الاثنين، 23 مارس، 2009

عذرا أصدقائى

سحقا للقانون
آسف أصدقائى فقد تم تأجيل المهرجان
فى يوم الافتتاح ووسط فرحة الجميع حض الى المكان كل من العميد فلان والعميد فلان ومعهما العقيد علان مع صحبة من
رجالهم وبعض الموظفين وتم اعلان اغلاق المسرح الخاص بالجمعية والمقرر اقامة المهرجان عليه وكالعادة لضرورة الامن
وبأمر من الدفاع المدنى والحريق
وتم إغلاقه وتشميعه بالشمع الأحمر إلى أجل غير مسمى ليلحق بما سبقه من المسارح على تلك القائمة وعلى رأسها القومى والبالون وغيرهم من المسارح الجميلة وليتم نقل المهرجان إلى مركز شباب الساحل (ولا يسئلنى أحد ما هو فلا يعلم عنه الكثيرون أى شىء )
أما عن الموعد الجديد فما زال فى علم الغيب لا أحد يعلم متى سيستأنف المهرجان
وبالتالى لا يعلم أحد موعد العروض
آسف لكم جميعا حقيقة كنت أتمنى رؤية الكثيرين
ولكن تأتى الرياح بما لا تشتهى السفن
قدر الله وما شاء فعل
ولعل الغد أفضل
***************************************************************************
لالالالالالالالالالالا
وأنا راجع وفاكر إنى هالاقى يفط متعلقة وانتظروا مفاجأة الموسم
والحق العرض الكبير
والدعوات منتشرة للحضور
وفى أول أجازة ( 12 ساعة على فكرة) أدخل ألاقى كل حاجة هس هس كده
وكمان عمالين تقولوا العنوان مش واضح
طيب ده عنوان المهرجان المكتوب فى الورق عندى
جمعية محلة الرواد
جماعة الرواد
رقم 1 (واحد) شارع الترعة البولاقية متفرع من شارع الجلاء
خلف مجمع محاكم الجلاء
بالذمة مش عنوانى اسهل
انما اقول ايه عقدة الخواجة بقى
واعلان هام يا جماعة تم تقديم مواعيد المهرجان بالكامل لمدة يوم
وبذلك يكون العرض فى الساعة السادسة يوم الأحد 29/3
وصدقونى والله العظيم ما لى يد فى تغييره المره دى الموضوع جاى من فوق
فوق قوى
إنما فى المرة الأولانية غيرناه بناء على مواعيد المهرجان بحيث نكون آخر عرض وما زلنا وسيكون حفل الختام يوم 30
وكان تحديد الموعد بناء على مصلحة أقارب الأعضاء والمدعوين من الأقاليم بحيث يتمكنوا من سماع العرض والعودة دون التعرض لزحام نهاية الأسبوع
وما زال الإعتذار ساريا عن متابعة الموضوعات الجديدة فى المدونات
أدعوا الله أن ألقاكم على خير
************************************************************************************
دعوة عامة ويا رب تبقى لمه


