عودة من جديد

رجعت لكم يا بشر

تنبيه هام جدا جدا وعاجل

وانتصرنا 

انتصرنا 

انتصرنا 

أنا نجحت يا بشر وبقى معايا 

 3 دان شيتوكان 

واللى مش فاهم يعنى إيه مش هأتعب قلبى معاه 

انا فرحان ورايق 

عنده جوجل يعرفه 

أو يرجع لى الأسبوع الجاى وأفهمه على رواقة 

وطبعا شكر خاص لللمساندة الجبارة من عدة شخصيات على طول الأسبوع الماضى على التشجيع 

وأخص بالذكر من حضر معى الدورة والتمرين النهائى بالأمس 

كما أخص بمحبة بلا حدود لمن حضر معى اختبار اليوم 

وكان معى لحظة إعلان النتيجة 

وشاركنى فرحة الفوز 

ومن هذا المنبر بأحذر كل عضوات الجمعية 

بقى معايا وبشكل مفتوح

تصريح بالقتل 

على رأى الرواية المشهورة بتاعت جيمس بوند 

وكل واحدة تتلم وتخلى بالها من نفسها 

أحسن لها 

يوم ممتع

بعد الشيكولاتة البلجيكى الرائعة النهاردة 

كان لازم أغفر وأسامح على كل الأخطاء السابقة

ويمكن خطأين تلاتة جايين كمان 

بجد رائعة 

أنا صورتها بالتليفون ورفعت كل الصور

علشان مش عارف هيطلعوا حلوين ولا نص كم 

عجبتنى

وعجبنى اللى كتبها

ودخلت نغاشيش قلبى من جوه

عزيزتي المرأه التي تطالب بالمساواه عايز اسألك سؤال : .. .. .. .. .. .. .. .. اذا كان الدلع ليكى من و انتي صغيره وكل الهنا ليكى و انتي كبيره و دراستك على اخوكي و ابوكي و معندكيش جيش ولما نفتح الوظائف فى الجرايد بنلاقي تاء التأنيث مالية الصفحه وبعد الجواز مصاريفك على جوزك حتى جل الشعر الي بيستخدمه الشباب مكتوب سرحي شعرك و في اتفاقيات دوليه لحقوق المرأه و فى العيد انتى اول حاجة بيفكروا فيها و لو زعلتى ولا اتقمصتيلك شوية بيراضوكي و التاكسي بيوقفلك انتى مابيوقفش للشباب وبعد ده كلوووو تقولي مساواه مساووااااه مين ياللي تنشكي ف بطنك

وعجبي

شكر ولخبطة

ورجعنا من جديد والحمد ، طبعا كان المفروض أبدأ بالكلام ده لكن الظروف اللى كانت موجودة فى البلد شغلتنا كلنا ، الحمد لله الغياب كان لخير طبعا الكل عارف فترة ما بعد الجيش وترتيب الأوضاع من جديد وكمان كان فى مشاكل فى أرض الجبل بتاعت اعمامى وتم استدعائى كخبير قديم وراجل من المطاريد المتمرسين للتعامل مع الأزمة وتم حلها بأغرب طريقة ممكنة حتى أنا ما صدقتش لما ده حصل ، طبعا نخلى الكلام ده لبعدين فى حكايات منفصلة .

طبعا لازم أوجه الشكر لكل اللى سأل عنى وعلى رأسهم أختين يعلم ربنا قربهم لقلبى ومكانتهم عندى ححتى من قبل السؤال ودا لإنهم فعلا من الشخصيات الصادقة جدا جدا جدا ، بأشكر لحظة تأمل ( اللى أقول لها كل سنة وانت طيبة على عيد ميلادك اللى عدى وأنا مشغول ) وفاتيما على سؤالهم وتعليقاتهم اللى كتير أسعدتنى وخلتنى طرت من الفرح ومست قلبى كتيييييييييييييييييييييير ، طبعا مش هنتكلم عن النيات فى الموضوع لإن كل واحد ونيته ، فى ناس كانت بتسأل عنى علشان عايزينى أرجع وقلقانين على وفى محبة لله بين وبينهم ، وفى ناس تانية كانوا بيسألوا علشان يتأكدوا إن انا رحت فى أى مصيبة ولا فى الروح وممكن أرجع أنكد عليهم وأفضح الجميعة الخايبة بتاعتهم وأكشفهم على الملأ ، وطبعا لا داعى لذكر الأسماء وكل واحد عارف نفسه كويس جدا جدا جدا جدا جدا جدا جدا جدا جدا برضه .

