقاطعه هنا هتيجي علي دماغ العاملين المصريين
ندور بجد علي المتجات المستورده فعلا ونقاطعها ونكون قد المقاطعه دي

romansy يقول...

استاذ ازهرى
ايه ياعم انت غيرت نشاطك ولا ايه
فتحت نفسنا اونطه كده
مره فراخ محمره
ومره مكرونه بالبشاميل

romansy يقول...

استاذ ازهرى
ايه ياعم انت غيرت نشاطك ولا ايه
فتحت نفسنا اونطه كده
مره فراخ محمره
ومره مكرونه بالبشاميل

تامر علي يقول...

فعلاً في علاقة قوية جداً بين الأكل والموقف السياسي ... فالطعام ما هو إلا سياسة ...مثلاً شوف انت اتذليت أد إيه علشان تاكل مكرونه والعرب اتذلوا أد إيه علشان ياكلوا كبسه ... شوف انت قدمت (تنازلات)اد ايه من أجل المكرونه ... والعرب قدموا تنازلات أد إيه علشان يحتفظوا بكراسيهم الموسيقية... خد موقف وقاطع المكرونة بعدها كل شيء هايتصلح :)

mahasen saber يقول...

انا جوعت وانا كنت لسه ملتهمه الاكل من شويه

بس حسستنى بالجوع وبطعم الباشميل فى بئى

يا زهر يا متعدد المواهب تمثيل وكتابه ده انتا تحفه


اطيب خاطرك بايه ليك عندى صنية ياشميل محروقه طبعا


بس بدات البوست بالاكل وختمته بالمقاطعه بس الرابطين فى صميم الاكل برضه

mahasen saber يقول...

انا جوعت وانا كنت لسه ملتهمه الاكل من شويه

بس حسستنى بالجوع وبطعم الباشميل فى بئى

يا زهر يا متعدد المواهب تمثيل وكتابه ده انتا تحفه


اطيب خاطرك بايه ليك عندى صنية ياشميل محروقه طبعا


بس بدات البوست بالاكل وختمته بالمقاطعه بس الرابطين فى صميم الاكل برضه

MaNoOoSh يقول...

لا يا ازهرى ناس كتير بتفضل ثابتة على مبدأها ومستمرة فى المقاطعة
بس انت جوعتنى يا مفترى والواحد مداقش المعكرونة بالبشاميل دى من سنة
عااااااااااااااااااا
مليش دعوة بقى انا جعت وعايزة اكل معكرونة بالبشاميل

kochia يقول...

انا بحبها برده
ووجبة رئيسية في المناسبات
وممكننعمللها مناسبةخاصة ونقول تعالوا عشان عندنا مكرونة بالبشاميل

المهم كنت لسة بفكر اجي عندك واقولك فين الموضوعات
لقيت طبق المكرونة نازل
قلت اكل بقي وبعدين نرغي
اما باقي الكلام بتاع المكرونة والموقف السياسي
فالحقيقة بعد الاكل مش بعرف افكر كويس

المرةالجاية
تحياتي

صدى الصمت - عاشقة الورد - يقول...

جميل قوى وصفك وعشقك للمكرونة البشاميل
والأجمل نصيحتك للمصرين ال هيه مغزى الحوار
تحياتى

عاشقة الورد

الازهرى يقول...

مواطن مصرى نايم
مبروك اول تعليق
لكن الصينية للأسف خلصت
خيرها فى غيرها

الازهرى يقول...

مواطن مصرى نايم

نعمل ايه بقى الدنيا
لكن حاسب
المرة الجاية تغلط وتنسى وتدخل الفرن معاها

الازهرى يقول...

نونا

نعمل ايه بقى
منها لجوزها
ولو انه بيحبها وانا عارف وصعب يزعلها

لكن لو قالت لابوها برضه كنت انا عرفت
لانه بيحبنى وصعب يشوفنى باتعذب

اهلا بيكي واتمنى دوام التواصل

الازهرى يقول...

ابو على

ماهو سلطها وخلاص
المهم اعمل انا ايه دلوقتى ؟

انجدنى يا صاحبى

الازهرى يقول...