أصدقائى الأعزائى إنه ليسعدنى ويشرفنى أن أدعوكم إلى زفاف الأستاذ/ الأ..........
لالالالا ياجماعه زفاف إيه بس وهباب إيه
أسف أصلى فاصل ومن غير نوم تقريبا من 65 ساعة وحالتى كرب
المهم ومن غير خروج عن الموضوع خلينا نقول الكلمتين وبعدين ننام والصباح رباح وبكرة الجمعة ويا ريت تفتكرونى وقت الصلاة بدعوة حلوة إن ربنا يقوينى لإن فعلا الدنيا مقلوبة على دماغى اليومين دول ومحتاج لدعائكم معايا بصدق إن ربنا يوفقنى
ونرجع لموضوعنا
الموضوع إنى اتورطت فى مشكلة عويصة وناوى أشرككم معايا فيها إجبارى كده وكمان ممكن تسموها غلاسة لكن أعمل إيه مش لاقى غيركم يستحملنى
يوم30 مارس بإذن الله يكون تاريخ العرض المسرحى الجديد (مدد يا عالم ) والذى أشرف بالمشاركة فيه على الرغم من أنها إجبارية وضد إرادتى إلا أن الموضوع جميل ومع مخرج لا أستطيع أن أرفض له طلبا للأسف وهو يعلم ذلك ويستغله فى كل مره لكن فعلا موضوع المسرحية أكثر من رائع ونتمنى الفوز بهذا المهرجان
المفروض العرض كان يوم 26 لكن إتضح إنه يوم خميس وبممارسة سلطاتى الجبارة ودموع التماسيح وخلافه وطبعا مع الإستعانة بالكوسة ( ربنا يكترها فى بلدنا ) قدرت على تأجيله ليوم 30 وهو يوم الأثنين وكان نفسى يكون يوم الأحد علشان فى شخص واحد بحبه جدا والمفروض إنه بينزل القاهرة يوم الأحد فقط لكن يسامحنى بقى أنا حاولت على قد ما قدرت
نرجع تانى لموضوعنا يا جماعة بلاش تتوهونى فى كلامكم اتفقنا
العرض بإذن الله هيكون تبع مهرجان المسرح وبدون اسئلة برضه عن اسم المهرجان لإنها من كترمهرجانات الثقافة دخلت الاسامى فى بعض والموضوع باظ خالص
المهم العرض بإذن الله هيكون فى ( جماعة الرواد ) ودى موجودة فى القللى وعلشان الوصفة تكون أسهل الواحد يروح عند مبنى الأهرام ( بتوع الجرايد ) ويقف قدام المبنى بانبهار لفخامته ومتانته لمدة دقيقتين وبعدها يبص على اليمين هيلاقى مجمع محاكم مصر القديمة
ويمشى ناحيته لكن بدل ما يمشى من قدامه وواحد محامى يضربه باى حاجة لانى صراحة اصبحت محتارا ايهم الاكثر اجراما المحامى ام المتهم
المهم تمشوا من وراء المبنى وبمحاذاته هتلاقوا ورشة نجارة فيها اسطى شاطر جدا تطلبوا منه انه يعمل لكم كرسى علشان تقعدوا عليه لان المسرح كراسيه قليلة ومحتاج تبرعات وخلافه واى حد بخيل ممكن ياخد الكرسى بتاعه وهو راجع بيته من تانى
وبعد ما يخلص لكم الكرسى تاخدوه وتدخلوا من الباب الموجود بعد الورشة على طول هو باب الجمعية هتلاقوا لوحة كبييييييييرة عليها اعلان المهرجان
وأقرب محطة مترو هى أحمد عرابى
لكن الناس اللى هتنزل فى رمسيس ممكن تمشى لانها مسافة بسيطة
والعرض باذن الله يبدأ الساعة 6 وطبعا مساء وليس صباحا مش عاوزين ذكاوة والنبي
نيجى بقى لأهم المهم صحيح إن العرض مجانا وبدون تذاكر لكن هيكون فى صندوق كرتون من الحجم المتوسط لجمع التبرعات لصالح أخوكم العبد الفقير إلى الله والراجى محبتكم وكل واحد وزوقه بقى
وطبعا أوامر هامه
ممنوع إصطحاب الأطفال تحت 26 سنة منعا باتا ، كما يمنع أى حد بيحب المصاصات منعا باتا من التواجد وكل واحد عارف نفسه ، وكمان الناس بتوع الشيكولاته الميزانية خربت أشوف فيكم يومين حلوين
ويا ريت كل واحد يعرف بالموضوع يبلغ أصحابه ويحاول يجيب معاه أكبر عدد منهم أهو التبرعات كمان تز......
لالالالالالا يا جماعة ممنوع حد يفهمنى صح انتم عارفين ان الفلوس آخر حاجة أفكر فيها أنا مش عارف لسانى بيقول كلام غريب عنى من الإرهاق تقريبا
أنا يهمنى ألاقيكم هناك وخاصة الناس اللى فاتهم لقاء توقيع كتاب أنا أنثى وعيطوا وكانوا قربوا ينتحروا
اتفقنا ؟
استودعكم انتم والمدونة فى رعاية الله وبإذن الله أتشرف بلقائكم هناك وسيسعدنى كل من يحضر على أن تكون ظروفه تسمح بذلك وبدون أن يكلف نفسه فوق طاقتها ومن لا يحضر فله منى كل العذر والمحبة بدون أى شىء
وبالطبع استمحيكم عذرا فى التغيب الفترة المقبلة نظرا لكثافة الإستعدادات وانشغالى بأمور اضافية أخرى على رأسها الدراسة
وبإذن الله عند حدوث أى تعديل سأقوم بإضافته فى تحديث جديد
السلام عليكم ورحمة الله وبركاته

هناك 111 تعليقًا:

أكون أو لا أكون يقول...

موفق إن شاء الله...


اتمنى من أي حد يروح العرض... يسجل لنا مقطع من المسرحيه... حتى لو كان صغير... على القليله نشوف الأجواء ههه...

مواطن مصرى نايم يقول...

و حياة امى الغالية اول زيارة
و زهقت يا عمونا
هههههههههههههههههههههه
انا توهت منك
انت كنت عاوز مين يعنى
طب لما يجى اقول له مين
ههههههههههههههه
==================
بالتوفيق ان شاء الله و تشوف صاحبك بتاع الاحد
حندعى لك حاضر
بس حدد ادعى لك العرض ينجح و الا تشوف صاحبك ليك دعوة واحده بس

تحياتى

اسلام

wafaa يقول...

ربنا يوفقك

والوصفة سهلة خالص وماتتوهش اهم حاجة نخرج من البيت من يوم 27 عشان نقدر نوصل ف معاد العرض وميفوتناش

مفكر يقول...

