الأربعاء، 1 أبريل 2009

خمسة ضياع



خمسة ضياع


آسف جدا إنى غبت فجأة لكن كنت مشغول جدا قبل السفر

سافرت فين ؟


طبعا مش هأقول لأنى عارف ان فى ناس قلبها مش نضيف وكمان انا زعلان جدا من المدونين


لالالالالالالالالا


بلا أخوة بلا كلام فاضى


طيب اشهدوا انتوا


انا جيت هنا وبقالى 3 أيام يادوب عايش على المية والملح


وانا اللى قلت انى أول ما أوصل وأنزل من الأوتوبيس وأقول للناس إن أنا ضيف على الهانم اللى بتقول شويه انها حروف وبعدها تقول انها كبرت وبقت كلمات


ألاقى البلد اتنفضت وبلغوا المديرية والمحافظ يجرى يستقبلنى ويحجزولى فى البلازا ويدونى مبلغ وقدره لزوم المصاريف او حتى جلويا او اى مكان اعرف الجأ له بعد اليوم ما يخلص


أينوه ما هو اللى يشوف كلامها والفتونة علينا وكل ما أروح مكان تيجى هناك تهدى النفوس بينى وبينكم


وعاملة فيها زعيم عصابة ومقفلاها بلاد وحاجة كده رعب يعنى


وأسأل عنها ولا أى حد يعرفها هنا


أنا لو سألت أ حد عن ناس فى لندن أنا واثق أنهم عارفين عنهم أكتر منها


وعلى كل بلعتها وسكت وقلت ياما فى المدونين يا فشارين


إنما شويتين والميزانية خلصت وبقيت على الحميد المجيد ودرت فى الشوارع يمكن أقابل حد أعرفه أهو يعزمنى على أكلة أو حتى نطلع منه بأى حاجة


والنواية تسند الزير


وبرضه الحالة قحت قلت خلاص أنا أتصل بيها يمكن تصدق المرة دى وتبعت أى حاجة


ردت على وقعدت توصف أنها بتطبخ بفتيك ومعاه مكرونه وشوية حاجات كده تجرى الريق وكملت الوصف لحد ما ريقى خلص واستلفت شوية من ماء البحر احطهم يجروا بدل ريقى


ولما زهقت سألتها هتبعتي لى الغدا امتى لقيتها وبكل هدوء تقول لى إنها كانت بتلك وهى بتكلمنى وخلصت الأكل وخيرها فى غيرها


والجايات أكتر من الرايحات


وكلام كده مفيش منه عازه ومش وقته أساسا


أنا سلمت أمرى لله وأعتمدنا عليه والحمد لله فرجت وقضيت اليومين فى البلد دى وأنا مستور


لكن توبة من دى النوبة إنى أصدق مدونين من تانى


إييييييييييه


الحمد لله على كل حال


الواحد برضه لازم يتلسع علشان يتعلم



على العموم بإذن الله أغيب يومين كمان أجازة أريح فيها نفسى بعد الضغط ده كله

وباذن الله أسافر الصبح للمكان الجديد وارجع القاهرة بعدها ونرجع لعادتنا القديمة

صحيح أنا مش فاكر عادتنا كانت إيه لكن لما أرجع نتفاهم من جديد فى الموضوع ده كمان

أترككم فى رعاية الله وأسألكم الدعاء

هناك 39 تعليقًا:

شمس النهار يقول...

ترجع بالسلامه ياريس
بس اخبار المهرجان ايه

تامر علي يقول...

ايه ده انت قررت تلف بالمسرحية على المحافظات بعد الاصطدام بالبيروقراطية هنا ولا ايه ؟؟؟

يا اخي طمنا عليك :)

تحياتي

kochia يقول...

انت رحت فين وليه
بتتفسح ؟
لا
شكلها مش فسحة مادام فيها جوع كدة

ابقي خد معاك شوية سندوتشات وخلاص ..
واستخدمهم عند اللزوم بس

ابقي طمنا بس

تحياتي

yoyo يقول...