رودى هانم

ايوه يا اختى
غيظينى غيظينى

لكن ليه انت مش بتحبى الاكلات التانية

اللهم آمين
اللهم آمين

الازهرى يقول...

خياراااااااااااااااااا
أخيرا افتكرتى الغلبان الموجود هنا

لا زمان ولا النهاردة
انا اساسا مش باكل اى حاجة مغلفة
او مش عارف مصدرها بالظبط

الازهرى يقول...

محمد غاليا

خلاص يا عمنا
انا عازمك

الازهرى يقول...

الحاجة شموسة
نععععععععععععععععععععععععم
أنا ادخل المطبخ وأطبخ كمان ؟
ليه من قلة البنات عندنا ؟

أنا أساسا كنت عاوز الوصفة علشان هم يعملوها ويبطلوا يجربوا فىالوصفات الغريبة بتاعتهم


أما بالنسبة للمقاطعة
فأحنا متفقين على الأجنبى أما بالنسبة للمحلى
فالأفضل لهم أن يستثمروا فى ما يفيدهم ويفيد الناس معهم

وعلى الأٌقل نبدا بما نحن واثقين منه ومتفقين عليه
بدلا من الوقوف صامتين

الازهرى يقول...

رومانسى

يا عمنا أنا عازمك
بس انت حدد المكان والزمان
ويكون سر

الازهرى يقول...

تامر على

ممكن أقاطعها
لوكل أصحابى وعودنى إنهم يقاطعوا كل المنتجات المضرة بصحتهم وموقفهم العالمى

اتفقنا ؟

الازهرى يقول...

محاسن صابر

طيب كنت بتاكلى ايه ؟

وعموما محروقة محروقة
أكيد أحسن من أكلى اليومين دول

قلتى لى بقى ناوية تقاطعى ايه ؟

الازهرى يقول...

مانوووووووووووووش

سنةكاملة
انا بقالى شهر ونص
وبقيت اضرب زمايلة وازعق لاساتذتى
ولولا بيحبونى كانوا طلبوا لى مستشفى المجانين

انا عارف ان فى ناس ثابته على مبدأها
لكن برضه
وذكر ان الذكرى تنفع المؤمنين

الازهرى يقول...

كوشيا

وممكن نعمللها مناسبةخاصة ونقول تعالوا عشان عندنا مكرونة بالبشاميل

انا مسكت الدليل لو العزومة ما حصلتش
اسبوعين بكتيره والا ابلغ النيابة والنائب العام وامن الدولة والمخابرات والسى اى ايه والكى جى بى

انا مستنى المرة الجاية
وبالهنا والشفا

الازهرى يقول...

صدى الصمت

اعمل ايه بقى القافية حكمت

لكن انت بتحبيها برضه ؟
ورأيك ايه فى السياسة

القدر و انا يقول...

الزهرى
ايه الجمال ده
انا دخلت لاول مرة قلت اكيد حاشوف ازهرى بقى بيكتب عن الازهر يمكن يفيدنى فى موضوعى اللى محيرنى
الاقى البوست كله باشميل وقطع وكل بالف هنا
انت جميل جدا ودمك خفيف
اولا تقبل مرورى
ثانيا ارجو ان تفيدنى فى الرد على موضوعى الاخير
اذا كنت من خريجى الازهر
ولك تحياتى

عمرو يقول...

أنا بقى حاربت حبى للمكرونه بالشطه خاصة من عند أبو طارق و الله وحده يعلم مدى معاناتى و قهرى لحد ما تعديت مرحلة الاٍنسحاب المكرونى من دمائى المشبعه بالبشاميل و الصلصه و الكربوهيدرات و كانت حرب ضروس كتب ليا فيها النصر بفضل المولى سبحانه ..
أنصحك يا صديقى بالسفر لأيطاليا و خاصة نابولى حيث هناك جنة المكرونه اللى على أصولها من كل شكل و لون :))
و اٍذا كانت بنت خالتك هى اللى عامله طبق المكرونه اللى فى الصوره فأرجو اٍبلاغها تحياتى على هذا الاٍبداع اللى لا يقدره سوى واحد زيى ذو خبره واسعه بهذا الصنف الرائع :)
أحييك على آخر سطرين فى البوست و أرجو أن يستوعبهم القراء و يعملوا بهم بارك الله فيك ..
تقبل تحياتى و تقديرى ..