السلام عليكم::

هو انت ممثل مسرحي؟؟

أنا أول مرة أعرف

أنا صعب أحضر لأني في الاسماعلية وف يالدراسة حالياً

بس والله يا ريت لو هتصوروا المسرحية فيديو يا ريت ترفعها على النت علشان نتفرج عليها ووربنا يوفقك

عمرو يقول...

ربنا يوفقك اٍن شاء الله و أوعدك أنى حأحاول قدر اٍستطاعتى اٍنى أحضر العرض
بس ماكنتش عارف اٍنك فنان مسرحى كمان !!
برافو عليك :)
أما بالنسبه لعدم حضورى حفل توقيع الكتاب فببساطه لأنى ماكنتش أعرف أى شىء عن هذا الموضوع و ماحدش قال لى عنه أى حاجه خالص بتاتا بالمره و كان طبعا شىء يسعدنى اٍنى أتواجد بينكم لكن معلش الجايات أكتر من الرايحات و أشكرك يا صديقى اٍنك اٍفتقدت وجودى و لكن و الله ماكنتش أعرف عنه أى حاجه
بالتوفيق اٍن شاء الله

mahasen saber يقول...

اول مره اعرف انك بتمثل او غاوى تمثيل

انا مبهوره بيك ومبسوطه منك قوى قوى قوى
ربنا يوفقك
والعرض يكسر الدنيا
بس بلاش شمع والنبى

mahasen saber يقول...

بس يوم الاتنيين صعب قوى على اليى بره القاهره انه يحضره
كان يوم الخميس افضل بكتير بكتير

هحاول احضر بس لو كان يوم خميس كنت اكيد باذن الله كنت هحضران ربنا ادانا عمر

انا مبسوطه بيك قوى قوى يا ازهرى

ABOALI يقول...

العنوان فى القللى

من قلة القلل فى البلد راحين تعلموا
مظاهرة مسرحية فى القللى

يااااااااااار ايحين القللى
سلامولى على الغالى
وعقبالوا وعقبالى



والخميس كان احسن يا غالى
وانتا اكيد غيرته علشان حد تانى


موفق موفق موفق

فركشاوي ..ناوي يقول...

أزهري...
السلام عليكم ورحمه الله وبركاته ...
بقي العرض يوم الأثنين والنهارده الجمعه طيب انا كده فاتني العرض كان المفروض الدعوه تكون بدري شويه ....
لكن حفل توقيع الكتاب كان رائع ...
أجمل شيئ فيه انك سوف ترسل لي الكتاب فورا ...
مش كده برضووووه

romansy يقول...

يا ازهرى
بكتتب لما وانت نايم وقولنا ماشى
وكمان ممثل دى بقى انبسطت منها قوى
ربنا يسهل يا ازهرى باشا
ونحضر العرض المسرحى
ونشوف القلل وهى بتكسر من كتر التصفيق الحاد

Butterfly يقول...

بالتوفيق ان شاء الله ...

تامر علي يقول...

ايه ده يا أخي بس ؟؟ انت اللي كاتب المسرحية يعني ولا هاتمثل ولا هاتخرجها ؟؟
على العموم قوللنا وضعك فيها إيه ولو هاتمثل قلنا هاتبقى لابس إيه علشان نعرفك :)

ربنا ينولك كل النجاح والتوفيق وتحياتي دائماً

dr.lecter يقول...

اشته ياريس التنين مناسبني جدا هاخلص الشغل وانط علي هنااك

بسنت يقول...

بالتوفيق ان شاء الله
انا الصراحه ما حضرت اى مسرح من قبل وكنت اتمنى
ولكن بعد البلاد بقى
ان شاء الله يكون رض متميز

marmar يقول...

طب خدوني معاكم امثل بقى
طب اغني
طب اقلد
طب ان شالله اقشر كوسة بس اجي مصر بقى
"وش بيعيط وبعييط وبيعيط وبيعييط"
عشان مبيحبش الكوسه
هههههههههههههههههههههههه

يلا كل مع الف وانت سلامة

ظبط الجمله تحصل على تلاجه بس هتتاخد تاني بعد ما تفرح بيها شوية

سلام

سفروتة يقول...

ماشي يا عم المشهور

ومهرجانات كمان

لالالالالالالالالالالالالالالالالالالا

ده احنا عدينا خلااااااااااااص

موفق يا والدي موفق باذن الله

ولو فيه فرصة اننا نيجي ان شاء الله نحضر

دمت بكل ود
:)

mohamed ghalia يقول...

هههههههههههههههههههههههههه
أنت تايه ياعم ولا ايه؟
أقولك روح نام ولما تصحى نتفاهم
إبقى كلمنى على الإيميل

saragebaly يقول...

كان نفسي اكون موجودة

بس انت قلت ممنوع حضور عشاق الشيكولاته

اتصدمت فعلا

وبعدين العنوان تايه اصلآ

وكمان قلل

ربنا يستر

ههههههههه

نتكلم جد

بجد كان نفسي احضر

بس للأسف الشديد انا مش من القاهرة

ربنا يوفقك باذن الله ويكون معاك

تحياتي لك وكل التقدير

سارة

لحظة تأمل يقول...