حمد لله على السلامة من رحلة الضياع الأولى
وتروح وتجى بالف مليون سلامة من الرحلة التانية بدون اى ضياع بقى
انت كدا والله صعبت عليا اوى ههههههههههههههههه معليش بقى يا بنى مش بقى فى آمان
ابقى قضيها بسكويت وقرص بقى هههههههههه

ترجع بالف سلامة يارب
تحياتى
يويو

mohamed ghalia يقول...

ايه ياعمنا روحت فين بس
حمدا لله على السلامة
وفى إنتظارك دوما

romansy يقول...

ايوووووووووووووووووووو

الازهرى اتبهدل يا رجاله
بس كويس انك كنت ضحيه علشان نعرف بقى مين العدو ومين الصديق
ازهرى
كلت ايه ياعم بس
كفايه عليك انك شبعت من البحر بقى

Butterfly يقول...

هههههههههههه
حمدالله على السلامه
وترجع بالسلامه برده :)

صدى الصمت - عاشقة الورد - يقول...

تروح وترجع بالسلامة
وفى إنتظار جديدك بإذن الله
تحياتى

عاشقة الورد

Rania Lelah يقول...

كويس الحمدلله انك رجعت سالما غانام من الرحله الغريبه دى

تحياتى

MaNoOoSh يقول...

دة انت طلعت حكاية
بس مش هحكيهالك بقى منت تلاقيك عارفها طبعا
هههههههههههههههههه
بتمثل من ورايا
ماشى ماشى
وكمان سافرت كدة من غير ما تاخدنا فى رحلة معاك
يللا مش مشكلة
هنسيبك تريح شوية وتاخد نفسك وبعدين نعزم نفسنا عندك فى المدونة على أكلة حلوة كدة وشوية كاتوه وحلويات

لحظة تأمل يقول...

ياااه حمدلله على سلامتك

وبعدين مالها مية البحر حد لاقى :)

ترجع تانى بالسلامة ان شاء الله

الازهرى يقول...

الحاجة شموسة

الله يسلمك المهرجان لا يزال فى علم الغيب
وربنا يسهل
ويهديهم

الازهرى يقول...

تامر على

لا أبدا احنا لسه مصطدمين بيها
لكن كان فى امور لازم اسافر لها خاصة بالدراسة وبعض الاعمال

وربنا يطمنى عليكم دايما
صدقنى وحشنتونى جدا جدا جدا

الازهرى يقول...

كوشيا

سندويتشات ؟
والله فكرة كويسة
باذن الله المرة الجاية اعملها

وهىمش كانت فسحة انما دراسة مع شوية شغل وربنا يطمنى دايما عليكم يا رب

الازهرى يقول...

يويو

الله يسلمك يا احلى اخت فى الدنيا دى كلها

لكن بسكويت وقرص مين
انا بال حوالى 5 ارغفة فى الاكلة
تفتكرى يقضينى بسكويت ؟

الازهرى يقول...

محمد غاليا
اهو فى الدنيا الواسعة

الله يسلمك يا جميل

الازهرى يقول...

رومانسى
شوفت الزمن
حكم
تصدق بالله انا ما لمستش المية طول ما انا هناك اساساانا كنت غرقان فى جب من المسؤليات وعلشان كده اخدت اجازة بعدها

الازهرى يقول...

فراشتنا

الله يسلمك يا رب من كل سوء

الازهرى يقول...

صدى الصمت
الله يسلمك
ادينى رجعت وربنا يسهل فى الباقى

الازهرى يقول...

رانيا

والحمد لله رجعت من الرحلة التانية كمان

الازهرى يقول...

مانووووووووووووووش
تصدقى انى لسه جاى من عندك حالا

بخصوص الحكاية لا انا مش عارفها
وبخصوص العزومة انا باذن الله راجع بعد 5 سنين و7 شهور و 18يوم

الازهرى يقول...

لحظة تأمل

تصدى باللهوالله ما لمست مية البحر اساسا وانا هناك

فشكووول يقول...

ازيك يا ازهرى يا عزيزى
تحياتى
طبعا وانا باكتب التعليق زمانك فى القاهره
طب يا اخى لما فلست ومبقاش معاك فلوس انت معاك نمرة تليفونى كنت اروح لك جرى من شبين لحد اسكندريه والحقك واستر عليك ... واقول لك انا جاى من شبين وفى الحقيقه انا كنت جانبك لحد الساعة 2 كل يوم.. وكنت تلاقينى فى السوق بتاع المنشيه باشترى ام الخلول عشان اروح الاستراحه اتسلى بيهم ... بس يعنى اعمل منظر لنفسى وخلاص

وعموما انت عرفتنى بحروف ومش اصدقها لو عملتها معايا انا كمان واعمل حسابى واخد معايا قرشانات زياده
تحياتى

Unknown يقول...