غروب يقول...

انا بمووووووت في المكرونه اعمل حسابي في طبق ولو انى متغاظه منك مع اول زياره

انت ايه اللى انت عامله عند ابو على ده يا راجل انت

ادخل الاقيك محتل المدونه

واحد وعشرين تعليق ؟؟؟

ليه يعنى

احتلال

لالالالالالالالا زعلانه

صالحنى بقه بطبق مكرونه واتوصي

صدى الصمت - عاشقة الورد - يقول...

طبعاً بحب المكرونة الباشاميل ومين مايقدرش يحبها
وبأعملها لجوزى كمان
مش فاهمة رأيى فى السياسة من ناحية ايه بالظبط السؤال عام ومحدد
تحياتى

عاشقة الورد

صدى الصمت - عاشقة الورد - يقول...

سورى
أقصد السؤال عام ومش محدد

سفروتة يقول...

انا جيت يا والدي
اه ما انا لقيتك عازمني علي اكلة انا بموووووووووووووووووووووووووووووووووووووووووووووووووووووت فيها

اكلتي المفضلة

وكل كوكب السفاريت بيموت فيهاااااا

صحيح الموضوع بدأ بهزار لكن في النهاية انت ختمته بسطرين احييك عليهم بجد

ياريت لو الكل يفهم ويستوعب خطورة اللي بنعمله
الكل بيقول يعني هو انا اللي هأثر لما اشتري منتجاتهم
يارب نفسي الفكر ده يتغير

تحياتي ياازهري علي الموضوع الجميل ده

:)

PrInCeSS BeRy يقول...

الله الله الله بموت فى البشمللللللللللل بشمل ماما طبعا هههههه اولا لفت نظرى حبك لطنط ولخالتو ربنا يخليهملك حبيت ادعى لكوا يعنى

وبنت خالتك الاكبر منك بحب انا الجو دة اسكت انا اكبر منك ههههههههه

بس عشان اضحك مش علشان بجد يعنى ولا حاجة

طريقة ظريفة فى النهاية لمكونات البشمل مشرحتهاش بالتفصيل لييييييية عاوزة اعرف النكهة اللى طنط بتحطها البشمل دى جنااااااااااية


عثل يا ازهرى تحياتى ليك

yoyo يقول...

وانا داخلة من على بابا المدونة ريحة المكرونة تجنن يا ازهرى ههههههههههههه

صباحك سكر الاول
اخبارك ايه ؟؟
يارب تكون بالف خير

هو فى حد مش بيحب المكرونة بالبشاميل مش اعتقد يعنى
انا عن نفسى بموووووووووووووووت فيها
وبموووووووووووووت فى البشاميل خاصة
يا بنى انا كنت ناوية اعمل رابطة لمحبى المكرونة بالبشاميل ايه رايك تجى معايا ولا ايه ؟؟؟ ههههههههههه

شفت بقى البنات شاطرة ازاى مش زى ناس والله بنوتة زى العسل عرفت تضحك عليك هههههههههههه

عارف اجمل حاجة ايه طريقتك فى عرض الموضوع ورغم انه لذيذ كدا وخفيف الا انك عملت بيه اسقاط على موضوع هام جدا اننا بنسى بسرعة وبنعمل الموقف لمجرد انه يتقال اننا عملنا بدون اى فايدة يعنى اهوا مظاهرة و احتجاج وخلاص
يا عم سيبك تحيا المكرونة ههههههههههه

بالنسبة لموضوع التاج والله انا وراك وراك هتروح منى فين ؟؟

تحياتى
يويو

أكون أو لا أكون يقول...