واضح ان عدم النوم مأثر عليك خالص
والواحد لو فكر يمشى على العنوان اللى بتقوله هيغنى فى الاخر دى وصفة هايلة :)

بجد ما شاء الله عليك
ربنا يكرمك ان شاء الله وبالتوفيق دايما

ويارب الظروف تسمح واقدر اتواجد

تحياتى دوما
ودمت بكل الخير

صدى الصمت يقول...

مش فاهمة قصدك ايه بقى بالكلام دة :
خاصة الناس اللى فاتهم لقاء توقيع كتاب أنا أنثى وعيطوا وكانوا قربوا ينتحروا ؟
تقصد مين يعنى ؟
على فكرة أخويا المراكبى بعتلى لينك فيه حفل التوقيع وكان رائع جداً
ومادام ممنوع لإصطحاب الأطفال يبقى أنا مش هأقدر آجى طبعاً يعنى أسيب بنتى فين ؟؟
وايه الوصفة السهلة الهايلة دى للوصول للمسرح ؟
بصراحة مش مفهوم منها حاجة
ههههههههه
تحياتى
وأتمنى لكم التوفيق ونجاح العرض

شمس النهار يقول...

وانا اقول انت مستخبي فين
ان شاء الله هحاول اجي مايهمكش
بس اتجدعن انت وورينا التمثيل المظبوط
احلا ايام هي ايام الجامعه

EMMY BABY يقول...

ههههههههههه ربنا يوفقك ان شاء الله يا ازهرى

ويبقى عرض جامد

تحياتى

ايمى

maha zein يقول...

ماشي ماشي
ماشي ماشي
هتتغردق وهتمثل كمان
لا وايه هتاخد تبرعات
يا ابن الايه

انا والله كنت اتمني اجي
بس هناك العديد والعديد من الظروف تمنع بقه
بس بالله عليك تخلي حد يسجل
وتنزلها علي النت
عوزين نتفرج يا عم

اتدرب كويس
عوزين احلي اداء

GiGi يقول...

الف مبروك وربنا يوفقك للخير وتنجح جامد قويييييييييييييييييي

Sweet Violet يقول...

ممنوع إصطحاب الأطفال تحت 26 سنة منعا باتا

تخيل كنت لسه هقول الف مبروك بس لقيت الكلمه دى قولت مش قايله حاجه

ايوة ايوة ماهو كل واحد عارف نفسه ... انا اصلا غلطانه انى قولتلك سنى

و كمان بقى هو ده الحدث طيب ياعم الوصف بقى فييييييييييييين ؟؟؟

انا مافهمتش حاجه على فكرة من الوصف بتاعك ده ... شكل كده هيحصل زى حفل التوقيع

عموما حاول لو دخلت تبعت الوصف سهل شويه و بطل الوصف اللى يتوه ده
و بردو مش الف مبروك بس هه

ادم المصرى يقول...

هوا فى ايه بس وانا هقولك طب الاستاذ مستنى حد هوا فى ايه...

على العموم يا عمونا ربنا يوفئك وانا اكيد هدعيلك وممكن اجى كمان لا فى صحه ولو عشنا اصلا لبكره

انا عيذك ترفع رصنا وبلاش ترفعنا معاها بلله عليكى

سلامى لمسرح القومى كلو

oRiGiNaL HeArT يقول...

بالتوفيق ان شاء الله
بس يعنى الاطفال اللى عندهم 20 مينفعش يجو :]

منى يقول...

ربنا يوفقك يا ازهرى
ابقوا تعالوا بعد المهرجان اعرضوا فى المنصوره عشان نشوفكم
حاولوا كده واضمنلك جمهور مهووول
تحياتى

fashkool يقول...

ازيك يا ازهرى .. انا راجع امبارح بالليل من اسكندريه .. وبعدين فتحت الصبح اليوم لقيتك كاتب عن العرض المسرحى والدعوه يوم الاحد .
شوف يا ازهرى .. انا طبيعة شغلى مفتش عام بلف على المحافظات .. كل اسبوع محافظه ويوم الاحد بأكون فى مصر عشان آخد التكليف من رئيس مجلس الاداره .. ودايما الاحد والاثنين والثلاثاء واحيانا كثيره الاربع بكون مشغول جدا فى احد المحافظات .. بس قول لى الميعاد الساعه كام يوم الاحد وانا احاول احضر يوم الاحد وقول حتكون لابس ايه احمر ولا اصفر ولا لون هدومك هيكون ايه .. عموما انا اما الواد محمود ابنى يصحى من النوم حاخليه يبعت لك الاميل بتاعى على الهوت ميل عشان اكلمك عليه.
تحياتى

الازهرى يقول...