السلام عليكم ورحمة الله وبركاته
اكيد التجربة مهما كانت بها من صعاب فيها ايضاً فوائد ودروس وهكذا الحياة دروس وعبر والحصيف من يعى ويتعلم
تقديرى واحترامى

Unknown يقول...

السلام عليكم ورحمة الله وبركاته
اكيد التجربة مهما كانت بها من صعاب فيها ايضاً فوائد ودروس وهكذا الحياة دروس وعبر والحصيف من يعى ويتعلم
تقديرى واحترامى

اعشق فى الليل ضوء القمر يقول...

السلام عليكم
ترجع بالسلامه يا وحش
ومعلش هما المدونين كده كلام يا راجل وتعتمد على كلمات إزاى ده حتى فى المثل كلام الليل مدهون بذبده يطلع عليه الليل يسيح
معلش بقى

gogo!sf يقول...

معلش يا ازهرى
تعيش وتاخد غيرها
بس نصيحه اوع تسمع كلام حد تانى
اللى يمشى ورا كلام اى حد
يروح فى الضياع وعلى العموم خيرها فى غيرها ومتزعلش يا عم
تتعوض المرة الجايه

عاشقه الاحزان

القلم السكندري يقول...

السلام عليكم

ما هذه الثورة العارمة علي المدونين والمدونات :)

عموما الله يسهلك .. سفر وفسح

أنا مش بحسد

انا بس بقول .. يسر الله لك أمرك

وسفر موفق


تحياتي

MISS\GH يقول...

لالالالا انا بصراحه انا بقى عارفه انت كنت فين ...اكيد فى بلد السحر والجمال وبجد كانت منوره بيك
وزى ما قولت هترجع ليها تانى

ترجع بالسلامه ان شاء الله

الازهرى يقول...

فشكولنا الغالى

اتصل ازاى بس ؟
انا الفلوس لو كانت معايا كنت كلت بيها احسن

وعموما الظالم له ربنا ينصفنا منه

الازهرى يقول...

الاخ الغالى محمد الجرايحى
وعليكم السلام ورحمة الله وبركاته

وهذا هو ما يجعلنى اعيد الكرة المرة تلو المرة ولايصيبنى اليأس

تحياتى دوما

الازهرى يقول...

عاشق ضوء القمر

نعمل ايه بقى فى الدنيا

الامر لله اسامح علشان خاطرك

الازهرى يقول...

جوجو

توبة مندى النوبة
انا اتلسعت خلاص وبعد كده هانفخ فى الزبادى والعرقسوس كمان

الازهرى يقول...

القلم السكندرى
وعليكم السلام ورحمة الله وبركاته

يسر الله لنا ولك
ولا حسد بيننا
لانى اعرف انك تسعد لى كما اسعد لك

الازهرى يقول...

MISS\GH

ما انا لازم ارجع
لانى ببساطة وبدون مبالغة لو ما رجعتش اموت
انا سايب اغلى ما لى فى الدنيا هناك

مـجـنـووون يقول...

ترجع بالسلامه يا غالي

وربنا يوفقك يا رب

تقبل مروري
مجنووون

mahasen saber يقول...

تعالى انتا الشرقيه بس
وشوف انا هعملك ايه

هروحك القاهره جعان وعطشان وندمان على دخولك عالم التدوين من اساسه ..لا لا بهزر يا زهر اوعى تصدقنى بس تعالى انتا بس وهات معاك فلوس كتير عشان انتا اليى هتعزمنى

الازهرى يقول...

مجنون

الله يسلمك يا غالى

تحياتى دوما

الازهرى يقول...

محاسن

انا جربت بتوع الشرقية
كنا رايحين نجيب عروسة
ورحنا ورجعنا من غير حتى شوية ميه
وبعد كده يتكلموا عن الكرم ؟
زمن