هههههههههههه البوست ابتدى بالطبخ والأكل... والحياه الجتماعيه... بعدين قفل بحاجه مختلفه خالص...
كل ده بسبب الإدمان على البشميل... آه هو حلو بس مش صحي على فكره... لأن البشميل فيه كميه كبيره من الزيت... يعني بيتختن بشكل سريع... وبعد الأمل بتحس انك تقيل هههههه
كل ده محاولات لحل حالة الإدمان...

لا لا ... أنا عندي الحل.... إيه رأيك تبطله بالتدريج... يعني اليوم تاكل كميه... المره اللي بعدها تاكل نص الكميه... وبعدها اقل... ثم اقل... هههه زي اللي بيعملوه مع المدمنين بالضبط... بعد الشر عنك يعني بس... بس برضو الحاله ده ادمان ههههه

البشاميل:
كباية حليب... وتحط عليها ملعقتين طحين... وفنجان صغير زيت ذره...
تخلطهم بالخلاط اليدوي...
وتحطهم على نار هادئه جداً... وتفضل تخلط على مهل... علشان مايجمدش المزيج...
ولما تحس إنه شويه تماسك... تشيله عن النار... ترش عليه ملعقه نص صغيره فلفل اسود...
وشويه جبن مبشور" جبنة قشقوان"...
تصب نص الكميه على طبق المعكرونه... والنص التاني تكسر عليه بيضه وتحط عليه ملعقه صغيره فلفل اسود وتخلطه... تصبه فوق الطبق بتاع المكرونه... وبعدين ترش جين على الوش بتاع الصحن... وتدخله للفرن... تشعل النار السفليه للفرن.... وبعد ربع ساعه... تشعل النار اللي فوق... ولما يتحمر الوش... صحتين وعافيه...

ده طريقة البشاميل بس... يعني أكيد بتعرف تعمل المكرونه... ولو مش عارف أكتب لك الطريقه كمان...

Beram ElMasry يقول...

الاخ العزيز الازهرى
السلام عليكم ورحمة الله وبركاته
: صديقى العزيز والجميل والبخيل جداً في مودتي, أنت تعلم أن نظرى ضعيف جداً وأجد صعوبة شديدة فى زيارة المدونات وإنت مش عايز ترحم وفاكر إن تأخرى فى زيارتكم أو زيارة غيرك هى إنشغال عنكم والحقيقة أني أتمنى محاورتكم يومياً ولكنه ضعف البصر يجعل الأمر متعذر ,
خليو ده هو خليو اجلاسيوس وهو مغنى اسباني كان حارس مرمي المنتخب الاسباني, دعته جيهان السادات فغنى لنسائنا فى سفح الهرم

زمن الشيكابالالالا يقول...

أنا آسف جداً على التأخير فى الرد دايماً عندى شغل كتيير وظروفى مش سامحة أنى أقعد عالنت
قرأت تاج آخر الأحزان وفعلاً سعرت بتقارب شديد فى إجاباتنا وشخصيتنا وأنا مش شاسق حاجة مؤسفة فية
وبالنسبة للمكرونة البشاميل فالتشابة بينا إنها عشقى الأول أنا كمان
بس انت مارديتش عليا فى الصفة ال انت شايف إننا مشتركين فيها
تحياتى

طوبه فضه وطوبه دهب يقول...

جميل اوى موضوع المكرونه وحتى لو ادمان ايه المشكله مدام مش حاجه غلط ولا مضره ربنا يكرمك انت كمان ببنت خاله تكون شاطره وتعملك احسن مكرونه وتغيظ بنت خالتك وجوزها بس اهم حاجه تتاكد انها بتعرف تعملها

فشكووول يقول...

العزيز الازهرى
تحياتى
انت خدتنا من البشميل لابنة خالتك اللى بتعمل بشميل يهبل وسافرت وسابتك غلبات تنعى حظك مع البشميل ورحت بينا فى رحلة للمطاعم الجميله اللى انا بحبها الى المقاطعه ... ايه يا عم الرحله دى كلها انت لفيت بينا الدنيا ورجعتنا تانى.