أكون أو لا أكون
اللهم آمين
كنا نتمنى ايضا أن تنضمى إلينا
ونرجوا من الله أن نوفق الى الاتحاد جميعا تحت راية واحدة ونلتقى كما نشاء
وسأحاول فى موضوع التسجيل لاننى لا افقه فيه الكثير
ولكن سألجأ الى اصدقائى


تحياتى دوما

الازهرى يقول...

مواطن مصرى نايم

ادعى لى انجح وتكونوا كلكم موجودين ونفرح كلنا مع بعض

تحياتى وتمنياتى بالتواصل
واعدك بالزيارة بعد انتهاء هذه الظروف

الازهرى يقول...

وفاء
ربنا يخليك يا رب
والاهم النية فى الحضور
وبلاش تلكيك بالعنوان العنوان واضح وكمان حطيت عنوان جديد

وعلى فكرة انا هاكون فى الغردقة بعد العرض

الازهرى يقول...

حبيبنا المفكر
وعليكم السلام ورحمة الله وبركاته
تصدق اول مرة اعرف انا كمان

الميعاد كويس ويوم راحة من الدراسة يعيد النشاط من جديد
وانت دكتور وعارف
لكن برضه لازم تخلى بالك من الدراسة لو اليوم مهم
وربنا يعينا جميعا

الازهرى يقول...

حبيبى الغالى عمرو
صادق ومن غير حلفان انا مصدق دايما
لان ما بيننا كبير جدا
موضوع المسرح ده من سنين
ويا رب اقدر اشوفك هناك هاكون سعيد جدا

الازهرى يقول...

محاسن ام الغالى عبدالرحمن
وانا كمان اول مرة اعرف
لكن ليه بلاش شمع
دا المخرج عامل دور انى طول المسرحية ماشك الشمع
تفتكرى ده مقلب ؟

الازهرى يقول...

محاسن
لالالا
يوم الخميس اصعب علشان المواصلات للاقاليم وده اساسا سبب الميعاد

وصدقينى انا مبسوط كتير ان ربنا ؤزقنى اخوات جمال زيكم
واتمنى تقدرى
وكمان تجيبى بيدو معاكى وانا هاجيب له مصاصات كتير ومن غير ما كيارا تعرف
اتفقنا ؟

الازهرى يقول...

ابوعلى
الموعد كان بناء على حسابات كتيرة
انا مش لوحدى فى الفرقة صدقنى
وكمان انش لسه ما ذكرتش
انت جاى والا لأ
اتمنى تيجى

الازهرى يقول...

حبيبنا الفركشاوى
وعليكم السلام ورحمة الله وبركاته
لاااااااااا
انا موافق ابعت الكتاب لكن فين العنوان
انما تتهرب من المجى فلا و1256 لا
انا مستنيك والا تدفع غرامة خمسة وسبعين قرش فورا
واعذرنى انى مش متابع لكن باذن الله راجع بعد العرض

تحياتى وخالص مودتى

الازهرى يقول...

رومانسى الغالى
بس بشرط
القلل تتكسر فى العرض قدامى
مش ورايا بعد ما امشى

مستنيك يا غالى

الازهرى يقول...

فراشتنا الجميلة
اللهم آمين
اللهم آمين

الازهرى يقول...

تامر على
انا حاجات كتير كده
المهم انك تحضر
وسهل تعرفنى هو يعنى فى كام ازهرى فى العرض

اتمنى اقابلك

الازهرى يقول...

د/ليكتر
انا سعيد جدا انك هتيجى
لكن فى تغيير فى الموعد
هيكون 29/3 والتفاصيل الجديدة عندى
واهلا بك انت وكل من تدعوه

الازهرى يقول...

بسنت
انا الخسران
لكن اتمنى نتعرف فى ظروف تانية
تحياتى لاجمل اخت

الازهرى يقول...

مرمر
ليه بس مع ان الكوسة حلوة
وانا لما افوق احل الجملة
واهو الصيف قرب والتلاجة تنفع
وابقى خديها بعد الصيف
اتفقنا ؟

الازهرى يقول...

سفروووووووووووته
رنا يخليكى يارب
وينقذك من ايمى
وباذن الله تقدروا تحضروا

الازهرى يقول...

محمد غاليا
اعمل ايه كل الدنيا على دماغى
لكن مفيش كلام على الميل لانى مطحون ومفيش وقت
اتمنى الاقيك تانى

الازهرى يقول...

سارة جبالى
وبعدين بقى
كده عشاق الشيكولاته زادوا
انا خلاص فلست
روحوا اشوف ايامكم كلها حلوة
وخيرها فى غيرها

الازهرى يقول...

لحظة تأمل
ياااااااااارب تقدرى
وانا كتبت العنوان من جديد
صحيح هو اصعب من الاول فى رأيي لكن انتم عايزين كده
وكمان فى تغيير فى الميعاد

الازهرى يقول...