ما علينا وخلى الطيب أحسن وإنت الكبير يا ابنى برض ولازم يبقى قلبك واسع وتسامح .
أما أبو على فله شكر خاص على متابعته لى خلال افترة الى فاتت بالتليفون ، ومكانته فى قلبى هو أعلم الناس بها .

إمبارح بعد ما خلصنا تنضيف فى التحرير وحقيقي كان المشهد أكتر من رائع والعدد أكبر مما كنت متخيل أسعدنى إنى ألاقى بره التحرير برضه ناس كانت بتنضف وتزيل آثار الأحداث فى أكتر من مكان داخل القاهرة والجيزة ، حقيقي كان المشهد أكتر من رائع وحسيت فعلا إن المعدن الأصيل رجع من تانى يلمع ، بس المهم لازم نحافظ على الوضع ده ونحسنه ، يعنى مش يبى يوم وعدى خلاص وكلواحد يروح لحاله ، خلاص الثورة والحمد لله وصلت لوضع جميل جدا ، لكن المرحلة الجديدة بدأت وهى مرحلة البناء ودى أصعب وأشق ألف مرة ، المجالات كتير وفى كل مكان محتاجين ناس مخلصين الوضع مش هيتحسن لوحده لله فى لله وبرضه مش فى يوم وليلة ، عجبنى جدا مبادرة إنقاذ البنوك والبورصة المصرية هتلاقوا تفاصيلها فى فى الفارس الأخير و بنت خيخة وأى كلام اللى هى أصلا مش خيخة وأجدع من ناس كتير بس خايفة من الحسد ، وغيرها من المواقع والجروبات على النت أنا مش فاضى أفضل أحط فى لنكات خلى عندكم نشاط ودوروا بنفسكم يا باى على الكسل ، وأنا ناقشت ناس كتير فيها وأنا بأتنقل امبارح وكتير من الشعب رحب بس مش عارفين التفاصيل فياريت الكل ينشرها فى نطاق تواجده .

الحاجة بقى اللى حزت فى نفسى وسط كل ده هى أمى تخيلوا وسط كل ده والبلد مقلوبة ورحت لها بالليل وهى عند أختى وفوجئت إنهم حاطين راسهم فى راس بعض وهات يا مؤامرات ضدى ومسكونى فى النص وإنت يا ابنى كبرت وقربت تعجز ، وشعرك طاروحالتك بقت صعبة ولازم تتصرف وتخطب بسرعة قبل ما الموضوع يخرج من إيدك ،ويبقى فى رجلك والكلام الثورى اللى باالكم منه ده ، وأنا بأسمع وعمال أدعى على نفسى وعلى اللحظة اللى قررت إنى آجى فيها المكان ده ، وسط كل ده كانت واحدة زميلة أختى قاعدة فسألتنى بهدوء : هو إنت شروطك إيه بس فى العروسة ؟ فرديت علها أنا مفيش عندى غير شرط واحد بس ( تكون بتفهم ) وعنها ولقيت الناس كلها سابتنى وقامت وباين عليهم اليأس وزوج أختى لما كنا نازلين قال لى : يا ابنى خدها نصيحة من أخ قديم شرطك صعب وكده إنت مش هتتجوز ولو بعد ألف مليون سنة .

الحمد لله عدينا من المطب وحطينا شرط جامد على ما يقدروا يحققوه ( ودا أشك إنه يحصل فى وقت قريب ) يكون الواحد أخد نفسه ودبر حاله ، ولله الأمر من قبل ومن بعد .

الصورة من مدونة الكيت كات