عارف يا ازهرى الواحد اما يروح مطعم نضيف ما يعرفش ياكل لكن لو كان مطعم كدا يعنى جميل والدبان بيهف على الاكل والناموس والحاجات الحلوه دى بتبقى الاكله زى السكر وبالهنا والشفا والبشميل كمان
تحياتى

GiGi world يقول...

روعه روعه روعه
بجد مش ممكن انت انسان رائع
وصلت لهدفك بطريقه راااااااااااااااااائعه
يارب يكرمك ويزيدك مكرونه بالباشميل انتاج بيتى احسن يطلعولنا تانى مكرونه امريكى ربنا يستر

الازهرى يقول...

القدر وانا

مرورك اسعدنى للغاية
وكل ما اكتبه هنا له علاقة بالازهر

وبأذن الله أزورك
وكمان أتمنى دوام التواصل

الازهرى يقول...

عمرو الغالى

اولا صور المكرونة بتاعتها عندى وهى اقل جمالا من دى صدقنى
لكن دى من النت

أما بخصوص طريقة التخلص من المكرونة فصعبة لإنى بحب الشطة جدا على الرغم من متاعبها
واخر سطرين اتمنى من الله أن ينفع الناس بهم

الازهرى يقول...

غروووووووب
لا
إذا كانت المصالحة بطبق مكرونة
خليكى مخاصمانى أحسن
أنا ما بصدق ألاقى طبق منها


تحياتى وأتمنى دوام التواصل

الازهرى يقول...

صدى الصمت
طيب ممكن أطمع تستأذنى منه فى طبق للغلبان الموجود هنا
والثواب والأجر من عند الله

والسياسة يعنى آخر أربع سطور من الموضوع

الازهرى يقول...

سفرووووووووووووته

أنا عزمتك تتفرجى بس
مش تاكلى

وانا كمان اتمنى كل الناس تفهم
انها تعمل باللى فهمته
تحياتى وتمنياتى لك ولكل الكوكب بالنجاح فى الإمتحانات

الازهرى يقول...

بيرىىىىىىىىىىىىىىىىىىىىىىىىىىى

العبى غيرها
انا اكبر طبعا
فى بنت الايام دى بتقول انها كبيرة

انا اساسا ما اعرفش هى بتحط ايه
لكن أسألك ؟ وارد عليكى

الازهرى يقول...

يويويويويويويويو

ايوه ضحكت على ولسه برضه بتضحك على للنهاردة
تخيلى ؟

اتمنى ان كل الناس يبقى ليها موقف موحد ونثبت عليه
وقتها كل الدنيا تعمل لنا حساب

تحياتى
وبخصوص التاج ربنا يسهل

الازهرى يقول...

أكون أو لا أكون
فينك من زمان

أيوه كل ده من البشامل
وكمان مفيش خوف انى اتخن
لانى بالعب رياضة كويسة
انا وزنى ثابت من حوالى 7 سنين على الرغم من الاكل ده كله

وبخصوص الموضوع التانى اتمنى كل الناس تفهمه ونقدر نعمل بيه

اما بخصوص المطبخ فانا اكبر علاقة لى معاه انى ادخل اجيب زجاجة ماء من الثلاجة
ده اذا كان مفيش حد فى البيت طبعا
لكن انقل الوصفة للمختصين ونشوف النتيجة

شكرا على الوصفة الجميلة

الازهرى يقول...

حبيبى الغالى ا/ بيرم المصرى

يعلم الله اننى لم اكن منقطعا عنك وحدك ولكننى ومنذ شهر كامل بعيد عن النت باكمله
ولو تعلم ظروفى لأمرتنى أن أبتعد لفترة كبيرة حتى أنتهى مما أنا فيه ولولا خوفى من أن يغضب أحباء لى مثلك وأنننى أيضا أشتاق إليهم ما دخلت مطلقا

أسألك الدعاء
والعذر فى الغياب

وشكرا على معلومة خوليو

الازهرى يقول...