صدى الصمت
انا نفسى اعرف العنوان مش عاجبكم فى ايه ؟
على العموم انا غيرته وكمان الميعاد اتغير
كانوا كتير قرروا ينتحروا لانهم كانوا مش حاضرين كتير قوى
لكن كلام فى سرك انا مستعد اديكى كارت علشان تقدرى تدخلى بيه اى اطفال تبعك
لكن طبعا ممنوع حد تانى يعرف
اتفقنا ؟

الازهرى يقول...

الحاجة شموسة
انا ممستنى وباتشوى على نار هادية لحد اليوم ما ييجى واقابلكم
وفى تغيير عندى فى الميعاد

وعلى فكرة ايام الثانوى بالنسبة لى احلى

الازهرى يقول...

ايمى الصغنونة قوى قوى قوى

ايوه كده
تشجيعه امال

تحياتى دوما

الازهرى يقول...

ايمى الصغنونة قوى قوى قوى

ايوه كده
تشجيعه امال

تحياتى دوما

الازهرى يقول...

مها زين السياسية المخضرمة

التشجيع حلو برضه

انا برضه المفترى وباخد كل حاجة ؟
الله يسامحك
والتاريخ يثبت

الازهرى يقول...

جى جى

يااااارب
ربنا يخليلى كل اخواتى

الازهرى يقول...

ضد ضد ضد ضد
لالالالالالا
انا كنت باجرب الاسم حاسس انى من زمان مش قلته
خايف يصدى
انا غيرت العنوان حسب الاوامر

وما زال الاستثناء جاريا هه بس

الازهرى يقول...

آدم المصرى

السلام وصل طبعا وما زلت فى انتظارك على احر من الثلج
تحياتى دوما

الازهرى يقول...

اريجينال هارت
ليكى عندى كارت بلانش تقدرى تدخلى بيه اطفال من اى سن
انا تحت امرك دايما

وكمان فى تغيير فى الميعاد تلااقيه عندى
مع العنوان الجديد
وطبعا تعذرينى على عدم المتابعة
تحياتى دوما

الازهرى يقول...

منى
انا موافق ومن عينى
لكن فى الاجازة ان شاء الله
لاننا جميعا فى قمة الارهاق من تواجد العرض مع الدراسة مع امور اخرى

الازهرى يقول...

فشكولنا الغالى
يعنى الخميس مش عاجب
نجيبه وسط الاسبوع مشغول
انا خلاص ناقص دقيقتين واقرر افجر المسرح بالفرقة
حلهالى انت با عم
والا يعنى علشان مفتش عام خلاص تسيبنا وتمشى
لالالالا كده تخلينى افتكر انك منوفى ولا حاجة لا سمح الله


العرض باذن الله الساعة 6
اتمنى نتقابل لكن طبعا من غير ما يكون فى مشقة او تعب من اى نوع ومن ناحية انا هألبس ايه مش عارف لكن تلاقينى فى اخر المسرحية واقف وعلى وشى غضب ربنا كده لله فى لله
اعمل ايه فى المخرج بيحبنى جدا وبيدينى الادوار الحلوة

fashkool يقول...

شوف يا ازهرى بك
انا ان شاء الله يوم الاحد ح اروح الساعه 2 او 3 بعد الضهر المكان اللى انت وصفته ده عند جريدة الاهرام عند جماعة الرواد رقم واحد شارع الترعه البولاقيه متفرع من شارع الجلاء خلف مجمع محاكم الجلاء ز.. والله دى وصفه هايله ودى وصفه سهله والايميل بتاعى آهه..........
salahabozid@hotmail.com
عشان نتفق ازاى اقابلك وعلى فكره تلاقى راجل عجوز وطويل زى النخله كدا وشايل شنطه ... اهو دا يبقى انا.....

الازهرى يقول...

فشكولنا الغالى
سعيد جدا جدا جدا جدا انى اتعرفت عليك
انا اخر الراحة بالنسبة لى النهاردة باذن الله نتقابل على خير
وانا مستنى انك تتولى الدعاية والاعلان للعرض والحساب فى الاخر يجمع
عايز بقى انوار ويفط وتنتخبوا مين وحاجات كتيرة كده

fashkool يقول...

طب يا ازهرى حاعمل اللى بتقول عليه يا طويل

عصفور مهاجر يقول...

طبعا ...تزعل لو بصيت لتحت شويه كنت لقيت عصفور بيشأشأ ويرفرف ويسأف انك وصلت ...ووووووووووواااااااااسسسسسسسسعععععع يا جدع...الأزهري وصل.

PrInCeSS BeRy يقول...

ازيك يا عثللللللللللل بزمتك انا مبسالش عليك يا وحش انت انت لما غبت سالت عليك كتير شوف البوستاااااااااات عامل اية ربنا يوفقك يارب بجد انت تستاهل كل خير وهتكسر الدنياااااااااااااا ان شاء الله يا جميل متتاخرششششششششش

ماما أمولة يقول...

