من ابتغى رضى الناس بسخط الله ، سخط الله عليه وأسخط عليه الناس
مكملين يا ليل حزين
مكملين رغم الأنين
مكملين والصبح باين
من وشوش الكادحين
مكملين والظلم رايح
مكملين والقهر جارح
مكملين والنفس تايهة
بين دروب المقهورين
مكملين والصبر نار
مكملين رغم الدمار
مكملين والقمرة واخدة
الطريق للإنتحار
مكملين والشمس ساطعة
مكملين وقلوبنا واسعة
مكملين والموت صديقنا
والألم رقصة حنين
أسوأ كابوس بيواجهنى من سنين إنى أموت فى غربة ، فى مكان انا مش معروف فيه ، إنى اكون فى اللحظة دى لوحدى .
من سنين كانت النبوءة، كنا أول مرة نتقابل ، لمحت فى عينيها دموع محبوسة ، قربت منى وقالت لى : إنت زى عظيم عندكم .
يومها استغربت جدا ، والأغرب إنها مشيت من غير ما تفسر ، لكن لما اتقابلنا مرات تانية ومع الوقت فهمت هى تقصد مين ، أبو ذر ، يمشى وحيدا ويموت وحيدا .
مع الوقت قالت لى على حاجات كتير عن حياتها ، وعن خيباتها ، كان لها معايا خمس نبوءات ، اتحقق منها أربعة .
منها النبوءة دى ، الوحدة .
المشى لوحدى كان مش بطال ، لكن دايما خوفى كان من اللحظة الأخيرة ، إنك تكون لوحدك ، مفيش ايد تطبطب عليك ، تحضنك ، تشيلك مرة أخيرة، وتدعى لك .
النهاردة عرفت انها مشيت فى رحلتها الأخيرة ، ووصلت للنهاية من شهور قليلة ، كانت لوحدها ، فى بلاد غريبة .
سيناريوهات كتير مرعبة جت فى دماغى عنها ، وعن السنين إللى فرقتنا ، لا عارف هى كانت فين ولا إيه حصل معاها، على الرغم من انى دورت كتير ، لكن كل ده كوم ، وأنها كانت لوحدها فى اللحظة الأخيرة كوم تانى بالنسبة .
هنتلاقى... وبيننا كلام كتير بإذن الله تعالى
..............
قالت عرافة قريتنا : يوما ستكون وحيدا ، وسترحل كى تلقى الصحبة .