زمن الشيكابالالالالا

ليكن الله فى عوننا جميعا
المشكلة لم تكن فى التاج ولكن فى المعركة التى نشأت عنه

ولا أتذكر الأن ما هى تلك الصفة ولكن أعدك أن أراجع التاج واكتب لك عنها

اعذرنى وانظر ردى على أ/ بيرم المصرى

الازهرى يقول...

طوبة دهب وطوبة فضة

حاسبى لانها بتقرأ الكلام ده
ودى شرانيه وانا عارفها

ربنا يخليكى يا رب ويجزيكى خير على دعوتك الجميلة

اتمنى دوام التواصل

thunder يقول...

ههههههههههههههههههههههههه تستاهل وكويس ان نقطة الضعف اتعرفت وفى بشرية بتزلك
والحمدلله انك مش من الناس اللى بتقول بيكتا وسوزيس والحاجات اللى فى الوريد والعضل دى
بوست بشمل خلاص يا معلم ربنا يوافقك فى كل طبخة جديدة قصدى فى كل بوست جديد دمت بكل ما تحب ياااااااااااااارب

الازهرى يقول...

فشكولنا الغالى

المهم انى رجعتكم فى الاخر

انا بقى صعب جدا انى اكل برة البيت ولو فكرت اعملها يبقى
يا اما عربية فول
يا اما مطعم كشرى وخلصنا على كده

وزى كل مرة بتهرب
ما علينا

الازهرى يقول...

جى جى

ايوه كده
دى دعوة فى الصميم
جزاك الله عنها خيرا

والاهم ان يعمل من تعلم بما تعلم
تحياتى دوما

الازهرى يقول...

ثندر بيرد

ربنا يخليك يا رب
انا كمان باعرف اقول فول وطعمية وجعليص

دمت بخير وادام الله المودة بيننا

رحلتنا في الحياة يقول...

هههههههه ياعينى صعبت عليا كل ده علشان المكرونة البشاميل انت ممكن تبيع البلد علشان صينية مكرونة من دى انت حالتك خطر خالص على فكرة لازم تتعالج من ادمان المكرونة
بس بخصوص موضوع الذل وانت صغير كنت انا اللى بزل العيال مع انى ولا اكبر منهم ولا حاجة بس افترى تقول ايه كنت طفلة بلطجية

♥♥♥♥♥ Jennifer™® ♥♥♥♥♥ يقول...

أحب بلوق الخاص بك

صدى الصمت - عاشقة الورد - يقول...

إن شاء الله لما أعمل مكرونة هأخلى شيكابالا يعزمك وتشرفنا
وبالنسبة للسياسة فأنا ضد الإزدواجية فى تعاملات الناس إنها تطالب برفع الظلم والإحتلال وتكون ضد المجازر وفى نفس الوقت تروج وتشترى السلع الخاصة بتمويل هذا البلد وممكن يكون هذا التمويل مخصص للأسلحة لديهم
بس فيه ناس بتفصل دة عن دة ماأعرفش إزاى
تحياتى

dr.lecter يقول...

ياعم انا جعان ده وقته خالص يخرب بيت كده

وبعدين مدونتك التانيه مابتكتبش فيها ليه ؟ انا كل شويه ادخل عليها الاقي مافيش جديد ماخدتش بالي الا من التانيه بتصريف الهي

فشكووول يقول...

انت بره البيت بتعط بتعمل ايه يا ازهرى يا بتاع الكشرى وعربية الفول
ويا سلام لو كمان فحل بصل والفول يكون عليه قزازة خل .... وكمان فجلتين تلاته والواحد ياكل وما يحس انه هو بياكل الا بعد ساعتين تلاته ويأنتخ وينبعج كدا ويبقى زى اللى شارب ويقول انا جدع
تحياتى

ابو المفاصل الواصل يقول...