ازيك يا ازهري

ربنا يوفقك يارب

انا بعيد قوي عنك لو كنت في القاهرة كنت جيت

تتعوض ان شاء الله

ربنا معاك

وياريت على رأي اكون او لا اكون حد يسجل ولو جزء علشان نشارككم

سلام وربنا ييسرلك امورك

ايوشة يقول...

بالتوفيق ان شاء الله
كان نفسى احضر انا بحب العروض المسرحية جدااااااااااا
بس ازاى وانا فى اخر بلاد المسلمين
اهئ اهئ اهئ

mohamed ghalia يقول...

بالتوفيق ياعمنا

mahasen saber يقول...

برضه يوم احد يوم احد يوم احد ماله اخر الاسبوع بس ماله

rovy يقول...

السلام عليكم
ازيك يا ازهرى ,, ربنا يوفقك يارب
و مبرووك مقدما نجاح المسرحيه
انا مكسوفه من نفسى جدااا انى اتأخرت جدااا فى تهنئتك .. معلش و كمان كان نفسى احضر بس ده صعب جدا لانى من اسكندريه و اكيد انت حتعذرنى

المهم الف مبرووك و ربنا يوفقك يارب

ارق تحياتى

kochia يقول...

رغم اني غالبا مش هعرف اجي بس متشوقة لليوم كاني هشوف
بس هسمع طبعا التعليقات عن الموضوع

بالتوفيق ان شاء الله

dr.lecter يقول...

ياااادي النيلله

ايه الحظ ده بس

وايه دخل الامن بده كله


لاحول ولا قوه الا بالله

saragebaly يقول...

خير

ان شاء الله خير

وعسى ان تكرهوا شيئا وهو خير لكم

ماما أمولة يقول...

وعسى ان تكرهوا شيئا وهو خير لكم

متزعلش يا ازهري

الحمد لله على كل حال

لحظة تأمل يقول...

صديقى الازهرى

زعلت قوى بجد لانى كمان كنت رتبت انى هاجى (بس اوعى تقول وشى وحش :)

بس ولا يهمك .. قدر الله وما شاء فعل
وكفاية انكم تعبتوا عشان تقدموا حاجة جميلة

وثق ان الغد افضل ان شاء الله :)

دمت بكل خير

rovy يقول...

اخى العزيز ارجو ان لا تحزن
قدر الله و ما شاء فعل
ان شاء الله تتعوض و من يعلم عسى ان تكرهوا شيئا و هو خيرا لكم ..
ربنا يعوضك خير و تحقق كل احلامك يا رب

تحياتى

الحقيقه المصريه يقول...

ياريت تيجي وتزور
الحقيقه المصريه
وتشوف احنا وصلنا لايه
عمالين كماشه عليا يا باشا
لكن ربنا معانا ان شاء الله
http://elhakika.blogspot.com/

سفروتة يقول...

امممممممممممممممممممممممممممممممم
ايه الناس دي
معلش قدر الله وماشاء فعل
كل تأخيرة وفيها خيرة
بس عارف جه في وقته لاني كنت عايزة اجي بس الدكتور ميحلالوش انه يعملنا امتحان الا يوم الاحد وفي نفس ميعاد العرض بتاع المسرحية
يارب بس الميعاد الجديد يكون كويس وميبقاش فيه امتحانات


دمت بكل ود
:)

maha zein يقول...

قدر الله و ما شاء فعل
ده مركز الساحل حلو ان شاء الله
ده علي فكرة كده ممكن ابقه اقدر اجي مثلا لو الميعاد كويس وبدري

ده اصلا الساحل دي جنبنا شوية
يعني اسمع انها قريبة
وحلوة متخفش
ده حتي فيها مستشفي الساحل

يلا نصيبك وكله خير
يا عالم يمكن فعلا المسرح التاني كان ولع
حاك هي موضة
وانت عارف اعداء النجاح كتييييييييييييييييييير
واللى عوزين يولعوا المسرح بلي فيه اكتر

واخدلي بالك
واحد ذي رومانسي كان ما صدق يطلع احقاده الدفينه بقه

ربنا يحفظنا
كله خير
الجاي احسن ان شاء الله

roody hanem يقول...

رغم انى مكنش هينفع اجى خالص لانى فى اسكندريه اصلا بس كنت متشوقه للصور والتفاصيل

بس كل تأخيره وفيها خيره وان شاء الله المكان والمعاد التانيين يكونوا افضل بكتير من الاول

متزعلش بقى

ومستنين العرض قريبااا (:

شمس النهار يقول...

معلش كل تأخيره وفيها خيره
بس المهم يعملوا المهرجان وتعبكم مايروحش كده
ابقا قول الموعد الجديد
واحنا مستنين يا ازهري باشا

kochia يقول...

يا سيدي ان شاء الله كل تاخيرة وفيها خيرة علي راي المثل
وان شاء الله يكون خير ولعل النجاح ان شاء الله يكون في العرض الذي حدد اله موعده

ومازلت متشوقة ايضا لتفاصيل العرض عندما يعرض ان شاء الله

تحياتي

منى يقول...