ابو المفاصل انا.....وانا ابو المفاصل .....الواصل
الى كل البشر اقول................
=================
مهما تكون غنى وعزيز وواصل
ليست لك قيمة بدون ابو المفاصل
فانا المتحكم فى المتحكمين وعارف الجارى والحاصل
ابرئك ان كنت متهما واتهمك حتى لو كان بينك وبين الحرام حد وفاصل
لا تخلو منى منطقة فانا المخلصاتى والسمسار
ولا يهمنى ان كنت سبة فى جبين وطنى وعار
طلعتى مهيبة وحلوة ونفسى مرة ولكن فى انتشار
كل يوم اكبر ذى السرطان وانشر المر والمرار
غويط لا يعرف احدا اخرتى وسوء نفسى ذى القار
امثالى ملتفون حولى فى انتباة وزنهار
وعلى استعداد لفعل اى شىء دون انتظار
طالما عندى الضوء الاخضر بالاذى واحمل الشعار
++++++++++++++++++++++++++++++

اعشق فى الليل ضوء القمر يقول...

امرنا لله اول ما والدتى تعمل المكرونه بالبشاميل ستكون ضيفى فى ذلك اليوم بس نتفق لما امى تتكرم علينا و تعملها تفضل امى فى البيت بلاش نشبت و نقول تروح معايا علشان تعملى مكرونه
ههههههههههههه

نـــــور يقول...

طب والله بحبها
متشكره عالهديه
بس انت قلت ليه لا تعليق على البوست وبعدين رجعت علقت؟؟ ولا انت كتبت لا تعليق غلطه؟

وماتخافش لو جبتلى هديه مش هتقدر تاخدها
هبلطج عليك ومش هتقدر تاخدها وانا اهو وانت اهو
ودينى مااكلك مكرونه بشاميل تانى
وهعملها واحنسك بيها ومش اديلك منها
بس
هه

حروف يقول...

i m so sorry really im sorry i not read tl last post th prevoious one inot visite any ony sorry i ve alot problems ana fe 7alet tware2
emergence
sorry again
good post good bye

Unknown يقول...

ياااااااااااااااه

جيتي على الجرح

مكرونة باشميل

ليه كده

تحياتي

ويبقى التواصل

Beram ElMasry يقول...

الازهرى
حبيبي الازهري يسعدني مرورك ويقليقني انقطاعك فارجو ان تكون المور علي خير ما يرام. مع امنياتي لك بالتوفيق في كل ما تعمل
لك تحياتى والسلام ، ولا سلام مع اليهود

وكلنا بنحب المكرونة بالباشاميل

الازهرى يقول...

ايوشة
صاحبة احلى تخاريف

يعنى انا اخلص منها تطلعى لى انتى
ربنا يقوينى عليكم
انا شخصيا بعت كل حاجة من زمان علشان صينية المكرونة
لكن تفتكرى لو بعت دينى ومبادئى يتفضل ايييه؟

الازهرى يقول...

جينيفر

شكرا على المجاملة الرقيقة

وربنا يهدينا جميعا

الازهرى يقول...

صدى الصمت
اللى يرجع فى كلامه يدفع غرامة
لكن تفتتكرى هتعجبنى
اسأل شيكابالا الاول

الازدواجية والتردد هما السبب فى الكثير مما نحن فيه

الازهرى يقول...

د/ليكتر
يا عم انا عازمك
بس انت حدد الزمان والمكان

وانا خلاص كتبت هناك لكن كان فى ظروف خارجة عن الارادة

الازهرى يقول...

فشكووووووووووووووووووووول

انا بره البيت فى الدنيا الواسعة اغلبها وتغلبنى
وادينا ماشيين

الازهرى يقول...

ابو المفاصل

ايوه انا بضه كنت كده ايام الشباب
تفتكر النهاردةوصلت لإيه ؟

تحياتى واتمنى دوام التواصل

الازهرى يقول...

اعشق فى الليل ضوء القمر

امممم
شكلك واثق ان الاكل هيعجبنى
خلاص اتفقنا
حدد انت الزمان والمكان
وانا موجود

الازهرى يقول...

نور
الا صحيح هى فين حبيبة

انا قلت لا تعليق
لانك قلتى عايزة البلوجر ينفجر من كتر التعليقات

وبخصوص المكرونة
انا شاكك اساسا انك بتعرفى تعمليها
هندسة ومكونة بالباشميل
صعب يجتمعوا

الازهرى يقول...