ولا يهمك
اكيد خير
استغل الوقت ده بقى فى المذاكره
لحد لما الميعاد الجديد يبان
وربنا يوفقك دايما

fashkool يقول...

ما علهش يا ازهرى
خيرها فى غيرها
هما كدا
يبوظوا كل حاجه حلوه
ويخلوا لنا كل حاجه وحشه
الامن والامان قال
الامن بس
اما الامان فدا لهم مش لينا
تحياتى

mahasen saber يقول...

قدر الله وما شاء فعل

لعله خير يا زهرى

ولااا يهمك

وفى العرض القادم اكيد هحضر ان شاء الله بس خليها خميس ربنا يصلح حالك

بس مره كمان ولاا يهمك ولاا تزعل نفسك يا فنان

ABOALI يقول...

ايه يا ازهرى

مختفى ليه
اوعى تكون بتمثل المسرحية فى طره ولا ابو زعبل
ازعل اقوووووووووووى
مال مين هايجيب الساقع والسخن

يلا كده
اكتب حاجة خلينا نطمئن
حتى لو تكتب الكود السرى بتاعك


منتظر

rovy يقول...

فينك يا ازهرى ؟؟
جيت اطمن عليك .. اخبارك ايه ؟

يارب تكون بكل خير

ياريت تطمنا عليك ..

الازهرى يقول...

فشكول
انا زعلن
صحيح هو اتلغى لكن برضه

الازهرى يقول...

عصفورنا المهاجر
الف حمد لله على سلامتك عارف انى مقصر
لكن باذن الله راجع من تانى

الازهرى يقول...

بيرى
اهى الدنيا اتكسرت من غير اى حاجة
الحمد لله على كل حال

الازهرى يقول...

ماما امولة
يا فرحة ما تمت خدها الامن وطار
لكن باذن الله لو العرض اكتمل اصوره وانشره

الازهرى يقول...

ايوشة
بسيطة
غيرى محل الاقامة

الازهرى يقول...

محمد غاليا
دعواتكم معانا

الازهرى يقول...

محاسن
اهو اتلغى خالص
لكن صدقينى يوم الخميس بيكون عذاب بالنسبة لسفر الاقاليم

الازهرى يقول...

ام مريم
انتى من اسكندرية ؟
انا لسه راجع من هناك
وباذن الله عندى عرض بعد فتره هناك ممكن ابقى اكتب عنه

الازهرى يقول...

كوشيا
بس يا رب العرض يطلع

الازهرى يقول...

د/ليكتر

لله الامر من قبل ومن بعد
انا كمان بأسأل السؤال ه

الازهرى يقول...

سارة جبالى
الحمد لله على كل حال

الازهرى يقول...

ماما امولة
لله الحمد من قبل ومن بعد

الازهرى يقول...

لحظة تأمل
باذن الله العض يتحدد له مكان وميعاد تانى
يا رب يناسبكم
واقدر اقابلكم

الازهرى يقول...

روفى

ربنا يسهل ونقدر نعمل حاجة
والعرض يطلع فى النهاية

الازهرى يقول...

الحقيقة المصرية

باذن الله اقدر ازروك عن قريب

الازهرى يقول...

سفروته
اكيد انتى اللى دعيتى ان العرض يتأخر

على كل حال باذن الله الميعاد الجديد ان اتحدد يناسب الكل

الازهرى يقول...

مها زين

يا نهار ابيض كل ده ان جواكى دا انا بقى شرير كبير قوى علشان تشيلى منى كل ده

على العموم يا رب بس ترسى على الساحل
بس المهم العرض يطلع
صعب جدا ناى اقبلل ان التعب بتاع الناس معايا يروح هدر
اخبار الرسالة ايه ؟

الازهرى يقول...

رودى هانم

انا عارف والله
بالمناسبة كنت فى اسكندرية وشفت كرم الزيارة على اصوله

الازهرى يقول...

الحاجة شموسة
يا رب
انا خايف على تعب الناس معايا يروح بلاش هيزعلوا كتير

الازهرى يقول...

كوشيا

المهم انه يعرض
والباقى على الله

الازهرى يقول...

منى

ادينا بنحاول
لكن صعب الذهن برضه مشغول

الازهرى يقول...

فشكول
والحل يا عمنا
هنفضل كده كتير ساكتين

الازهرى يقول...

محاسن
يا دى الخميس
ما علينا
خميس خميس
المهم العرض يطلع

الازهرى يقول...

ابوعلى

شكلها هترسى على كده بس انت ادعى

الازهرى يقول...

روفى

انا الحمد لله رجعت
لكن طبعا محتاج وقت على ما اقدر ازور الكل

شكرا على سؤالك عنى المتوقع منك
والذى يخلق بداخلى امتنانا عميقا للاخوة بيننا