حروف
اقطع دراعى ان كنت فاهم اكتر من نص الكلام
لكن على العموم
الاعتذار مقبول
وربنا يعينك
لكن والنبى بلاش اللغة الغلايبة دى انا مشش بافهم فيها خاااااااااالص

الازهرى يقول...

الشهيد
اخى الكريم
لو ظللنا نعدد فى فضائا الشهيد وحقوقه نحو وطنه واهله فلن ننتهى
لانه بلا حدود

تحياتى واتمنى دوام التواصل

الازهرى يقول...

معتز شاهين

سلامتك من كل الجراح

ودوام التواص معك شرف لى

الازهرى يقول...

حبيبنا الغالى ا/ بيرم المصرى
شكرا على دعائك الجميل وليعنى الله ان اواجه ما انا فيه دون انقطاع عنكم

تحياتى دوما

فشكووول يقول...

بص بقى يا اخينا انا قاعد على قلبكوا وكمان علشان اقعد اكل المكرونه اللى انت مابتعرفش تعملها مهو لازم نشجع المنتج المحلى
صعلوك

prince4ever يقول...

هتخليني ااقوم ااكل و ابطل الريجيم
اه..ما هو النهارده اليوم الفري... و اللي هو موافق عندي سبت و حد و اتنين و تلات و اربع و خميس...انما الجمعه صيانه..

marmar يقول...

طب انا عايزة مكرونه بالباشميل لو سمحت
ليا عندك طبق
كنت هكتبلك الوصفه بس اكون او لا اكون وصفتهالك ميه ميه اهو
"على فكره مش بعرف اعملها خالص " ههههههههههههههههههه
بس كنت هكتباهلك بالذكاء كده

Sweet Violet يقول...

ياااااااااااااااااااااه تخيل انا حبيت بنت خالتك دى من قبل مااشوفها

ايوة كده ربنا يارب يزيدها و تفضل كده على طووووووول

P:

اشكرك بشده على سؤالك عنى انا بخير الحمدلله .. موجوده يعنى ماتفرحش قوى و تقول انك خلاص خلصت من موضوع الحبر لانك بردو هتجيبه D:

رئيس التحرير يقول...

بسم الله الرحمن الرحيم
لازم ...نسمي الله قبل الأكل
ونحمده كمان بعد الأكل..
وبعدين ...نسلم وتسلم أيدين اللي عملوا الأكل.
وبعدين ...
انت بنت خالتك تضحك عليك و تدوخك السبع دوخات
وتتفش فينا و تدوخنا معاك..
ما من غير مكرونه وباشميل قول يا جماعه تعالو نقاطع الأكل ...لأن كل الأكل جاي لنا من هناك ...وناكل بالهنا والشفا.

الازهرى يقول...

صعلوك
يا عمنا انا قلت لك بلاش تاخد اسم فشكول وتشتغل بيه
دا شبهه
اعمل لك اسم
صدقنى التكاليف بسيطةو وممكن تخليها على حسابى يا عم ولا يهمك
وكمان انا قلتلك نصيحة لوجه الله
وقد اعذر من انذر

الازهرى يقول...

اميرنا الغالى
وليه بس الريجيم القاسى ده
بالراحة على نفسك شوية

تحياتى دوما

الازهرى يقول...

مرمر

يااااااااااه
اخيرا لقيت حد بيشاركنى
فى عدم المعرفة وليس فى الذكاء طبعا

الازهرى يقول...

ضد

امشى
امشى تانى
انتى ايه رجعك اساسا
انتى المفروض تسافرى خمس او ست او حتى عشر سنين كده
قال حبيتها من قبل ما تشوفها قال
ناقص كمان تتالف معاها والحزب يكمل
ما ناقصة يعنى


يا رب ما تغيبى ابدا

الازهرى يقول...

رئيس التحرير

ولما اتفش بعيد عن المدونة تفتكر هيكون فين
هو انا لقيت مكان وقلت لأ يا عمنا دول عاملين على حصار
ومان كان نفسى اسمع رأيك
مع المقاطعة والا ضدها